1 Ndin Abọọñ amaabo Nua, "Dakka dʌk ubom, afo ye afịd ekpək mfo, sia ami mmukịt fiin nte adinen awo ke emana anyem. 2 Ben utọ uduud unam itiaba, iba-iba, e-esanake, ayaara ye nsaña amọ, ye uduud unam keed se imiisanake, ayaara ye nsaña amọ, 3 ndin ben afịd utọ inuen itiaba, iba-iba, ayaara ye uman, nọ anịm mme aduuk afịd unam ke uwem ke afịd ederimbod. 4 Usen itiaba amaaboiyo tọọñọ ke mfịn, ami ñyaanam edịm adep ke ederimbod uweemeayio aba ye akonayio aba, ndin ami ñyaasọọk afịd aduuwem ñkpọ se ami ñkebot mfep ke unadod."

5 Nua amaanam afịd se Abọọñ akenọọ anye ewʌhọ abo anam.

6 Nua akedo isua ikie itiokeed idaha a-mmọọñ edịmukwọ aketịppeke ke ederimbod. 7 Akema Nua ye nditọ amọ ideen, ye anwaan amọ ye ibaan nditọ amọ ideen emaedʌk ubom nọ ebọkkọ mmọọñ edịmukwọ. 8 Mme unam se isana ye se ideghe, ye inuen, ye afịd se eboot e-ekesañake ke isọñ emaesaña iba, 9 ayaara ye uman, edi ebịne Nua enyʌñ edʌk ubom, kpa naña Abasi akenọọ Nua ewʌhọ abo anam. 10 Ndin ke usen itiaba emaekeboiyo, mmọọñ ukwọ amaadʌk ederimbod.

11 Ke ayọhọ isua uwem Nua ikie itiokeed, ke ayọhọ usen duob mme itiaba ke ayọhọ afiọñ iba, ke usen ado ke afịd idịm inyañ ibom akesakka, ndin emaebeere mme inuaatob mme hefịn. 12 Ndin edịm amaadep ke isọñ uweemeayio aba ye akonayio aba. 13 Ke ataa usen ado Nua ye nditọ amọ ideen, Sem, Ham ye Yafed dian anwaan amọ ye ibaan nditọ amọ ita, ekedʌk ubom. 14 Ammọ emaenie afịd afai unamikọd akeene utọ ammọ, afịd ufene akeene utọ ammọ, afịd unam se inyọọn ke isọñ akeene utọ ammọ, ye afịd inuen akeene utọ ammọ, afịd ñkpọ se inie mba. 15 Afịd se ebot e-enieghe ibifịk uwem ke idem ammọ emaesaña iba-iba ebịne Nua enyʌñ edʌk ubom. 16 Mme unam se ikidʌk ekedo ayaara ye uman afịd aduuwem ñkpọ, kpa naña Abasi akenọọ Nua ewʌhọ abo anam. Ndin Abọọñ amaabet usʌñ asịn Nua.

17 Ke usen aba mmọọñ ukwọ amaakaa iso aba ke ederimbod, ndin naña mmọọñ ayọọk, anye amaabenne ubom akpọñ isọñ. 18 Mmọọñ amaadọọk anyʌñ ayọọk eti-eti ke isọñ, ado ubom amaafiọrọ ke anyọñ mmọọñ. 19 Mmọọñ amaadọọk eti-eti anyʌñ afʌk afịd mme ikpọabod e-ekebaaha ke idak mme hefịn. 20 Mmọọñ amaadọọk afʌk mme ikpọabod atəño akan kubid duob mme ition.* 21 Afịd aduuwem ñkpọ se ikisaña ke isọñ emaekpañña. Mme inuen, ufene, afai unamikọd, afịd mme aduuwem ñkpọ se inyọọn ke isọñ, ye afịd ubonawo emaekpañña.

22 Afịd ñkpọ ke nsaad isọñ e-ekenieghe ibifịk uwem ke aduiwuo ammọ emaekpañña. 23 Emaesobo afịd mme aduuwem ñkpọ ke iso isọñ. Emaenyʌñ esobo mme awo ye mme unam ye mme aduuwem ñkpọ se inyọọn ke isọñ ye mme inuen esio ke ederimbod. Nua ikpọọñ ye mbon se ikisịne ke ubom ye anye ekesʌhọ.

24 Mmọọñ amaafiọrọ ke isọñ ke usen ikie mme aba mme duob.