1 Kana o Isaak phurilo thaj hasardas o vido gajda kaj majbut našti dićhelas pe jakha, akhardas pire majpurane čhave e Isave thaj phendas: "Čhaveja!" A o Isav phendas: "Ake, akate sem!"

2 O Isaak phendas: "Ake, phurilem thaj či džanav o đes kana merava. 3 Zato tu akana le ćiro luko thaj ćiri tobolco e strelenca thaj dža ande pustinja te astares varesavi divljač. 4 Askal ćer manđe ukusno habe, sosko me voliv, pa an manđe te hav, te šaj blagosloviv tut majsigo nego so merav."

5 E Reveka čholas kan so o Isaak phenelas pire čhavešće e Isavešće, pa kana o Isav đelotar ande pustinja te astarel divljač pire dadešće, 6 e Reveka phendas pire čhavešće e Jakovešće: "Ake, akana ašundem sar ćiro dad phenel ćire phralešće e Isavešće: 7 ‘An manđe varesavi divljač thaj ćer manđe ukusno habe te hav, te šaj blagosloviv tut anglo GOSPOD majsigo nego so merav.’ 8 Zato akana, čhaveja mungreja, čho kan mande thaj ćer sar phenav tuće. 9 Dža ando stado thaj an manđe duj šukar terne jarconen te lendar pale ćiro dad ćerav ukusno habe, sosko vo volil. 10 Askal tu inđareja će dadešće te hal, te šaj blagoslovil tut majsigo nego so merel."

11 Pe godova o Jakov phendas pire dejaće e Revekaće: "Ali mungro phral o Isav si maljavo manuš, a me naj sem. 12 So ako o dad čhol piro vas pe mande? Askal haćarela kaj kamlem te hohavav les thaj gajda crdava pe mande romaja, a na blagoslov."

13 Lešći dej pe godova phendas lešće: "Čhaveja mungreja, neka godola romaja peren pe mande. Čho tu samo kan mande. Dža thaj an manđe e terne jarconen."

14 O Jakov đelo, astardas e terne jarconen thaj anda len ke piri dej, a voj ćerda ukusno habe sago kaj lesko dad volilas. 15 Askal e Reveka lijas e majšukar drze save sas lat ando ćher katar piro majpurano čhavo katar o Isav thaj dijas pe piro majterno čhavo po Jakov. 16 Askal lija e jarconenđi morćhi thaj učharda lešće vas thaj lešći kor. 17 Pale godova dijas pire čhavešće Jakovešće okova ukusno habe thaj o mangro savo ćerda.

18 O Jakov đelo ke pesko dad thaj phendas: "Dade mungreja!"

O Isaak phendas: "Akate sem. Savo san tu, čhaveja mungreja?"

19 O Jakov phendas pire dadešće: "Me sem o Isav, ćiro prvobijando čhavo. Ćerdem sar phendan manđe. Akana moliv tut, ušti, beš thaj ha katar akaja mungri divljač, te šaj blagoslovis man."

20 O Isaak phučlas pire čhaves: "Sar areslan gajda sigo te astares, čhaveja mungreja?"

O Jakov phendas lešće: "O GOSPOD, ćiro Del, pomognisarda manđe ande godova."

21 Askal o Isaak phendas e Jakovešće: "Av majpaše, čhaveja, te čhav o vas pe tute te dikhav dali san tu vi čače mungro čhavo o Isav ili naj san."

22 O Jakov avilo majpaše ke piro dad o Isaak thaj akava čhuta o vas pe leste thaj phendas: "O glaso si e Jakovesko, ali e vas si e Isavešće." 23 Či pindžarda les kaj lešće vas sas maljave sago lešće phralešće e Isavešće. Kana lijas te blagoslovil les, 24 phučla les još jekhar: "San tu vi čače mungro čhavo o Isav?"

O Jakov phendas lešće: "Me sem."

25 Askal o Isaak phendas: "Čhaveja, an manđe te hav cara katar ćiri divljač, te šaj blagosloviv tut."

Thaj o Jakov andas lešće thaj o Isaak halas. A andas vi mol, thaj o Isaak vi pilas. 26 Askal lesko dad o Isaak phendas lešće: "Av akana majpaše thaj čumide man, čhaveja."

