1 ଏନ୍ତେ ପ୍ରାଭୁ ମୁଶାକେ କାଜିକିୟା, 2 "ଆମ୍‌ ଇସ୍ରାଏଲ୍‌ ହଡ଼କକେ କାଜିକମେ, ଆପେ ରୁହାଡ଼୍‌କେଦ୍‌ତେ ମିଗ୍‌ଦୋଲ୍‌ ଓଡ଼ୋଃ ସାମୁଦାର୍‌ ଥାଲା ପିହହିରୋତ୍‌ ଜାପାଃରାଃ ବାଲ୍‌ସଫୋନ୍‌ ଆୟାର୍‌ ସାମୁଦାର୍‌ ଗେନାରେ କୁମ୍ବା ବାଇୟେପେ। 3 ଏନାରେ ଫାରୋ ଉଡ଼ୁଃୟା, ଇସ୍ରାଏଲ୍‌ ହଡ଼କ ଦିଶୁମ୍‌ରେ ଓଡ଼ୋଃ ବିର୍‌ରେ ଆଦ୍‌ୟାନା। 4 ଆଇଙ୍ଗ୍‌ ଫାରୋରାଃ ମନ୍‌କେ କେଟେଦ୍‌ ରିକାୟା, ଏନାରେ ଇନିଃ ଆପେକେ ଅତଙ୍ଗ୍‌ପେୟା, ଓଡ଼ୋଃ ଆଇଙ୍ଗ୍‌ ଫାରୋ ଓଡ଼ୋଃ ଆୟାଃ ପାଲ୍‌ଟାନ୍‌କଆଃ ନାଗେନ୍ତେ ମାଇନାନ୍‌ ନାମେୟାଇଙ୍ଗ୍‌, ନେଆଁତେ ମିସାର୍‌ ହଡ଼କ ସାରିୟା ଆଇଙ୍ଗ୍‌ ପ୍ରାଭୁ ତାନିଙ୍ଗ୍‌।" ଏନ୍ତେ ଇନ୍‌କୁ ଏନ୍‌ଲେକା ରିକାକେଦା।

5 ଚିମ୍‌ତା ମିସାର୍‌ରେନ୍‌ ରାଜା ଫାରୋ ସାରିକେଦାଏ ଯେ ଇସ୍ରାଏଲ୍‌ ହଡ଼କ ନିର୍‌ୟାନାକ, ଫାରୋ ଓଡ଼ୋଃ ଆୟାଃ ଦାସିକଆଃ ମନ୍‌ ବାଦ୍‌ଲାଅୟାନା। ଇନ୍‌କୁ କାଜିକେଦାକ, "ଆଲେ ନେଆଁ ଚିନାଃ ରିକାକେଦାଲେ ? ଆଲେ ଇସ୍ରାଏଲ୍‌ ହଡ଼କକେ ବାଗିକେଦ୍‌ ହରାତେ ଆଲେୟାଃ ଦାସି ଲେକା ସୁନୁସାର୍‌ କାମି ରିକାତାନ୍‌ ହଡ଼କକେ ଆଦ୍‌କେଦ୍‌କଆଲେ।" 6 ଏନ୍ତେ ରାଜା ଆୟାଃ ଲାଡ଼ାଇ ଗାଡ଼ି ସେକାଡ଼୍‌ କେଦ୍‌ତେ ଆୟାଃ ହଡ଼କକେ ଗାତିରେ ଇଦି କେଦ୍‌କଆ। 7 ଇନିଃ ୬୦୦ ଲାଡ଼ାଇ ଗାଡ଼ି ସାଲାକେଦା ଓଡ଼ୋଃ ମିସାର୍‌କଆଃ ସବେନ୍‌ ଲାଡ଼ାଇ ଗାଡ଼ି ଓଡ଼ୋଃ ଏନାରେ ସିପାଇକକେ ଇଦିକେଦ୍‌କଆ। 8 ପ୍ରାଭୁ ମିସାର୍‌ରେନ୍‌ ରାଜା ଫାରୋରାଃ ମନ୍‌କେ କେଟେଦ୍‌କେଦ୍‌ ହରାତେ ଇନିଃ ବେଗାର୍‌ ବରତେ ଓଡ଼ୋଃ ପୁରାଃ ପେଡ଼େଃତେ ସେନଃତାନ୍‌ ଇସ୍ରାଏଲ୍‌ ହଡ଼କକେ ଅତଙ୍ଗ୍‌କେଦ୍‌କଆ। 