ହରାସେନ୍‌ପୁଥି 32

ସୋନାରେନ୍ ଦାମୁର୍‌

1 ମୁଶା ବୁରୁଏତେ ଆଡ଼୍‌ଗୁନ୍‌ତେୟାଃ ବିଲାମଃତାନ୍‌ ନେଲ୍‌କେଦ୍‌ତେ ହଡ଼କ ହାରୁନ୍‌ତାଃ‌ ହିଜୁଃକେଦ୍‌ତେ‌ କାଜିକିୟାଃକ, "ଆଲେକେ ଆୟାର୍‌ ନାଗେନ୍ତେ ମାହାପୁରୁ ବାଇମେ, ଚିୟାଃଚି ମିସାର୍‌ ଦିଶୁମ୍‌ଏତେ ମୁଶା ଆଲେକେ ଅଡଙ୍ଗ୍ ଆଉକେଦ୍‌ଲେୟା, ଇନିଃ ଚିକାୟାନା ଏନା କାଲେ ସାରିୟାଃ।" 2 ଏନ୍ତେ ହାରୁନ୍ ଇନ୍‌କୁକେ କାଜିକେଦ୍‌କଆ‌, "ଆପେୟାଃ କୁଡ଼ିକଆଃ ଓଡ଼ୋଃ କଡ଼ାହନ୍ କୁଡ଼ିହନ୍‌କଆଃ ଲୁତୁର୍‌ରେ ତୁସିଙ୍ଗ୍‌କାନ୍‌ ସୋନାକ ହଲେକ୍ କେଦ୍‌ତେ ଆଇଙ୍ଗ୍‌ତାଃ ଆଉୱେପେ।" 3 ଏନ୍ତେ ସବେନ୍ ହଡ଼କ ଆକଆଃ ଲୁତୁର୍‌ରାଃ‌ ତୁସିଙ୍ଗ୍‌କାନ୍‌ ସୋନାକେ ହଲେକ୍ କେଦ୍‌ତେ ହାରୁନ୍‌ତାଃ‌ ଆଉକେଦା। 4 ହାରୁନ୍ ଇନ୍‌କୁଆଃ ତିଃଇଏତେ ଏନ୍‌ ସବେନାଃ ଇଦିକେଦାଏ ଓଡ଼ୋଃ ହାଁତେୟାର୍‌ଲଃ ବାଇକାନ୍‌ ଛାଞ୍ଚ୍‌ରେ ଟାଘ୍‌ଲାଅକାନ୍‌ ସୋନା ଦୁଲ୍‌କେଦ୍‌ତେ ଦାମୁର୍‌ ବାଇକିୟାଏ।

ଏନ୍ତେ ହଡ଼କ କାଜିକେଦା, "ହେ ଇସ୍ରାଏଲ୍‌, ଅକ ମାହାପୁରୁ ଆପେକେ ମିସାର୍‌ ଦିଶୁମ୍ଏତେ ଅଡଙ୍ଗ୍ ଆଉକେଦ୍‌ପେୟାଏ, ଇନିଃ ନିଃଗି ତାନିଃ।"

5 ନେଆଁ ନେଲ୍‌କେଦ୍‌ତେ ହାରୁନ୍ ଇନିୟାଃ ଆୟାର୍‌ରେ ମିଆଁଦ୍ ବେଦି ବାଇକେଦା ଓଡ଼ୋଃ "ଗାପା ପ୍ରାଭୁ ନାଗେନ୍ତେ ପାରାବ୍ ହବାଅଃଆ ମେନ୍ତେ କାଜିକେଦ୍‌କଆ।" 6 ଓଡ଼ୋଃ ଇନ୍‌କୁ ସେତାଃ ଇଦାନ୍‌ରେ‌ ବିରିଦ୍‌କେଦ୍‌ତେ‌ ଉରୁବ୍‌ଦାଣେଁ‌ ରାକାବ୍‌କେଦା‌କ ଓଡ଼ୋଃ ମେନେସାରେୟାଃ ଦାନ୍‌ ଆଉକେଦାକ। ଏନ୍ତେ ଇନ୍‌କୁ ଜମ୍‌, ନୁଁ ନାଗେନ୍ତେକ ଦୁବ୍‌ୟାନା, ଏନ୍ତେ ତିଙ୍ଗୁକେଦ୍‌ତେ ସୁସୁନ୍‌ତାନ୍‌ଲଃ ଏତ୍‌କାନ୍‌ ରିଜ୍‌ ରାଙ୍ଗ୍‌ରେକ ବୁଲ୍‌ୟାନା।

