1 Ke ini Aisik amaakesọñ, anyen amọ anyʌñ ameem ndin anye ikikịtte ñkpọ aba, anye amaakoot Isọ akpan ammọ anyʌñ abo anye ate, "Ayịn mmi."

Ndin anye amaabọọrọ, "Se miin mi."

2 Aisik amaabo anye, "Ami mmekappa akaanadeen, ñnyʌññọ ndiọọñọ usen ñkpa mmi. 3 Ben ñkpọ utom mfo, utịgha ye idañ mfo, nyʌñ wuọ kaa esịd ikọd kewot unam ikọd nsọk miin. 4 Ndin di tem inem-inem ndidia se ami mma, nyʌñ ben nsọk miin nọ ami ndia ñnyʌñ unọ fiin adidiọñ mmi mbemiso ami ñkpa."

5 Naña anye akesʌkkọ atañ ikọ ye Isọ, Ribeka akesʌk akpañ utọñ akop se Aisik aketañ. Isọ amaakedakka akaa ikọd aditop unam, 6 Ribeka amaabo ayịn amọ Yekọb ate, "Ami mmaakop naña ete mfo abo Isọ ayịneka mfo ate, 7 ‘Ben unam ikọd di nyʌñ dinam inem-inem ndidia nnọ ndia, nọ ami unọ fiin adidiọñ mmi ke iso Abọọñ mbemiso ami ñkpa.’ 8 Idahami, ayịn mmi, nekke kpañ utọñ nyʌñ nam se ami utemme fiin: 9 Kaa ke itie ufene nyʌñ dat mfọọn abaak ebod iba nsọk miin, nọ ami ntem inem-inem ndidia nnọ ete mfo, ke usʌñ se anye ama. 10 Ndin amaakem afo ayaaben asọk ete mfo adia, nọ anye unọ fiin adidiọñ amọ mbemiso anye akpa."

11 Ndin Yekọb amaabo Ribeka eka amọ, "Ado ayịneka mmi Isọ ado ided-ided awo ke ini ami nnieghe ndọnọ-ndọnọ ikpaidem. 12 Nsoo iditịppe adieke ete mmi antuuhọ miin? Ami ñyaakappa ndo awo ñkara ke iso amọ, ndin mben isuuñọ nnọ idem mmi utu ke adidiọñ." 13 Ndin eka amọ amaabo anye, "Ayịn mmi, yak isuuñọ ado andoro miin ke idem. Kap nam se ami udọkkọ; kaa ke koono mme ñkpọ ado nsọk miin."

14 Ndin anye amaakaa akekoono mme ñkpọ ado asọk eka amọ, ndin Ribeka amaanyʌñ atem inem-inem ndidia ke usʌñ se ete amọ akema. 15 Ndin Ribeka amaakesio ataa nti afọñ Isọ akpan amọ a-anye akenieghe ke ufọk, asịn Yekọb, udọ amọ ke idem. 16 Anye amaanyʌñ aben ikpa ebod afʌk anye ke ubọk ye ke aboditọñ amọ. 17 Akema anye amaaben inem-inem ndidia ado ye uyo a-anye akenamma anọ ayịn amọ Yekọb.

18 Yekọb amaakaa abịne ete amọ anyʌñ akebo anye, "Ete mmi."

Ndin anye amaabọọrọ "Ii, ayịn mmi. Anie ado ami?"

19 Yekọb amaabo ete amọ, "Ami ndo Isọ, akpan mfo. Ami mmaakenam naña afo akendọkkọ miin. Mbọk dakka tie-tie nyʌñ ta mme unam ikọd añketoppo, nọ afo annọ miin adidiọñ mfo."

20 Ndin Aisik amaabịp ayịn ammọ ate, "Ayịn mmi, afo akenam die akịt unamikọd ataa usọp-usọp ntom?"

Anye amaabọọrọ ate, "Abọọñ Abasi mfo akennọọ miin mfọniso."

21 Ndin Aisik amaabo Yekọb, "Ayịn mmi, sịkke di ise yak ami utuuk fiin, nọ ndiọọñọ me afo ado ayịn mmi Isọ, me udooho."

22 Yekọb amaasịkke akpere ete amọ Aisik, ndin ete amọ amaatuuk anye anyʌñ abo, "Uyio ado uyio Yekọb, ado ubọk ado ubọk Isọ." 23 Anye ikidiọọñọke anye, sia ubọk amọ ekedooho ided-ided nte ubọk ayịneka amọ Isọ; ndin anye amaakaa iso adidiọñ anye. 24 Ndin Aisik amaabịp, "Afo anekke ado ayịn mmi Isọ ke akpanikọ?"

Ndin Yekọb amaabọọrọ, "Ami ke ado."

25 Akema anye amaabo, "Ayịn mmi, dat mme unam ikọd mfo nsọk miin yak nta, nọ ami unọ fiin adidiọñ mmi."

Yekọb amaaben asọk anye, ndin anye amaata; amaanyʌñ aben ukọd anọ anye, anye anyʌñ anwọñ. 26 Akema ete amọ Aisik amaabo anye, "Di mi, ayịn mmi, nyʌñ ntʌm miin inua."