9 ମିସାର୍‌ରେନ୍‌ ଫାରୋରାଃ ସବେନ୍‌ ସାଦମ୍‌ଗାଡ଼ି, ସାଦମ୍‌ରେ ଦୁବ୍‌କେଦ୍‌ତେ ଲାଡ଼ାଇ ପାଲ୍‌ଟାନ୍‌କ ଓଡ଼ୋଃ ସିପାହୀକ ଇସ୍ରାଏଲ୍‌ ହଡ଼କଆଃ ଦୟା ଦୟା ଅତଙ୍ଗ୍‌କେଦ୍‌ତେ ବାଲ୍‌ସଫୋନ୍‌ ହେପାଦ୍‌ରାଃ ଦରେୟା ଗେନା ଜାପାଃ ପିହହିରୋତ୍‌ତାଃ ଆକଆଃ କୁମ୍ବା ହେପାଦ୍‌ ସେଟେର୍‌ୟାନାକ।

10 ଇସ୍ରାଏଲ୍‌ ହଡ଼କ ଫାରୋ ଓଡ଼ୋଃ ମିସାର୍‌ରେନ୍‌ ହଡ଼କକେ ହିଜୁଃତେୟାଃ ନେଲ୍‌କେଦ୍‌ତେ ବରତାନ୍‌ଲଃ ପ୍ରାଭୁକେ ଦେଙ୍ଗା ନାଗେନ୍ତେ କେଡ଼ାକିୟାକ। 11 ଇନ୍‌କୁ ମୁଶାକେ କାଜିକିୟା, "ମିସାର୍‌ରେ ତପା ଗାଡ଼ା କା ତାଇକେନା ଜେ ଆମ୍‌ ନେ ବିର୍‌ରେ ଗଜଃ ନାଗେନ୍ତେ ଆଉ କାଦ୍‌ଲେୟାମେ ? ଆମ୍‌ ଆଲେକେ ନେଲେକା ରିକା ନାଗେନ୍ତେ ମିସାର୍‌ ହେତେ ଚିକା ନାଗେନ୍ତେ ଅଡଙ୍ଗ୍‌ ଆଉ କାଦ୍‌ଲେୟାମେ ? 12 ଆଲେ ଚିଆଃ ଆମ୍‌କେ ମିସାର୍‌ରେ କାଲେ କାଜିଲେମା ? ଆଲେକେ ମିସାର୍‌ରେ ମିସାର୍‌ ହଡ଼କଆଃ ଦାସି ଲେକା ସୁନୁସାର୍‌ କାମି ରିକା ନାଗେନ୍ତେ ବାଗିତାଲେମେ ଚିଆଃଚି ବିର୍‌ରେ ଗଜଃ ହେତେ ମିସାର୍‌ ହଡ଼କଆଃ ଦାସି ଲେକା ସୁନୁସାର୍‌ କାମି ଆଲେ ନାଗେନ୍ତେ ବୁଗିନ୍‌ ହବାଅଃଆ।"

13 ଏନ୍ତେ ମୁଶା କାଜିକେଦ୍‌କଆ, "ଆଲପେ ବରୟା, ପ୍ରାଭୁ ତିସିଙ୍ଗ୍‌ ଆପେକେ ଚିଲ୍‌କା ଜୀଉବାଞ୍ଚାଅପେୟା ଏନା ନେଲେପେ, ତିସିଙ୍ଗ୍‌ ଆପେ ମିସାର୍‌ରେନ୍‌ ହଡ଼କକେ ଚିଲ୍‌କା ନେଲ୍‌କତାନାପେ ଏନ୍‌ଲେକା ଆଡଃକାପେ ନେଲ୍‌କଆ। 14 ପ୍ରାଭୁ ପାର୍‌ମେଶ୍ୱାର୍‌ ଆପେ ନାଗେନ୍ତେ ଲାଡ଼ାଇୟାଃ, ଆପେ ହାପା ଗି ତାଇନ୍‌ପେ ଜେତ୍‌ନାଃ ଆଲପେ ରିକା।"

