Levítico 25

ज़िम्मीं लै बशैघ

1 ज़धू मोसा सीनाई धारा थिअ, बिधाता बोलअ तेऊ लै इहअ कि✝25:1 लुआ. 23:10,11 2 सारी इज़राईली परज़ा का डाह इहअ खोज़ी, "ज़ुंण ज़ैगा मंऐं तम्हां लै आसा लाई दी दैई, तिधी पुजी करै तम्हैं हर छ़हा साला बाद एकी साला ज़िम्मीं लै बशैघ दैई।

3 "छ़हा साला बऊऐ खेच अर दाखे बागा का काढै राम्बल़ी साल-फसल, 4 पर सातुई साला दैऐ आपणैं खेचा अर दाखे बागा लै बशैघ, सह साल हणीं मुंह बिधाता लै। 5 अह साल आसा तिन्‍नां खेचा अर दाखे बागा लै पठी बशैघ दैणैंओ बगत, ज़ै तेथ किज़ै पज़े बी तेता निं झाल़ी आथी। 6,7 पर तम्हैं अर थारै गलाम, थारै मज़दूर, परदेसी सका तेता का खाई अर डागै-धअण अर बणें ज़ीबा बी हणअ तेता का खाणां लै।

पज़ाहुई साला बर्शगांठअ

8,9 "तेखअ ज़ेभै हर पज़ाहुई साला दसा शऊजै ज़ांऊं सात बशैघे साला पूरी हणीं, सह धैल़ी बी हणीं पापो प्राश्त करने महान धैल़ी, तेभै बाज़ै सारै देशै हर ज़ैगा नर्शिंगै। 10 अह पज़ाहुई साल आसा पबित्र, अह आसा तम्हां लै आज़ाद हणैंओ बगत अर बर्शगांठै*25:10 बर्शगांठै इब्रानी बोली दी आसा असली दी एतो मतलब "गाभू।" बादा का बोलअ एता लै गाभूओ शगैठ। खिरी आसा अह साल ज़ैगा-ज़िम्मीं बापसीए बन्दोबसते साल बी, गाभूए शगैठा बाज़णें थिई अह खास गल्‍ल। मनाऊंणेओ बगत, तेभै भेटणीं तम्हां आपणीं-आपणीं जदी ज़ैगा बापस अर गलाम डेऊणैं आपणैं-आपणैं घअरा लै फिरी।✝25:10 लुआ. 19:13 11 तैहा साला बी निं तम्हैं खेचै किछ़ै बऊई, नां किज़ै बेज़अ डाही रोही अर नां खेचै आप्पै पज़ी दी किज़ै च़ीज़ लऊई कठा करी अर नां दाखे बेला का लुम्बर चोल़ी डाही झाल़ी। 12 अह बगत आसा तम्हां लै पबित्र बर्शगांठै मनाऊंणेओ बगत, ज़ुंण खेचै आप्पै होर पज़अ द होए, तेता सका तम्हैं खेचा ई का खाई।

13 "ऐहा साला दैऐ तम्हैं ज़िम्मीं तेते असली मालका लै बापस फरेऊई। 14,15 ज़ै तम्हैं ज़िम्मीं का धख आपणैं भाई-बंधा का बेच़े या आप्पू लै मोलै लए, तेतो मोल-भाअ करै इहअ भाल़ी कि आगली पज़ाहुई साले बर्शगांठै लै केतरी साला रही होर, अर तेभै तैणीं ज़िम्मीं का केतरी पज़ैआ सका हई। तम्हैं निं एकी-दुजै ठगी आथी। 16 ज़ै पज़ाहुई साले बर्शगांठै लै खास्सी साला होए रही दी, तै हणीं तैहा ज़िम्मींए किम्मत खास्सी, ज़ै थोल़ी होए, तै हणीं किम्मत थोल़ी। किल्हैकि तेतो मोल-भाअ हणअ तेते साबै कि तैहा ज़िम्मीं का केतरी साला तैणीं सका पज़ैआ हई।

17 "हुंह आसा थारअ परमेशर बिधाता, तम्हैं करै तिहअ ई ज़िहअ हुंह बोला अर आपणैं भाई-बंधा निं ठगी।

सातुई साला लै बर्गत

18,19 "ज़ै तम्हैं मेरअ बधान अर तेते बिधी मने, तै निं तम्हां तेऊ देशै रहंदी किछ़ै डअर रहणीं अर थारी हणीं खास्सी साल-फसल। 20 तम्हैं निं इहअ फिकर करी कि खेचै बऊअ-बचऊअ निं किछ़ै आथी ऐबै सारी साला ज़िणस किधा का काढणीं! 21 तेता लै दैंऊं हुंह आप्पै तम्हां लै एही बर्गत कि छ़हुई साला हणीं थारी एतरी पज़ैआ कि सह निं थारै चिई साला तैणीं च़ाल्‍ली मुक्‍की। 22 आठुई साला खाणअ तम्हां सह नाज़ ज़ुंण तम्हैं छ़हुई साला आसा कठा किअ द, पर नहुई साला खाणअ तम्हां सह नाज़ ज़ुंण तम्हैं आठुई साला बऊअ अर कठा किअ।

