1 Ke ini Yekọb akekoppo ke abakpa a-aba ke Iyib, anye amaabo nditọ ideen amọ, "Nsoo inam ndufo eka iso ese emọ-emọ? 2 Ami mmekop ke abakpa mmọdo ke Iyib. Isọiyọ ikaa do ikidep isọk ñnyịn, mbaak ñnyịn idikpañña."

3 Akema nditọete Yosef awo duob emaesọiyọ ekaa adikidep abakpa ke Iyib. 4 Ado Yekọb ikiyakka Benyamin, ayịneka Yosef akaa ye mbon ñko, sia ndịk amaanam anye ke unọmọ akeme adikisịm anye. 5 Ke ntoro nditọ Isrel emaekeene esịne ke atu mbon e-ekekaaha ekedep abakpa, sia akañ amaasịm isọñ Kenan akọrọ.

6 Idaha ntoro, Yosef akedo adaukara ke Iyib, anyʌñ ado awo a-akenyamma abakpa anọ afịd mbon awo. Ndin ke ini nditọete Yosef ekedisịmme, ammọ emaenyuuk iwuod enọ anye enyʌñ esuuk iso ke isọñ. 7 Yosef akekekịt nditọete amọ, anye amaadiọọñọ ammọ, ado anye amaanam nte imọ ido asenawo, anyʌñ atañ ikọ nduaiya-nduaiya ye ammọ. Anye amaabịp ammọ ate, "Ndufo eto uke?"

Ammọ emaebọọrọ, "Ñnyịn ito isọñ Kenan idi adidep ndidia." 8 Akpesʌkado Yosef amaakediọọñọ nditọete amọ, ammọ ikidiọọñọke anye. 9 Ndin Yosef amaatoiyo mme ndab amọ a-akebañake ammọ, anyʌñ abo ammọ, "Ndufo edoñño mbon uyeb! Ekedi edise naña isọñ ñnyịn aba ye itie se ukpeme imiibaaha."

10 Ammọ emaebọọrọ, "Iyoo, abọọñ mmi. Nditọufọk mfo ekedi adidep ndidia. 11 Afịd ñnyịn idoñño nditọ ete keed. Ñnyịn ido mbon akpanikọ, ñnyịn idoññoke mbon uyeb."

12 Yosef amaabo ammọ, "Iyoo! Ndufo edi edise isọñ ñnyịn itie se ukpeme imiibaaha."

13 Ado ammọ emaebọọrọ ete, "Nditọufọk mfo ekedo nditọete duob mme iba, nditọ e-ete keed abonno, e-edʌññọ ke isọñ Kenan. Andisịb ñkan mmọdo ye ete ñnyịn, keed ibaaha aba."

14 Yosef amaabo ammọ, "Ado kpa se ami ñkidọkkọ ndufo: Ndufo edoñño mbon uyeb! 15 Ndin ntom ke ediidat idomo ndufo ise: Ma uwem Fero, ndufo idiikpọññọ itie ami ibọhọke akpeedem ayịnete ndufo adi mmi. 16 Dọñ keed ke atu ndufo akeben ayịnete ndufo adi; ndufo se isʌhọ eyaesịne ke ñkpakọb, nọ ato do edomo ikọ ndufo ese me se ndufo etañ ado akpanikọ. Adieke imiidooho, ma uwem Fero, ndufo edoñño mbon uyeb!" 17 Ndin anye amaasịn ammọ ke ñkpakọb ke usen ita.

18 Ke ayọhọ usen ita, Yosef amaabo ammọ, "Inam ntom ndin ndufo eyaedu uwem, sia ami mmebaak Abasi: 19 Akpedo ndufo edo mbon akpanikọ, iyaak keed ke atu nditọete ndufo asịne mi ke ufọk ñkpakọb, ke ini ndufo mbon ako ebenne abakpa enyọñ ekenọọ mbon ufọk ndufo e-etieghe abiọọñ. 20 Ado ana nte eben akpeedem ayịnete ndufo ensọk miin, nọ ñkan nduuñọ ikọ ndufo mbaak ndufo idikpañña." Ndin ammọ emaenam naña Yosef akebo.

21 Ammọ emaeneme ye emọ-emọ ete, "Ke akpanikọ imia ñnyịn ufen ke ntak ayịnete ñnyịn. Ñnyịn imaikịt naña anye akebọọ ndutʌhọ ke ini anye akikpeeghe ñnyịn ubọk abaña uwem amọ, ado ñnyịn ikikpañña utọñ; ami ado ntak a-ndutʌhọ ami isịmme ñnyịn."

