1 Ndin Abọọñ amaafọn ido ye Sera, kpa naña anye aketañ; ndin Abọọñ amaanam se anye akenwọñọ anọ Sera. 2 Sera amaayommo idịb anyʌñ aman ayịn awodeen anọ Ebraham ke anye amaakesọñ ke isua, kpa ke ukem ini A-Abasi akenwọñọke anọ anye. 3 Ebraham amaasio ayịn a-Sera akemanna anọ anye Aisik*. 4 Ke ini Aisik ayịn amọ akeyọhọke usen itiaita, Ebraham amaafọọrọ anye edʌd, naña Abasi akebo anye anam. 5 Ebraham akedo isua ikie idaha a-ayịn amọ Aisik akemanake anọ anye.

6 Sera amaabo, "Abasi annọ miin imam nọ nsak, ndin afịd awo e-ekoppo ebaña ñkpọ ami eyaesak ye ami." 7 Anye amaadian do abo, "Anie awo ikpikibo Ebraham ke Sera akpaanie nditọ? Ado ami mmeman ayịn awodeen nnọ anye ke ayio usọñ amọ."

8 Ayịn ado amaakpon enyʌñ efịppe anye ke eba, ndin ke usen e-ekefịppeke Aisik ke eba, Ebraham amaanam ekamba usọrọ. 9 Ndin Sera amaakịt ke ayịn ake Haka a-awo Iyib akemanna anọ Ebraham akesʌk asak. 10 Anye amaabo Ebraham, "Bịne afʌn awonwaan ado ye ayịn awodeen amọ sio, sia ayịn afʌn awonwaan ado idiikemekekeme adiwana udeemeñkpọ adiaakpa ye Aisik ayịn mmi."

11 Ñkpọ ado amaafịna Ebraham eti-eti, sia akebañake ayịn amọ awodeen. 12 Ado Abasi amaabo Ebraham, "Kuunekke ufịna idem ubaña etəkayịn awodeen ado ye afʌn awonwaan mfo. Kpañ utọñ kop se Sera atañ unọọ fiin, sia adiito ke Aisik ke ubon mfo adiisakka. 13 Ami ñyaanyʌñ nnam ayịn afʌn awonwaan ado ñko akappa ado idịd sia anye ado mfịd mfo."

14 Ubakusen edem usen Ebraham amaaben ndidia ye mmọọñ ke ekpadikpa anọ Haka. Anye amaadịppe mme ñkpọ ado adot anye ke afara anyʌñ asio anye ye ayịn amọ unyọñ. Anye amaakaa uwa amọ akeyooñ ke Akpautatan Beeseba.

15 Ke mmọọñ a-akesịneke ke ekpadikpa amaakekweeñe, anye amaayaak ayịn anịm ke ikọd keed. 16 Ndin anye amaadakka asaña akaa nsan-nsan akesuuk atie, sia akikere amọ akedo, "Ami ndiikanna ntie nse naña ayịn mmi akpa." Ndin ke anye akesʌkkọ atie do, anye amaatọọñọ adifok.

17 Abasi amaakop naña ayịn ado atua, ndin enyere Abasi amaato ke hefịn akoot Haka anyʌñ abo anye ate, "Haka nsoo ido? Kuunyeñ idem; Abasi a-akop naña ayịn ado atua ke itie a-anye anaaha do. 18 Mʌm ayịn ado ubọk dịppe ke anyọñ, sia ami ñyaanam anye ado ekamba idịd."

19 Abasi amaatat anye anyen ndin anye amaakịt ube mmọọñ. Anye amaadakka akekoi mmọọñ ayọhọ ekpadikpa ado adinọ ayịn amọ nọ anwọñ.

20 Abasi amaaba ye ayịn ado tutu anye akpon. Anye amaadʌñ ke akpautatan anyʌñ akappa atautob. 21 Ke ini anye akesʌkkọ adʌñ ke Akpautatan Paran, eka amọ amaadọ awonwaan Iyib anọ anye.

22 Ke ini ado, Abimelek ye Fikol adaiso ekọñ amọ emaebo Ebraham, "Abasi a-ada ye afo ke afịd ñkpọ se afo anam. 23 Ndin nwọñọ nnọ miin mi ke iso Abasi bo ke imọ idiinamma ñkpọ ye ami me ye nditọ mmi me ubon mmi ke abiaña. Ñwọt miin ye afịd idịd abio mmi a-afo adʌññọ nte asenawo mfọn, kpa naña ami nnam ye afo."

24 Ebraham amaabo, "Ami mmenwọñọ ntoro."

25 Akema Ebraham amaadọkkọ Abimelek abaña ube mmọọñ a-nditọufọk amọ ekebọọhọ anye ke ñkanubọk. 26 Ado Abimelek amaabo, "Ami ndiọọñọke awo a-anamma ñkpọ ami. Afo ukundọkkọke, mfịn ke ñnyʌñ ñkop."

27 Ebraham amaaben udịmedọñ ye udịmenañ asọk Abimelek, ndin ammọ awo iba emaenam edioomo. 28 Ebraham amaasio abaak umanedọñ itiaba ke atu udịmedọñ anịm, 29 ndin Abimelek amaabịp Ebraham ate, "Nsoo ke abaak umanedọñ itiaba a-afo asioho asaña-asaña anịm mi awuọñọ?"

30 Anye amaabọọrọ, "Mbọ miin abaak umanedọñ itiaba ami nte ntiense antooho miin ke ami ñkedọk ube mmọọñ ami."

31 Ado anam ekekoot itie ado Beeseba,* sia ideen iba ado emaenwọñọ unwọñọ do.

32 Ke emaekenam edioomo ema ke Beeseba, Abimelek ye Fikol adaiso ekọñ Abimelek, emaetịmme enyọñ ekaa isọñ mbon Filistia. 33 Ebraham amaatọ eto tamaris ke Beeseba, anyʌñ akoot anyịñ Abọọñ Nsi-nsi Abasi ke ndo. 34 Ndin Ebraham amaadʌñ akpeene ke isọñ mbon Filistia ke anyan ini.