1 ପ୍ରାଭୁ ମୁଶାକେ କାଜିକିୟା, "ଆଇଙ୍ଗ୍‌ ଫାରୋ‌ ଓଡ଼ୋଃ ମିସାର୍‌ରେନ୍‌ ହଡ଼କତାଃ ଆଡଃମିଆଦ୍‌ ଦୁକୁ କୁଲେୟାଇଙ୍ଗ୍‌। ଏନ୍‌ ତାୟମ୍‌ତେ ଇନିଃ ନେତାଃଏତେ ଆପେକେ ସେନ୍‌ ଇଚିପେୟା ଓଡ଼ୋଃ ସବେନ୍‌କକେ ପୁରାଗି ସେନଃ ଇଚିପେୟା। 2 ନାହାଁଃ ଆମ୍‌ ସବେନ୍‌ ହଡ଼କ ଆୟୁମେ ଲେକା କାଜିମେ, ମିମିଆଦ୍‌ କଡ଼ା ଓଡ଼ୋଃ ମିମିଆଦ୍‌ କୁଡ଼ି ଆୟାଃ ହପର୍‌ଜାପାଃରେନ୍‌ ତାଃଏତେ ରୁପା ଓଡ଼ୋଃ ସୋନାରେୟାଃ ତୁସିଙ୍ଗ୍‌ତେୟାଃ ଆସିକେଦ୍‌ତେ ଇଦିକାଏ।" 3 ପ୍ରାଭୁ ନେ'ଲେକା ରିକାକେଦାଏ ଯେ, ମିସାର୍‌ରେନ୍‌ ହଡ଼କ ଇସ୍ରାଏଲ୍‌ ହଡ଼କକେ ଲିବୁଇକେଦ୍‌କଆକ। ଓଡ଼ୋଃ ମିସାର୍‌ ଦିଶୁମ୍‌ରେ ଫାରୋରାଃ ଦାସିକ ମୁଶାକେ ପୁରାଃଗି ମାଇନ୍‌କିୟାକ।

4 ଏନ୍ତେ ମୁଶା ଫାରୋକେ କାଜିକିୟା, "ପ୍ରାଭୁ ନେଆଁ କାଜିତାନାଏ, ‘ଆଇଙ୍ଗ୍‌ ଥାଲା ନିଦାରେ ମିସାର୍‌ ହରାତେ ସେନାଇଙ୍ଗ୍‌। 5 ଏନ୍ତେ ରାଜ୍‌ଗାଦିରେ ଦୁବାକାନ୍‌ ଫାରୋ‌ତାଃଏତେ ଜାନ୍ତା ଦିରି ରିଦେତାନ୍‌ କାମ୍‌ଡ଼ିରାଃ ମୁତ୍‌କୁଲ୍‌ ହନ୍‌ ଜାକେଦ୍‌ ମିସାର୍‌ ଦିଶୁମ୍‌ରେ ତାଇନ୍‌ତାନ୍‌ ସବେନ୍‌ ମୁତ୍‌କୁଲ୍‌ ହନ୍‌ ଓଡ଼ୋଃ ଜାଁତୁକଆଃ ମୁତ୍‌କୁଲ୍‌ ହନ୍‌କ ଗଜଃଆ। 6 ନେ'ଲେକା ପୁରାଃ ରାନାଃ ଗେରାଙ୍ଗ୍‌ ହବାଅଃଆ ଯେ, ମିସାର୍‌ ଦିଶୁମ୍‌ରେ ଚିଉଲାଅ କା ହବାକାନ୍‌ ତାଇକେନା ଓଡ଼ୋଃ ଚିଉଲାଅ କା ହବାଅଃଆ। 7 ମେନ୍‌ଦ ପ୍ରାଭୁ ଇସ୍ରାଏଲ୍‌ ହଡ଼କକେ ମିସାର୍‌ରେନ୍‌ ହଡ଼କତାଃଏତେ ସାଲା ଅଡଙ୍ଗ୍‌କଆ, ନେଆଁ ଆପେ ସାରିପେ ମେନ୍ତେ ଇସ୍ରାଏଲ୍‌ରେନ୍‌ ହଡ଼, ସେତା ଚାଏ ଜାଁତୁରାଃ ରାନାଃ କା ଆୟୁମଃଆ।’ 8 ଏନ୍ତେ ଆମାଃ ନେ ଦାସିକ ହିଜୁଃଆ ଓଡ଼ୋଃ ଆଇଙ୍ଗ୍‌ତାଃରେ ଇକ୍‌ଡ଼ୁମ୍‌କେଦ୍‌ତେ ଜହାର୍‌ତାନ୍‌ଲଃ କାଜିୟାକ, ‘ଆପେ ଓଡ଼ୋଃ ଆପେୟାଃ ସବେନ୍‌ ହଡ଼କ ଅଡଙ୍ଗ୍‌କେଦ୍‌ତେ ସେନଃପେ। ଏନ୍ତେ ଆଇଙ୍ଗ୍‌ ଅଡଙ୍ଗ୍‌କେଦ୍‌ତେ ସେନଃଆଇଙ୍ଗ୍‌।’" ଏନ୍‌ ତାୟମ୍‌ତେ ମୁଶା ଖିସ୍‌ୟାନ୍‌ଲଃ ଫାରୋ‌ତାଃଏତେ ଅଡଙ୍ଗ୍‌ୟାନା।

9 ଏନ୍ତେ ପ୍ରାଭୁ ମୁଶାକେ କାଜିକିୟା, "ଆଇଙ୍ଗ୍‌ ମିସାର୍‌ ଦିଶୁମ୍‌ରେ ଆଡଃଗି ଆକ୍‌ଦାନ୍ଦାଅ କାମିକ ରିକାରାଃ ମେନାଃ। ଏନାମେନ୍ତେ ଫାରୋ‌ ଆପେୟାଃ କାଜି କାଏ ଆୟୁମେୟା।" 10 ମୁଶା ଓଡ଼ୋଃ ହାରୁନ୍‌ ଫାରୋ‌ରାଃ ଆୟାର୍‌ରେ ନେ ସବେନ୍‌ ଆକ୍‌ଦାନ୍ଦାଅ କାମିକ ରିକାକେଦାକିନ୍‌, ମେନ୍‌ଦ ପ୍ରାଭୁ ଫାରୋ‌ଆଃ ମନ୍‌କେ କେଟେଦ୍‌କେଦା ଓଡ଼ୋଃ ଇନିଃ ଇସ୍ରାଏଲ୍‌ ହଡ଼କକେ କାଏ ସେନ୍‌ ଇଚିକେଦ୍‌କଆ।