1 Yesu avayo aja mu tawuni y'iwaabo, abiigiishwa be baramukurikira. 2 Ku munsi w'i Isaabato, atangira kwigiisha mu Sinagoogi, abenshi bamwumviise baratangaara, baravuga bati, "Uyu mugabo ibyo avuga abikuura he? Ubu ni buhanga ki yahaawe? Biriiya bitangaaza akora bikomooka he? 3 Uriiya si wa mubaaji tuuzi, umuhungu wa Mariya, akaba na mwene nyina wa Yaakobo na Yozesi, na Yuda na Simooni, kandi bashiki be ntidutuuranye?" Baheerako ntibamwemera.

4 ✝Yesu arababwira ati, "Nta handi abahanuuzi basuuzugurirwa keretse mu gihugu c'iwaabo, muri beene waabo, ndetse no mu mago yaabo."

5 Nuuko ntiyahakorera igitangaaza na kimwe, keretse abarwayi bake abo yarambikagaho ibiganza bagakira. 6 Yatangaajwe no kuteemera kwabo.

Nuuko aja mu byaro yiigiisha abantu. 7 Ahamagara ba bandi cumi na babiri, aboohereza babiri babiri, kandi abaha ububaasha bwo gutegeka abadayimooni. 8 Abategeka kutagira ico biitwaza ku rugendo, keretse inkoni yoonyine, nta mugaati, nta gikapu, nta mashilingi mu mifuka yaabo, 9 ariko bambare ingato z'urugendo kandi bekwitwaza undi mwambaro. 10 Arababwira ati, "Inzu muzinjiramo yoose, muzaayigumemo kugeza igihe muzaaviira muri uwo mwanya. 11 ✝✝Aho muzaagera ntibabaakiire bakanga no kubumva, mukihava, muzakunkumure umucuucu wo mu birenge byanyu, bibabeere ikimenyeetso co kubashinja."

12 Nuuko baragenda babwira boose ko bakwiriye kwihana. 13 ✝Biirukana abadayimooni benshi, kandi basiiga amavuta abarwayi benshi barakira.

14 ✝Umwami Herodi arabyumva, kuko izina rya Yesu ryari ryamamaye hoose. Bamwe baaravugaga bati, "Yohaana Umubatiza yazuutse mu bapfuuye ni co gituma afite ububaasha bwinshi bumukoreramo."

15 Ariko abandi bakavuga bati, "Ni Eliya."

Naho abandi bati, "Ni umuhanuuzi nk'umwe mu bakeera."

16 Ariko Herodi abyumvise, aravuga ati, "Yohaana wo naciiye igihanga, yaazuutse!" 17 ✝Herodi ubwe yari yaroohereje abantu ngo bafate Yohaana, bamubohe bamushire mu gihome bamuryoje Herodiyaasi, muka mwene nyina Filipo, kuko Herodi yari amutunze. 18 Yohaana yari yarabwiye Herodi ati, "Binyuranye n'amategeko kugira ngo utunge muka mwene nyoko."

19 Ku bw'iyo mpamvu, Herodiyaasi amugirira inziika ashaaka no kumwica ariko ntiyabishobora. 20 Herodi yatiinyaga Yohaana, kuko yari azi ko ari intungaane kandi umuziranenge, bigatuma amurengera. Yakundaga kumva ibyo yamubwiraga n'ubwo byamubuzaga amahoro.

21 Nuuko Herodiyaasi abona umugisha ubwo Herodi yiizihizaga umunsi yavuukiyeho. Herodi yatumiye abatware, bakuru b'ingabo n'abandi banyacuubahiro b'i Galileeya. 22 Umukoobwa wa Herodiyaasi araaza arabyina, ashiimiisha Herodi n'abo yari yaatumiye, nuuko umwami abwira uwo mukoobwa ati, "Nsaba ico ushaaka coose, ndakiguha." 23 Aramurahira ati, "Ico uri bunsabe coose ndakiguha n'ubwo caaba kimwe ca kabiri c'igihugu canje."

24 Umukoobwa arasohoka abaza nyina ati, "Nsabe iki?"

Aramusubiza ati, "Saba igihanga ca Yohaana Umubatiza."

25 Ako kaanya agaruka aho umwami ari yiihuuta, aramusaba ati, "Nshaaka ngo umpe noone aha igihanga ca Yohaana Umubatiza ku mbeehe."

