ଯାଜାକ୍ କଆ ଲିଜାଃ
1 "ଆମ୍ ଆଇଁୟାଃ ଯାଜାକ୍ କାମି ନାଗେନ୍ତେ ଇସ୍ରାଏଲ୍ ହନ୍କଆଃ ଥାଲା ହେତେ ଆମାଃ ହାଗା ହାରୁନ୍କେ ଓଡ଼ୋଃ ଆୟାଃ ହନ୍ ନାଦବ୍, ଅବିହୁ, ଇଲିୟାଜାର୍ ଓଡ଼ୋଃ ଇଥାମର୍କେ ଆମାଃତାଃତେ ଆଉକୁମ୍। 2 ଆମାଃ ହାଗା ହାରୁନ୍ ସୁଗାଡ଼ାନ୍ ନେଲଃ ନାଙ୍ଗ୍ ଓଡ଼ୋଃ ମାଇନ୍ ନାମେ ନାଙ୍ଗ୍ ପାବିତାର୍ ଲିଜାଃ ବାଇୟେମେ। 3 ଓଡ଼ୋଃ ଆଇଙ୍ଗ୍ ଅକନ୍କକେ ସେଣାଁ ଓଡ଼ୋଃ ବୁଦ୍ଧିତେ ପେରେୟାକାଦ୍ କଆଇଙ୍ଗ୍, ଇନ୍କୁକେ କାଜିକମେ, ଆଇଁୟାଃ ଉଦ୍ଦେଶ୍ରେ ଯାଜାକ୍ କାମି ରିକା ନାଗେନ୍ତେ ହାରୁନ୍କେ ପାବିତାର୍ ନାଙ୍ଗ୍ ଇନ୍କୁ ଆୟାଃ ଲିଜାଃ ବାଇୟାକ। 4 ଇନ୍କୁ ବୁକୁପାଟା, ଏଫୋଦ୍, ଜିଲିଙ୍ଗ୍ ଚୋଗା ତୁସିଙ୍ଗ୍ ଲିଜାଃ, ବୁଟାଦାର୍ ଜାମା, ପାଗ୍ଡ଼ି ଓଡ଼ୋଃ ମାୟାଙ୍ଗ୍ ରେୟାଃ କାସ୍ନା, ନେ ସବେନ୍ ଲିଜାଃ ଇନ୍କୁ ବାଇୟା, ଆଇଁୟାଃ ନାଙ୍ଗ୍ ଯାଜାକ୍ କାମି ନାଗେନ୍ତେ ଆମାଃ ହାଗା ହାରୁନ୍ ଓଡ଼ୋଃ ଇନିୟାଃ ହନ୍କ ନାଙ୍ଗ୍ ଇନ୍କୁ ପାବିତାର୍ ଲିଜାଃ ବାଇୟା। 5 ଓଡ଼ୋଃ ଇନ୍କୁ ଏନାକେ ସୋନା ଓଡ଼ୋଃ ନିରାଲ୍ ଲିଜାଃରାଃ ନିଲିୟା, ବାଇଗିନିୟା, ଆରାଃ ଓଡ଼ୋଃ ପୁଣ୍ଡି ଲିଜାଃତେ ବାଇୟେକାକ।
6 "ଓଡ଼ୋଃ ନିଲିୟା, ବାଇଗିନିୟା, ଆରାଃ ଓଡ଼ୋଃ ଉଇଙ୍ଗ୍କାନ୍ ପୁଣ୍ଡି ନିରାଲ୍ ସୁତାମ୍ତେ ବୁଗିନ୍ ବାବାଇନିୟାଃ ହରାତେ ଏଫୋଦ୍ ଲିଜାଃକେ ବାଇୟା। 7 ଏନାରାଃ ବାରାନ୍ କଚାରେ ବାରିୟା ଗଅଃତେୟାଃ ବାଇୟେମେ ଏନା ଏଟାଃନିଃଲଃ ଜଡ଼େନ୍ ତାଇନ୍କା। 