मूल़ 2

18 तेखअ सोठअ बिधाता इहअ, "आदमीओ एक्‍कै रहणअ निं ठीक आथी, मुंह बणाणअं एऊ लै इहअ साथी ज़ुंण एऊ संघै ढब्बे।"✝2:18 1 करि. 11:9

19 तेखअ आणै बिधाता आपणैं बणाऐं दै धरतीए सोभै ज़ीब अर सरगै डैऊंदै सोभै च़ेल्‍लू-पखीरू आदमी सेटा कि सह भाल़े कि तेऊ आदमी तिन्‍नों किज़ै-किज़ै नाअं डाहा, तिन्‍नां सोभी ज़ीबो ज़िहअ-ज़िहअ नाअं तेऊ आदमी डाहअ, तिन्‍नों पल़अ तिहअ ई नाअं।

20 इहअ करै डाहै तेऊ आदमी सोभी बणें ज़ीब, घरेलू डागै-चैणैं अर सरगै डैऊंदै च़ेल्‍लू-पखीरूए नाअं। पर आप्पू लै निं तेऊ इहअ साथी भेटअ ज़ुंण तेऊ संघै ढब्बे।

21 तेखअ सताऊअ बिधाता सह आदमी घणीं निंजा दी, ज़ांऊं सह सुत्तअ, तेखअ काढअ तेऊओ एक शल़्हअ अर तैहा ज़ैगा भरअ मास्स।✝2:21 1 करि. 11:8

22 तेऊ शल़्है करै बणाईं बिधाता एक बेटल़ी, संघा निंईं सह तेऊ आदमी सेटा लै।✝2:22 1 तिम. 2:13

23 तैहा भाल़ी बोलअ तेऊ आदमी,

"अह आसा बै मुंह ई ज़ेही,

अह आसा मेरी देहीओ भाग अर

मेरअ आपणअ हाड-मास्स।

मुंह डाहणअ ऐहा नाअं बेटल़ी।"

24 तैही रहणअ मर्ध आपणैं ईजा-बाबा छ़ाडी आपणीं लाल़ी संघै मिली अर तिंयां दुहै हणैं एक देही।✝2:24 मोत्त. 19:5; मार्क. 10:7,8; 1 करि. 6:16; इफि. 5:31