जदी ज़िम्मींओ बधान

23 "च़ाऐ ज़ेही बी ज़िम्मीं होए तैहा नां सदा लै बेच़ी अर नां सदा लै मोलै लई। सारी ज़ैगो मालक आसा हुंह बिधाता अर तम्हैं आसा तेथ परदेसी ज़िहै थोल़ै धैल़े प्राहुंणैं।

24 "ज़ेभै तम्हैं आपणीं ज़िम्मीं बेच़णअ बी च़ाहे, सोभी का आजी आसा तेता कुआसणेंओ हक तेते असली मालका।

25 "ज़ै तम्हां मांझ़ै कुंण इज़राईली इहअ गरीब होए कि सह आसा आपणीं ज़िम्मीं बेच़णां लै मज़बूर, तेता सका तेऊए टबरा मांझ़ै तेऊओ भाई-बंध कुआसी।

26 "ज़ै कहा मणछो तैहा ज़िम्मीं कुआसणैं आल़अ कोहै निं होए, तै सका मणछ बादा का तेता आप्पै कुआसी ज़ेभै तेऊ का तेता जोगी ढब्बै होए। 27 सह दैऐ इहअ भाल़ी तेते किम्मत कि सह ज़िम्मीं बेच़णैं का बाद तेऊ सेटा केतरी साला रही अर आगली पज़ाहुई साले बर्शगांठै लै केतरी साला रही होर। तेखअ हणीं तेऊए सह जदी ज़िम्मीं भिई आपणीं। 28 पर ज़ै तेऊ मणछा का आपणीं तैहा जदी ज़िम्मीं कुआसणा लै ढब्बै नांईं होए, तै रहणीं सह ज़िम्मीं पज़ाहुई साले बर्शगांठै तैणीं तेऊ ई का ज़हा लै सह बेच़ी दी आसा, तेता बाद हणअ भिई आप्पै सह तैहा आपणीं जदी ज़िम्मींओ मालक।

29 "ज़ै कहा मणछो घअर एही नगरी दी होए ज़ेता फेर-फिरदै उछ़टै गहल़ हआ च़िणैं दै, तेखअ सह मणछ तेऊ घअरा कहा होरी का बेच़ी पाए, सह मणछ सका तेऊ घअरा तैहा साला भितरी बापस कुआसी। 30 पर ज़ै सह मणछ तेता तैहा साला भितरी बापस नांईं कुआसे, तेखअ हणअ तेऊ घअरो मालक सह मणछ तेऊए पोस्ती दर पोस्ती सदा लै ज़ुंणी सह मोलै लअ। अह निं तेखअ तेऊ बेच़णैं आल़ै पज़ाहुई साले बर्शगांठै दी बापस भेटणअ। 31 पर ज़ै सह घअर नगरी का दूर किधी गराऊंऐं होए, तेता सका होरी ज़िम्मीं ज़िहअ कज़ेभल़ी कुआसी अर पज़ाहुई साले बर्शगांठै दी लागणअ सह एही बी तेते असली मालका लै बापस दैणअ।

32 "पर ज़ै कहा लेबी गोत्रे मणछो घअर फेर-फिरदै गहल़ा आल़ी नगरी दी होए, तिंयां सका आपणअ घअर तिधी बी कज़ेभल़ी कुआसी। 33 तेखअ ज़ै लेबी गोत्रो मणछ नगरीए तेऊ घअरा नांईं बी कुआसे, तिन्‍नां लै लागणअ सह पज़ाहुई साले बर्शगांठै लै सह बी बापस दैणअ, किल्हैकि इज़राईली मांझ़ै ज़ुंण घअर लेबीए आसा, तेते मालक आसा सदा लै तिंयां ई। 34 नां लेबी गोत्रे कहा घैहणीं बेच़ी किल्हैकि सह ज़ैदात आसा सदा लै तिन्‍नें।

