1 ପ୍ରାଭୁ ମିସାର୍‌ ଦିଶୁମ୍‌ରେ ମୁଶା ଓଡ଼ୋଃ ହାରୁନ୍‌କେ କାଜିକେଦ୍‌କିନା, 2 "ନେ ମାହିଁନା ଆପେୟାଃ ନାଙ୍ଗ୍‌ ବାରାଷ୍‌ରେୟାଃ ପାହିଲା ମାହିଁନା ହବାଅଃଆ। 3 ଆବେନ୍‌ ଇସ୍ରାଏଲ୍‌ ସାମାଜ୍‌ରେନ୍‌ ସବେନ୍‌କକେ କାଜିୟାକବେନ୍‌, ନେ ମାହିଁନାରାଃ ଗେଲେୟା ହୁଲାଙ୍ଗ୍‌ରେ ଆପେୟାଃ ସବେନ୍‌ ହଡ଼କ ଆପ୍‌ନାଃ ଆପ୍‌ନାଃ ଅଡ଼ାଃ ଲେକାତେ ମିପିଆଦ୍‌ ମିଣ୍ଡିହନ୍‌ ଇଦିକପେ। 4 ମିଣ୍ଡିହନ୍‌କେ ଜମି ନାଗେନ୍ତେ ଏନ୍‌ ଅଡ଼ାଃରେନ୍‌ ହଡ଼କ ହୁଡିଙ୍ଗ୍‌ ହବାଅଃତାନ୍‌ ରେଦ, ଇନ୍‌କୁ ଓଡ଼ୋଃ ଆକଆଃ ହୋପର୍‌ଜାପାଃରେନିଃଲଃ ମେସାକେଦ୍‌ତେ ଏନ୍‌ ମିଆଁଦ୍‌ ମିଣ୍ଡିହନ୍‌ ଇଦିକାକ ଓଡ଼ୋଃ ମିପିହୁଡ଼୍‌ରାଃ ଜମେ ଲେକା ହିସାବ୍‌ ଦହେକାକ। 5 ଆପେ ମିଣ୍ଡି ଗୋଟ୍‌ ଚାଏ ମେରମ୍‌ ଗୋଟ୍‌ଏତେ ମିଆଁଦ୍‌ ସାଲାଇପେ, ଇନିଃ କା ଦାଗିକାନ୍‌ ଓଡ଼ୋଃ ମିଦ୍‌ ବାରାଷ୍‌ରେନ୍‌ ପେଠା ତାଇନ୍‌କାଏ। 6 ଏନ୍‌ ମାହିନାରାଃ ଗେଲ୍‌ ଉପୁନିୟା ହୁଲାଙ୍ଗ୍‌ ଜାକେଦ୍‌ ଇନିଃକେ ତଲ୍‌କେଦ୍‌ତେ ଦହିକାକ। ଓଡ଼ୋଃ ସିଙ୍ଗିହାସୁର୍‌ୟାନ୍‌ଚି ଇସ୍ରାଏଲ୍‌ ସାମାଜ୍‌ରେନ୍‌ ସବେନ୍‌କ ଏନ୍‌ ଜାଁତୁକେ ମାଆଃ ଗଜିକାକ। 7 ଓଡ଼ୋଃ ଅକ ମିଣ୍ଡିହନ୍‌ ଚାଏ ମେରମ୍‌କେ ଜମିୟାଁକ, ଇନିୟାଃ ମାୟୋମ୍‌କେ ଇଦିକେଦ୍‌ତେ ଆକଆଃ ଅଡ଼ାଃ ଦୁଆର୍‌ରାଃ ବାରାନ୍‌ ଚାଉଖାଟ୍‌ରେ ଓଡ଼ୋଃ ଏନାରାଃ ଚେତାନ୍‌ରେ ମାୟୋମ୍‌ ଏମେକାକ। 8 ଇନ୍‌କୁ ଏନ୍‌ ନୁବାଃରେଗି ଏନ୍‌ ମାସ୍‌କେ ସେଙ୍ଗେଲ୍‌ରେ ଝଲାଅକେଦ୍‌ତେ ଏନାଲଃ ମେହେର୍‌ ଆଡ଼ାଃ ଓଡ଼ୋଃ ବେଗାର୍‌ ସୋଢ଼ାରାଃ ହଲଙ୍ଗ୍‌କେ ମେସାକେଦ୍‌ତେ ଜମେକାକ। 