15 ପ୍ରାଭୁ ପାର୍‌ମେଶ୍ୱାର୍‌ ମୁଶାକେ କାଜିକିୟା, "ଆମ୍‌ ଆଇଙ୍ଗ୍‌କେ ଚିକା ନାଗେନ୍ତେ କେଡ଼ା ତାନାମ୍‌ ? ଇସ୍ରାଏଲ୍‌ ହନ୍‌କକେ କାଜିକମେ, ଇନ୍‌କୁ ଆୟୁର୍‌ ତେଗି ସେନଃକା। 16 ଓଡ଼ୋଃ ଆମ୍‌ ଆମାଃ ସଟା ରିମ୍‌କେଦ୍‌ତେ ସାମୁଦାର୍‌ ଚେତାନ୍‌ରେ ତିଃଇ ଜିଲିଙ୍ଗ୍‌ କେଦ୍‌ତେ ଏନା ବାର୍‌ ହିସା ତାମ୍‌, ଏନାରେ ଇସ୍ରାଏଲ୍‌ ହନ୍‌କ ସାମୁଦାର୍‌ ଥାଲା ରହଡ଼ ହରାରେ ସେନଃଆ। 17 ଆଇଙ୍ଗ୍‌ ମିସାର୍‌ ହଡ଼କଆଃ ମନ୍‌କେ କେଟେଦ୍‌କେଦ୍‌ତେ ଆପେୟା ତାୟମ୍‌ ତାୟମ୍‌ ସେନାଃକ ଏନ୍ତେ ଫାରୋ ଓଡ଼ୋଃ ଆୟାଃ ସବେନ୍‌ ପାଲ୍‌ଟାନ୍‌ ଓଡ଼ୋଃ ଲାଡ଼ାଇ ଗାଡ଼ିକେ ଚାଲାଅ ହରାତେ ଆଇଁୟାଃ ମାଇନାନ୍‌ ହବାଅଃଆ। 18 ଫାରୋ, ଆୟାଃ ସାଦମ୍‌ଗାଡ଼ି ଓଡ଼ୋଃ ସାଦମ୍‌ରେ ଦୁବ୍‌କେଦ୍‌ତେ ଲାଡ଼ାଇତାନ୍‌ ହଡ଼କକେ ହାରାଅ ହରାତେ ଆଇଁୟାଃ ମାଇନାନ୍‌ ହବାଅଃଆ ଇମ୍‌ତା ଆଇଙ୍ଗ୍‌ ପ୍ରାଭୁ ତାନିଙ୍ଗ୍‌ ମେନ୍ତେ ମିସାର୍‌ରେନ୍‌ ହଡ଼କ ସାରିୟା।"

19 ପାର୍‌ମେଶ୍ୱାର୍‌ଆଃ ଦୁଁତ୍‌ ଇସ୍ରାଏଲ୍‌କଆଃ ଆୟୁର୍‌ ସେନ୍‌ ତାଇକେନା ଇନ୍‌କୁଆ ତାୟମ୍‌ ୟାନାଏ ଓଡ଼ୋଃ ରିମିଲ୍‌ ଖୁଣ୍ଟୁ ଇନ୍‌କୁଆ ତାୟମ୍‌ରେ ତାଇନ୍‌ୟାନା। 20 ଏନ୍‌ ରିମିଲ୍‌ ଖୁଣ୍ଟୁ ମିସାର୍‌ ଓଡ଼ୋଃ ଇସ୍ରାଏଲ୍‌ ଥାଲାରେ ହିଜୁଃୟାନା, ଅକଆଃ ହରାତେ ନୁବାଃ ତାଇନ୍‌କେନା ମେନ୍‌ଦ ନୁବାଃକେ ମାର୍ସାଲ୍‌ କେଦାଏ, ଏନାମେନ୍ତେ ସବେନ୍‌ ନୁବାଃ ମିଆଦ୍‌ ଝୁଣ୍ଡ୍‌ ଓଡ଼ୋଃ ମିଆଦ୍‌ ଝୁଣ୍ଡ୍‌ କତାଃ କାକ ହିଜୁଃ ଦାଡ଼ିୟାନା।