7 ଏନ୍ତେ ପ୍ରାଭୁ ପାର୍‌ମେଶ୍ଵାର୍‌ ମୁଶାକେ କାଜିକିୟା, "ନେ ବୁରୁଏତେ ଆଡ଼୍‌ଗୁନ୍‌ମେ ଆମାଃ ହଡ଼କ ଅକନ୍‌କ‌କେ‌ ମିସାର୍‌ ଦିଶୁମ୍‌ଏତେ ଅଡଙ୍ଗ୍‌ ଆଉକାଦ୍‌କ‌ଆମ୍‌ ଇନ୍‌କୁ ପୁରାଃଗି ଏତ୍‌କାନ୍‌କାନାକ। 8 ଆଇଙ୍ଗ୍‌ ଇନ୍‌କୁକେ ଅକ ହରା ଅତଙ୍ଗ୍‌ନାଙ୍ଗ୍‌ ଆଚୁକାଦ୍‌କ ତାଇକେନାଇଙ୍ଗ୍‌, ଏନାକେ ଇନ୍‌କୁ ଜାଲ୍‌ଦିଗି ଆଦ୍‌କେଦ୍‌ତେ ଆକଆଃ ମିଆଁଦ୍ ସୋନାରାଃ ଦାମୁର୍‌ ବାଇକିୟାକ ଓଡ଼ୋଃ ଇନିଃକେ ସେୱାତାନ୍‌ଲଃ ଆୟାଃ ଆୟାର୍‌ରେ ଦାଣେଁ ରାକାବ୍‌ତାନା‌କ ଓଡ଼ୋଃ କାଜିତାନାକ, ‘ହେ ଇସ୍ରାଏଲ୍‌, ଅକ ମାହାପୁରୁ ଆପେକେ ମିସାର୍‌ ଦିଶୁମ୍‌ଏତେ ଅଡଙ୍ଗ୍‌ ଆଉକାଦ୍‌ପେୟା, ଇନିଃ ନିଃଗି ତାନିଃ।’ 9 ପ୍ରାଭୁ ମୁଶାକେ କାଜିକିୟା, ଆଇଙ୍ଗ୍‌ ଇନ୍‌କୁକେ ନେଲାକାଦ୍‌କ‌ଆ‌ଇଙ୍ଗ୍‌, ଇନ୍‌କୁ ‌ପୁରାଃ କେଟେଃଦ୍‌ ମନ୍‌ତାନ୍‌କ‌। 10 ନାହାଁଃ ଆଇଙ୍ଗ୍‌କେ ବାଗିତାଇଙ୍ଗ୍‌ମେ ନିକୁଆଃ ବିରୁଧ୍‌ରେ ଆଇଁୟାଃ ଖିସ୍‌ ପୁରାଃଗି ହବାଅଃତାନା, ନିକୁକେ ଆଇଙ୍ଗ୍‌ ଜିଅନ୍‌କଆଇଙ୍ଗ୍‌। ମେନ୍‌ଦ ଆଇଙ୍ଗ୍‌ ଆମାଃ କିଲିଏତେ ମିଆଁଦ୍‌ ଜାତି ଅଡଙ୍ଗ୍‌କଆଇଙ୍ଗ୍‌।"

