ହରାସେନ୍‌ପୁଥି 8

ଏଟାଃ ସାଜାଇ-ଚକେକ

1 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ମୁଶାକେ କାଜିକିୟା, "ଆମ୍‌ ଫାରୋ‌ତାଃ ସେନ୍‌କେଦ୍‌ତେ କାଜିମେ, ପ୍ରାଭୁ ପାର୍‌ମେଶ୍ୱାର୍‌ ନେ କାଜି କାଜିତାନାଏ, ‘ଆଇଁୟାଃ ସେୱା ଓଡ଼ୋଃ ସୁନୁସାର୍‌ କାମି ନାଗେନ୍ତେ ଆଇଁୟାଃ ହଡ଼କକେ ସେନ୍‌ ରିକାକମେ। 2 ମେନ୍‌ଦ ଆମ୍‌ ଇନ୍‌କୁକେ କାମ୍‌ ସେନ୍‌ ରିକାକରେଦ ଆଇଙ୍ଗ୍‌ ଚକେକଆଃ ହରାତେ ଆମାଃ ଗଟା ଦିଶୁମ୍‌କେ ସାଜାଇ ଏମେୟାଇଙ୍ଗ୍‌। 3 ନିଲ୍‌ ନାହିଁ ଚକେତେ ପେରେଃକଆଃ, ଚକେକ ଆମାଃ ଅଡ଼ାଃ ବଲକେଦ୍‌ତେ ଦୁଡ଼ୁମ୍‌ ପାର୍‌କମ୍‌ରେ ତାଇନାକ ଓଡ଼ୋଃ ଆମାଃ ଦାସିକଆଃ ଅଡ଼ାଃରେ, ହଡ଼କଆଃ ଚେତାନ୍‌ରେ, ଆମାଃ ଚୁଲ୍‌ହା ଓଡ଼ୋଃ ଆଟା ସିପୁଦ୍‌ ଥାଡ଼ିକରେ ବଲଆକ। 4 ଚକେକ ଆମ୍‌ରେ, ଆମାଃ ହଡ଼କଆଃ ଚେତାନ୍‌ରେ ଓଡ଼ୋଃ ଆମାଃ ଦାସିକଆଃ ଚେତାନ୍‌ରେ ରାକାବାକ।’"

5 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ମୁଶାକେ କାଜିକିୟା, ହାରୁନ୍‌କେ କାଜିମେ ଇନିଃ ଆୟାଃ ସଟାକେ ସାବ୍‌କେଦ୍‌ତେ ସବେନ୍‌ ନାହିଁ, ଗାଡା, ଓଡ଼ୋଃ ବାନ୍ଦା ଚେତାନ୍‌ରେ ଜିଲିଙ୍ଗ୍‌ୟେଁକାଏ ଏନ୍ତେ ମିସାର୍‌ ଦିଶୁମ୍‌ରେ ଚକେକ ପେରେଜଃକାକ। 6 ଏନ୍ତେ ହାରୁନ୍‌ ମିସାର୍‌ରାଃ ସବେନ୍‌ ଦାଆଃ ଚେତାନ୍‌ରେ ତିଃଇ ଜିଲିଙ୍ଗ୍‌କେଦାଏ ଓଡ଼ୋଃ ଚକେକ ମିସାର୍‌ ଦିଶୁମ୍‌ରାଃ ସବେନ୍‌ସାଃରେ ପେରେଃୟାନାକ। 7 ମେନ୍‌ଦ ଏନ୍‌ଲେକାଗି ଯାଦୁବାଲାକ ହଗି ଆକଆଃ ଯାଦୁଟଣାତେ ଚକେକକେ ମିସାର୍‌ ଦିଶୁମ୍‌ରେ ଆଉ କେଦ୍‌କଆକ।

8 ଫାରୋ‌ ମୁଶା ଓଡ଼ୋଃ ହାରୁନ୍‌କେ କେଡ଼ାକେଦ୍‌ତେ କାଜିକେଦ୍‌କିନାଏ, "ଆବେନ୍‌ ଆଇଁୟାଃତାଃଏତେ ଓଡ଼ୋଃ ଆଇଁୟାଃ ହଡ଼କତାଃଏତେ ଚକେକକେ ଆତମ୍‌ ନାଗେନ୍ତେ ପ୍ରାଭୁ ପାର୍‌ମେଶ୍ୱାର୍‌କେ ବିନ୍ତିକେଦ୍‌ତେ କାଜିବେନ୍‌। ତାବ୍‌ଦ ଆଇଙ୍ଗ୍‌ ପ୍ରାଭୁଆଃ ନୁତୁମ୍‌ତେ ଦାଣେଁ ରାକାବ୍‌ ନାଙ୍ଗ୍‌ ଆମାଃ ହଡ଼କକେ ସେନ୍‌ ରିକାକଆଇଙ୍ଗ୍‌।"

