ହରାସେନ୍‌ପୁଥି 26

ପ୍ରାଭୁଆଃ କୁମ୍ବା

1 "ଆମ୍‌ କୁମ୍ବାକେ ଗେଲ୍‌ଠୁ ଦାନାଙ୍ଗ୍‌ ଲିଜାଃତେ ବାଇୟେମେ। ଏନ୍‌ ଦାନାଙ୍ଗ୍‌ ଲିଜାଃ ଉଇଙ୍ଗ୍‌କାନ୍‌ ପୁଣ୍ଡି ରାଙ୍ଗ୍‌ରାଃ ନିରାଲ୍‌ ଲିଜାଃ ଓଡ଼ୋଃ ନିଲିୟା, ବାଇଗିନିୟା, ଆରାଃ ସୁତାମ୍‌ତେ ଗାଲାଙ୍ଗ୍‌କାନ୍ କିରୁବ୍‌କ ଖଦାକାନ୍‌ ତାଇନ୍‌କାକ। 2 ମିମିଆଦ୍‌ ଦାନାଙ୍ଗ୍‌ ଲିଜାଃରାଃ ଜିଲିଙ୍ଗ୍‌ ମିଦ୍‌ ହିସି ଇରାଲିୟା ମୁକା ଓଡ଼ୋଃ ଚାକାର୍‌ ଉପୁନ୍‌ ମୁକା ତାଇନ୍‌କା, ସବେନାଃ ମିଦ୍‌ ରାକାମ୍‌ ତାଇନ୍‌କା। 3 ମିଦ୍‌ତାଃରେ ମଣେୟାଁ ଲିଜାଃକେ ମିସାତେ ତଲ୍‌କେଦ୍‌ତେ ଦହେମେ ଓଡ଼ୋଃ ମିଆଦ୍‌ ହିସାକେ ମଣେୟାଁ ଦାନାଙ୍ଗ୍‌ ଲିଜାଃକେ ମିଆଦ୍ ଓଡ଼ୋଃ ମିଆଦ୍‌ଲଃ ଏନ୍‌ ଲେକାଗି ମେସାକେଦ୍‌ତେ ତାଇନ୍‌କା। 4 ଓଡ଼ୋଃ ସିଦା ଦାନାଙ୍ଗ୍‌ ଲିଜାଃରାଃ ଟୁଣ୍ଡୁ ଜଡ଼େନ୍‌ ଠାୟାଦ୍‌ରେ ନିଲିୟା ସୁତାମ୍‌ତେ ଫାଁସ୍‌ରି ବାଇୟେମେ ଓଡ଼ୋଃ ଏଟାଃ ଦାନାଙ୍ଗ୍‌ ଲିଜାଃରାଃ ଜଡ଼େନ୍‌ ଠାୟାଦ୍‌ରେ ଏନ୍‌ ଲେକା ରିକାଏମେ। 5 ସିଦା ଦାନାଙ୍ଗ୍‌ ଲିଜାଃରାଃ ଜଡ଼େନ୍‌ ଠାୟାଦ୍‌ରେ ପାଚାସ୍‌ ଫାଁସ୍‌ରି ବାଇୟେମେ ଓଡ଼ୋଃ ଏଟାଃ ଦାନାଙ୍ଗ୍‌ ଲିଜାଃରାଃ ଜଡ଼େନ୍‌ ଠାୟାଦ୍‌ରେ ପାଚାସ୍‌ ଫାଁସ୍‌ରି ବାଇୟେମେ, ଏନ୍‌ ଫାଁସ୍‌ରି ମିଦ୍‌ ଏଟାଃଲଃ ସାମ୍‌ନାଙ୍ଗ୍‌ରେ ତାଇନ୍‌କା। 6 ପାଚାସ୍‌ ଆକୁସି ସୋନାଲଃ ମିଆଦ୍‌ ଦାନାଙ୍ଗ୍‌ ଲିଜାଃ ଏଟାଃଲଃ ଜଡ଼େନ୍‌ କେଦ୍‌ତେ ମିଆଦ୍‌ ଅଡ଼ାଃ ହବାଅଃଆ।