8 ଓଡ଼ୋଃ ଏନାରେୟାଃ ତେଙ୍ଗଃକାନ୍ କାସ୍ନା ଏନାକେ ତଲ୍ ନାଗେନ୍ତେ ନେ’ଲେକାନ୍ କାମି ଓଡ଼ୋଃ ଲିଜାଃତେ ବାଇକେଦ୍ତେ ଏନା ସୋନା, ନିଲିୟା, ବାଇଗିନିୟା, ଓଡ଼ୋଃ ଆରାଃ ଓଡ଼ୋଃ ଉଇଙ୍ଗ୍କାନ୍ ପୁଣ୍ଡି ନିରାଲ୍ ଲିଜାଃତେ ବାଇୟଃକା। 9 ଓଡ଼ୋଃ ବାରିୟା ଗୋମେଦକ୍ ଗନଙ୍ଗ୍ଆଁନ୍ ଦିରି ଇଦିକେଦ୍ତେ ଏନ୍ ଚେତାନ୍ରେ ଯାକୁବ୍ଆଃ ହନ୍କଆଃ ନୁତୁମ୍ ଖୋଦାକେଦ୍ତେ ଅଲେମେ। 10 ମିଆଦ୍ ଗନଙ୍ଗ୍ଆଁନ୍ ଦିରିରେ ତୁରିୟା ନୁତୁମ୍ ଆଡଃମିଆଦ୍ ଗନଙ୍ଗ୍ଆଁନ୍ ଦିରିରେ ସାରେୟାକାନ୍ ତୁରିୟା ନୁତୁମ୍ ଇନ୍କୁଆଃ କିଲିକଆଃ ଲେକା ଅଲେମେ। 11 ଗନଙ୍ଗ୍ଆଁନ୍ ଦିରିରେ ଖୋଦାକାମିନିଃ ଲେକା ଏନ୍ ବାରାନ୍ ଗନଙ୍ଗ୍ଆଁନ୍ ଦିରିରେ ଇସ୍ରାଏଲ୍ ହନ୍କଆଃ ନୁତୁମ୍ ଖୋଦାକେଦ୍ତେ ଅଲେମେ ଓଡ଼ୋଃ ଏନାକେ ସୋନାରେୟାଃ ଆକୁସିତେ ବିୟୁରେମେ। 12 ଓଡ଼ୋଃ ଇସ୍ରାଏଲ୍ ହନ୍କ ପାହାମେ ନାଗେନ୍ତେ ଏନ୍ ବାରିୟା ଗନଙ୍ଗ୍ଆଁନ୍ ଦିରିକେ ଏଫୋଦ୍ରାଃ ବାରାନ୍ ତାରାନ୍ରେ ଦହଏମେ ଓଡ଼ୋଃ ହାରୁନ୍ ପାହାମେ ନାଗେନ୍ତେ ପ୍ରାଭୁଆଃ ଆୟାର୍ରେ ଆୟାଃ ବାରାନ୍ ତାରାନ୍ରେ ଇନ୍କୁଆଃ ନୁତୁମ୍ ଗଗେକାଏ। 13 ଓଡ଼ୋଃ ସୋନାରେୟାଃ ଆକୁସି ବାଇୟେମେ। 14 ଓଡ଼ୋଃ ଫାର୍ଚି ସୋନାରେୟାଃ ଓଡ଼ୋଃ ଏନା ଗାଲାଙ୍ଗ୍ କାନ୍ ବାଏହାର୍ ଲେକା ବାରିୟା ସିକ୍ଲା ବାଇୟେମେ ଓଡ଼ୋଃ ଏନାକେ ଆକୁସିରେ ତୁସିଙ୍ଗ୍ଇମେ।
କୁଡ଼ାମ୍ରେୟାଃ ତୁସିଙ୍ଗ୍ ଲିଜାଃ