9 ଆପେ ଏନ୍‌ ମାସ୍‌କେ ବେରେଲ୍‌ଗି ଚାଏ ଦାଆଃରେ ଇସିନ୍‌କେଦ୍‌ତେ ଆଲପେ ଜମେୟାଁ, ମେନ୍‌ଦ ସେଙ୍ଗେଲ୍‌ରେ ଏନାରାଃ ବହଃ, ବୁଲୁ ଓଡ଼ୋଃ ହଡ଼୍‌ମରେୟାଃ ସବେନ୍‌ତେୟାଃ ଝଲାଅକେଦ୍‌ତେ ଜମେପେ। 10 ଓଡ଼ୋଃ ସେତାଃ ଜାକେଦ୍‌ ଏନାରାଃ ଜେତ୍‌ନାଃ ସାରେଜ୍‌କେଦ୍‌ତେ ଆଲପେ ଦହଏୟା। ସେତାଃ ଜାକେଦ୍‌ ସାରେଜ୍‌କାନ୍‌ ରେଦ, ଏନାକେ ସେଙ୍ଗେଲ୍‌ରେ ଅଣ୍ଡର୍‌ତାପେ। 11 ନେ'ଲେକାତେ ଆପେ ଜାଲ୍‌ଦିଗି ଜମେପେ, ଚିଆଃଚି ଆପେ ମାୟାଙ୍ଗ୍‌ରେ ଲିଜାଃ ପାଟେନ୍‌ପେ, କାଟାରେ ଖାର୍‌ପା ତୁସିଙ୍ଗ୍‌ୟେଁନ୍‌ପେ ଓଡ଼ୋଃ ତିଃଇରେ ସଟା ସାବ୍‌କେଦ୍‌ତେ ସେନ୍‌ ନାଙ୍ଗ୍‌ ସେକାଡ଼େନ୍‌ପେ, ନେଆଁ ହବାଅଃତାନା ପ୍ରାଭୁଆଃ ମାଇନଃ ପାସ୍‌କା ପାରାବ୍‌।

12 "ଚିଆଃଚି ଆଇଙ୍ଗ୍‌ ତିସିଙ୍ଗ୍‌ ନୁବାଃରେ ମିସାର୍‌ ଦିଶୁମ୍‌ରାଃ ତାଲା ହରାତେ ସେନାଇଙ୍ଗ୍‌ ଓଡ଼ୋଃ ମିସାର୍‌ରେନ୍‌ ହଡ଼ ଓଡ଼ୋଃ ଜାଁତୁକଆଃ ସବେନ୍‌ ମୁତ୍‌କୁଲ୍‌ ହନ୍‌କକେ ଗଏଃକଆଇଙ୍ଗ୍‌। ଓଡ଼ୋଃ ମିସାର୍‌ରେନ୍‌ ସବେନ୍‌ ମାହାପୁରୁକଆଃ ବିଚାର୍‌ ରିକାକେଦ୍‌ତେ ସାଜାଇ ଏମାକଆଇଙ୍ଗ୍‌। ଆଇଙ୍ଗ୍‌ ପ୍ରାଭୁ ତାନିଙ୍ଗ୍‌। 13 ଏନାମେନ୍ତେ ଆପେ ଅକ ଅକ ଅଡ଼ାଃରେ ତାଇନାଃପେ, ଏନ୍‌ ଅଡ଼ାଃ ମାୟୋମ୍‌ତେ ଏମାକାନ୍‌ ଚିହ୍ନା ଲେକା ତାଇନାଃ। ଓଡ଼ୋଃ ଆଇଙ୍ଗ୍‌ ମିସାର୍‌ ଦିଶୁମ୍‌କେ ସାଜାଇ ଇମ୍‌ତା ଦିପିଲିରେ ଏନ୍‌ ମାୟୋମ୍‌କେ ନେଲେରେ, ଆପେକେ ବାଗିକେଦ୍‌ତେ ଆୟୁର୍‌ତେ ସେନଃଆଇଙ୍ଗ୍‌ ଓଡ଼ୋଃ ଆପେୟାଃ ଚେତାନ୍‌ରେ ଜେତାନ୍‌ ନକ୍‌ସାନ୍‌ କା ହବାଅଃଆ। 