22 Akema Rubịn amaabọọrọ ammọ ate, "nte ami ñkidọkkọke ndufo mbo ikiinam ayịn ado idiọọk? Ado ndufo ikiyemme ikpañ utọñ! Idahami ana nte ñnyịn ibọ utịb iyiib amọ." 23 Ammọ ikidiọọñọke ke se ammọ eketañ amaanwaña Yosef, sia anye akekamake akappaikọ atañ ikọ ye ammọ.

24 Akema anye amaadakka akpọñ ammọ anyʌñ aketua, ado akema anye amaatịmme adi amaana aditañ ikọ ye ammọ. Anye amaanam emʌm Simiọn esio ke atu ammọ, anyʌñ abọp anye ke iso ammọ.

25 Yosef amaanọ uyio ate edọñ abakpa ke mme ekpad ammọ nọ ayọhọ, etịmme eyaak akʌk ammọ esịn ke ekpad awo keedekeed, enyʌñ enọ ammọ ñkpọ se edia ke usʌñisañ ammọ. Ke emaekenam ami enọ ammọ, 26 ammọ emaedoot abakpa ammọ ke edem dọñki ammọ enyʌñ enyọñọ.

27 Ke itie a-ammọ eketreke ke akonayio adiduọk adudu, awo ammọ keed amaatat ekpad amọ adisio ndidia nnọọ dọñki amọ, ndin anye amaakịt silfa amọ ke inua ekpad amọ. 28 Anye amaadọkkọ nditọete amọ, "Emaetịmme eyaak silfa mmi ennọ. Se anye mi ke esịd ekpad mmi."

Esịd amaakịppe ammọ; ammọ emaenyʌñ ekanna ese emọ-emọ ke ñnyeñidem enyʌñ ebo, "Nsoo ke Abasi anam ye ñnyịn ntom?"

29 Ke ini ammọ emaekenyọñ ebịne ete ammọ Yekọb ke isọñ Kenan, ammọ emaedọkkọ anye afịd se ikitịppe inọ ammọ. Ammọ emaebo, 30 "Awo a-akedooho abọọñ ke idʌñ ado aketañ ikọ ye ñnyịn nduaiya-nduaiya, anyʌñ anam ñkpọ ye ñnyịn nte ikika uyeb ke idʌñ ado. 31 Ado ñnyịn imaidọkkọ anye ibo, ‘Ñnyịn ido mbon akpanikọ; ñnyịn idooho mbon uyeb. 32 Ñnyịn ikido duob mme iba, nditọ ete keed. Keed ibaaha aba, ndin akpeedem mmọdo idahami ye ete ñnyịn ke Kenan.’

33 "Akema awo a-akedooho abọọñ ke idʌñ ado amaibo ñnyịn, ‘Naña ami ndiinam ndiọọñọ me ndufo edo mbon akpanikọ ado ami: Ikpọñ keed ke atu nditọete ndufo mi ye ami, inyʌñ iben ndidia inyọñọ ikinọ mbon ufọk ndufo e-etieghe abiọọñ. 34 Ado iben akpeedem ayịnete ndufo insọk miin nọ ami ndiinịm ke ndufo idoññoke mbon uyeb, ado ke edoñño mbon akpanikọ. Ndin ami ñyaayaak ayịnete ndufo inọ ndufo, ndin ndufo emekeme edinyam udua ke isọñ ami.’ "

35 Akema, naña ammọ ekesʌkkọ enwañña ekpad ammọ, awo keedekeed amaakịt eboho akʌk amọ naña asịne ke esịd ekpad amọ! Ke ini ammọ ye ete ammọ ekekịtte mme eboho akʌk ado, ndịk amaanam ammọ. 36 Ndin ete ammọ, Yekọb, amaabo ammọ, "Ndufo emembọi nditọ mmi. Yosef ibaaha aba, Simiọn ñko ibaaha aba, ndin idahami ndufo eyem adiben Benyamin. Afịd ñkpọ akanna amfʌk miin!"

37 Akema Rubịn amaabo ete amọ, "Afo amekeme adiwot nditọ ideen mmi naña iba adieke ami mmentịmmeke ndat anye usọk fiin. Yaak anye sịn ke idak ukpeme mmi, ndin ñyaaben anye ñnyọñ ndi."

38 Ado Yekọb amaabo, "Ayịn mmi idiisọiyọke ikaa do ye ndufo; ayịneka amọ amaakpa, ndin anye ikpọọñ asʌhọ. Adieke unọmọ asịmme anye ke usʌñisañ a-ndufo edatta anye esaña, ndufo eyaenam iwuod iwad mmi adʌk udi ke mfʌhọ."