21 ମୁଶା ଆୟାଃ ସଟା ସାମୁଦାର୍‌ ଚେତାନ୍‌ରେ ତିଃଇ ଜିଲିଙ୍ଗ୍‌ ହରାତେ ପ୍ରାଭୁ ପାର୍‌ମେଶ୍ୱାର୍‌ ସିଙ୍ଗିତୁରଃସାଃ ହେତେ ହୟ କେଦାଏ ଓଡ଼ୋଃ ସାମୁଦାର୍‌ ଦାଆଃ ବାର୍‌ ହିସା କେଦ୍‌ତେ ହରା ରହଡ଼୍‌ ହବାୟାନା। 22 ଓଡ଼ୋଃ ଇସ୍ରାଏଲ୍‌ ହନ୍‌କ ରହଡ଼୍‌ ହରାତେ ସାମୁଦାର୍‌ ଥାଲା ସେନଃୟାନା, ଓଡ଼ୋଃ ଜମ୍‌ତିଃଇ ସାଃ ଓଡ଼ୋଃ ଲେଙ୍ଗାତିଃଇ ସାଃ ଦାଆଃରାଃ କାଥି ଲେକା ହବାୟାନା। 23 ଏନ୍ତେ ମିସାର୍‌ରେନ୍‌କ ଇନ୍‌କୁଆଃ ତାୟମ୍‌ ତାୟମ୍‌ ସେନଃୟାନାକ ଓଡ଼ୋଃ ଫାରୋରାଃ ସବେନ୍‌ ଲାଡ଼ାଇ ଗାଡ଼ି, ସାଦମ୍‌ ଓଡ଼ୋଃ ଲାଡ଼ାଇ ଗାଡ଼ି ଚାଲାଅତାନ୍‌କ ଦରେୟାରେ ବଲୟାନାକ। 24 ସେତାଃ ଇଦାନ୍‌ରେ ପ୍ରାଭୁ ପାର୍‌ମେଶ୍ୱାର୍‌ ସେଙ୍ଗେଲ୍‌ ଓଡ଼ୋଃ ରିମିଲ୍‌ ଖୁଣ୍ଟୁ ହରାତେ ମିସାର୍‌ରେନ୍‌ ପାଲ୍‌ଟାନ୍‌କକେ ନେଲ୍‌କେଦ୍‌ତେ ଆକ୍‌ବାକାଅ ତାକୁଆଏ। 25 ଇନିଃ ନେ'ଲେକା ରିକାକେଦାଏ ଯେ, ଇନ୍‌କୁଆଃ ସାଦମ୍‌ଗାଡ଼ିରାଃ ଚାକାକ ଅଡଙ୍ଗ୍‌ଅଃ ତାଇକେନା ଓଡ଼ୋଃ ଇନ୍‌କୁ ତାର୍‌ସାର୍‌ ସାଦମ୍‌ଗାଡ଼ି ଚାଲାଅ ତାଇକେନାକ। ମିସାର୍‌ରେନ୍‌ ହଡ଼କ କାଜିକେଦା, "ଦଲା, ଇସ୍ରାଏଲ୍‌ ହଡ଼କତାଃଏତେ ନିରାଃବୁ ଚିଆଃଚି ପ୍ରାଭୁ ଇନ୍‌କୁଆଃସାଃରେ ତାଇକେଦ୍‌ତେ ମିସାର୍‌ରେନ୍‌ ହଡ଼କଆଃ ବିରୁଧ୍‌ରେ ଲାଡ଼ାଇତାନା।"