7 "ଏନ୍‌ ଅଡ଼ାଃ ଚେତାନ୍‌ରେ ହାରୁବ୍‌ କୁମ୍ବା ନାଗେନ୍ତେ ମେରମ୍‌ ଉହୁର୍‌ରାଃ ଗେଲ୍‌ ମିଆଦ୍‌ ଠୁ ଦାନାଙ୍ଗ୍‌ ଲିଜାଃ ବାଇୟେମେ। 8 ଏନ୍‌ ସବେନାଃ ଦାନାଙ୍ଗ୍‌ ଲିଜାଃରାଃ ଜିଲିଙ୍ଗ୍‌ ହିସି ଗେଲ୍‌ ମୁକା ଚାକାର୍‌ ଉପୁନିୟା ମୁକା ମିଦ୍‌ ସାମାନ୍‌ଗି ତାଇନ୍‌କା। 9 ମଣେୟାଁ ଦାନାଙ୍ଗ୍‌ ଲିଜାଃକେ ମିଦ୍‌ଗି ଓଡ଼ୋଃ ତୁରିୟା ଦାନାଙ୍ଗ୍‌ ଲିଜାଃକେ ଏଟାଃଗି ଜଡ଼େନ୍‌ କେଦ୍‌ତେ ମିସାତେ ଫାର୍‌କାରେ ଦହେମେ ଓଡ଼ୋଃ ତୁରିୟା ଦାନାଙ୍ଗ୍‌ ଲିଜାଃ କୁମ୍ବାରାଃ ସାମ୍‌ନାଙ୍ଗ୍‌ରେ ତାଇନା। 10 ଓଡ଼ୋଃ ତାୟମ୍‌ ତଲାକାନ୍‌ ଦାନାଙ୍ଗ୍‌ ଲିଜାଃରାଃ ଜଡ଼େନ୍‌ରେ ବାର୍‌ ହିସି ଗେଲ୍‌ ଫାଁସ୍‌ରି ଓଡ଼ୋଃ ଏଟାଃ ଦାନାଙ୍ଗ୍‌ ଲିଜାଃରେହଗି ବାର୍‌ ହିସି ଗେଲ୍‌ ଫାଁସ୍‌ରି ବାଇୟେମେ। 11 ଓଡ଼ୋଃ ପିତ୍ତାଲ୍‌ରାଃ ବାର୍‌ ହିସି ଗେଲ୍‌ ଆକୁସି ବାଇୟେମେ ଓଡ଼ୋଃ ଏନାକେ ଫାଁସ୍‌ରିରେ ବଲ କେଦ୍‌ତେ କୁମ୍ବା ଜଡ଼େନେମେ ଓଡ଼ୋଃ ଏନା ମିଆଦ୍‌ କୁମ୍ବା ହବାଅଃଆ। 12 ଏନ୍‌ ସାରେୟାକାନ୍‌ ଆଧା ଦାନାଙ୍ଗ୍‌ ଲିଜାଃ କୁମ୍ବାରେୟାଃ ତାୟମ୍‌ରେ ହାକାକାନ୍‌କା। 13 ଆଧା ଦାନାଙ୍ଗ୍‌ ଲିଜାଃରାଃ ମିଦ୍‌ ମୁକା ଲେକା କୁମ୍ବାରାଃ ବାରାନ୍‌ସାଃ ହାକାକାନ୍‌କା।

14 "ଏନ୍ତେ କୁମ୍ବା ନାଗେନ୍ତେ ଆରାଃ ରାଙ୍ଗ୍‌ କାନ୍‌ ମିଣ୍ଡି ଉହୁର୍‌ତେ ମିଆଦ୍‌ ହାରୁବେ ତେୟାଃ ବାଇୟେମେ ଓଡ଼ୋଃ ଏନାରେୟାଃ ଚେତାନ୍‌ରେ ଓଡ଼ୋଃ ମିଆଦ୍‌ ଲେବେଃ ଉହୁର୍‌ତେ ହାରୁବେ ତେୟାଃ ବାଇୟେମେ।

