Gênesis 45

युसुफै बोलअ हुंह आसा थारअ ई भरैर

1 ज़ांऊं युसुफै यहूदे गल्‍ला शूणीं, तेखअ निस्सअ तेऊए तिन्‍नां होरी नोकर-च़ाकरा सम्हनै रहूई, संघा बोलअ तेऊ ज़ोरै, "मुंह सेटा का काढा इना सोभी बागै।" तिंयां होर निखल़ै सोभ बागै संघा रहअ युसुफ आपणैं सोभी भाई सेटा एक्‍कै। तेखअ बोलअ तेऊ तिन्‍नां लै, "हुंह आसा युसुफ।"✝45:1 शधा. 7:13

2 तेखअ लागअ सह ज़ोरै-ज़ोरै लेरा लांदअ। बागै हेरअ मिसरी लोगै बी शूणीं अर अह खबर पुजी मैहलै मिसर देशे माहा राज़ै सेटा बी।

3 युसुफ लागअ आपणैं तिन्‍नां भाई का बोल्दअ, "मेरअ बाब अज़ी बी ज़िऊंदअ आसा?" तिंयां हुऐ नड़क्‍क, अर तिन्‍नां छ़ुटी डरै काम्मणीं।

4 तेखअ शादै युसुफै तिंयां सोभै आप्पू नेल़ ज़िहै। ज़ांऊं तिंयां नेल़ आऐ, युसुफै बोलअ तिन्‍नां लै, हाँ, हुंह आसा युसुफ ज़ुंण तम्हैं मिसर देशा लै एछणैं आल़ै इशमाईली का बेच़ी पाअ त।✝45:4 शधा. 7:9 5 तम्हैं निं फिकर करा अर नां एते कशूरबार आप्पू समझ़ी। बिधाता छ़ाडअ हुंह तम्हां बच़ाऊंणा लै तम्हां आजू।

6 "देशै नकाल़ पल़ी गई दूई साला हई, आजू रहणअ पांज़ा साला होर, तेभै तैणीं निं साल-फसल हणीं। 7 पर बिधाता छ़ाडअ हुंह तम्हां आजू कि थारी आद-लुआद ज़िऊंदी रहे अर इहअ करै तम्हैं बच़े।

8 "एऊ साबै निं तम्हैं हुंह इधी पजैल़अ पर मुंह इधी पजैल़णैं आल़अ आसा बिधाता। तेऊ बणाअं हुंह मिसर देशै मिसर देशे माहा राज़ैओ माहा मंत्री संघा बणाअं हुंह सारै मिसर देशो मालक। 9 ऐबै डेओआ एभी घअरा लै, संघा बोलै मेरै बाबा का इहअ कि तेरअ शोहरू युसुफ बोला इहअ, ‘आझ़ बणाअं हुंह बिधाता सारै मिसर देशो मालक! ज़ेतरअ हई सका, तेतरअ छ़ेक्‍कै लोल़ी तूह इधा लै आअ।

10 "‘तूह रहै मुंह नेल़ गोशेन मुल्खै आपणैं शोहरू, पोचै अर भेडा-बाकरी, गाऊई-बल्द, गाधै-गाधी, ऊँटे हेल़्ही अर सारी ज़ैदाता संघी। 11 नकाल़े पांज़ा साला करूं हुंह तेरी हेर-सभाल़ तिधी। पर ज़ै तूह छ़ेक्‍कै निं एछे, तै सका ताह संघी तेरै टबर अर डागै-धअण, चैणैं भुखै मरी।’

12 "तम्हैं सोभी अर मेरै भाऊ बिन्यामीनै भाल़अ हुंह आपणीं आछी, तम्हैं बी सका बोली कि ज़ुंणी तम्हां संघै गल्‍ला किई सह आसा युसुफ।

13 "तम्हैं खोज़ै मेरै बाबा का घअरै सोभै गल्‍ला ज़िहअ-ज़िहअ तम्हैं भाल़अ कि सारै मिसर देशै आसा मेरअ राज़। संघा आणै नढैऊऐ तेऊ इधा लै।"

14 तेखअ दैनी युसुफै बिन्यामीने गल़ै बाह पाई मल़्हैची संघा लागै तिंयां दुहै लेरा लांदै।