9 ମୁଶା ଫାରୋ‌କେ କାଜିକିୟା, "ଆଇଙ୍ଗ୍‌ ଚିମ୍‌ତା ଆମାଃ ନାଙ୍ଗ୍‌, ଆମାଃ ଦାସିକ ନାଙ୍ଗ୍‌ ଓଡ଼ୋଃ ଆମାଃ ହଡ଼କଆଃ ନାଙ୍ଗ୍‌ ପ୍ରାଭୁତାଃରେଇଙ୍ଗ୍‌ ବିନ୍ତିୟା, ଏନା ଦାୟାକେଦ୍‌ତେ ଆଇଙ୍ଗ୍‌କେ ଉଦୁବାଇଙ୍ଗ୍‌ମେ। ଏନାରେ ଚକେକକେ ଆମାଃତାଃଏତେ ଓଡ଼ୋଃ ଆମାଃ ଅଡ଼ାଃଏତେ ସାଙ୍ଗିନ୍‌ୟାନ୍‌ଲଃ ନିଲ୍‌ ନାହିଁରେ ଏସ୍‌କାର୍‌ ତାଇନାଃକ।"

10 ଫାରୋ‌ କାଜିକିୟାଏ, "ଗାପା, ବିନ୍ତିମେ"।

ମୁଶା କାଜିକିୟାଏ, "ଆଲେୟାଃ ପ୍ରାଭୁ ପାର୍‌ମେଶ୍ୱାର୍‌ ଲେକା ଏଟାଃ ଯେତାଏ ବାଙ୍ଗ୍‌କଆ, ଏନା ଆମ୍‌ ସାରିୟାମ୍‌ ମେନ୍ତେ ଆମାଃ କାଜି ଲେକାଗି ହବାଅଃକା। 11 ଚକେକ ଆମ୍‌କେ, ଆମାଃ ଅଡ଼ାଃ, ଆମାଃ ହଡ଼କକେ ଓଡ଼ୋଃ ଦାସିକକେ ବାଗିକେଦ୍‌ତେ ନିଲ୍‌ ନାହିଁରେ ଏସ୍‌କାର୍‌ ତାଇନାଃକ।" 12 ମୁଶା ଓଡ଼ୋଃ ହାରୁନ୍‌ ଫାରୋ‌ତାଃଏତେ ଅଡଙ୍ଗ୍‌ୟାନ୍‌ଲଃ ଫାରୋଆଃ ବିରୁଧ୍‌ରେ ଆଉୱାକାନ୍‌ ଚକେକ ବିଷାଏରେ ମୁଶା ପ୍ରାଭୁ ପାର୍‌ମେଶ୍ୱାର୍‌କେ ବିନ୍ତିକିୟା। 13 ଏନ୍ତେ ମୁଶାରାଃ କାଜି ଲେକାଗି ପ୍ରାଭୁ ପାର୍‌ମେଶ୍ୱାର୍‌ ରିକାକେଦାଏ। ଏନ୍ତେ ଅଡ଼ାଃରେନ୍‌, ରାଚାରେନ୍‌, ଓଡ଼ୋଃ ପିଡ଼ିରେନ୍‌ ସବେନ୍‌ ଚକେକ ଗଏଃୟାନା। 14 ହଡ଼କ ଇନ୍‌କୁକେ ମିଦ୍‌ତାଃରେ ହୁଣ୍ଡିକେଦ୍‌କଆକ ଓଡ଼ୋଃ ଗଟା ଦିଶୁମ୍‌ ସିତ୍‌ରୁ ସହାନ୍‌ତେ ପେରେଃୟାନା। 15 ମେନ୍‌ଦ ଫାରୋ ସବେନ୍‌ ଚକେକ ଗଏଃ ଚାବାୟାନାକ, ଏନା ନେଲ୍‌କେଦ୍‌ତେ ପ୍ରାଭୁଆଃ କାଜି ଲେକାଗି ଆୟାଃ ମନ୍‌ସୁରୁଦ୍‌କେ କେଟେଦ୍‌ଲଃ ମୁଶା ଓଡ଼ୋଃ ହାରୁନ୍‌ରାଃ କାଜିକେ କାଏ ଆୟୁମ୍‌କେଦା।