26 Umwami arababara caane, ariko ku bw'indahiro yari yarahiriye imbere y'abashitsi, atiinya guhemuka. 27 Ako kaanya umwami yoohereza umusirikare, amutegeka ko azana igihanga ca Yohaana. Aragenda amusanga mu gihome amuca umutwe, 28 awuuzana ku mbeehe, maze awuha uwo mukoobwa, na we awuheereza nyina. 29 Abiigiishwa ba Yohaana babyumviise, baraaza bajaana umurambo we, barawuhamba.

30 Intumwa ziitooroora Yesu, zimubwira byose byo zaakoze n'ibyo ziigiishije. 31 Arazibwira ati, "Nimuuze mwenyine mu mwanya udatuuwe, maze muruhuukeho." Kuko benshi baaraazaga bakagenda, bigatuma batabona umwanya wo kuruhuuka ndetse no kurya. 32 Maze binjira mu bwato boonyine baja ahadatuuwe.

33 Benshi bababoonye bagenda barabamenya, bagenda biihuuta n'amaguru bavuuye mu ma tawuni menshi babatangayo. 34 ✝Yesu amaze kwambuka abona abantu benshi, abagirira impuhwe, kuko baari bameze nk'intama zitagira umushumba, maze atangira kubiigiisha byinshi. 35 Umunsi ukuze, abiigiishwa be baramwegeera baramubwira bati, "Dore aha turi ntihatuuwe, kandi buriije, 36 baseezerere kugira ngo baje mu mpande zoose z'ibyaro bashobore kwigurira ibyokurya."

37 Ariko we arababwira ati, "Nimubahe ibyokurya."

Baramubwira bati, "Uragira ngo tuje kugura imigaati iguze idinaari magana abiri, maze tubahe barye?"

38 Arababaza ati, "Mufite imigaati ingahe? Nimuje kureeba."

Babiboonye, baramubwira bati, "Dufite imigaati itaanu, n'isamaaki ebyiri."

39 Nuuko ategeka ko biicaza abantu ku gacaaca, mu dutsiko. 40 Maze biicara mu dutsiko tw'abantu ijana ijana, na mirongo itaanu mirongo itaanu. 41 Afata ya migaati itaanu n'isamaaki ebyiri, areeba ku ijuru, ashiimira Imaana, amaanyura ya migaati, ayiha abiigiishwa be ngo na bo bayihe abantu, nuuko na za samaaki ebyiri arazibagaburira. 42 Boose bararya barahaaga, 43 kandi hasigara intonga cumi n'ebyiri z'ubuvungunyukira bw'imigaati hamwe n'ubw'isamaaki. 44 Abo baariiye banganaga abagabo ibihumbi bitaanu.

45 Ako kaanya abwira abiigiishwa be kuja mu bwato kugira ngo bamubanzirize haakurya, i Beetsayida, we asigara aseezerera abantu. 46 Amaze kubaseezerera, azaamuuka umusozi aja gusenga. 47 Bugoroobye, ubwato bwari bugeze mu nyanja hagati, naho we yari akiri imusozi wenyine. 48 Aboonye ko barwana n'ingashi ku bw'umuyaga mwinshi, aza abasanga butari bwaca, agendera ku maazi. Yashaakaga kubanyuraho. 49 Ariko baboonye agendera heejuru y'inyanja, bateekereza ko ari umuzimu maze bateera induuru. 50 Boose bamuboonye bakuuka umutima.

Ariko ako kaanya avugana na bo arababwira ati, "Muhuumure, ni njeewe, mureke gutiinya." 51 Abasanga mu bwato, maze umuyaga uratuuza. Barushaho gutangaara, 52 kuko baari bataraasobaanukirwa iby'imigaati kandi n'imitima yaabo yari ikinangiye.

53 Bamaze kwambuka, bagera i Genezareeti, bazirika ubwato. 54 Bakiva mu bwato, ako kaanya abantu baramumenya. 55 Nuuko birukanka muri ako gace koose, batangira kuuzana abarwayi mu ngobyi babamusangiisha aho bumvaga ageze hoose. 56 Aho yajaga hoose, haaba mu byaro, mu ma tawuni, mu mirima, cangwa mu maguriro, baazanaga abarwayi maze bakamwinginga kugira ngo bishobotse abeemerere bakore ku nshonda y'umwenda we kandi abaawukoragaho boose baarakiraga.