1 Akema Yekọb amaakoot nditọ amọ anyʌñ abo ammọ: "Ida ikanna nọ ntañ inọ ndufo se idiitịppe inọ ndufo ke ini iso.

2 "Ida ikanna inyʌñ ikpañ utọñ, ndufo nditọ Yekọb;

ikpañ utọñ inọ ete ndufo Isrel.

3 "Rubịn, afo ado akpan mmi,

adudu mmi, akpa idiọọñọ adudu mmi,

ñwuọnda ke ukpono, ñwuọnda ke inweek.

4 Ntʌkko-ntʌkko nte mmọọñ, afo uduuwuọhọ uda aba,

sia afo amaadọọk ikʌk ete mfo,

adọọk anyọñ mbịd mmi akesappa.

5 "Simiọn ye Lifai edoñño nditọeka;

akañkañ ammọ edo ñkpọ ekọñ afai.

6 Ami ndiidʌkkọ esob ammọ,

yak ami ñkuuwana ke mbono ammọ,

sia ammọ ekewotto mme awo ke iyadesịd ammọ,

enyʌñ ekpok asịb ekpaha abaakenañ naña ammọ emama.

7 Adọdiọọk anọ iyadesịd ammọ, sia a-afiop ataa eti-eti,

ye ifiobesịd ammọ, sia adooho afai!

Ami ñyaasuan ammọ ke Yekọb,

ñnyʌñ nsuan ammọ ke Isrel.

8 "Yuda,* nditọete mfo eyautooro fiin;

ubọk mfo ayaafiik itọñ mme asua mfo;

nditọ ete mfo eyaetuak iwuod unọ fiin.

9 Yuda, afo ado ñyịn ekpe,

ayịn mmi, afo amenyọñ adiyem ndidia.

Nte ekpe anye a-asọrọ anyʌñ asuuk anaa,

nte uman ekpe, anie idedei adibịmme anye?

10 Esañ ubọọñ idiikpọññọ Yuda,

esañ ukara idiinyʌññọ ikpọñ ñkpatiañ ukod amọ,

tutu awo se inie anye adi,

ndin ñkobitem mme idịd ayaado ake amọ.

11 Anye ayaayịt dọñki amọ ke fain,

ayịt abaak enañmbakara amọ ke eti ñkọk eto;

anye ayaakama wain ayet mme afọñ amọ,

ayet mme afọñidem amọ ke iyiib kreb.

12 Anyen amọ ayaayiibe akan wain,

eded amọ asaana akan mmọọñeba.

13 "Sebulọn adiidʌñ ke mben akpainyañ,

anyʌñ ado itie mbeghe ubom;

adaña amọ ayaaben akaa Sidọn.

14 "Isaka ado asọñ idem dọñki,

a-anaaha ke mme abaedọñ.

15 Ke ini anye akịtte naña itie nduọkadudu amọ afọn,

ye naña isọñ amọ anem,

anye ayaanyuuk afara amọ anọ mbiomo,

anyʌñ ayaak idem anọ utom ifʌn.

16 "Daan* ayaanọ mbon amọ unenikpe,

nte keed ke atu mme esiin ke Isrel.

17 Daan adiido udʌkikọd ke mben usʌñ,

ibọm ke akpọusʌñ,

a-adommo enañmbakara itịghitịghi,

nọ andiwad anye adooro aduọ ebeek.

18 "Ami ñyem adinyaaña mfo, Abọọñ.

19 "Udịm mbon amauke eyaenwana ye Kad,*

ado anye ayaanwana afiik ammọ ke itịghitịghi.

20 "Ndidia Asaa adiido ndiin;

anye ayaanọ inem ndidia a-adotto ye adidem.

21 "Naftali ado uman edob, e-ekpọkkọ eyaak

a-amanna mfọọn nditọ.

22 "Yosef* ado eti uduud fain,

eti uduud fain a-adaaha ke mben idịm,

ake mme ñkọk amọ ebiọkkọ edọọk ndibene.

23 Ke idiọọkesịd mbon utịgha emaenwana ye anye;

ammọ emaetịgha anye ke idañ ke usua.

24 Ado utịgha amọ ada inyeeñeke,

adudu ubọk amọ a-asọñ ada,

sia atooho ubọk Akpọsọñ Abasi Yekọb,

sia atooho Akpemeedọñ, a-adooho Itiad Isrel,

25 ke ntak Abasi ete mfo, u-unwamma fiin,

ke ntak Andikponñkan*, u-udiọññọ fiin,

ye mme adidiọñ e-etooho ikpaanyọñ,

mme adidiọñ e-ebaaha ke esịd idịm ke idak isọñ,

mme adidiọñ e-etooho eba ye ntʌñidịb.

26 Mme adidiọñ ete mfo e-ekpon,

ekan mme adidiọñ ñkaan ikpọabod,

ekan mme uwak ñkpọ e-etooho ñkaan abod.

Yak afịd ami adoro Yosef ke iwuod,

anye a-adooho adaiso ke atu nditọete amọ.

27 "Benyamin ado ewaikọd;

ke ubakusen anye awai se akemʌm ata,

ke ndubiayio anye adeeme mbịme."

28 Afịd ami ado esiin Isrel duob mme iba, ndin ami ado se ete ammọ aketañ anọ ammọ ke ini anye akediọññọ ammọ, anyʌñ anọ keedekeed adidiọñ a-adotto ye anye.

29 Ndin Yekọb amaanọ ammọ mme item ami: "Akpere ini ami adikiba ye mme aduuk mmi. Imbuuk miin ye mme ete mmi ke abaitiad ke inwañ Efrọn mbon Hed, 30 abaitiad ke inwañ Makpela, a-akpereke Mamre ke Kenan, ake Ebraham akedeppe adian ye inwañ ato Efrọn a-aketooho Hed nte itie ubuuk akpo. 31 Ke itie ado ke ekebuuk Ebraham ye anwaan amọ Sera, ke ndo ke ekebuuk Aisik ye anwaan amọ Ribeka, kpa ke ndo ke ami ñkebuuk Lia. 32 Ekedep inwañ ado ye abaitiad a-abaaha do eto mbon Hed.*"

33 Ke ini Yekọb amaakekweeñe adinọ nditọ amọ item, anye amaadʌt ukod amọ adịppe adoot ke ñkpana, anweek akpatre inweek, ndin emaeben anye esọk mbon amọ.