11 ଏନ୍ତେ ମୁଶା ପ୍ରାଭୁ ପାର୍‌ମେଶ୍ୱାର୍‌କେ ବିନ୍ତି‌କେଦ୍‌ତେ‌ କାଜିକିୟା, "ହେ ପ୍ରାଭୁ, ଅକ ହଡ଼କକେ ଆମ୍ ଆମାଃ ପୁରାଃ ପେଡ଼େଃତେ ଓଡ଼ୋଃ ପେଡ଼େୟାନ୍ ତିଃଇତେ ମିସାର୍‌ ଦିଶୁମ୍‌ଏତେ ଅଡଙ୍ଗ୍‌ ଆଉକେଦ୍‌କ‌ଆମ୍‌, ଆମାଃ ଏନ୍‌ ହଡ଼କ ନାଗେନ୍ତେ ଚିନାଃମେନ୍ତେ ପୁରାଃଗି ଖିସ୍ଅଃତାନାମ୍‌ ? 12 ଆମ୍ ଆମାଃ ଜୁଲ୍‌ତାନ୍‌ ଖିସ୍ ବାଗିତାମ୍ ଓଡ଼ୋଃ ଆମାଃ ହଡ଼‌କ‌ଆ‌ଃ ଏତ୍‌କାନ୍‌ଆଃ‌ ଛାମାଏମେ କା’ରେଦ ମିସାର୍‌ ଦିଶୁମ୍‌ରେନ୍‌କ ଇନ୍‌କୁକେ ଜିଅନଃ‌ନାଙ୍ଗ୍‌ ବୁରୁରେ ଓଡ଼ୋଃ ନେ ଅତେ ଦିଶୁମ୍‌ଏତେ ଆତମ୍ ଚାବା ନାଗେନ୍ତେ ଇନିଃ ଏତ୍‌କାନ୍‌ ଉଡ଼ୁଃତେ ଅଡଙ୍ଗ୍‌ ଆଉକାଦ୍‌କଆ ମେନ୍ତେ କାଜିୟା। 13 ଆମ୍ ଆବ୍ରାହାମ୍‌, ଇସାକ୍‌ ଓଡ଼ୋଃ ଯାକୁବ୍‌କେ‌ ପାହାମ୍‌କମେ‌, ଆମ୍‌ଗି ଇନ୍‌କୁକେ ବାନାର୍‌ସା କାଜିତେ ଆଇଙ୍ଗ୍‌ ଆପେୟାଃ କିଲିକେ ସିର୍ମା‌ରେନ୍‌ ଇପିଲ୍‌କ‌ ଲେକା ପସାୟା ଓଡ଼ୋଃ କାଜିକାଦ୍ ନେ ଗଟା ଦିଶୁମ୍ ଆପେୟାଃ କିଲିରେନ୍‌କ‌କେ‌ ଏମାକ‌ଆ‌ ଓଡ଼ୋଃ ଏନା ଜାନାଅ ଜାକେଦ୍ ଆପେୟାଃ ଆକ୍‌ତେୟାର୍‌ରେ‌ ତାଇନାଃ ମେନ୍ତେ କାଜିୟା‌କାଦାମେ‌।" 14 ଏନାମେନ୍ତେ ପ୍ରାଭୁ ଆୟାଃ ହଡ଼କ‌କେ ଜିଅନ୍‌କ‌ଆ‌ ମେନ୍ତେ କାଜିକାଦ୍‌ କାଜି ନାଗେନ୍ତେ ହେୟାତିଙ୍ଗ୍‌କେଦା‌।

15 ମୁଶା ହେତା ରୁହାଡ଼୍‌କେଦ୍‌ତେ‌ ବୁରୁଏତେ ଆଡ଼୍‌ଗୁୟାନା ଓଡ଼ୋଃ ତିଃ‌ଇ‌ରେ‌ ଏନ୍ ଆନ୍‌ଚୁ ବାରାନ୍ ଦିରି ପାଟାରେ ଅଲାକାନ୍‌ ତାଇକେନା ଓଡ଼ୋଃ ଏନାରାଃ ବାରାନ୍‌ସାଃ‌ ଅନଲ୍ ତାଇକେନା। 16 ଓଡ଼ୋଃ ଏନ୍ ଦିରି ପାଟା ପାର୍‌ମେଶ୍ୱାର୍‌ଗି ବାଇକେଦା ଓଡ଼ୋଃ ଦିରି ପାଟାରେ ଅଲାକାନ୍ ଅନଲ୍ ପାର୍‌ମେଶ୍ୱାର୍‌ଆଃ ତାଇକେନା।

