1 ପାବିତାର୍‌ ଠାୟାଦ୍‌ରେ ସେୱା ନାଙ୍ଗ୍‌ ହଡ଼କ ପ୍ରାଭୁ ମୁଶାକେ ଆଚୁକାଇ ଲେକା ନିଲିୟା, ବାଇଗିନିୟା, ଆରାଃ ସୁତାମ୍‌ତେ ହାରୁନ୍‌ ନାଙ୍ଗ୍‌ ପାବିତାର୍‌ ଲିଜାଃ ବାଇକେଦା।

2 ଓଡ଼ୋଃ ଇନ୍‌କୁ ନିଲିୟା, ବାଇଗିନିୟା, ଆରାଃ, ଉଇଙ୍ଗ୍‌କାନ୍‌ ପୁଣ୍ଡି ନିରାଲ୍‌ ସୁତାମ୍‌ ଓଡ଼ୋଃ ସୋନାଲଃ ଏଫୋଦ୍‌ ଲିଜାଃ ବାଇକେଦା। 3 ଇନ୍‌କୁ ସୋନାକେ ଦାଲ୍‌କେଦ୍‌ତେ ପାତ୍‌ଲାକେଦା ଓଡ଼ୋଃ ଏନାରେ ନିଲିୟା, ବାଇଗିନିୟା, ଆରାଃ ଓଡ଼ୋଃ ପୁଣ୍ଡି ନିରାଲ୍‌ ସୁତାମ୍‌ ଉଇଙ୍ଗ୍‌ ନାଙ୍ଗ୍‌ ଏନାକେ ହାଦ୍‌କେଦା। 4 ଏଫୋଦ୍‌ ନାଗେନ୍ତେ ଏନାରାଃ ବାରାନ୍‌ କଚାରେ ଜଡ଼େନ୍‌ କେଦ୍‌ତେ ବାରିୟା ଗଅଃତେୟାଃ ବାଇକେଦା। 5 ପ୍ରାଭୁ ମୁଶାକେ ଆଚୁକାଇ ଲେକା ଏନାରେୟାଃ ତେଙ୍ଗଃକାନ୍‌ କାସ୍‌ନା ଏନାକେ ତଲ୍‌ ନାଗେନ୍ତେ ନେ'ଲେକାନ୍‌ କାମି ଓଡ଼ୋଃ ଲିଜାଃତେ ବାଇକେଦ୍‌ତେ ଏନା ସୋନା, ନିଲିୟା, ବାଇଗିନିୟା, ଓଡ଼ୋଃ ଆରାଃ ଓଡ଼ୋଃ ଉଇଙ୍ଗ୍‌କାନ୍‌ ପୁଣ୍ଡି ନିରାଲ୍‌ ଲିଜାଃତେ ବାଇକେଦା ଓଡ଼ୋଃ ଏଫୋଦ୍‌ଲଃ ମେସାକେଦା। 6 ଯାକୁବ୍‌ଆଃ ଗେଲ୍‌ବାର୍‌ ହନ୍‌କଆଃ ନୁତୁମ୍‌ ମୋହର୍‌ ଖୋଦା ଲେକା ବାରିୟା ଗୋମେଦକ୍‌ ଗନଙ୍ଗ୍‌ଆଁନ୍‌ ଦିରି ଚେତାନ୍‌ରେ ଖୋଦାକେଦ୍‌ତେ ଅଲ୍‌କେଦା। 7 ପ୍ରାଭୁ ମୁଶାକେ ଆଚୁକାଇ ଲେକା ଇନିଃ ଇସ୍ରାଏଲ୍‌ ହନ୍‌କ ପାହାମେ ନାଗେନ୍ତେ ଏନ୍‌ ବାରିୟା ଗନଙ୍ଗ୍‌ଆଁନ୍‌ ଦିରିକେ ଏଫୋଦ୍‌ରାଃ ବାରାନ୍‌ ତାରାନ୍‌ରେ ଦହକେଦା।