14 ନେ ହୁଲାଙ୍ଗ୍‌କେ ପାହାମେ ନାଗେନ୍ତେ ଆପେ ପ୍ରାଭୁଆଃ ପାରାବ୍‌ ଲେକା ମାନାତିଙ୍ଗ୍‌ ରିକାଏୟାପେ, ଓଡ଼ୋଃ ପିଢ଼ି ପିଢ଼ି ଜାକେଦ୍‌ ଜାନାଅଗି ନେ'ଲେକା ନେ ପାରାବ୍‌ ମାନାତିଙ୍ଗ୍‌ ରିକାଏୟାପେ।"

15 ଆପେ ଏୟା ହୁଲାଙ୍ଗ୍‌ ଜାକେଦ୍‌ ସାବାଃ ହଲଙ୍ଗ୍‌ ଜମେୟାଁପେ। ପାହିଲା ହୁଲାଙ୍ଗ୍‌ ଆପ୍‌ନାଃ ଅଡ଼ାଃଏତେ ସାବାଃ ଅଡଙ୍ଗ୍‌ ଏଣ୍ଡାଃଏପେ, ଚିଆଃଚି ଅକ ହଡ଼ ପାହିଲା ହୁଲାଙ୍ଗ୍‌ଏତେ ଏୟା ହୁଲାଙ୍ଗ୍‌ ଜାକେଦ୍‌ ସାବାଃ ହଲଙ୍ଗ୍‌ ଜମେ ରେଦ, ଇନିଃ ଇସ୍ରାଏଲ୍‌ଏତେ ଆତମଃଆ। 16 ପାହିଲା ହୁଲାଙ୍ଗ୍‌ ଆପେୟାଃ ପାବିତାର୍‌ ସାଭା ହବାଅଃଆ, ଓଡ଼ୋଃ ଏୟା ହୁଲାଙ୍ଗ୍‌ରେ ହଗି ଆପେୟାଃ ପାବିତାର୍‌ ସାଭା ହବାଅଃଆ। ଓଡ଼ୋଃ ଏନ୍‌ ହୁଲାଙ୍ଗ୍‌ରେ ସବେନ୍‌କଆଃ ନାଙ୍ଗ୍‌ ଜମେୟାଁଃ ବାଇୟଃଆ, ଏନ୍‌ କାମି ବାଗିକେଦ୍‌ତେ ଓଡ଼ୋଃ ଏଟାଃ ଜେତାନ୍‌ କାମିଉଦାମ୍‌ ଆଲପେ ରିକାଏୟା।

17 "ନେ'ଲେକାତେ ଆପେ ସାବାଃ ହଲଙ୍ଗ୍‌ରାଃ ପାରାବ୍‌ ମାନାତିଙ୍ଗ୍‌ ରିକାଏପେ। ଚିଆଃଚି ଏନ୍‌ ହୁଲାଙ୍ଗ୍‌ଗି ଆଇଙ୍ଗ୍‌ ଆପେୟାଃ ପାଲ୍‌ଟାନ୍‌କକେ ମିସାର୍‌ ଦିଶୁମ୍‌ଏତେ ଅଡଙ୍ଗ୍‌ ଆଉକଆଇଙ୍ଗ୍‌। ଏନାମେନ୍ତେ ଆପେ ପିଢ଼ି ପିଢ଼ି ଜାକେଦ୍‌ ଜାନାଅଗି ନେ ହୁଲାଙ୍ଗ୍‌କେ ମାନାତିଙ୍ଗ୍‌ପେ। 18 ଆପେ ପାହିଲା ମାହିଁନାରାଃ ଗେଲ୍‌ ଉପୁନିୟା ହୁଲାଙ୍ଗ୍‌ ସିଙ୍ଗିହାସୁରଃ ନେଣ୍ଡାଏତେ ହିସିମିଆଁଦ୍‌ ହୁଲାଙ୍ଗ୍‌ ଜାକେଦ୍‌ ସାବାଃ ହଲଙ୍ଗ୍‌ ଜମେପେ। 