15 "ଆମ୍‌ କୁମ୍ବା ନାଗେନ୍ତେ ବାବୁଲ୍‌ ଦାରୁରାଃ ତାକ୍‌ତା ବାଇୟେମେ, ଏନା ତିଙ୍ଗୁ ତାଇନ୍‌କା। 16 ମିମିଆଦ୍‌ ତାକ୍‌ତା ଗେଲ୍‌ ମୁକା ଜିଲିଙ୍ଗ୍‌ ଓଡ଼ୋଃ ଚାକାର୍‌ ମିଦ୍‌ ମୁକା ମିଦ୍‌ ବିତା ତାଇନ୍‌କା। 17 ଏନ୍ କୁମ୍ବା ନାଗେନ୍ତେ ତାକ୍‌ତାକେ ମିଆଦ୍‌ ଏଟାଃଲଃ ତଲଃ ନାଙ୍ଗ୍‌ ବାର୍ ମୁକାରେ ଦହେମେଁ ଓଡ଼ୋଃ ସବେନ୍ ତାକ୍‌ତାକେ ଏନ୍‌କାଗି ବାଇୟେମେଁ। 18 ଓଡ଼ୋଃ ଅଡ଼ାଃ ବାଇ ନାଗେନ୍ତେ ଜମ୍‌ସାଃରେ ବାର୍‌ ହିସି ଠୁ ତାକ୍‌ତା ବାଇୟେମେ। 19 ଓଡ଼ୋଃ ଏନ୍‌ ମିଦ୍‌ ହିସି ତାକ୍‌ତା ଲାତାର୍‌ରେ ବାର୍‌ ହିସି ରୁପାରାଃ ସାକ୍‌ତାଅକେଦ୍‌ତେ ଦହ ନାଙ୍ଗ୍‌ ଉଡ଼ୁଃକାନ୍‌ ତିଙ୍ଗୁତେୟାଃ ବାଇୟେମେ, ମିମିଆଦ୍‌ ତାକ୍‌ତା ନାଗେନ୍ତେ ବାରିଆ ଲେକା ତିଙ୍ଗୁକେଦ୍‌ତେ ତାଇନଃତେୟାଃ ବାଇୟେମେ। 20 ଅଡ଼ାଃରାଃ ଲେଙ୍ଗାସାଃ ନାଗେନ୍ତେ ମିଦ୍‌ ହିସି ତାକ୍‌ତା ବାଇୟେମେ। 21 ମିଆଦ୍‌ ତାକ୍‌ତା ଲାତାର୍‌ରେ ବାରିଆ ତିଙ୍ଗୁ ତେୟାଃ ଲେକା, ସବେନ୍‌ ତାକ୍‌ତା ନାଙ୍ଗ୍‌ ବାର୍‌ ହିସି ତିଙ୍ଗୁ ତେୟାଃ ବାଇୟେମେ। 22 କୁମ୍ୱାରାଃ ସିଙ୍ଗିହାସୁର୍‌ରାଃ ତାୟମ୍‌ସାଃ ନାଗେନ୍ତେ ତୁରିୟା ଠୁ ତାକ୍‌ତା ବାଇୟେମେ। 23 ଓଡ଼ୋଃ ସିଙ୍ଗିହାସୁର୍‌ରାଃ ତାୟମ୍‌ସାଃ ବାରାନ୍‌ କଚାରେ ବାରିଆ ତାକ୍‌ତା ଦହେମେ। 24 ନେ କଚାରେ ତାଇନଃ ତାକ୍‌ତାକ ଲାତାର୍‌ ହେତେ ଚେତାନ୍‌ସାଃ ଜାକେଦ୍‌ ମିଦ୍‌ତାଃଗି ଜଡ଼େନ୍‌ ହବାଅଃଆ, ନେଲେକା ବାରାନ୍‌ କଚାରେ ତାଇନଃ ବାରାନ୍‌ ତାକ୍‌ତା ନେ’ଲେକାଗି ହବାଅଃଆ। 