8 ଏନ୍ତେ ଇନିଃ ବୁକୁପାଟା ଏଫୋଦ୍‌ ଲେକା ସୋନା, ନିଲିୟା,ବାଇଗିନିୟା, ଆରାଃ ଓଡ଼ୋଃ ଉଇଙ୍ଗ୍‌କାନ୍‌ ପୁଣ୍ଡି ନିରାଲ୍‌ ସୁତାମ୍‌ତେ ବାଇକେଦା। 9 ଏନାରାଃ ଚାରିଓସାଃ ମିଦ୍‌ ସାମାନ୍‌ଗି ତାଇକେନା ଓଡ଼ୋଃ ଇନିଃ ଏନାକେ ବାର୍‌ସା ଲାଟୁମ୍‌ କେଦ୍‌ତେ ମିଦ୍‌ ବିତା ଜିଲିଙ୍ଗ୍‌ ଓଡ଼ୋଃ ମିଦ୍‌ ବିତା ଚାକାର୍‌ ଦହକେଦା। 10 ଏନାରାଃ ଉପୁନିୟା ପାନ୍ତିରେ ଗନଙ୍ଗ୍‌ଆଁନ୍‌ ଦିରି ଗୁତୁକାନ୍‌ ତାଇକେନା, ପାହିଲା ପାନ୍ତିରେ ଚୁଣି, ପିତମଣି ଓଡ଼ୋଃ ମର୍‌କତ୍‌ ଗନଙ୍ଗ୍‌ଆଁନ୍‌ ଦିରି, 11 ଏଟାଃ ପାନ୍ତିରେ ପଦ୍ମରାଗ, ନୀଳକାନ୍ତ ଓଡ଼ୋଃ ହୀରକ ନୁତୁମ୍‌ ଗନଙ୍ଗାନ୍‌ ଦିରି, 12 ଆପି ପାନ୍ତିରେ ପେରୋଜ୍‌, ଯିସ୍ମ ଓଡ଼ୋଃ ଇନ୍ଦ୍ରନୀଳ୍‌ ମଣି; 13 ଓଡ଼ୋଃ ଉପୁନିୟା ପାନ୍ତିରେ ବୈଦୁର୍ଯ୍ୟ, ଗୋମେଦକ୍‌ ଗନଙ୍ଗ୍‌ଆଁନ୍‌ ଦିରି ଓଡ଼ୋଃ ସୁର୍ଯ୍ୟକାନ୍ତ ମଣି ତାଇକେନା, ନେ ସବେନାଃ ସୋନାତେ ଗୁତୁକାନ୍‌ ତାଇକେନା। 14 ଯାକୁବ୍‌ଆଃ ମିପିଆଦ୍‌ ହନ୍‌କଆଃ ନୁତୁମ୍‌ ଲେକାତେ ମିପିଆଦ୍‌ ଗନଙ୍ଗ୍‌ଆଁନ୍‌ ଦିରି, ନେ'ଲେକା ଗେଲ୍‌ବାର୍‌ ଗନଙ୍ଗ୍‌ଆଁନ୍‌ ଦିରି ତାଇୟାନା ଓଡ଼ୋଃ ମୋହର୍‌ରେ ଖୋଦା ଲେକା ଗେଲ୍‌ବାର୍‌ କିଲିକଆଃ ମିପିଆଦ୍‌ ନୁତୁମ୍‌ ମିପିଆଦ୍‌ ଗନଙ୍ଗ୍‌ଆଁନ୍‌ ଦିରିରେ ଖୋଦାକେଦ୍‌ତେ ଅଲ୍‌ୟାନା। 15 ବିଚାର୍‌ ବୁକୁପାଟା ନାଗେନ୍ତେ ଫାର୍‌ଚି ସୋନାରେୟାଃ ଗାଲାଙ୍ଗ୍‌କାନ୍‌ ସିକ୍‌ଲା ବାଇକେଦା। 16 ବୁକୁପାଟା ନାଗେନ୍ତେ ସୋନାରାଃ ବାରିୟା ଗୋଲ୍‌ତେୟାଃ ବାଇୟେମେ ଓଡ଼ୋଃ ଏନ୍‌ ବାର୍‌ନାଃକେ ବୁକୁପାଟାରେୟାଃ ଚେତାନ୍‌ କଚାରେ ତୁସିଙ୍ଗ୍‌କେଦା। 