19 ମିଦ୍‌ ହାପ୍ତା ଜାକେଦ୍‌ ଆପେୟାଃ ଅଡ଼ାଃରେ କାଟିଃହ ସାବାଃ ହଲଙ୍ଗ୍‌ ଆଲକା ତାଇନଃକା, ଚିଆଃଚି ଏଟାଃ ଦିଶୁମ୍‌ରେନ୍‌ ଚାଏ ଆପ୍‌ନାଃ ଦିଶୁମ୍‌ରେନ୍‌ ଅକ ହଡ଼ ସାବାଃ ହଲଙ୍ଗ୍‌ ବାଗିକେଦ୍‌ତେ ଏଟାଃତେୟାଃ ଜମେୟାଏ, ଇନିଃ ଇସ୍ରାଏଲ୍‌ ହଡ଼କଆଃ ସାମାଜ୍‌ଏତେ ଆତମଃଆ। 20 ଆପେ ସୋଡ଼ା ମେସାକାନ୍‌ ଜେତାନ୍‌ ଜିନିଷ୍‌ ଆଲପେ ଜମେୟାଁ। ଆପେ ଆପେୟାଃ ଆପ୍‌ନାଃ ତାଇନଃ ଠାୟାଦ୍‌ରେ ସାବାଃ ହଲଙ୍ଗ୍‌ ଜମେପେ।"

21 ମୁଶା ଇସ୍ରାଏଲ୍‌ରେନ୍‌ ପ୍ରାଚିନ୍‌କକେ କେଡ଼ାକେଦ୍‌ତେ କାଜିକେଦ୍‌କଆ, "ଆପେ ଆପେୟାଃ ନାଙ୍ଗ୍‌ ଆପ୍‌ନାଃ ଆପ୍‌ନାଃ କିଲି ଲେକାତେ ଗୋଟ୍‌ରେନ୍‌ ମିପିଆଦ୍‌ ମିଣ୍ଡିହନ୍‌ ଆଉକେଦ୍‌ତେ ପାସ୍‌କା ପାରାବ୍‌ରେୟାଃ ଦାଣେଁ ରାକାବେପେ। 22 ମିଆଁଦ୍‌ ଏସୋବ୍‌ ଝୁପା ଇଦିକେଦ୍‌ତେ ଥାଡ଼ିରେ ତାଇକାନ୍‌ ମାୟୋମ୍‌ରେ ତୁପୁଇପେ ଓଡ଼ୋଃ ଦୁହାର୍‌ ଚାଉଖାଟ୍‌ରେୟାଃ ବାରାନ୍‌ସାଃ ଓଡ଼ୋଃ ଚେତାନ୍‌ରେ ଜରଏପେ, ଓଡ଼ୋଃ ସେତାଃ ଜାକେଦ୍‌ ଆପେୟାଃ ଜେତାଏ ଅଡ଼ାଃଏତେ ଆଲପେ ଅଡଙ୍ଗ୍‌ଅଃପେ। 23 ଚିମ୍‌ତାଙ୍ଗ୍‌ ପ୍ରାଭୁ ମିସାର୍‌ରେନ୍‌ ହଡ଼କକେ ଗଗଏଃ ନାଗେନ୍ତେ ଇନ୍‌କୁଆଃ ହରାତେ ସେନା, ଇମ୍‌ତାଙ୍ଗ୍‌ ଦୁଆର୍‌ ଚାଉଖାଟ୍‌ରାଃ ବାରାନ୍‌ସାଃ ଓଡ଼ୋଃ ଏନାରାଃ ଚେତାନ୍‌ରେ ମାୟୋମ୍‌ ଟିପାଃକାନ୍‌ ନେଲେରେ, ପ୍ରାଭୁ ଏନ୍‌ ଦୁହାର୍‌ ବାଗିକେଦ୍‌ତେ ଆୟାର୍‌ତେ ସେନ୍‌ପାରମା। ଓଡ଼ୋଃ ଗଗଏଃ ଦୁଁତ୍‌କେ ଆପେୟାଃ ଅଡ଼ାଃରେ ବଲ ନାଙ୍ଗ୍‌ କାଏ ଆଚୁକଆ। 