27 Ndin Yekọb amaasaña akpere anye anyʌñ atʌm anye inua. Ke ini Aisik amaakekop ufịk afọñidem a-anye akesịneke, anye amaadiọñ anye ate,

"Sai, ufịk idem ayịn mmi

aba nte ufịk ikọd

ake Abọọñ amaakediọñ.

28 Yak Abasi unọ fiin mbara a-atooho hefịn

ye inie ederimbod,

ataa uwak abakpa ye ufa ukọd.

29 Yak mme idịd enam ñkpọ unọ fiin,

mbon awo enyʌñ etuak iwuod unọ fiin.

Do abọọñ nọ nditọuka ideen,

ndin yak nditọ e-eka mfo amanna enyʌñ etuak iwuod unọ fiin.

Eyaesuuñọ mbon u-usuuñọke fiin,

enyʌñ ediọñ mbon u-udiọññọ fiin."

30 Ke ini Aisik amaakekweeñe adidiọñ anye, ndin ke imiikikpeeneke Yekọb akekpọñ iso ete amọ, ayịneka amọ Isọ amaanyọñ utob adi. 31 Anye ñko amaanyʌñ atem inem-inem ndidia aben asọk ete amọ. Ndin anye amaabo anye, "Ete mmi, mbọk dakka tie-tie nyʌñ ta mme unam ikọd añketoppo, nọ afo annọ miin adidiọñ mfo."

32 Ete amọ Aisik amaabịp anye ate, "Afo ado anie?"

Anye amaabọọrọ, "Ami ndo ayịn mfo, akpan mfo, Isọ."

33 Idem amaanyeñ Aisik akpọsọñ-akpọsọñ, ndin anye amaabo, "Anie akedo andikitop unam ikọd iben insọk miin? Akedo ami nta mma ikpeenekekpeene afo anyọñ adi. Ami mmaadiọñ anye, ndin ke akpanikọ eyaediọñ anye!"

34 Ke ini Isọ akekoppo mme ikọ ete amọ, anye amaasio ñkpo atua ndod-ndod ayịd, anyʌñ abo ete amọ, "Ndiọñ miin, ndiọñ miin ñko, Ete mmi!"

35 Ndin Aisik amaabo, "Ayịneka mfo amaasaña ke ñkara adibọ adidiọñ mfo."

36 Isọ amaabo, "Nte awo ikoodo anye Yekọb*? Ayọhọ akañ iba ado ami a-anye abreke ñkara ye ami. Anye amambọ miin itie akpan; ndin idahami anye a-aben adidiọñ mmi!" Ndin anye amaabịp ete amọ ate, "Nte afo ukusʌhọke adidiọñ ndomokeed unnọ miin?"

37 Aisik amaabọọrọ Isọ ate, "Ami mmenam anye ado andukara fiin ñnyʌñ nnam afịd nditọete amọ edo nditọufọk amọ, ndin ke mfọn ye ntadubọk ami mmenyʌñ nnọ anye ndidia ye ufa ukọd. Ndin nsoo mfen isʌhọ a-ami ñkpenamma unọọ fiin, ayịn mmi?"

38 Isọ amaabo ete amọ, "Ete mmi, ado nte afo anie adidiọñ keed kpọd? Ete mmi, ndiọñ miin ñko!" Ndin Isọ amaadịppe uyio atua.

39 Ete amọ Aisik amaabọọrọ anye ate,

"Itie idʌñ mfo adiiba

nsan-nsan akpọñ inie isọñ,

awuọ akpọñ mbara a-atooho hefịn ke anyọñ.

40 Afo uduudu uwem mfo ke akañkañ,

ndin afo uduunam utom unọ ayịneka mfo.

Ado ke ini afo umuuduunieghe emem,

afo ayaatop akpọnọ amọ adooro ke itọñ mfo."

41 Isọ amaanie udu abaña Yekọb ke ntak adidiọñ e-ete amọ akediọññọ anye. Isọ amaabo idem amọ ate, "Mme usen ufʌhọ ikpo ete mmi akpere; ndin ami ñyaawot ayịneka mmi Yekọb."

42 Ke ini Ribeka amaakekop se akpan amọ Isọ aketañ, anye amaadọñ ekoot udọ amọ Yekọb anyʌñ abo anye, "Isọ ayịneka mfo asʌk aduak adusio usiene ke aduwot fiin. 43 Idahami ndin, ayịn mmi, nam se ami ntañ. Feghe ini keed kaa bịne ayịneka mmi Leban ke Haran. 44 Tie ye anye ke etək ini tutu iyadesịd ayịneka mfo asuuhọ. 45 Ke ini ayịneka mfo imiiyatta esịd aba ye afo anyʌñ afre se afo akenam anye, ami ñyaadọñ edudọkkọ fiin nọ afo anyọñ adi. Nsoo ikpido ntak nọ ndufo awo iba entak miin ke usen keed?"

46 Akema Ribeka amaabo Aisik ate, "Uwem andooro miin ato ke ntak nditọ ibaan Hed ami. Adieke Yekọb adọọhọ anwaan ke atu mme ibaan idʌñ ami, ke atu ibaan Hed e-ebaaha ntom, uwem mmi idiibaha ufọn ndomokeed."