ଆପିଆ ସାଜାଇ ସିକୁ ତିଜୁ

16 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ମୁଶାକେ କାଜିକିୟା, "ହାରୁନ୍‌କେ କାଜିମେ, ଇନିଃ ଆୟାଃ ସଟାକେ ଉଠାଅକେଦ୍‌ଲଃ ଅତେରାଃ ଧୁଡ଼ିରେ ହୁମାଗେକା, ଏନାରେ ଗଟା ଧୁଡ଼ି ପିଚୁରକ ହବାକେଦ୍‌ତେ ମିସାର୍‌ ଦିଶୁମ୍‌ରାଃ ସବେନ୍‌ସାଃରେ ପେରେଃକଆଃକ।" 17 ଇନ୍‌କିନ୍‌ ଏନ୍‌ ଲେକାଗି ରିକାକେଦାକିନ୍‌। ହାରୁନ୍‌ ଆୟାଃ ତିଃଇରେ ସଟା ସାବ୍‌କେଦ୍‌ଲଃ ଅତେରାଃ ଧୁଡ଼ିରେ ହୁମାଃକେଦା, ଇମ୍‌ତା ହଡ଼ ଓଡ଼ୋଃ ଜାଁତୁକଆଃରେ ପିଚୁରକ ହବାୟାନାକ। ମିସାର୍‌ରାଃ ଗଟା ଧୁଡ଼ି ପିଚୁରକ ହବାୟାନାକ। 18 ଯାଦୁବାଲାକ ହଗି ଆକଆଃ ଯାଦୁଟଣାତେ ପିଚୁରକ ବାଇ ନାଙ୍ଗ୍‌ ଚେଷ୍ଟାକେଦାକ ମେନ୍‌ଦ କାକ ବାଇ ଦାଡ଼ିକେନା। ହଡ଼ ଓଡ଼ୋଃ ଜାଁତୁକଆଃ ଚେତାନ୍‌ରେ ପିଚୁରକତେ ପେରେଃୟାନାକ। 19 ଏନ୍ତେ ଯାଦୁବାଲାକ ଫାରୋକେ କାଜିକିୟାକ, "ନେଆଁ ସାର୍‌ତିଗି ପାର୍‌ମେଶ୍ୱାର୍‌ ରିକା କାଦାଏ।" ଏନ୍‌ରେୟ ପ୍ରାଭୁଆଃ କାଜି ଲେକାଗି ଫାରୋ‌ ଆୟାଃ ମନ୍‌ସୁରୁଦ୍‌କେ କେଟେଦ୍‌କେଦା ଓଡ଼ୋଃ ଇନ୍‌କିନାଃ କାଜିକେ କାଏ ଆୟୁମ୍‌କେଦା।