24 ଆପେ ଓଡ଼ୋଃ ଆପେୟାଃ ହନ୍‌କ ନେ ନିୟାମ୍‌କେ ଜାନାଅ ଜାନାଅଗି ମାନାତିଙ୍ଗ୍‌ପେ। 25 ପ୍ରାଭୁ ଆପେକେ ଅକନ୍‌ ଦିଶୁମ୍‌ ଏମଃ ନାଗେନ୍ତେ ବାନାର୍‌ସା ଏମାକାଦାଏ, ଏନ୍‌ ଦିଶୁମ୍‌ରେ ବଲକେଦ୍‌ତେ ନେଆଁ ମାନାତିଙ୍ଗ୍‌ତାନ୍‌ଲଃ କାମି ରିକାଏପେ। 26 ଆପେୟାଃ ହନ୍‌କ ନେ ସୁନୁସାର୍‌ ଚିକା ନାଗେନ୍ତେପେ ରିକାତାନା ? ମେନ୍ତେ କୁଲିପେୟାକ, 27 ଇମ୍‌ତା ଆପେ ଇନ୍‌କୁକେ କାଜିରୁହାଡ଼୍‌କପେ, ‘ନେଆଁ ପ୍ରାଭୁଆଃ ମାଇନଃ ନାଗେନ୍ତେ ପାସ୍‌କା ପାରାବ୍‌ରାଃ ଦାଣେଁ ରାକାବଃତାନା, ଚିଆଃଚି ମିସାର୍‌ରେନ୍‌ ହଡ଼କକେ ଗଗଏଃ ଇମ୍‌ତା ଇନିଃ ମିସାର୍‌ରେ ତାଇନଃତାନ୍‌ ଇସ୍ରାଏଲ୍‌ ହନ୍‌କଆଃ ଅଡ଼ାଃ ବାଗିକେଦ୍‌ତେ ସେନ୍‌ ପାରମ୍‌ୟାନାଏ ଓଡ଼ୋଃ ଆଲେକେ ବାଞ୍ଚାଅ କେଦ୍‌ଲେୟା।’ "

ଇମ୍‌ତା ଇସ୍ରାଏଲ୍‌ ହଡ଼କ ଇକ୍‌ଡ଼ୁମ୍‌ୟାନ୍‌ଲଃ ବହଃ ତିରୁବ୍‌କେଦ୍‌ତେ ଜହାର୍‌କିୟାକ। 28 ମୁଶା ଓଡ଼ୋଃ ହାରୁନ୍‌କେ ପ୍ରାଭୁ କାଜିକେଦ୍‌କିନ୍‌ ଲେକାଗି ଇସ୍ରାଏଲ୍‌ ହନ୍‌କ ସବେନ୍‌ କାମି ରିକାକେଦାକ।

29 ପ୍ରାଭୁ ଥାଲା ନୁବାଃ ନେଣ୍ଡା ଇମ୍‌ତା ରାଜ୍‌ଗାଦିରେ ଦୁବାକାନ୍‌ ଫାରୋ‌ଆଃ ମୁତ୍‌କୁଲ୍‌ ହନ୍‌ତାଃଏତେ ଏଟେଦ୍‌କେଦ୍‌ତେ ଜେହେଲ୍‌ରାଃ ନୁବାଃ ଅଡ଼ାଃରେ ତାଇକାନ୍‌ ହଡ଼କଆଃ ମୁତ୍‌କୁଲ୍‌ ହନ୍‌ ଜାକେଦ୍‌ ମିସାର୍‌ ଦିଶୁମ୍‌ରେନ୍‌ ସବେନ୍‌ ମୁତ୍‌କୁଲ୍‌ ହନ୍‌କକେ ଓଡ଼ୋଃ ଜାଁତୁକଆଃ ମୁତ୍‌କୁଲ୍‌ ହନ୍‌କକେ ଗଏଃକେଦ୍‌କଆଏ। 