1 *Akema Yekọb amaakaa uwa amọ, ndin mme enyere Abasi emaesoobo ye anye. 2 Ke ini Yekọb akekịtte ammọ, anye amaabo, "Ami ado itie mbono Abasi!" Ndin anye amaanọ itie ado anyịñ Mahanaim.*

3 Yekọb amaasio mme isʌñutom ebem anye iso ekekịt ayịneka amọ Isọ ke isọñ Sei, ke idịd Edọm. 4 Anye amaanọ ammọ item ate, "Ami ado se ana nte ndufo edọkkọ abọọñ mmi Isọ: ‘Awo mfo Yekọb abo ate, ami ñkedʌñ ye Leban mmenyʌñ ntie ke udo ñkpeene tutu idahami. 5 Mmenie mme enañ, mme dọñki, mme edọñ ye mme ebod, ñkọrọ nditọufọk ideen ye ibaan. Idahami ndọñ utom ami nnọ abọọñ mmi, nọ ñkịt mfọn ke iso mfo.’ "

6 Ke ini mme isʌñutom eketịmmeke ebịne Yekọb, ammọ emaebo, "Ñnyịn imaikaa ikikịt ayịneka mfo Isọ ndin idahami anye asʌk adi adusoobo fiin, ndin ideen ikie inaañ esaña ye anye."

7 Ke ataa ekamba ndịk ye nnananyen Yekọb amaabakka mme awo se ikiba ye anye ke ikpeghe iba, ye udịmedọñ ye ebod ye udịmenañ ye kamel ke ukem usʌñ ado. 8 Anye akekere abo, "Adieke Isọ adiighe adinwana ikpeghe keed, ikpeghe andisʌhọ akeme adibọkkọ."

9 Akema Yekọb amaabọñ akam abo, "O Abasi ete mmi Ebraham, Abasi ete mmi Aisik, Abọọñ, afo a-akembooho miin ate, ‘Tịmme nyọñ abio mfo ye ufọk emana mfo, ndin ami ñyaanam afo aforo,’ 10 ami ndotto adibọ ukeed mfọn a-afo añwọttọ miin ayịnufọk mfo. Esañ mmi kpọd ke ñkekama idaha a-ami ñkekaañake Yọdan ami, ado idahami ami mmekappa ndo atu mboho iba. 11 Ami mmubeeñe, ñnyaaña miin sio ke ubọk ayịneka mmi Isọ, sia ndịk annam miin ke anye ayaadi adinnọmọ miin, akọrọ ye mme eka ye nditọ ammọ. 12 Ado afo amebo ate, ‘Ke akpanikọ ami ñyaanam afo anekke aforo, ñnyʌñ nnam ubon mfo atie nte ntan ke mben akpainyañ, a-awo imiikanna adibat.’ "

13 Yekọb amaadaiya ke akonayio ado ke itie ado, ndin ke atu mme ñkpọ se anye akenie anye amaasio enọ anịm anọ ayịneka amọ Isọ: 14 Ebod ikie iba ye akpoebod edịb, umanedọñ ikie iba ye akukịmedọñ edịb, 15 uman kamel edịb mme duob ye mme ñyịn ammọ, umanenañ aba ye ñyaaraenañ duob, ye uman dọñki edịb ye ñyaara dọñki duob. 16 Ndin anye amaayaak ammọ asịn nditọufọk amọ ke ubọk, udịmedọñ keedekeed ke idem amọ, anyʌñ adọkkọ nditọufọk amọ abo, "Imbem miin iso ikaa, inyʌñ inịm ufañ ke ufọọd mme udịmenañ."

17 Anye amaatemme andikiboiyo iso ate, "Ke ini ayịneka mmi Isọ amaadusịme fiin anyʌñ ubịp, ‘Anie awo inie ndufo, ndufo enyʌñ ekaiya uke, anie anyʌñ anie afịd mme ufene ami ke iso ndufo?’ 18 Afo ayaabọọrọ ate, ‘Ado Yekọb awo mfo anie ammọ. Ammọ edoñño mme enọ e-enọọhọ esọk abọọñ mmi Isọ, ndin anye asʌk adi ke edem ñnyịn.’ "

19 Anye amaanyʌñ atemme ayọhọ awo iba, ayọhọ ita ye afịd se ikikeene mme udịmenañ: "Ana ndufo etañ ukem ikọ ami enọ Isọ ke ini esooboke ye anye. 20 Inyʌñ ikịt ke emetañ ebo, ‘Awo mfo Yekọb asʌk adi ke edem ñnyịn.’ " Sia anye akekereke abo, "Ami ñyaanam anye anekke iso ye ami ke mme enọ a-ami nnọọhọ nọ ambem miin iso; amaakem, ke ini ami mmaakịt anye, akemeido anye ayandaara miin." 21 Ndin mme enọ Yekọb emaeboiyo iso, ado anye ke idem amọ amaanaa adaiya ke akonayio ado ke itie nnaa.

22 Ke akonayio ado Yekọb amaadakka ada anyʌñ adat naña ibaan amọ iba, nditọufọk amọ ibaan iba ye nditọ ideen amọ duob mme keed anyʌñ akaaña idịm Yabọk. 23 Ke anye amaakenam ammọ ekaaña idịm ado, anye amaanọ afịd inie amọ eboiyo. 24 Ke ntoro Yekọb akeba ikpọọñ, ndin awodeen keed amaanwana ye anye tutu ayio asiere. 25 Ke ini awo ami akekịtte ke imọ ikanna anye ubọk, anye amaatuak akpọ akikoi Yekọb ndin akpọ ifʌkkọ amọ amaafekke ke ini anye akenwanake ye awo ado. 26 Akema awo ado amaabo, "Nsaana miin yaak nọ ñnyọñ, sia ayio asiere."

Ado Yekọb amaabọọrọ anye ate, "Ami nduuyaaha fiin tutu afo andiọñ miin."

27 Awo ado amaabịp anye ate, "Afo akere die?"

Anye amaabọọrọ ate, "Yekọb."

28 Akema awo ado amaabo, "Anyịñ mfo idiidooho aba Yekọb, ado Isrel,* sia afo amenwana ye Abasi ye mme awo ndin amenyʌñ akan."

29 Yekọb amaabo anye, "Mbọk ndọkkọ miin anyịñ mfo."

Ado anye amaabọọrọ, "Nsoo ido ntak a-afo ambịppe miin anyịñ mmi?" Akema anye amaadiọñ anye ke itie ado.

30 Ndin Yekọb amaanọ itie ado anyịñ Peniel,* abo, "Sia ami mmaakịt Abasi iso ye iso, ado esaana uwem mmi eyaak."

31 Utịn amaasakka ke ini anye akeboiyoke Peniel,* ndien anye akekpọkpọi ke ntak akikoi amọ. 32 Ke ntom tutu usen mfịn ami nditọ Isrel itaaha asịb unam a-adianake ke akpọ akikoi ifʌkkọ, sia emaenọmọ asịb a-akpereke akpọ akikoi Yekọb.