ଉପୁନିୟା ସାଜାଇ ତୁଡ଼୍‌ରକ

20 ପ୍ରାଭୁ ପାର୍‌ମେଶ୍ୱାର୍‌ ମୁଶାକେ କାଜିକିୟା, "ଆମ୍‌ ସେତାଃ ଇଦାନ୍‌ରେ ବିରିଦ୍‌କେଦ୍‌ତେ ଫାରୋ‌ତାଃ ସେନ୍‌ମେ। ଇନିଃ ନାହିଁ ଗେନାତେ ସେନା ଇମ୍‌ତା ଆମ୍‌ ଇନିଃକେ କାଜିମେ, ପ୍ରାଭୁ ପାର୍‌ମେଶ୍ୱାର୍‌ କାଜିକାଦାଏ, ଆଇଁୟାଃ ସେୱା ରିକା ନାଙ୍ଗ୍‌ ଆଇଁୟାଃ ହଡ଼କକେ ସେନ୍‌ ରିକାକମେ। 21 ଆମ୍‌ ଆଇଁୟାଃ ହଡ଼କକେ କାମ୍‌ ସେନ୍‌ ରିକାକରେଦ ଆଇଙ୍ଗ୍‌ ଆମାଃ ଚେତାନ୍‌ରେ, ଆମାଃ ଦାସିକଆଃ ଚେତାନ୍‌ରେ, ଆମାଃ ହଡ଼କ ଚେତାନ୍‌ରେ ଓଡ଼ୋଃ ଆମାଃ ଅଡ଼ାଃ ଭିତାର୍‌ରେ ତୁଡ଼୍‌ରକ କୁଲ୍‌କଆଇଙ୍ଗ୍‌। ଏନ୍ତେ ମିସାର୍‌ ଦିଶୁମ୍‌ରେନ୍‌ ହଡ଼କଆଃ ଅଡ଼ାଃ ଓଡ଼ୋଃ ଇନ୍‌କୁଆଃ ପିଡ଼ିରେ ପେରେଜଃଆକ। 22 ଅତେଦିଶୁମ୍‌ରେ ଆଇଙ୍ଗ୍‌ ଏସ୍‌କାର୍‌ ପ୍ରାଭୁ ତାନିଙ୍ଗ୍‌, ନେଆଁ ଆମ୍‌କେ ଉଦୁବ୍‌ମେ ନାଗେନ୍ତେ ଏନ୍‌ ହୁଲାଙ୍ଗ୍‌ ଆଇଁୟାଃ ହଡ଼କ ତାଇନ୍‌ତାନ୍‌ ଗୋଶେନ୍‌ ପାର୍‌ଗାନ୍‌ରେ ଏନ୍‌ଲେକା କା ହବାଅଃଆ। ଏନ୍ତାଃରେ ତୁଡ଼୍‌ରକ କାକ ତାଇନାଃ। 23 ନେ ଲେକାତେ ଆଇଙ୍ଗ୍‌ ଆଇଁୟାଃ ହଡ଼କକେ ଆମାଃ ହଡ଼କତାଃଏତେ ଆତମ୍‌କଆଇଙ୍ଗ୍‌। ନେ ଆକ୍‌ଦାନ୍ଦାଅ ଚିହ୍ନା ଗାପା ହବାଅଃଆ।" 24 ପ୍ରାଭୁ ପାର୍‌ମେଶ୍ୱାର୍‌ ଏନ୍‌ଲେକାଗି ରିକାକେଦା। ଏନ୍ତେ ଫାରୋ‌ଆଃ ଅଡ଼ାଃରେ, ଆୟାଃ ଦାସିକଆଃ ଅଡ଼ାଃରେ ଓଡ଼ୋଃ ଗଟା ମିସାର୍‌ ଦିଶୁମ୍‌ରେ ତୁଡ଼୍‌ରକ ପେରେଃୟାନ୍‌ ହରାତେ ପୁରା ଜିଅନ୍‌ୟାନା।

25 ଏନ୍ତେ ଫାରୋ‌ ମୁଶା ଓଡ଼ୋଃ ହାରୁନ୍‌କେ କେଡ଼ାକେଦ୍‌ତେ କାଜିକେଦ୍‌କିନା, "ଜୁ ସେନଃପେ, ଆପେୟାଃ ପାର୍‌ମେଶ୍ୱାର୍‌ଆଃ ନାଗେନ୍ତେ ନେ ଦିଶୁମ୍‌ରେ ଦାଣେଁ ରାକାବେପେ।"

26 ମେନ୍‌ଦ ମୁଶା କାଜିକେଦାଏ, "ଏନା ରିକାତେୟାଃ ବୁଗିନାଃ କା ହବାଅଃଆ, ଚିଆଃଚି ଏନା ରିକାଲେରେ, ଆଲେ ଆଲେୟାଃ ପ୍ରାଭୁ ପାର୍‌ମେଶ୍ୱାର୍‌ଆଃ ଉଦ୍ଦେଶ୍‌ରେ ଅକ ଦାଣେଁ ରାକାବେୟାଲେ, ଏନା ମିସାର୍‌ରେନ୍‌ ହଡ଼କଆଃ ନେପେଲ୍‌ରେ ହିଲାଙ୍ଗ୍‌ଅଃ ଲେକାନାଃ ହବାଅଃଆ। ଇନ୍‌କୁଆଃ ନେପେଲ୍‌ରେ ଅକ୍‌ନାଃ ହିଲାଙ୍ଗ୍‌ଅଃତେୟାଃ ତାନାଃ, ଆଲେ ଏନ୍‌ ଦାଣେଁ ରାକାବ୍‌ଲେରେ ଇନ୍‌କୁ ଚିନାଃ ଆଲେକେ ଦିରିତେ କାକ ଚିଦ୍‌ଗି ଗଏଃଲେୟା ? 27 ଏନା ନାଙ୍ଗ୍‌ ଆଲେୟାଃ ପ୍ରାଭୁ ପାର୍‌ମେଶ୍ୱାର୍‌ଆଃ କାନାଜି ଲେକାତେ ବିର୍‌ରେ ଆଲେକେ ଆପି ମାହା ହରା ସେନ୍‌କେଦ୍‌ତେ ଦାଣେଁ ରାକାବ୍‌ ରିକା ଲାଗାତିୟାଁଃ।"

