1 Ke atu afịd ndiọi unamikọd se Abọọñ Abasi akebot, udʌkikọd akekara ñkara akan. Anye amaabo awonwaan ate, "Nte Abasi amaanekke ibo, ‘Ndufo inaaha edia mfịd eto ndomokeed ke inwañ?’ "

2 Awonwaan amaabọọrọ udʌkikọd, "Ñnyịn imikeme idia mfịd eto ke inwañ, 3 ado Abasi amaabo, ‘Inaaha ndufo edia mfịd eto a-abaaha ke ufọọd inwañ, inyʌññọ ina ndufo etuuk anye, imiidooho ndufo eyaekpa.’ "

4 Udʌkikọd amaabo awonwaan, "Ke akpanikọ ndufo idiikpaaha. 5 Abasi adiọọñọ ke ndufo emaedia eto ado, anyen ndufo ayaatara, ndufo eyaenyʌñ eba nte Abasi, e-ediọọñọ eti ye idiọọk."

6 Ke ini awonwaan ado akekịtte ke mfịd eto ado a-afọn se edia anyʌñ ayaiya se ese ke anyen, anyʌñ ado se ekama enie ifiọk, anye amaakịppe ubaak adia. Anye amaaben ubaak asọk ebe amọ, a-akebaaha ye anye; anye ñko amaabọ adia. 7 Ndin anyen ammọ awo iba emaetaara, ndin ammọ emaekịt ke mmimọ ikisaña ifed; do ke ammọ ekekoono mfañ fik ekịm edian keed enam ufʌkidem enọ idem ammọ.

8 Akema awodeen ado ye anwaan amọ emaekop uyio Abọọñ Abasi nte asaña ke inwañ ke mfuud uweemeayio, ammọ emaenyʌñ ekedịbe ke ufọọd mme eto ke inwañ. 9 Ado Abọọñ Abasi amaakoot awodeen ate, "Afo aba ke mmọọ?"

10 Anye amaabọọrọ, "Ami ñkekop uyio mfo ke inwañ, ndin ndịk amannam miin, sia ami ñkesaña ifed; ke ntoro ami mmaadịbe."

11 Ndin Abasi amaabo, "Anie ikudọkkọ fiin ke asaña ifed? Afo amedia ato eto a-ami ñkubooho fiin kuudia?"

12 Awodeen amaabo, "Awonwaan a-afo akenịmme mi ye ami, anye akennọọ usʌk mfịd a-atooho eto ado, ami mmaanyʌñ ndia."

13 Akema Abọọñ Abasi amaabo awonwaan, "Nsoo ke afo anam ami?"

Awonwaan amaabo, "Udʌkikọd akembiaña miin, ndin ami mbọ ndia."

14 Ke ntoro Abọọñ Abasi amaabo udʌkikọd, "Sia afo amenam ñkpọ ami,

"Adọdiọọk unọ fiin ke atu mme ufene

ye ke atu afịd unam ikọd!

Afo ayaanyọọn ke idịb mfo,

ayaanyʌñ adia ntọñ

ke afịd usen uwem mfo."

15 Ndin ami ñyaasịn usua

ke ufọọd mfo ye awonwaan,

ke ufọọd mfịd idịb mfo ye ake amọ;

anye ayaunuak fiin iwuod,

afo ayaanyʌñ akọñ anye itịghitịghi.

16 Anye amaabo awonwaan,

"Ami ñyaanam ubiak mfo anekke akpon ke ini uman ayịn;

ke akpọsọñ ubiakuman ke afo uduuman nditọ.

Udọñ mfo adiido ebe mfo,

ndin anye ayaukara fiin."

17 Ndin anye amaabo Adam, "Sia afo amaakpañ utọñ anọ anwaan mfo anyʌñ adia mfịd eto a-ami ñkubooho fiin, ‘Inaaha afo adia ato anye,’ 

"Adọdiọọk anọ isọñ ato ke ntak mfo;

adito ke akpọsọñ ufen ke afo uduudia ñkpọ uto isọñ

ke afịd ayio uwem mfo.

18 Anye adiitịppe akpab ye mbaraekpe unọ fiin,

ndin ndufo ediidia mme eto inwañ.

19 Ke ibibiak akpọiso mfo

ke afo uduudia ñkpọ

tutu afo atịmme anyọñ isọñ,

sia ke anye ke afo aketo adi;

ntọñ ke afo ado,

ndin ntọñ ke afo uduutịmme uka."

20 Adam akekoot anwaan amọ Iif*, sia anye adiido eka afịd mme aduuwem.

21 Abọọñ Abasi amaanam afọñidem ke ikpa aben asịn Adam ye anwaan amọ. 22 Ndin Abọọñ Abasi amaabo, "Idahami, awo ayeba nte keed ke atu ñnyịn, adiọọñọ eti ye idiọọk. Inaaha eyak anye nọ anyan ubọk amọ akịppe mfịd eto uwem adia anyʌñ adu uwem ke nsi-nsi." 23 Ke ntoro, Abọọñ Abasi amaabịne anye asio ke inwañ Idịn nọ aka akenam utom ke isọñ a-anye aketooho awuọ. 24 Ke anye amaakebịne awo asio, anye amaanịm serubim ye eduad a-asakka ikañ ke usakkautịn inwañ Idịn nọ anye asaaña ke inwañ akpeme eto uwem.