17 ଯିହୋଶୁୟ ହଡ଼କଆଃ କାଉରି ଆୟୁମ୍‌କେଦ୍‌ତେ‌ ମୁଶାକେ କାଜିକିୟା, "ଡେରାରେ ମାପାଃତୁପୁଇଙ୍ଗ୍‌ ଲେକା ଆୟୁମଃ ତାନାଃ।"

18 ମୁଶା କାଜିରୁହାଡ଼୍‌କିୟା, "ନେ କାଉରି ଜିତାଅୟାନ୍‌କ‌ଆ‌ଃ ଚାଏ ହାରାଅୟାନ୍‌କ‌ଆ‌ଃ ନାହାଁଲାଃ ମେନ୍‌ଦ ଆଇଙ୍ଗ୍‌ ନେଆଁ ଦୁରାଙ୍ଗ୍‌ ତାନ୍‌କ ଲାବ୍‌ଜା ଆୟୁମ୍‌ ତାନାଇଙ୍ଗ୍‌।"

19 ଚିମ୍‌ତାଙ୍ଗ୍‌ ମୁଶା ଡେରାତାଃ ନାଡ଼େଃୟାନ୍‌ଚି ଏନ୍ ସୋନାରାଃ ଦାମୁର୍‌ ଓଡ଼ୋଃ ସୁସୁନ୍‌ତାନ୍‌ ହଡ଼କକେ ନେଲ୍‌କେଦ୍‌କଆ, ଇମ୍‌ତାଙ୍ଗ୍‌ ଖିସ୍‌ତେ ଜୁଲ୍‌ୟାନା ଓଡ଼ୋଃ ତିଃଇରେ ସାବାକାଦ୍‌ ଏନ୍‌ ବାରାନ୍ ଦିରି ପାଟାକେ ଲାତାର୍‌ତେ ହୁଦ୍‌ମାକେଦା ଓଡ଼ୋଃ ଏନା ବୁରୁ ଲାତାର୍‌ରେ‌ ଟୁକ୍‌ଡ଼ା ଟୁକ୍‌ଡ଼ାୟାନା। 20 ଓଡ଼ୋଃ ଇନ୍‌କୁଆଃ ବାଇୟାକାନ୍ ଦାମୁର୍‌କେ ସେଙ୍ଗେଲ୍‌ରେ ଉରୁବ୍‌କିୟା ଓଡ଼ୋଃ ରିଦ୍‌ଗୁଣ୍ଡାକେଦ୍‌ତେ‌ ଦାଆଃ ଚେତାନ୍‌ରେ ହୁରାଙ୍ଗ୍‌କିୟା ଓଡ଼ୋଃ ଇସ୍ରାଏଲ୍‌କକେ ଏନା ଆନୁକେଦ୍‌କ‌ଆ‌। 21 ମୁଶା ହାରୁନ୍‌କେ କାଜିକିୟା, "ଇନ୍‌କୁ ଆମାଃ ଚିକାନ୍‌ ଗୁହ୍ନାଁ ରିକାକେଦାକ ଯେ, ଆମ୍ ଇନ୍‌କୁକେ ନିମିନ୍ ମାରାଙ୍ଗ୍‌ ପାପ୍‌ରେ ଉୟୁଃକେଦ୍‌କ‌ଆମ୍‌ ?"