26 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ମୁଶାକେ କାଜିକିୟା, "ଆମ୍‌ ତିଃଇ ସାମୁଦାର୍‌ ଚେତାନ୍‌ରେ ଜିଲିଙ୍ଗ୍‌ ତାମ୍‌, ଓଡ଼ୋଃ ମିସାର୍‌ରେନ୍‌ କଆଃ ସବେନ୍‌ ସାଦମ୍‌ ଗାଡ଼ି ଓଡ଼ୋଃ ଲାଡ଼ାଇ ଗାଡ଼ି ଚାଲାଅତାନ୍‌ ହଡ଼କଆ ଚେତାନ୍‌ରେ ଦାଆଃ ଆଡଃମିସା ରୁହାଡ଼୍‌ ହିଜୁଃଆ।" 27 ଏନ୍ତେ ମୁଶା ଆୟାଃ ତିଃଇ ଦୋରେୟା ଚେତାନ୍‌ରେ ଜିଲିଙ୍ଗ୍‌କେଦା, ଓଡ଼ୋଃ ସେତାଃଲଃ ଦୋରେୟା ଚିଲ୍‌କା ତାଇକେନା ଏନ୍‌ଲେକା ହବାୟାନା ଓଡ଼ୋଃ ମିସାର୍‌ରେନ୍‌ ହଡ଼କ ରୁହାଡ଼୍‌କେଦ୍‌ତେ ନିର୍‌ତାନ୍‌ ଇମ୍‌ତା ପ୍ରାଭୁ ଇନ୍‌କୁକେ ଦୋରେୟା ଥାଲାରେ ହୁରାଙ୍ଗ୍‌ କେଦ୍‌କଆ। 28 ଦାଆଃ ଆଡଃମିସା ରୁହାଡ଼୍‌କେଦ୍‌ତେ ଇନ୍‌କୁଆ ସବେନ୍‌ ଲାଡ଼ାଇ ଗାଡ଼ି ଓଡ଼ୋଃ ସାଦମ୍‌ରେ ରାକାବ୍‌ ହଡ଼କକେ ଆତୁ ଇଦି କେଦ୍‌କଆ ଓଡ଼ୋଃ ଫାରୋଆଃ ଅକନ୍‌ ପାଲ୍‌ଟାନ୍‌କ ତାୟମ୍‌ ତାୟମ୍‌ ସାମୁଦାର୍‌ ଜାକେଦ୍‌ ବଲ କାନ୍‌କ ତାଇକେନା ଇନ୍‌କୁଆ ହେତେ ମିଆଦ୍‌ ହଗି କାକ ତାଇନ୍‌ୟାନା। 29 ମେନ୍‌ଦ ଇସ୍ରାଏଲ୍‌ ହନ୍‌କ ରହଡ଼୍‌ ହରାରେ ସାମୁଦାର୍‌ ଥାଲାରେ ସେନ୍‌ୟାନା, ଓଡ଼ୋଃ ଦାଆଃ ଇନ୍‌କୁଆ ଜମ୍‌ତିଃ ସାଃ ଓଡ଼ୋଃ ଲେଙ୍ଗା ତିଃଇ ସାଃ କାଥି ଲେକା ହବାୟାନା।

30 ନେ'ଲେକା ଏନ୍‌ ହୁଲାଙ୍ଗ୍‌ ଇସ୍ରାଏଲ୍‌ ହଡ଼କକେ ମିସାର୍‌ରେନ୍‌ ହଡ଼କଆଃ ତିଃଇଏତେ ପ୍ରାଭୁ ବାଞ୍ଚାଅ କେଦ୍‌କଆ ଓଡ଼ୋଃ ମିସାର୍‌ରେନ୍‌ ହଡ଼କକେ ଦରେୟା ଗେନାରେ ଗଜଃତେୟାଃ ଇସ୍ରାଏଲ୍‌କ ନେଲ୍‌ କେଦ୍‌କଆ। 31 ପ୍ରାଭୁ ପାର୍‌ମେଶ୍ୱାର୍‌ ମିସାର୍‌କଆଃ ଚେତାନ୍‌ରେ ଅକନ୍‌ ମାରାଙ୍ଗ୍‌ ପେଡ଼େଃ ରିକାକେଦାଏ, ଏନା ଇସ୍ରାଏଲ୍‌ ହଡ଼କ ନେଲ୍‌କେଦ୍‌ତେ ପାର୍‌ମେଶ୍ୱାର୍‌କେ ବରକିୟାକ ଓଡ଼ୋଃ ଆୟାଃ ଦାସି ମୁଶାକେ ବିଶ୍ୱାସ୍‌କିୟାକ।