15 "ବିଚାର୍ ବୁକୁପାଟା ବାଇୟେମେ ଓଡ଼ୋଃ ଏଫୋଦ୍ ଲେକା ସୋନା, ନିଲିୟା, ବାଇଗିନିୟା, ଆରାଃ ଓଡ଼ୋଃ ଉଇଙ୍ଗ୍କାନ୍ ପୁଣ୍ଡି ନିରାଲ୍ ସୁତାମ୍ତେ ଏନା ବାଇୟେମେ। 16 ଏନାରାଃ ଚାରିଓସାଃ ମିଦ୍ ସାମାନ୍ଗି ତାଇକେନା ଓଡ଼ୋଃ ଇନିଃ ଏନାକେ ବାର୍ସା ଲାଟୁମ୍ କେଦ୍ତେ ମିଦ୍ ବିତା ଜିଲିଙ୍ଗ୍ ଓଡ଼ୋଃ ମିଦ୍ ବିତା ଚାକାର୍ ତାଇନ୍କା। 17 ଏନାରେ ଉପୁନିୟା ପାନ୍ତିରେ ଗନଙ୍ଗ୍ଆଁନ୍ ଦିରିତେ ବାଇୟେମେ। ପାହିଲା ପାନ୍ତିରେ ଚୁଣି, ପିତମଣି ଓଡ଼ୋଃ ମର୍କତ୍ ଗନଙ୍ଗ୍ଆଁନ୍ ଦିରି, 18 ଏଟାଃ ପାନ୍ତିରେ ପଦ୍ମରାଗ, ନୀଳକାନ୍ତ ଓଡ଼ୋଃ ହୀରକ ନୁତୁମ୍ ଗନଙ୍ଗାନ୍ ଦିରି, 19 ଆପି ପାନ୍ତିରେ ପେରୋଜ୍, ଯିସ୍ମ ଓଡ଼ୋଃ ଇନ୍ଦ୍ରନୀଳ୍ ମଣି; 20 ଓଡ଼ୋଃ ଉପୁନିୟା ପାନ୍ତିରେ ବୈଦୁର୍ଯ୍ୟ, ଗୋମେଦକ୍ ଗନଙ୍ଗ୍ଆଁନ୍ ଦିରି ଓଡ଼ୋଃ ସୁର୍ଯ୍ୟକାନ୍ତ, ନେ ସବେନାଃ ସୋନାତେ ଗୁତୁ ହବାଅଃକା। 21 ଯାକୁବ୍ଆଃ ମିପିଆଦ୍ ହନ୍କଆଃ ନୁତୁମ୍ ଲେକାତେ ଗେଲ୍ବାର୍ ଗନଙ୍ଗ୍ଆଁନ୍ ଦିରିରେ ମିପିଆଦ୍ ଖୋଦାକେଦ୍ତେ ତାଇନାଃ। ଏନା ଇସ୍ରାଏଲ୍ରେନ୍ ଗେଲ୍ବାର୍ କିଲିକଆଃ ନୁତୁମ୍ ଲେକାତେ ମିପିଆଦ୍ ଗନଙ୍ଗ୍ଆଁନ୍ ଦିରିରେ ମିପିଆଦ୍ ନୁତୁମ୍ ମୋହର୍ରେ ଖୋଦା ଲେକା ଖୋଦାକେଦ୍ତେ ତାଇନାଃ। 22 ଓଡ଼ୋଃ ବିଚାର୍ ବୁକୁପାଟା ନାଗେନ୍ତେ ଫାର୍ଚି ସୋନାରେୟାଃ ଗାଲାଙ୍ଗ୍କାନ୍ ସିକ୍ଲା ବାଇୟେମେ। 23 ବୁକୁପାଟା ନାଗେନ୍ତେ ସୋନାରାଃ ବାରିୟା ଗୋଲ୍ତେୟାଃ ବାଇୟେମେ ଓଡ଼ୋଃ ଏନ୍ ବାର୍ନାଃକେ ବୁକୁପାଟାରେୟାଃ ଚେତାନ୍ କଚାରେ ତୁସିଙ୍ଗ୍ୟେଁମେ। 