1 Ndin Ebram amaawuọ akpọñ Iyib akaa Nekef, ye anwaan amọ ye afịd se anye akenie, Lọọd amaanyʌñ akeene anye. 2 Ebram amaanekke amọinyọ ke ufene ye ke silfa ye kold. 3 Tọọñọ ke Nekef anye amaakaiya mme itie mme itie tutu anye akewuọ Beteel, akewuọ itie akesịneke ke ufọọd Beteel ye Ai, a-anye akebemme iso adaaha atayad amọ 4 ye itie a-anye aketooho abọp itie uwa. Ke itie ado, Ebram amaakoot anyịñ Abọọñ.

5 Ndin Lọọd, a-akesisañake ye Ebram, amaanyʌñ anieñe udịmedọñ ye udịmenañ ye mme atayad. 6 Ado isọñ ado ikikemme ammọ ke ini ammọ ekesʌkkọ eba keed, sia inie ammọ emaewak tutu ammọ ikikanna idʌñọ keed. 7 Ñko utọk amaatịppe ke ufọọd mme akpeme ufene Ebram ye ake Lọọd. Idaha ntoro, mbon Kenan ye mbon Peris mmọdo ekedʌñ ke isọñ ado.

8 Ke ntoro, Ebram amaabo Lọọd, "Yak utọk akuuba ke ufọọd mmi ye afo, me ke ufọọd nditọufọk mmi ye ake mfo, sia ñnyịn ido nditọ ete keed. 9 Nte afịd isọñ ami unaaha fiin ke iso? Yak ñnyịn idiañña nsaña. Adieke afo akaaha ufiin, ami ñyaakaa nnasia; adieke afo akaaha nnasia, ami ñyaakaa ufiin."

10 Lọọd amaabenne anyen ase akanna afịd unaisọñ Yọdan ke mbeñ ukañ Soa akịt ke mmọọñ anekke aba ke esịd, nte inwañ Abọọñ, nte isọñ Iyib. (Ami akedo mbemiso Abọọñ akesobo isọñ Sọdọm ye Komora.) 11 Ke ntoro Lọọd amaadiañña afịd unaisọñ Yọdan adat anọ idem amọ anyʌñ atara akaa ukañ usakkautịn. Ndin ideen iba ado emaediañña nsaña. 12 Ebram amaadʌñ ke isọñ Kenan, ke ini Lọọd akedʌññọ ke abio unaisọñ ado anyʌñ awuuk mme atayad amọ akpere Sọdọm. 13 Idaha ntoro mbon Sọdọm emaebak ibak enyʌñ enekke enam idiọọkñkpọ ke iso Abọọñ.

14 Abọọñ amaabo Ebram ke ini Lọọd amaakediañña akpọñ anye, "Se kanna tọọñọ ke itie a-afo adaaha do, ke adoro ye ke usuuk, ke usakkautịn ye usobutịn. 15 Afịd isọñ a-afo akịtte do, ami ñyaunọ fiin ye nditọnditọ* mfo ke nsi-nsi. 16 Ami ñyaanam ubon mfo ewak nte ntan isọñ, nọ ato do awo akpekan abat ntan isọñ, anye ayaakan abat ubon mfo. 17 Kaa ke saaña ke unyọọñ ye ke ubom isọñ ami, sia ami ñyaayaak anye unọ fiin." 18 Ndin Ebram amaadakka akedʌñ ke ñkpere ikpọ eto Mamre ke Hibrọn, ke itie a-anye akedaahake mme atayad amọ. Anye amaabọp itie uwa anọ Abọọñ ke ndo.