22 ହାରୁନ୍ କାଜିରୁହାଡ଼୍‌କିୟାଏ, "ହେ ଆଇଁୟାଃ ଗମ୍‌କେ ଆଲମ୍ ‌ଖିସ୍ଆଇଙ୍ଗ୍‌, ନେ ହଡ଼କ ଏତ୍‌କାନ୍‌ଗି ଉଡ଼ୁଃୟା ଏନା ଆମ୍ ସାରିୟାଃମେ। 23 ଓଡ଼ୋଃ ଇନ୍‌କୁ କାଜିକେଦିୟାଁକ, ‘ଆଲେୟାଃ ଆୟାର୍‌ ଆୟାର୍‌ ସେନ୍‌ ନାଗେନ୍ତେ ମିଆଁଦ୍ ମାହାପୁରୁ ବାଇମେ, ଚିଆଃଚି ଅକ ହଡ଼ ଆଲେକେ ମିସାର୍‌ ଦିଶୁମ୍‌ଏତେ ଅଡଙ୍ଗ୍‌ ଆଉକେଦ୍‌ଲେୟା, ଏନ୍‌ ମୁଶାରାଃ ଚିକ୍‌ନାଃ ଚିକାୟାନା, ଆଲେ କାଲେ ସାରିୟା।’ 24 ଏନ୍ତେ ଆଇଙ୍ଗ୍‌ ଇନ୍‌କୁକେ କାଜିକେଦ୍‌କଆ‌ଇଙ୍ଗ୍‌, ଆପେତାଃ ସୋନାରାଃ ତୁସିଙ୍ଗ୍‌ତେୟାଃ ମେନାଃ, ଏନା ହଲେକ୍ କେଦ୍‌ତେ ଆଇଙ୍ଗ୍‌ତାଃ ଆଉୱେପେ ଓଡ଼ୋଃ ଇନ୍‌କୁତାଃଏତେ ଆଉକେଦ୍‌ଲଃ ସେଙ୍ଗେଲ୍‌ରେ ‌ଉୟୁଃକେଦା‌ ଓଡ଼ୋଃ ଏନାଏତେ ମିଆଁଦ୍ ଦାମୁର୍‌ ଅଡଙ୍ଗ୍‌ୟାନାଏ।"

25 ଓଡ଼ୋଃ ମୁଶା ହଡ଼କକେ କାଜି କା ମାନାତିଙ୍ଗ୍‌ତାନ୍‌ଲଃ ଆପ୍‌ନାଃ ଇଛାସାନାଙ୍ଗ୍‌ ଲେକା ଜୀଦାନ୍‌ ବିତାଅତାନ୍‌ ଲେକା ନେଲ୍‌କେଦ୍‌କଆ, ଚିଆଃଚି ହାରୁନ୍‌ ଇନ୍‌କୁକେ ବାଇରିକଆଃ ଥାଲାରେ ଲାନ୍ଦାଅଃ ଲେକା ବାଇକେଦ୍‌ତେ ବାଗିକାଦ୍‌ ତାଇକେନାକ। 26 ଓଡ଼ୋଃ ମୁଶା କୁମ୍ବାରାଃ ଦୁହାର୍‌ତାଃରେ ତିଙ୍ଗୁକେଦ୍‌ତେ କାଜିକେଦା, "ଅକଏ ପ୍ରାଭୁସାଃରେ ମେନାଇୟା, ଇନିଃ ଆଇଁୟାଃ ହେପାଦ୍‌ତେ ହିଜୁଃକା !" ଏନା ଆୟୁମ୍‌କେଦ୍‌ତେ ସବେନ୍‌ ଲେବୀ କିଲିରେନ୍ ଆୟାଃତାଃ ହୁଣ୍ଡିୟାନାକ। 27 ମୁଶା ଇନ୍‌କୁକେ କାଜିକେଦ୍‌କଆ, "ଇସ୍ରାଏଲ୍‌କଆଃ ପ୍ରାଭୁ ପାର୍‌ମେଶ୍ୱାର୍‌ ନେ’ଲେକା କାଜିତାନାଏ, ଆପେ ମିପିହୁଡ଼୍‌ ତାରାଉଡ଼ି ସାବେପେ ଓଡ଼ୋଃ କୁମ୍ବାରାଃ ନେ’ସାଃଏତେ ହାନ୍‌ସାଃ ଜାକେଦ୍‌ ସେନ୍‌କେଦ୍‌ତେ ଆପେୟାଃ ହାଗା, ଗାତି ଓଡ଼ୋଃ ହୋପର୍‌ଜାପାଃନିଃକେ ମାଆଃ ଗ‌ଏଃକପେ‌।" 28 ଏନ୍ତେ ଲେବୀ କିଲିରେନ୍ ହନ୍‌କ ମୁଶାରାଃ କାଜିଲେକା ରିକାକେଦାକ ଓଡ଼ୋଃ ଏନ୍ ହୁଲାଙ୍ଗ୍ ଆପି ହାଜାର୍ ହଡ଼କ ଗ‌ଏଃ‌ୟାନା‌। 29 ଓଡ଼ୋଃ ମୁଶା କାଜିକେଦା, "ଆପେ ଆପେୟାଃ ହନ୍ ଓଡ଼ୋଃ ହାଗାକଆଃ ବିରୁଧ୍‌ରେ ତାଇନ୍‌କେଦ୍‌ତେ ପ୍ରାଭୁ ନାଗେନ୍ତେ ସାଲାଅଃପେ, ଏନ୍ତାଃରେ ଇନିଃ ତିସିଙ୍ଗ୍‌ ଆପେକେ ଆଶିଷ୍‌ପେୟା।"