25 ଆଠ୍‌ ଠୁ ତାକ୍‌ତା ଓଡ଼ୋଃ ଗେଲ୍‌ ତୁରିୟା ରୁପାରାଃ ତିଙ୍ଗୁ ତେୟାଃ ଚୁଙ୍ଗା ହବାଅଃଆ, ମିଆଦ୍‌ ତାକ୍‌ତା ଲାତାର୍‌ରେ ବାରିଆ ତିଙ୍ଗୁ ତେୟାଃ ଲେକା ଏଟାଃ ତାକ୍‌ତା ଲାତାର୍‌ କରେ ହଗି ବାରିଆ ତିଙ୍ଗୁ ତେୟାଃ ଚୁଙ୍ଗି ତାଇନାଃ।

26 "ଓଡ଼ୋଃ ଆମ୍‌ ବାବୁଲ୍‌ ଦାରୁରାଃ ହୁକ୍ ବାଇୟେମେ ଓଡ଼ୋଃ ଏନ୍ କୁମ୍ବା ରେୟା ଗେନା ସାଃ ତାକ୍‌ତା ନାଗେନ୍ତେ ମଣେଁ ଠୁ ହୁକ୍ ଓଡ଼ୋଃ ଏଟାଃ ସାଃ ତାକ୍‌ତା ନାଗେନ୍ତେ ମଣେଁ ଠୁ ହୁକ୍ ବାଇୟେମେ। 27 ଓଡ଼ୋଃ କୁମ୍ବା ରେୟା ସିଙ୍ଗିହାସୁର୍ ସାଃ ତାୟମ୍‌ରେ ତାଇନ୍ ତାକ୍‌ତା ରେ ମଣେଁ ଠୁ ହୁକ୍ ଦହେମେ। 28 ଥାଲାରାଃ ଖୁଁଟା ତାକ୍‌ତାରାଃ ନେ’ସାଃ ହେତେ ହାନ୍‌ ଟୁଣ୍ଡୁ ଜାକେଦ୍‌ ତାଇନ୍‌କା। 29 ଓଡ଼ୋଃ ସୋନାତେ ଏନ୍‌ ସବେନ୍‌ ତାକ୍‌ତା ହାରୁବେମେ ଓଡ଼ୋଃ ଭଙ୍ଗାଟ୍‌ ସରଃ ନାଙ୍ଗ୍‌ ସୋନାରାଃ ବଲା ବାଇୟେମେ, ଏନା ସବେନାଃକେ ସୋନାଲଃ ଜଲମେମ୍‌। 30 ଏନ୍‌ଲେକାଗି କୁମ୍ବା ରେୟା ଅକ ପାବିତାର୍ ବିଷାଏ ବୁରୁ ଚେତାନ୍‌ରେ ଆମ୍‌କେ ଉଦୁବାକାନା, ଏନ୍‌ଲେକାଗି ଏନାକେ ବାଇୟେମେ।

31 "ମିଆଁଦ୍‌ ଦାନାଙ୍ଗ୍‌ ଲିଜାଃ ବାଇୟେମେ ଏନାଦ ନିରାଲ୍‌ ଲିଜାଃରାଃ, ନିଲିୟା, ବାଇଗିନିୟା, ଆରାଃ ସୁତାମ୍‌ତେ ଓଡ଼ୋଃ ଉଇଙ୍ଗ୍‌କାନ୍‌ ପୁଣ୍ଡି ସୁତାମ୍‌ରାଃ ମିଆଁଦ୍‌ ଦାନାଙ୍ଗ୍‌ ଲିଜାଃ ବାଇୟେମେ, ଏନାରେ ଖୋଦାକେଦ୍‌ତେ ତାଇକାନ୍‌ କିରୁବ୍‌କଆଃ ମୁରୁତ୍‌ ହଗି ଖୋଦାକେଦ୍‌ତେ ବାଇୟଃକା। 