24 ସୋନାରେୟାଃ ଗାଲାଙ୍ଗ୍କାନ୍ ସିକ୍ଲାକେ ବୁକୁପାଟା ଚେତାନ୍ରେ ଲାଗାକାନ୍ ବାରାନ୍ ଗୋଲ୍ତେୟାଃରେ ତୁସିଙ୍ଗ୍ୟେଁମେ। 25 ଗାଲାଙ୍ଗ୍କାନ୍ ଏନ୍ ବାରାନ୍ ସିକ୍ଲାକେ ଏନ୍ ବାରାନ୍ ଆକୁସିରେ ତୁସିଙ୍ଗ୍ୟେଁମେ ଓଡ଼ୋଃ ଏଫୋଦ୍ ଆୟାର୍ସାଃରେ ବାରାନ୍ ତାରାନ୍ରେ ତୁସିଙ୍ଗ୍ୟେଁମେ। 26 ଏନ୍ତେ ସୋନାରାଃ ବାରିୟା ଗୋଲ୍ତେୟାଃ ବାଇକେଦ୍ତେ ବୁକୁପାଟାରେୟାଃ ବାରାନ୍ କଚା ଏଫୋଦ୍ ଭିତାର୍ସାଃ ତୁସିଙ୍ଗ୍ୟେଁମେ। 27 ସୋନାରାଃ ଓଡ଼ୋଃ ବାରିୟା କାଡ଼ି ବାଇକେଦ୍ତେ ଏଫୋଦ୍ ଲିଜାଃରାଃ ବାରିୟା କାସ୍ନା ଲାତାର୍ରେ ଓଡ଼ୋଃ ଏଫୋଦ୍ରାଃ ସାମ୍ନାଙ୍ଗ୍ରେ ଜଡ଼େନ୍ ଠାୟାଦ୍ରେ କାସ୍ନା ଚେତାନ୍ରେ ତୁସିଙ୍ଗ୍ୟେଁମେ। 28 ବୁକୁପାଟାରେୟାଃ ବାରାନ୍ ଗୋଲ୍ତେୟାଃକେ ଏଫୋଦ୍ରାଃ ବାରାନ୍ ଗୋଲ୍ତେୟାଃଲଃ ଉଇଙ୍ଗ୍କାନ୍ ନିଲିୟା ସୁତାମ୍ତେ ତଲେମେ, ନେ’ଲେକାତେ ଏଫୋଦ୍ରାଃ କାସ୍ନା ଚେତାନ୍ରେ ତାଇନାଃ ଓଡ଼ୋଃ ଏନା ଏଫୋଦ୍ ହେତେ କା ହିଗାଡ଼୍ଅଃଆ।
29 "ଚିମ୍ତାଙ୍ଗ୍ ହାରୁନ୍ ପାବିତାର୍ ଠାୟାଦ୍ରେ ବଲଃ ଇମ୍ତାଙ୍ଗ୍ ପ୍ରାଭୁଆଃ ସାମ୍ନାଙ୍ଗ୍ରେ ପାହାମ୍ ନାଗେନ୍ତେ ଆୟାଃ କୁଡ଼ାମ୍ରେ ବିଚାର୍ ବୁକୁପାଟାରେ ଇସ୍ରାଏଲ୍ ହନ୍କଆଃ ସବେନ୍ ନୁତୁମ୍ ମନ୍ସୁରୁଦ୍ରେ ଗଅଃଏକା। 30 ଓଡ଼ୋଃ ବିଚାର୍ ବୁକୁପାଟାରେ ଉରିମ୍ ଓଡ଼ୋଃ ତୁମିମ୍କେ ଦହେମେ, ଚିମ୍ତାଙ୍ଗ୍ ହାରୁନ୍ ପ୍ରାଭୁଆଃ ସାନ୍ମାଙ୍ଗ୍ରେ ବଲଃ ଇମ୍ତାଙ୍ଗ୍ ଏନା ଇନିୟାଃ କୁଡ଼ାମ୍ରେ ତାଇନ୍କା ଓଡ଼ୋଃ ନେଲେକା ପ୍ରାଭୁଆଃ ସାନ୍ମାଙ୍ଗ୍ରେ ହାରୁନ୍ ଇସ୍ରାଏଲ୍ ହନ୍କଆଃ ବିଚାର୍ ଆୟାଃ କୁଡ଼ାମ୍ରେ ଜାନାଅ ତାଇନ୍କା।
