1 Ke Ebram amaakeyọhọ isua anaañ mme duob mme usʌkkeed, Abọọñ amaayaara idem anọ anye anyʌñ abo anye ate, "Ami ndo Abasi Andikponñkan*; saña mfọn-mfọn ke iso mmi nyʌñ nana ndo. 2 Ndin ami ñyaanam edioomo ke ufọọd mmi ye afo ñnyʌñ nnam nọ afo atọt ke ibad."

3 Ebram amaaduọ afʌk iso ke isọñ, ndin Abasi amaabo anye ate, 4 "Ama ado ami, edioomo mmi ye afo ado ami: Afo ayaado ete uwak idịd. 5 Afo uduukereke Ebram aba*; anyịñ mfo adiido Ebraham,* sia ami mmenam afo ado ete uwak mme idịd. 6 Ami ñyaanam afo anekke atọt; ñyaanyʌñ nnam uwak idịd esakka uto fiin, ñko ndidem eyaewuọñọ eto ke idem mfo. 7 Ami ñyaasọọñọ edioomo mmi nte nsi-nsi edioomo ke ufọọd mmi ye afo ye ubon mfo se ukeene fiin ye emana ini iso mfo; ndin ami ñyaado Abasi mfo ye Abasi mme ubon e-eduukeene fiin. 8 Afịd isọñ Kenan, a-afo adʌññọ nte asenawo idahami, ami ñyaunọ fiin ye ubon mfo nte nsi-nsi inie; ñko ami ñyaado Abasi ammọ."

9 Ndin Abasi amaabo Ebraham, "Amaado afo, ana afo anịm edioomo mmi, afo ye ubon mfo se iduukeene fiin ke emana ini iso. 10 Edioomo mmi ye ubon mfo u-ukeeneke fiin ado ami, ndin ana afo anịm edioomo ami: Afịd ideen ke atu mfo ana efọọrọ edʌd*. 11 Ana afo afọọrọ edʌd, ndin ami adiido idiọọñọ edioomo ke ufọọd mmi ye afo. 12 Ke mme emana se idiidi, afịd ideen ke atu ndufo e-eyọhọke usen itiaita ana efọọrọ edʌd, ye ke adooho mbon e-emanake ke ufọk mfo me mbon e-edeppedep ke akʌk eto mbon i-imiidooho aduuk mfo. 13 Me ado awo a-amanake ke ufọk mfo me anye a-afo adeppe ke akʌk mfo, ana efọọrọ ammọ edʌd. Edioomo mmi ke abʌkidem mfo ana ado nsi-nsi edioomo. 14 Awodeen akeedodo i-imiifọọrọke edʌd, awo imiifọọrọke edʌd ke abʌkidem, eyaediañña anye ekpọñ ubon amọ; sia anye a-abiat edioomo mmi."

15 Abasi amaanyʌñ abo Ebraham, "Ama ado Serai anwaan mfo, inaaha afo akoot anye Serai aba; anyịñ amọ adiido Sera. 16 Ami ñyaadiọñ anye ñnyʌñ unọ fiin ayịn nto anye. Ami ñyaadiọñ anye nọ anye ado eka uwak idịd; ndidem mme idịd eyaewuọññọ eto anye."

17 Ebraham amaaduọ afʌk iso ke isọñ; ndin anye amaasak anyʌñ abo idem amọ, "Awo isua ikie akeme ibon ayịn? Sera akeme iman ayịn ke isua anaañ mme duob?" 18 Ebraham amaanyʌñ abo Abasi, "Ubaha akpedooho Ismeel ado adiakpa mmi!"

19 Ndin Abasi amaabo Ebraham, "Ado ntoro, ado anwaan mfo Sera ayaaman ayịn awodeen unọ fiin, ndin afo ayaasio anye anyịñ Aisik. Ami ñyaanam edioomo mmi ye anye nte nsi-nsi edioomo nnọ ubon amọ se idiikeene anye. 20 Ado amaado Ismeel, ami mmekop se afo atañ. Ana ami ndiọñ anye; ami ñyaanam anye atọt ñnyʌñ nnam anye awak ke ibad. Anye ayaado ete anọ mme adaukara duob mme iba, ndin ñyaanam anye ado ekamba idịd. 21 Ado ami ndiinam edioomo mmi asu ye Aisik, a-Sera adiiman unọ fiin isua mfen idaha ntom." 22 Ke ini Abasi amaaketañ ikọ ama ye Ebraham, amaadakka akpọñ anye.

23 Ke usen ado Ebraham amaaben ayịn amọ Ismeel ye afịd mbon se ikimana ke ufọk amọ ye mbon se ekedep ke akʌk amọ, afịd se ikido ideen ke ufọk amọ, akefọọrọ ammọ edʌd, kpa naña Abasi akebo anye anam. 24 Ebraham akesọñ isua anaañ mme duob mme usʌkkeed idaha e-ekefọọrọke anye edʌd. 25 Ayịn amọ Ismeel ñko akedo isua duob mme ita ke ini ekefọọrọke anye edʌd. 26 Kpa ke usen ado ke ekefọọrọ Ebraham ye Ismeel ayịn amọ edʌd. 27 Emaefọọrọ afịd ideen se ikiba ke ufọk Ebraham, ye mbon se ikimana do, ñkọrọ mbon e-ekedeppe eto awo asenidịd edʌd.