32 ଆମ୍‌ ଏନାକେ ବାବୁଲ୍‌ ଦାରୁରେୟାଃ ସୋନାତେ ହାରୁବ୍‌କେଦ୍‌ତେ ଉପୁନିୟା ଖୁଣ୍ଟୁ ଚେତାନ୍‌ରେ ହାକାକେଦ୍‌ତେ ଏନାରେ ରୁପାରେୟାଃ ଉପୁନିୟା ତିଙ୍ଗୁତେୟାଃରେ ସୋନାରାଃ ଆକୁସିକ ଦହେମେ। 33 ସୋନାରାଃ ଆକୁସିରେ ଏନ୍‌ ଦାନାଙ୍ଗ୍‌ ଲିଜାଃ ହାକାକେଦ୍‌ତେ ଦାନାଙ୍ଗ୍‌ ଲିଜାଃରାଃ ତାୟମ୍‌ରେ ରାଜିନାମା ବାକ୍‌ସା ଦହେମେ। ଏନ୍‌ ଦାନାଙ୍ଗ୍‌ ଲିଜାଃକେ ପାବିତାର୍‌ ଠାୟାଦ୍‌ ହେତେ ପୁରାଃ ପାବିତାର୍‌ ଠାୟାଦ୍‌ତେ ବିନ୍‌ଗାଅ ଲାଗାତିୟାଁ। 34 ଆମ୍‌ ରାଜିନାମା ବାକାସ୍‌ରାଃ ହାରୁବେତେୟାଃ ପୁରାଃ ପାବିତାର୍‌ ଠାୟାଦ୍‌ ଭିତାର୍‌ରେ ଦହେମେ। 35 ଦାନାଙ୍ଗ୍‌ ଲିଜାଃରାଃ ନେ’ସାଃରେ ମେଜ୍‌କେ ଦହ ଲାଗାତିୟାଁ ଓଡ଼ୋଃ ମେଜ୍‌ରାଃ ଏଟାଃ’ସାଃରେ ପାବିତାର୍‌ କୁମ୍ବାରାଃ ଜମ୍‌ସାଃରେ ଦିଆ ଦହ ଖୁଣ୍ଟୁ ଦହ ଲାଗାତିୟାଁ। ପାବିତାର୍‌ କୁମ୍ବାରାଃ ଲେଙ୍ଗାସାଃରେ ମେଜ୍‌କେ ଦହେମେ।

36 "ପାବିତାର୍‌ କୁମ୍ବାରାଃ ଦୁହାର୍‌ ନାଙ୍ଗ୍‌ ରଅଃକେଦ୍‌ତେ ରାଙ୍ଗ୍‌ବିରାଙ୍ଗ୍‌ ଦାନାଙ୍ଗ୍‌ ଲିଜାଃ ବାଇୟେମେ। ଏନା ନିରାଲ୍‌ ନିଲିୟା ଲିଜାଃ, ବାଇଗିନିୟା, ଆରାଃ ସୁତାମ୍‌ତେ ଓଡ଼ୋଃ ଉଇଙ୍ଗ୍‌କାନ୍‌ ପୁଣ୍ଡି ସୁତାମ୍‌ତେ ବାଇୟେମେ। 37 ଏନ୍‌ ଦାନାଙ୍ଗ୍‌ ଲିଜାଃ ନାଗେନ୍ତେ ମଣେଁ ଠୁ ବାବୁଲ୍‌ ଦାରୁରାଃ ଖୁଣ୍ଟୁ ବାଇ କେଦ୍‌ତେ ସୋନାତେ ଦାପାଲେମେ ଓଡ଼ୋଃ ସୋନାତେ ଏନାକେ ଆକୁସି ରିକାଏମେ, ଏନା ନାଗେନ୍ତେ ପିତ୍ତାଲ୍‌ରାଃ ମଣେଁ ଠୁ ଚୁଙ୍ଗି ବାଇୟେମେ।