28 ଏନ୍ତେ ଫାରୋ‌ କାଜିକେଦାଏ, "ଆଇଙ୍ଗ୍‌ ଆପେୟାଃ ପ୍ରାଭୁ ପାର୍‌ମେଶ୍ୱାର୍‌ଆଃ ଉଦ୍ଦେଶ୍‌ରେ ଦାଣେଁ ରାକାବ୍‌ ନାଗେନ୍ତେ ବିର୍‌ତେ ସେନ୍‌ ରିକାପେୟାଇଙ୍ଗ୍‌ ମେନ୍‌ଦ ଥିମ୍ବା ସାଙ୍ଗିନ୍‌ ଆଲପେ ସେନାଃ ଓଡ଼ୋଃ ନାହାଁଃ ଆଇଁୟାଃ ନାଗେନ୍ତେ ବିନ୍ତିମେ।"

29 ମୁଶା କାଜିରୁହାଡ଼୍‌କିୟାଏ, "ଆଇଙ୍ଗ୍‌ ଆମାଃତାଃଏତେ ସେନଃୟାନ୍‌ଲଃ ଗାପା ପ୍ରାଭୁତାଃରେ ବିନ୍ତିୟାଇଙ୍ଗ୍‌ ଓଡ଼ୋଃ ଆମ୍‌ତାଃଏତେ, ଆମାଃ ଦାସିକତାଃଏତେ ଓଡ଼ୋଃ ଆମାଃ ହଡ଼କତାଃଏତେ ତୁଡ଼୍‌ରକ ସାଙ୍ଗିନ୍‌ କଆଃକ, ମେନ୍‌ଦ ପ୍ରାଭୁ ପାର୍‌ମେଶ୍ୱାର୍‌ଆଃ ଉଦ୍ଦେଶ୍‌ରେ ଦାଣେଁ ରାକାବ୍‌ ନାଗେନ୍ତେ ଫାରୋ ହଡ଼କକେ ଆଡଃମିସା ଆଲକାଏ ବେଦାକକା।"

30 ଏନ୍ତେ ମୁଶା ଫାରୋ‌ତାଃଏତେ ସେନଃୟାନ୍‌ଲଃ ପ୍ରାଭୁ ପାର୍‌ମେଶ୍ୱାର୍‌ତାଃରେ ବିନ୍ତିକେଦା। 31 ପ୍ରାଭୁ ପାର୍‌ମେଶ୍ୱାର୍‌ ମୁଶାରାଃ ବିନ୍ତି ଲେକା ରିକାକେଦାଏ। ଓଡ଼ୋଃ ଫାରୋ‌ତାଃଏତେ, ଆୟାଃ ଦାସିକତାଃଏତେ ଓଡ଼ୋଃ ଆୟାଃ ହଡ଼କତାଃଏତେ ତୁଡ଼୍‌ରକକ ସାଙ୍ଗିନ୍‌ୟାନା। ମିଆଦ୍‌ ହଗି ତୁଡ଼୍‌ରକ କାକ ତାଇନ୍‌ୟାନା। 32 ମେନ୍‌ଦ ଏନ୍‌ରେୟଗି ଫାରୋ‌ ଆୟାଃ ମନ୍‌ସୁରୁଦ୍‌କେ କେଟେଦ୍‌କେଦାଏ ଓଡ଼ୋଃ ହଡ଼କକେ କାଏ ସେନ୍‌ ରିକାକେଦ୍‌କଆ।