ଯାଜାକ୍କଆଃ ଏଟାଃ ଲିଜାଃ
31 "ଏଫୋଦ୍ରାଃ ଜିଲିଙ୍ଗ୍ ଚୋଗା ଲିଜାଃ ନିଲିୟା ରାଙ୍ଗ୍ରାଃ ବାଇୟେମେ। 32 ବହଃ ପାରମ୍ ନାଗେନ୍ତେ ଏନାରାଃ ଥାଲାରେ ମିଆଦ୍ ଉଣ୍ଡୁ ତାଇନ୍କା ଓଡ଼ୋଃ ଏନା ଆଲକା ଚେଚାଗଃ ନାଗେନ୍ତେ ଉଣ୍ଡୁରାଃ ଚାରିଓସାଃ ମେଡ଼େଦ୍ କୁର୍ତାରାଃ ଉଣ୍ଡୁ ଲେକା ତେଙ୍ଗଃକାନ୍ ବାଏହାର୍ତେ ବିୟୁରେମେ। 33 ଏନାରାଃ ଲାତାର୍ ଘେରାରେ ନିଲିୟା, ବାଇଗିନିୟା, ଓଡ଼ୋଃ ଆରାଃ ରାଙ୍ଗ୍ ଲିଜାଃତେ ଡାଲିମ୍ ବାଇୟେମେ ଓଡ଼ୋଃ ଏନାରେୟାଃ ଥାଲା ଥାଲାରେ ସୋନାରାଃ ଘାଣ୍ଟି ବାଇୟେମେ। 34 ମିଆଁଦ୍ ସୋନାରାଃ ଘାଣ୍ଟି, ମିଆଁଦ୍ ଡାଲିମ୍ ଏନ୍ତେ ଆଡଃମିଆଦ୍ ସୋନାରାଃ ଘାଣ୍ଟି, ଆଡଃମିଆଦ୍ ଡାଲିମ୍ ନେ’ଲେକାତେ ଲାତାର୍ ଘେରାରାଃ ଚାରିଓସାଃରେ ତାଇନ୍କା। 35 ଓଡ଼ୋଃ ସୁସାର୍ ଇମ୍ତାଙ୍ଗ୍ ହାରୁନ୍ ଏନା ତୁସିଙ୍ଗ୍ୟଃକାଏ ଓଡ଼ୋଃ ପାବିତାର୍ ଠାୟାଦ୍ ପ୍ରାଭୁଆଃ ସାନ୍ମାଙ୍ଗ୍ରେ ବଲଃ ଇମ୍ତାଙ୍ଗ୍ ଏନାରାଃ ସାଡ଼ି ଆୟୁମଃକା କା’ରେଦ ଗଜଃଆଏ।
36 "ଫାର୍ଚି ସୋନାରାଃ ମିଆଦ୍ ସାକାମ୍ ବାଇୟେମେ ଓଡ଼ୋଃ ମୋହର୍ରେ ଖୋଦାକାନ୍ ଲେକା ଏନ୍ ଚେତାନ୍ରେ ‘ପ୍ରାଭୁଆଃ ଉଦ୍ଦେଶ୍ରେ ପାବିତାର୍’ ମେନ୍ତେ ଖୋଦାକେଦ୍ତେ ଅଲେମେ। 37 ଏନାକେ ନିଲିୟା ସୁତାମ୍ତେ ମୁକୁଟ୍ରେ ଦହଏମେ ଓଡ଼ୋଃ ଏନା ମୁକୁଟ୍ ଚେତାନ୍ରେ ତାଇନ୍କା। 