27 O Jakov avilo majpaše thaj čumida les. O Isaak haćardas o miris lešće drzengo thaj blagoslovisarda les alavenca:

"O miriso mungre čhavesko slično si sago o miris ando polje

savo o GOSPOD blagoslovisarda.

28 Neka o Del del tut rosa andar o nebo

thaj plodno phuv,

but điv thaj terni mol.

29 Neka e thema služin tuće

thaj neka e plemenurja den koča angle tute.

Vladisar pe ćire phral

thaj neka den koča angle tute

e potomkurja ćire dejaće.

Prokleto te avel ko tut proklinjil

thaj blagoslovime ko tut blagoslovil!"

30 Samo so o Jakov đelotar katar piro dad nakon so akava blagoslovisarda les, lesko phral o Isav avilo andar o lovo. 31 Thaj vi vo ćerda ukusno habe, anda les pire dadešće thaj phendas lešće: "Dade, ušti thaj ha cara katar mungri divljač, te šaj blagoslovis man."

32 Lesko dad o Isaak phučla les: "Ko san tu?"

Vo phendas: "Me sem ćiro prvobijando čhavo o Isav."

33 Pe godava o Isaak silno uznemirisajlo thaj phendas: "A ko sas askal okova savo astardas divljač thaj andas manđe? Halem divljač majsigo nego so tu avilan. Blagoslovisardem les thaj vo avela blagoslovime."

34 Kana o Isav ašundas so lesko dad phendas, ando baro muj thaj ogorčime rknjisardas thaj phendas pire dadešće: "Vi man blagoslovisar, dade!"

35 Ali o Isaak phendas lešće: "Ćiro phral avilo thaj po hohaipe lijas ćiro blagoslov."

36 Askal o Isav phendas: "Či uzalud akhardol Jakov*? Već duj data hohada man. Lijas mungro pravo sago prvobijando, a akana lijas vi mungro blagoslov."

Askal phučlas: "Zar pale mande či muklan nijek blagoslov?"

37 O Isaak phendas e Isavešće: "Les čhutem pale ćiro gospodari thaj dijem les sa lešće phralen te aven lešće sluge, obezbedisardem les e đivesa thaj e terne molasa. Naj khanči so akana šaj ćerdemas pale tute, čhaveja!"

38 Pe godova o Isav phendas pire dadešće: "Zar si tu samo jek blagoslov, dade? Blagoslovisar vi man, dade mungreja!" Thaj ačhilo glasno te rovel.

39 Lesko dad o Isaak phendas lešće:

"Dur katar e plodno phuv avela ćiro ćher,

dur katar e rosa andar o nebo.

40 Trajija katar ćiro mačo

thaj ćire phralešće služija.

Ali kana pobunija tut,

čhudeja lesko tereto katar ćiri kor."

41 O Isav zamrzisardas e Jakove zbog o blagoslov savo akales dija o dad, pa ande peste gindilas: "Mungro dad uskoro merela. Askal me mudarava mungre phrale e Jakove."

42 Kana phendine e Revekaće so lako majpurano čhavo o Isav gindil te ćerel, voj bičhaldas te akharen laće majterne čhave e Jakov, pa phendas lešće: "Ćiro phral o Isav gindil te mudarel tut. 43 Zato akana čho kan mande, čhaveja: odma akana naš ke mungro phral ko Lavan ando Haran. 44 Ačh leste varesavi vrjama, dok ćire phrales mućel e holji. 45 Kana majbut či avela holjariko pe tute thaj kana bistarela so ćerdan lešće, bičhalava pale tute te boldes tut. Sostar te hasarav tumen liduje dženen ande jek đes?"

46 E Reveka phendas e Isaakošće: "Smučisajlo manđe o trajo zbog e Isavešće hetitske romnja. Ako vi o Jakov lel pale romnji varesave Hetitkinja, romnja andar akaja phuv, so trubul man kasavo trajo!"