30 ଫାରୋ‌, ଆୟାଃ ଦାସିକ ଓଡ଼ୋଃ ମିସାର୍‌ରେନ୍‌ ହଡ଼କ ନୁବାଃରେ ବିରିଦ୍‌ୟାନାକ। ଓଡ଼ୋଃ ମିସାର୍‌ ଦିଶୁମ୍‌ରେ କାଉରିତାନ୍‌ଲଃ ରାନାଃ ହବାୟାନା, ଚିଆଃଚି ମିପିଆଦ୍‌ ସବେନ୍‌ ଅଡ଼ାଃରେ ଗନଏଃ ହବାକାନ୍‌ ତାଇକେନା, ନେ'ଲେକା ମିଆଁଦ୍‌ହ ଅଡ଼ାଃ କା ବାଗି ଅକ ଅଡ଼ାଃରେ ଗନଏଃ କା ହବା। 31 ଏନ୍‌ ନୁବାଃରେ ଫାରୋ‌ ମୁଶା ଓଡ଼ୋଃ ହାରୁନ୍‌କେ କେଡ଼ାକେଦ୍‌ତେ କାଜିକେଦ୍‌କିନା, "ଆବେନ୍‌ ଓଡ଼ୋଃ ଇସ୍ରାଏଲ୍‌ ହଡ଼କ ଅଡଙ୍ଗ୍‌କେଦ୍‌ତେ ଆଲେୟାଃ ହଡ଼କଆଃ ଥାଲାଏତେ ଅଡଙ୍ଗ୍‌ୟାନ୍‌ଲଃ ନିର୍‌ପେ। ଆବେନାଃ କାଜି ଲେକା ପ୍ରାଭୁଆଃ ସେୱା ରିକା ନାଗେନ୍ତେ ସେନଃପେ। 32 ଆବେନାଃ କାଜି ଲେକା ଆପେୟାଃ ମିଣ୍ଡି, ମେରମ୍‌ ଓଡ଼ୋଃ ଉରିଃକ୍‌କଆଃ ଗୋଟ୍‌ ସାବ୍‌କେଦ୍‌ତେ ସେନଃପେ ଓଡ଼ୋଃ ଆଇଙ୍ଗ୍‌କେ ହଗି ଆଶିଷ୍‌ ଏମାଇଙ୍ଗ୍‌ପେ।"

33 ମିସାର୍‌ରେନ୍‌ ହଡ଼କ ଇସ୍ରାଏଲ୍‌ ହଡ଼କକେ ଦିଶୁମ୍‌ଏତେ ଜାଲ୍‌ଦି କୁଲ୍‌କମ୍‌ ମେନ୍ତେ ହାର୍‌ବାରାଅକିୟାକ, ଚିଆଃଚି ଇନ୍‌କୁ କାଜିକେଦାକ, "କା'ରେଦ ଆବୁ ସବେନ୍‌କଆଃ ଗନଏଃ ହବାଅଃଆ।" 34 ଏନ୍ତେ ସୋଡ଼ା କା ମେସାକେଦ୍‌ତେ ସୁଇଦାକାନ୍‌ ମାଏଦାକେ ହଡ଼କ ଆକଆଃ ସୁଇଦ୍‌ତାନ୍‌ ଥାଡ଼ିକକେ ଲିଜାଃରେ ତଲ୍‌ ବିହୁର୍‌କେଦ୍‌ଲଃ ତାରାନ୍‌ରେ ଗଅଃକେଦ୍‌ତେ ଇଦିକେଦାକ। 35 ଓଡ଼ୋଃ ଇସ୍ରାଏଲ୍‌ ହଡ଼କ ମୁଶାରାଃ କାଜି ଲେକା ରୁପା, ସୋନା ଓଡ଼ୋଃ ଲିଜାଃ ମିସାର୍‌ରେନ୍‌ ହଡ଼କକେ ଆସିକେଦ୍‌କଆକ। 36 ପ୍ରାଭୁଆଃ ହରାତେ ମିସାର୍‌ରେନ୍‌ ହଡ଼କ ଇସ୍ରାଏଲ୍‌ ହଡ଼କକେ ଲିବୁଇ ଓଡ଼ୋଃ ମାଇନ୍‌କେଦ୍‌କଆକ। ଏନାତେ ଇସ୍ରାଏଲ୍‌ ହଡ଼କ ମିସାର୍‌ରେନ୍‌ ହଡ଼କକେ ଅକ୍‌ନାଃ ଆସିକେଦ୍‌କଆକ ଏନା ଏମାଦ୍‌କଆକ। ନେ'ଲେକାତେ ଇନ୍‌କୁ ମିସାର୍‌ରେନ୍‌ ହଡ଼କଆଃ ସାମ୍ପାତି ରେଃକ୍‌ ଇଦିକେଦାକ।