15 युसुफै दैनी आपणैं तिन्‍नां सोभी भाई लै च़ुंज़ी-माख्खी अर मल़्हैची। तेखअ लागै युसुफे होर भाई बी तेऊ संघै गल्‍ला करदै।

16 ज़ांऊं अह खबर मिसर देशे माहा राज़ेए घअरै पुजी, राज़अ अर तेऊए कार-करिंदै बी हुऐ खुश।

17 मिसर देशे माहा राज़ै बोलअ तेखअ युसुफा लै, "आपणैं इना भाई लै बोल इहअ कि एभै डेओआ तम्हैं आपणैं गाधै दी ज़िणस लादी कनान देशा लै, 18 संघा एछा आपणैं बाबा संघा आणी सोभै टबर इधा लै रहंदै। हुंह दैंऊं तिन्‍नां लै मिसर देशै सोभी का बधिया ज़ैगा अर तिन्‍नां भेटणीं बधिया का बधिया च़िज़ा खाणां लै।✝45:18 शधा. 7:14

19 "तिन्‍नां लै बोलै इहअ बी कि आपणैं बेटल़ी-माठै आणना लै निंयैं मिसर देशा का होछ़ै-होछ़ै रथ बी, अर आपणैं बाबा आणै ज़रूर संघा।

20 "आपणीं ज़ैदात पिछ़ू रहणें निं तम्हैं फिकर करी किल्हैकि मिसर देशै जाणीं तम्हां बधिया का बधिया च़िज़ा भेटी।"

21 ज़िहअ मिसर देशे माहा राज़ै बोलअ, इज़राईले तिन्‍नैं सोभी शोहरू मनी तिंयां गल्‍ला तेही ई।

युसुफै दैनै तिन्‍नां लै होछ़ै-होछ़ै रथ, बाता लै दैनी खाणैं-पिणें च़िज़ा ज़िहअ राज़ै हुकम किअ त।

22 युसुफै दैनै तिन्‍नां सोभी भाई लै नऊंऐं झिकल़ै पर बिन्यामीना लै दैनै पांज़ ज़ोल़ै अर चअन शौ च़ंदीए सिक्‍कै*45:22 चअन शौ च़ंदीए सिक्‍कै तिंयां थिऐ साढै चअन किलू सिक्‍कै, एक च़ंदीओ सिक्‍कअ हआ त एकी मणछे एकी धैल़ीए मज़दूरी।।

23 आपणैं बाब याकबा लै दैनै तिन्‍नां संघै मिसर देशे बधिया-बधिया च़िज़े दस गाधै ज़िणस लादी, अर बाता हांढणा लै खाणैं-पिणें च़िज़ा करै दस गाधी लादी। 24 संघा छ़ाडै तिंयां सोभै भाई इहअ बोली घअरा लै, "बाता निं कहा संघै झ़घल़दै लागी।"

25 युसुफे सोभ भाई लागै तेखअ मिसर देशा का हांढदै संघा पुजै कनान देशै आपणैं बाबा याकबा सेटा।

26 घअरै पुजी खोज़ी तिन्‍नैं आपणैं बाबा का सारी गल्‍ला कि युसुफ आसा ज़िऊंदअ अर सह करा सारै मिसर देशै राज़। याकब हुअ तिन्‍नें गल्‍ला शूणीं नड़क्‍क अर तेऊ निं तिन्‍नें गल्‍लो विश्वास किअ।

27 तेखअ खोज़ी तिन्‍नैं याकबा का तिंयां सारी गल्‍ला ज़ुंण युसुफै तिन्‍नां का समाद त दैनअ द। ज़ांऊं युसुफै तिंयां होछ़ै-होछ़ै रथ भाल़ै ज़ुंण युसुफै तेऊ आणना लै तिन्‍नां संघै ती दैनै दै, तैबै जाई हुअ तेऊओ शाह हल़कअ।

28 तेखअ बोलअ इज़राईलै, "ऐबै हुअ मुंह विश्वास! मेरअ शोहरू युसुफ आसा हणअ सच्च़ी ज़िऊंदअ, मरनै का आजी लणअ मुंह तेऊओ मुंह भाल़ी।"