38 ଏନା ହାରୁନ୍ଆଃ ମଲଙ୍ଗ୍ରେ ତାଇନ୍କା ଓଡ଼ୋଃ ଚିମ୍ତା ଇସ୍ରାଏଲ୍ ହନ୍କ ଅକନ୍ ଦାଣେଁକେ ପାବିତାର୍ ଆଟ୍କାର୍କେଦ୍ତେ ଆକଆଃ ପାବିତାର୍ ଦାଣେଁ ରାକାବେୟାକ ଇମ୍ତା ଜେତାନ୍ ଗୁହ୍ନାଁ ହବାଅଃରେ ହାରୁନ୍ ଏନାକେ ଗଅଃଏକା ଓଡ଼ୋଃ ପ୍ରାଭୁଆଃ ସାନ୍ମାଙ୍ଗ୍ରେ ଇନ୍କୁ ସୁକୁଆନ୍ଗି ହବାଅଃଆକ ମେନ୍ତେ ଏନ୍ ସାକାମ୍ ହାରୁନ୍ଆଃ ମଲଙ୍ଗ୍ରେ ତାଇନ୍କା।
39 "କୁର୍ତାକେ ନିରାଲ୍ ସୁତାମ୍ତେ ଓଡ଼ୋଃ ମୁକୁଟ୍କେହଗି ନିରାଲ୍ ସୁତାମ୍ତେ ଓଡ଼ୋଃ କାସ୍ନାକେ ସୁଇଲଃ ରଅଃକେଦ୍ତେ ଗାଲାଙ୍ଗ୍କାନ୍ ଲେକା ବାଇୟେମେ।
40 "ହାରୁନ୍ଆଃ ହନ୍କ ମାଇନ୍ ନାମେ ନାଗେନ୍ତେ କୁର୍ତା, ମୁକୁଟ୍ ଓଡ଼ୋଃ କାସ୍ନା ବାଇୟେମେ। 41 ଏନ୍ତେ ଆମାଃ ହାଗା ହାରୁନ୍କେ ଓଡ଼ୋଃ ଆୟାଃ ହନ୍କକେ ଏନ୍ ଲିଜାଃ ତୁସିଙ୍ଗ୍କେଦ୍ ତାୟମ୍ ଇନ୍କୁକେ ଆଭିଷେକ୍କେଦ୍ତେ ଯାଜାକ୍ ଲେକା ଆଇଁୟାଃ ସୁନୁସାର୍ କାମି ରିକାନାଙ୍ଗ୍ ପାବିତାର୍କମ୍। 42 ଇନ୍କୁଆଃ ମାୟାଙ୍ଗ୍ ହେତେ ବୁଲୁ ଜାକେଦ୍ ହାରୁନ୍ଆଃ ନାଗେନ୍ତେ ଉନ୍ ଲିଜାଃରେୟାଃ ପାଇଜାମା ବାଇୟେମେ। 43 ହାରୁନ୍ ଓଡ଼ୋଃ ଇନିୟାଃ ହନ୍କ ନେପେଲ୍ କୁମ୍ବାରେ ବଲ ଇମ୍ତା ଚାଏ ପାବିତାର୍ ଠାୟାଦ୍ରେ ସୁସାର୍ ନାଗେନ୍ତେ ବେଦିତାଃରେ ହେପାଦଃ ଇମ୍ତା, ଇନ୍କୁ ଜେ’ଲେକା ଗୁହ୍ନାଁ ସାହାତିଙ୍ଗ୍ ହରାତେ ଆଲକାକ ଗଜଃକା ମେନ୍ତେ ନେ ଲିଜାଃ ତୁସେଙ୍ଗ୍ୟେଁନ୍କାକ। ନେଆଁ ହାରୁନ୍ ଓଡ଼ୋଃ ଆୟାଃ ହନ୍କଆଃ ଜାନାଅ ଜାନାଅରେୟାଃ ଆନ୍ଚୁ ତାନାଃ।
/images/a/WG5FS9VaSWVnVmV3VI8yP)
/images/a/a0208299-6f37-40a0-66e1-2576b9435f00)