17 ସୋନାରେୟାଃ ଗାଲାଙ୍ଗ୍‌କାନ୍‌ ସିକ୍‌ଲାକେ ବୁକୁପାଟା ଚେତାନ୍‌ରେ ଲାଗାକାନ୍‌ ବାରାନ୍‌ ଗୋଲ୍‌ତେୟାଃରେ ତୁସିଙ୍ଗ୍‌ୟେଁମେ। 18 ଗାଲାଙ୍ଗ୍‌କାନ୍‌ ଏନ୍‌ ବାରାନ୍‌ ସିକ୍‌ଲାକେ ଏନ୍‌ ବାରାନ୍‌ ଆକୁସିରେ ତୁସିଙ୍ଗ୍‌ୟେଁମେ ଓଡ଼ୋଃ ଏଫୋଦ୍‌ ଆୟାର୍‌ସାଃରେ ବାରାନ୍‌ ତାରାନ୍‌ରେ ତୁସିଙ୍ଗ୍‌କେଦା। 19 ଏନ୍ତେ ସୋନାରାଃ ବାରିୟା ଗୋଲ୍‌ତେୟାଃ ବାଇକେଦ୍‌ତେ ବୁକୁପାଟାରେୟାଃ ବାରାନ୍‌ କଚା ଏଫୋଦ୍‌ ଭିତାର୍‌ସାଃ ତୁସିଙ୍ଗ୍‌କେଦା। 20 ଇନ୍‌କୁ ସୋନାରାଃ ଓଡ଼ୋଃ ବାରିୟା କାଡ଼ି ବାଇକେଦ୍‌ତେ ଏଫୋଦ୍‌ ଲିଜାଃରାଃ ବାରିୟା କାସ୍‌ନା ଲାତାର୍‌ରେ ଓଡ଼ୋଃ ଏଫୋଦ୍‌ରାଃ ସାମ୍‌ନାଙ୍ଗ୍‌ରେ ଜଡ଼େନ୍‌ ଠାୟାଦ୍‌ରେ କାସ୍‌ନା ଚେତାନ୍‌ରେ ତୁସିଙ୍ଗ୍‌କେଦା। 21 ବୁକୁପାଟାରେୟାଃ ବାରାନ୍‌ ଗୋଲ୍‌ତେୟାଃକେ ଏଫୋଦ୍‌ରାଃ ବାରାନ୍‌ ଗୋଲ୍‌ତେୟାଃଲଃ ଉଇଙ୍ଗ୍‌କାନ୍‌ ନିଲିୟା ସୁତାମ୍‌ତେ ତଲ୍‌କେଦା, ନେ'ଲେକାତେ ଏଫୋଦ୍‌ରାଃ କାସ୍‌ନା ଚେତାନ୍‌ରେ ତାଇନାଃ ଓଡ଼ୋଃ ଏନା ଏଫୋଦ୍‌ ହେତେ କା ହିଗାଡ଼୍‌ଅଃଆ। ନେଆଁ ପ୍ରାଭୁ ମୁଶାକେ ଆଚୁକାଇ ଲେକାଗି ରିକାକେଦା।

22 ଏନ୍ତେ ଏଫୋଦ୍‌ରାଃ ଜିଲିଙ୍ଗ୍‌ ଚୋଗା ଲିଜାଃ ନିଲିୟା ରାଙ୍ଗ୍‌ରାଃ ବାଇକେଦା। 23 ବହଃ ପାରମ୍‌ ନାଗେନ୍ତେ ଏନାରାଃ ଥାଲାରେ ମିଆଦ୍‌ ଉଣ୍ଡୁ ତାଇନ୍‌କେନା ଓଡ଼ୋଃ ଏନା ଆଲକା ଚେଚାଗଃ ନାଗେନ୍ତେ ଉଣ୍ଡୁରାଃ ଚାରିଓସାଃ ସିଲେଇ ତାଇକେନା। 24 ଏନାରାଃ ଲାତାର୍‌ ଘେରାରେ ନିଲିୟା, ବାଇଗିନିୟା, ଓଡ଼ୋଃ ଆରାଃ ରାଙ୍ଗ୍‌ ଲିଜାଃତେ ଡାଲିମ୍‌ ବାଇକେଦାଏ, 25 ଓଡ଼ୋଃ ଫାର୍‌ଚି ସୋନାରାଃ ଘାଣ୍ଟି ବାଇକେଦ୍‌ତେ ଏନାରାଃ ଚାରିଓସାଃରେ ଡାଲିମ୍‌ରାଃ ଥାଲା ଥାଲାରେ ଡୁଙ୍ଗାକେଦା। 