37 ଇସ୍ରାଏଲ୍‌ ହଡ଼କ ରାମିଷେଷ୍‌ତାଃଏତେ ସୁକ୍‌କୋତ୍‌ତେ ସେନ୍‌ ହରାକେଦାକ। ଇନ୍‌କୁ କୁଡ଼ି ଓଡ଼ୋଃ ସିଟିଆକକେ ବାଗିକେଦ୍‌ତେ ୬୦୦,୦୦୦ ହଡ଼କ ତାଇକେନା। 38 ଏଟାଃ ଏଟାଃ ଗାଦେଲ୍‌ ହଡ଼କ ଓଡ଼ୋଃ ପୁରାଃ ଥିମ୍ବା ଆସୁଲ୍‌ ଜାଁତୁ ଉରିଃକ୍‌, ମେରମ୍‌ ଓଡ଼ୋଃ ମିଣ୍ଡିକଆଃ ଗୋଟ୍‌ ଇନ୍‌କୁଲଃ ସେନଃୟାନାକ। 39 ଇନ୍‌କୁ ମିସାର୍‌ଏତେ ଆଉକାଦ୍‌ ସୁଇଦାକାନ୍‌ ମାଏଦାଲଃ ସାବାଃ ହଲଙ୍ଗ୍‌ ବାଇକେଦାକ। ଚିଆଃଚି ମିସାର୍‌ଏତେ ଜାଲ୍‌ଦିଗି ଅଡଙ୍ଗ୍‌ୟାନ୍‌ ହରାତେ ମାଏଦାରେ ସୋଡ଼ା ମେସାକେଦ୍‌ତେ ଜମେୟାଃ କାକ ବାଇ ଦାଡ଼ିୟାନା। 40 ଇସ୍ରାଏଲ୍‌ ହଡ଼କ ମିସାର୍‌ ଦିଶୁମ୍‌ରେ ୪୩୦ ବାରାଷ୍‌ ଜାକେଦ୍‌ ତାଇକେନାକ। 41 ୪୩୦ ବାରାଷ୍‌ ପୁରାୟାନ୍‌ ଇମ୍‌ତା ପ୍ରାଭୁଆଃ ହଡ଼କ ମିସାର୍‌ ଦିଶୁମ୍‌ଏତେ ଅଡଙ୍ଗ୍‌ୟାନାକ। 42 ମିସାର୍‌ ଦିଶୁମ୍‌ଏତେ ଇସ୍ରାଏଲ୍‌ ହଡ଼କକେ ଅଡଙ୍ଗ୍‌ ଆଉକ ନାଙ୍ଗ୍‌ ପ୍ରାଭୁ ନେ ନିଦା ଏୟନାକାନ୍‌ ଓଡ଼ୋଃ ଚିର୍ଗାଲାକାନ୍‌ ତାଇକେନାଏ। ଏନାମେନ୍ତେ ସବେନ୍‌ ଇସ୍ରାଏଲ୍‌ ହଡ଼କ ପିଢ଼ି ପିଢ଼ି ଜାକେଦ୍‌ ଏନ୍‌ ନିଦାକେ ପ୍ରାଭୁଆଃ ମାଇନଃ ନାଗେନ୍ତେ ପାହାମ୍‌ ଓଡ଼ୋଃ ମାନାତିଙ୍ଗ୍‌ ଲାଗାତିୟାଁଃ।

