1 O Jakov vazdas pire jakha thaj dikhla e Isave sar avel štar šela muškarconenca. Thaj razdelisardas e čhavren ke Lija, ke Rahilja thaj ke duje sluškinje. 2 E sluškinjen thaj lenđe čhavren čhuta anglal, e Lija thaj laće čhavren čhuta pala lende, a e Rahilja thaj e Josife čhuta skroz palal. 3 O Jakov korkoro teljardas anglal leste thaj efta drom poklonisajlo dži ke phuv, dok či avilo majpaše dži ke piro phral.

4 O Isav prastajas angle leste, dija les mrtiko thaj ungladilo lešće pale kor, čumida les thaj liduj džene line te roven.

5 Askal o Isav vazda e jakha thaj dikhla e romnjen thaj e čhavren thaj phučlas: "Ko si akala tusa?"

O Jakov phendas lešće: "Čhavra saven o Del milostivo dijas manđe, ćire slugašće."

6 Askal e sluškinje thaj lenđe čhavra avile anglal thaj poklonisajle lešće. 7 Pale lende avili e Lija laće čhavrenca thaj poklonisajle lešće, a po krajo avili vi e Rahilja thaj o Josif thaj poklonisajle lešće. 8 O Isav phučlas: "So kanis okole stadonenca saven maladem?"

O Jakov phendas: "Te arakhav milost ande ćire jakha, gospodarina."

9 Ali o Isav phendas: "Man si but, phrala. Inćar tu ćiro pale tute."

10 "Na, moliv tut," phendas o Jakov, "ako arakhlem milost ande ćire jakha, le akava daro mandar. Kaj, kana dikhlem ćiro muj, godova si sago kaj dikhlem o muj e Devlesko, gajda milostivo primisardan man. 11 Le o daro savo andem tuće, kaj o Del sas milostivo prema mande thaj si man sa." Sar o Jakov gaći nagovorilas les, o Isav lijas o daro.

12 Askal o Isav phendas: "Hajde akana te teljaras po drom. Vi me džav tusa."

13 Ali o Jakov phendas lešće: "Tu džanes, gospodarina, kaj e čhavra si slabe, a trubul te las sama vi pe bakhre thaj vi pe gurumnja saven si cikne pe čuči. Ako e životinjen samo jek đes tradav te phiren majbrzo, sa merena. 14 Zato tu, gospodarina, dža angle mande, angle ćiro sluga, a me džava poloće, palo korako e stokako thaj e čhavrengo, dok či aresav tute, gospodarina, ando Seir."

15 O Isav phendas: "De man te mukav tusa varekazom katar mungre manuša."

O Jakov phendas lešće: "Či trubul, gospodarina, me samo kamav te arakhav milost angle ćire jakha."

16 Gajda o Isav godova isto đes teljardas palpale ando Seir. 17 Ali o Jakov đelo ando Sukot thaj okote ćerda pešće ćher thaj štala pale stoka. Zato godova than vi akhardol Sukot.

18 Kana avilo andar o Padan-Aram, o Jakov areslo džudo thaj sasto dži ko gav Sihem ando Hanaan thaj vazdas pire šatorja pašo gav. 19 E phuv pe savi vazdas piro šator ćindas pale šel rupune lovora katar e čhave e Hamorešće. O Hamor sas dad e Sihemesko. 20 Okote o Jakov vazdas o žrtveniko thaj akharda les: o Del si o Del e Izraelosko.