26 ମିଆଁଦ୍‌ ସୋନାରାଃ ଘାଣ୍ଟି ଓଡ଼ୋଃ ମିଆଁଦ୍‌ ଡାଲିମ୍‌ ଏନ୍ତେ ଆଡଃମିଆଦ୍‌ ସୋନାରାଃ ଘାଣ୍ଟି ଆଡଃମିଆଦ୍‌ ଡାଲିମ୍‌ ନେ'ଲେକାତେ ପ୍ରାଭୁ ଆଚୁକାଦ୍‌ ଲେକାଗି ମୁଶା ରିକାକେଦା।

27 ଏନ୍ତେ ଇନ୍‌କୁ ହାରୁନ୍‌ ଓଡ଼ୋଃ ଆୟାଃ ହନ୍‌କଆଃ ନାଗେନ୍ତେ ଉଇଙ୍ଗ୍‌କାନ୍‌ ନିରାଲ୍‌ ସୁତାମ୍‌ତେ କୁର୍ତା, 28 ପୁଣ୍ଡି ନିରାଲ୍‌ ସୁତାମ୍‌ତେ ଉଇଙ୍ଗ୍‌କାନ୍‌ ପାଗ୍‌ଡ଼ି ଓଡ଼ୋଃ ଉନ୍‌ରାଃ ପାଇଜାମା ବାଇକେଦା। 29 ପ୍ରାଭୁ ମୁଶାକେ କାଜିକିଃ ଲେକା, ଉଇଙ୍ଗ୍‌କାନ୍‌ ପୁଣ୍ଡି, ନିଲିୟା, ବାଇଗିନିୟା, ଆରାଃ ନିରାଲ୍‌ ସୁତାମ୍‌ତେ ସୁଇଲଃ ରଅଃକେଦ୍‌ତେ ମିଆଁଦ୍‌ କାସ୍‌ନା ବାଇକେଦା। 30 ଫାର୍‌ଚି ସୋନାତେ ମୁକୁଟ୍‌ରାଃ ସାକାମ୍‌ ବାଇକେଦ୍‌ତେ ଏନାରେ ମୋହର୍‌ ଖୋଦା ଲେକା ଏନ୍‌ ଚେତାନ୍‌ରେ ଖୋଦାକେଦ୍‌ତେ ନେ'ଲେକା ଅଲ୍‌ୟାନା, "ପ୍ରାଭୁଆଃ ଉଦ୍ଦେଶ୍‌ରେ ପାବିତାର୍‌।" 31 ପ୍ରାଭୁ ମୁଶାକେ କାଜିକିଃ ଲେକା, ଏନାକେ ମୁକୁଟ୍‌ ଚେତାନ୍‌ରେ ତାଇନଃ ନାଗେନ୍ତେ ନିଲିୟା ସୁତାମ୍‌ତେ ତଲ୍‌କେଦା।

32 ନେଲେକା ନେପେଲ୍‌ କୁମ୍ବାରାଃ ସବେନ୍‌ କାମି ଚାବାୟାନା ଓଡ଼ୋଃ ଇସ୍ରାଏଲ୍‌ ହନ୍‌କ ପ୍ରାଭୁ ମୁଶାକେ କାଜିଲେକା,ସବେନାଃ ବାଇକେଦା। 33 ଏନ୍ତେ ଇନ୍‌କୁ ଏନ୍‌ କୁମ୍ବାକେ ମୁଶାତାଃ ଆଉକେଦାକ ଓଡ଼ୋଃ କୁମ୍ବା ଏନାରାଃ ସବେନ୍‌ ବାସାନ୍‌, ଆକୁସି, ତାକ୍‌ତା, ଅର୍ଗଡ଼୍‌, ଖୁଣ୍ଟୁ ଓଡ଼ୋଃ କାଟା, 34 ମାୟୋମ୍‌ ମିଣ୍ଡି ଉହୁର୍‌ତେ ବାଇକାନ୍‌ ହାରୁବ୍‌ତେୟାଃ ଓଡ଼ୋଃ ଲେବେଃ ଉହୁର୍‌ତେ ବାଇକାନ୍‌ ହାରୁବ୍‌ତେୟାଃ ଓଡ଼ୋଃ ଦାନାଙ୍ଗ୍‌ ଲିଜାଃ, 35 ରାଜିନାମା ବାକାସ୍‌, ଏନାରେୟାଃ ଗଅଃତେୟାଃ ଓଡ଼ୋଃ ପାପ୍‌ଛାମା ହାରୁବ୍‌ତେୟାଃ, 36 ମେଜ୍‌, ଏନାରାଃ ସବେନ୍‌ ବାସାନ୍‌, ପ୍ରାଭୁଭୋଜ୍‌ ହଲଙ୍ଗ୍‌, 37 ଫାର୍‌ଚି ସୋନାରାଃ ଦିଆ ଦହ ଖୁଣ୍ଟୁ, ଏନାରାଃ ଦିଆ, ଏନାରାଃ ବାସାନ୍‌ ଓଡ଼ୋଃ ଏନାରାଃ ସୁନୁମ୍‌, 38 ସୋନାରାଃ ବେଦି, ଆଭିଷେକ୍‌ ସୁନୁମ୍‌, ଉରୁବେ ନାଗେନ୍ତେ ବୁଗିନ୍‌ ସହାନ୍‌ତେୟାଃ ଓଡ଼ୋଃ କୁମ୍ବାରାଃ ଦୁଆର୍‌ ଦାନାଙ୍ଗ୍‌ ଲିଜାଃ, 39 ପିତ୍ତାଲ୍‌ରାଃ ବେଦି ଓଡ଼ୋଃ ଏନାରେୟାଃ ପିତ୍ତାଲ୍‌ରାଃ ଜାଲମ୍‌, ଏନାରେୟାଃ ଗଅଃତେୟାଃ ଓଡ଼ୋଃ ସବେନ୍‌ ବାସାନ୍‌, ତିଃଇ ଆବୁଙ୍ଗ୍‌ତେୟାଃ ଓଡ଼ୋଃ ଏନାରାଃ କାଟା, 40 ରାଚାରେୟାଃ ଦାନାଙ୍ଗ୍‌ ଲିଜାଃ, ଏନାରେୟାଃ ଖୁଣ୍ଟୁ, ଏନାରେୟାଃ କାଟା, ରାଚା ଦୁଆର୍‌ରେୟାଃ ଦାନାଙ୍ଗ୍‌ ଲିଜାଃ, ଏନାରେୟାଃ ବାଏହାର୍‌, ଖିଲା ଓଡ଼ୋଃ ନେପେଲ୍‌ କୁମ୍ବା ନାଗେନ୍ତେ ସବେନ୍‌ ଲାଗାତିଙ୍ଗ୍‌ତେୟାଃ, 41 ପାବିତାର୍‌ ଠାୟାଦ୍‌ରେ ସେୱା ନାଗେନ୍ତେ ସିଙ୍ଗାର୍‌ ଲିଜାଃ, ହାରୁନ୍‌ ଯାଜାକ୍‌ଆଃ ପାବିତାର୍‌ ଲିଜାଃ ଓଡ଼ୋଃ ଆୟାଃ ହନ୍‌କଆଃ ଯାଜାକ୍‌ କାମିରାଃ ଲିଜାଃ, 42 ପ୍ରାଭୁ ମୁଶାକେ ଆଚୁଲେକା, ଇସ୍ରାଏଲ୍‌ ହନ୍‌କ ନେ ସବେନ୍‌ କାମିକ କାମିକେଦା। 43 ମୁଶା ନେ ସବେନାଃ କାମି ନେଲ୍‌ ବାଇକେଦା ଓଡ଼ୋଃ ପ୍ରାଭୁ ମୁଶାକେ ଆଚୁଲେକା ଇନ୍‌କୁ ଏନ୍‌ ସବେନାଃ ବାଇକେଦା ଓଡ଼ୋଃ ମୁଶା ଇନ୍‌କୁକେ ଆଶିଷ୍‌ କେଦ୍‌କଆ।