43 ପ୍ରାଭୁ ମୁଶା ଓଡ଼ୋଃ ହାରୁନ୍‌କେ କାଜିକେଦ୍‌କିନା, "ନେଆଁ ପାସ୍‌କା ପାରାବ୍‌ରେୟାଃ ନିୟାମ୍‌ ତାନାଃ, ଏଟାଃ ଦିଶୁମ୍‌ରେନ୍‌ ଜେତା ହଡ଼ ନେଆଁକେ ଜଜମ୍‌ କାଏ ଦାଡ଼ିୟା। 44 ମେନ୍‌ଦ ରୁପାତେ କିରିଙ୍ଗ୍‌କାନ୍‌ ଜେତା ହଡ଼ରାଃ ଦାସି, ଖାତ୍‌ନାଅକାନ୍‌ ରେଦ ଜଜମ୍‌ ଦାଡ଼ିୟାଏ। 45 ଏଟାଃ ଦିଶୁମ୍‌ରେନ୍‌ ଚାଏ ଏଟାଃକଆଃ ନାଲା କାମିକେଦ୍‌ତେ ଆସୁଲଃତାନ୍‌ ଜେତା ଦାସି ଏନା କାଏ ଜମ୍‌ ଦାଡ଼ିୟା। 46 ଏନା ମିଆଁଦ୍‌ ଅଡ଼ାଃରେଗି ଜମ୍‌ ହବାଅଃଆ, ଆପେ ମାସ୍‌ରାଃ କାଟିଃ ହଗି ବାହାରି ଆଲପେ ଅଡଙ୍ଗ୍‌ୟେଁଆ ଚାଏ ଜେତା ଜାଙ୍ଗ୍‌ ଆଲକା ଟହେଜଃକା। 47 ଇସ୍ରାଏଲ୍‌ରେନ୍‌ ସବେନ୍‌ ସାମାଜ୍‌ ଏନାକେ ମାନାତିୟେଁକାକ। 48 ଓଡ଼ୋଃ ଆପେଲଃ ଜେତାଏ ଏଟାଃ ଦିଶୁମ୍‌ରେନ୍‌ ହଡ଼ ପ୍ରାଭୁଆଃ ପାସ୍‌କା ପାରାବ୍‌ ମାନାତିଙ୍ଗ୍‌ ସାନାଙ୍ଗ୍‌ତାନ୍‌ ରେଦ, ଇନିୟାଃ ଅଡ଼ାଃରେନ୍‌ ସବେନ୍‌ ହଡ଼କ ଖାତ୍‌ନାଅଃକାକ। ତାବ୍‌ଦ ଇନିଃ ଆପ୍‌ନାଃ ଦିଶୁମ୍‌ରେନ୍‌ ହଡ଼ ଲେକା ନେ ପାରାବ୍‌ ମାନାତିଙ୍ଗ୍‌ ଦାଡ଼ିୟାଏ। ମେନ୍‌ଦ ଜେତାଏ କା ଖାତ୍‌ନାଅକାନ୍‌ନିଃ ଆଲକାଏ ଜମେକା। 49 ଆପ୍‌ନାଃ ଦିଶୁମ୍‌ରେଗି ଜାନାମ୍‌କାନ୍‌ ହଡ଼ ଓଡ଼ୋଃ ଆପେୟାଃ ଥାଲାରେ ତାଇନ୍‌ତାନ୍‌ ଏଟାଃ ଦିଶୁମ୍‌ରେନ୍‌ ହଡ଼ ନାଗେନ୍ତେହ ମିଆଁଦ୍‌ଗି ନିୟାମ୍‌ ତାଇନାଃ।" 50 ମୁଶା ଓଡ଼ୋଃ ହାରୁନ୍‌କେ ପ୍ରାଭୁ ଏମାକାଦ୍‌କିନ୍‌ ସବେନ୍‌ ଆନ୍‌ଚୁ ଇସ୍ରାଏଲ୍‌ରେନ୍‌ ହଡ଼କ ମାନାତିଙ୍ଗ୍‌କେଦାକ। 51 ଏନ୍‌ ହୁଲାଙ୍ଗ୍‌ଗି ପ୍ରାଭୁ ଇସ୍ରାଏଲ୍‌ ହଡ଼କକେ ମିସାର୍‌ ଦିଶୁମ୍‌ଏତେ ଅଡଙ୍ଗ୍‌ ଆଉକେଦ୍‌କଆ।