30 ଏଟାଃ ହୁଲାଙ୍ଗ୍ ମୁଶା ହଡ଼କକେ କାଜିକେଦ୍‌କଆ, "ଆପେ ପୁରାଃ ମାରାଙ୍ଗ୍ ଗୁହ୍ନାଁ ରିକାକାଦାପେ, ନାହାଁଃ ଆଇଙ୍ଗ୍‌ ପ୍ରାଭୁତାଃ ସେନଃ ତାନାଇଙ୍ଗ୍‌, ହବାସାକାଅଃଆ ଆଇଙ୍ଗ୍‌ ଆପେୟାଃ ପାପ୍‌ ନାଗେନ୍ତେ ହେୟାତିଙ୍ଗ୍‌ ରିକାଏୟାଇଙ୍ଗ୍‌।" 31 ଏନ୍ତେ ମୁଶା ପ୍ରାଭୁତାଃ ରୁହାଡ଼୍‌କେଦ୍‌ତେ କାଜିକିୟା, "ହାୟ, ନେ ହଡ଼କ ସୋନାରେନ୍‌ ମାହାପୁରୁ ବାଇକେଦ୍‌ତେ ପୁରାଃ ମାରାଙ୍ଗ୍ ପାପ୍‌ ରିକାକାଦାକ। 32 ଇମିନ୍‌ରେୟ ଦାୟାକେଦ୍‌ତେ ଇନ୍‌କୁଆଃ ପାପ୍‌ ଛାମାଏମେ, କା’ରେଦ ଆମ୍ ଆମାଃ ଅନଲ୍‌ ପୁଥିଏତେ ଆଇଁୟାଃ ନୁତୁମ୍‌ ମେଟାଅତାମ୍।"

33 ଏନାରେ ପ୍ରାଭୁ ମୁଶାକେ କାଜିକିୟା, "ଅକନ୍‌ ହଡ଼ ଆଇଁୟାଃ ବିରୁଧ୍‌ରେ ପାପ୍‌କାଦା ଇନିୟାଃ ନୁତୁମ୍‌କେ ଆଇଁୟାଃ ଅନଲ୍‌ ପୁଥିଏତେ ମେଟାଅତାଃଇଙ୍ଗ୍‌। 34 ନାହାଁଃ ଜୁ, ଆଇଙ୍ଗ୍‌ ଆମ୍‌କେ ଅକ ଠାୟାଦ୍‌ ବିଷାଏରେ କାଜିକାଦ୍‌ମାଇଙ୍ଗ୍‌, ଏନ୍ତାଃତେ ହଡ଼କକେ ସୁତୁଃ ଇଦିକମେ। ନେଲେମ୍ ଆଇଁୟାଃ ଦୁଁତ୍‌ ଆପେୟାଃ ଆୟାର୍‌ ଆୟାର୍‌ ସେନାଃଏ, ଏନ୍‌ରେୟ ଆଇଁୟାଃ ସାଜାଇ ଏମ୍‌ରାଃ ନେଣ୍ଡା ସେଟେର୍‌ ଇମ୍‌ତା ଆଇଙ୍ଗ୍‌ ଇନ୍‌କୁଆଃ ପାପ୍‌ରାଃ ସାଜାଇ ଏମାକଆଇଙ୍ଗ୍‌।"

35 ଓଡ଼ୋଃ ପ୍ରାଭୁ ଏନ୍ ହଡ଼କକେ ସାଜାଇକେଦ୍‌କ‌ଆ‌, ଚିଆଃଚି ଇନ୍‌କୁ ହାରୁନ୍ ବାଇକାଇ ଦାମୁର୍‌କେ ସେୱାକାଇ ତାଇକେନାକ।