1 E Sara trajisarda šel thaj biš thaj efta brš. 2 Muli ando Kirjat-Arba, godova si o Hevron ande phuv Hanaan. O Avraam žalilas pale Sara thaj rovelas pale late.

3 Kana uštilo o Avraam katar piri muli romnji, phendas e Hetitonenđe: 4 "Me sem maškar tumende samo stranco thaj doseljeniko. Bićinen manđe than palo limori te šaj prahov mungre mule romnja."

5 E Hetiturja phendine e Avraamešće: 6 "Ašun amen, gospodarina. Tu san e Devlesko poglavari maškar amende. Prahosar ćire romnja ande amaro majlačho limori. Ni jek amendar či uskratila tuće piro limori te ande leste prahosares ćire romnja."

7 Pe godova o Avraam uštilo thaj poklonisajlo e Hetitsko themešće savo trajilas ande godoja phuv, 8 pa phendas lenđe: "Ako kamen te den man te akate prahosarav mungre mule romnja, askal ašunen so phenava thaj inćaren mungri rig anglo Efron, e Coharesko čhavo, 9 te bićinel manđe e pećina Mahpela, savi si ande lesko vlasništvo, a ačhel okote po krajo ande lešći njiva. Neka bićinel lat manđe pale pherdi cena te avel manđe than palo prahope maškar tumende."

10 O Efron bešelas aver Hetitonenca save ćidine pe ke gavesko vudar, pa angle savorende phendas e Avraamešće: 11 "Na, gospodarina. Ašun mande: Dav tut e njiva thaj e pećina savi si pe late – dav tut godova angle mungre manuša. Prahosar okote ćire mule romnja."

12 O Avraam pale poklonisajlo e manušenđe andar godoja phuv, 13 pa phendas e Efronešće angle sa e manuša: "Moliv tut te ašunes man. Poćinava tuće kozom e njiva mol. Le kozom dav tut te šaj okote prahov mungre mule romnja."

14 O Efron phendas e Avraamešće: 15 "Ašun man gospodarina. Godoja phuv mol štar šela rupune kovanice, a godova naj khanči ni pale mande ni pale tute. Prahosar ćire romnja."

16 O Avraam složisajlo e Efronesa thaj izmerisardas lešće rup kozom akava manglas angle aver Hetiturja: štar šela rupune kovanice gajda sar merin e trgovcurja.

17 Gajda e Efronešći njiva ande Mahpela paše ke Mamre – e njiva, e pećina thaj sa e kašta pe njiva, 18 nakhle ando Avraamesko vlasništvo angle sa e Hetiturja save aviline pe gavešći kapija. 19 Posle godova o Avraam prahosarda pire romnja e Sara ande pećina pe njiva Mahpela paše ke Mamre, godova si ando Hevron ande phuv Hanaan.

20 Gajda godoja njiva thaj e pećina pe late nakhline katar e Hetiturja ande Avraamesko vlasništvo palo prahope lešće familijaće.