गरीबे मज़त

35 "ज़ै थारअ कुंण भाई-बंध पठी दाल़जी होए कि तेऊए निं बैल़ी खाई क्लारी आथी, तिन्‍नां इहै मणछे करै इहअ समझ़ी मज़त कि तूह आसा कहा परदेसीए मज़त करदअ ज़ुंण तम्हां जैंदरी रहा।✝25:35 बधा. 15:7,8 36,37 तेऊ का नां ढब्बै ऋण दैई बैज़ लई अर नां तेऊ का ज़िणस बेच़ी नफअ खटी। पर तम्हैं करै तिहअ, ज़िहअ हुंह थारअ बिधाता तम्हां लै बोला अर तेऊ आपणैं भाई-बंधा दैऐ आप्पू संघै ज़िन्दगी ज़िऊंणै।✝25:36-37 लुआ. 22:25; बधा. 23:19,20; लूक. 6:35

38 "तम्हैं डाहणीं अह गल्‍ल आद कि हुंह आसा थारअ परमेशर बिधाता! मंऐं आसा तम्हैं मिसर देशा का काढी आणै दै अर मंऐं दैनी तम्हां लै कनान देशे अह ज़ैगा कि हुंह थारअ परमेशर रहूं।

गलामा कुआसणेंओ बधान

39 "ज़ै किज़ै इहअ होए कि तम्हां मांझ़ै कुंण एतरअ दाल़जी होए कि सह आप्पू ई बिक्‍के अर तेरअ गलाम बणें,✝25:39 लुआ. 21:2-6; बधा. 15:12-18 40 तेऊ संघै निं परदेसी गलामा ज़िहअ बभार करी, तेऊ डाहै आप्पू संघै कामां लाऐ दै मज़दूरा ज़िहअ। खिरी करै तूह तेऊ पज़ाहुई साले बर्शगांठै लै आज़ाद, 41 ताकि सह तेऊए बेटल़ी-माठै संघी ताह सेटा का आपणैं खिंब अर आपणीं जदी ज़ैगा लै डेऊई सके। 42 किल्हैकि तिंयां आसा मंऐं मिसर देशा का एते तैणीं आणै दै कि तिंयां मेरी च़ाकरी करे, नां कि इहै गलामा ज़िहै बिक्‍के। 43 तेऊ प्रैंदै निं काठअ हई राज़ करी, तम्हैं रहै मेरी थारै परमेशरे डरा हेठै।

44 "ज़ै तम्हां गलाम च़ाहा डाहणैं, तिन्‍नां आणै होरी देशा का लई, 45 कि सका तम्हैं तिन्‍नां परदेसी गलाम हणां लै लई, ज़ुंण थारै देशै तम्हां जैंदरी रहा, संघा बणाआं तिन्‍नां आपणीं ज़ैदात।

46 "तिन्‍नें मालक हणैं तम्हैं अर तम्हां बाद हणैं तिन्‍नें मालक थारी लुआद, पर तम्हैं निं आपणैं इज़राईली भाई-बंधा गलाम डाही नर्दैई हई राज़ करी।

47 "ज़ै तम्हां मांझ़ै कुंण इज़राईली पठी दाल़जी होए अर सह तम्हां मांझ़ै रहणैं आल़ै कहा सेठ परदेसी मणछा लै आप्पू बेच़ी पाए, 48 तेऊ मणछा सका तेऊओ कुंण भाई-बंध ओर्ही कुआसी, ज़िहअ कि तेऊओ भाई, 49 च़ाच़ू या कुंण होर सक्‍कअ टबर। तेखअ ज़ै बादा का केभै तेऊ का आपणैं ढब्बै होए, तेभै सका सह ढब्बै भरी आज़ाद हई। 50 सह गलाम इज़राईली पज़ाहुई साले बर्शगांठै का आजी ज़ेतरी साला गलाम रहअ, सह दैऐ आपणैं मालका लै तेते साबै ढब्बै बापस। 51,52 ज़ै अज़ी पज़ाहुई साले बर्शगांठै लै खास्सी साला होए रही दी, तै लागणै तेऊ खास्सै ढब्बै दैणैं अर ज़ै थोल़ी साला होए, तै लागणअ तेऊ थोल़अ दैणअ।

53 "एही ता आसा सह आपणैं देशै परदेसी मणछो गलाम, पर तज़ी बी डाहै तम्हैं होर तेऊए आपणैं मणछ इहअ धैन कि तेऊ संघै निं तेऊए मालकै काठअ बभार लोल़ी किअ।✝25:53 कुलू. 4:1

54 "पर ज़ै सह मणछ केऊ बी साबै आप्पू आज़ाद नांईं करी सके, तैबी जाणअ सह तेऊए बेटल़ी-माठै संघी पज़ाहुई साले बर्शगांठै दी छ़ुटी। 55 इज़राईलीओ, हुंह आसा थारअ परमेशर बिधाता अर मंऐं आसा तम्हैं मिसर देशा का काढी आणै दै कि तम्हैं मेरी च़ाकरी करे।"