1 ଇନିଃ ବାବୁଲ୍‌ ଦାରୁରାଃ ମିଆଁଦ୍‌ ଉରୁବ୍‌ଦାଣେଁ ବେଦି ବାଇକେଦା, ଏନାରାଃ ଜିଲିଙ୍ଗ୍‌ ମଣେଁ ମୁକା, ଚାକାର୍‌ ମଣେଁ ମୁକା ଓଡ଼ୋଃ ସାଲାଙ୍ଗି ଆପି ମୁକା ଦହକେଦାଏ। 2 ଓଡ଼ୋଃ ଏନାରାଃ ଚାରିଓ କଚାରେ ଦିରିଙ୍ଗ୍‌ ବାଇକେଦା, ଏନ୍‌ ଦିରିଙ୍ଗ୍‌ ବେଦିରାଃ ମିଦ୍‌ ହିସା ଦହକେଦା, ଓଡ଼ୋଃ ଏନା ପିତ୍ତାଲ୍‌ତେ ହାରୁବ୍‌କେଦା। 3 ଓଡ଼ୋଃ ଇନିଃ ତରେକ୍‌ ଅଡଙ୍ଗ୍‌ ନାଗେନ୍ତେ ବେଲ୍‌ଚା, ଡୁବ୍‌ନି ଓଡ଼ୋଃ ଜାନୁମ୍‌ ଚାମୁଚ୍‌ ଓଡ଼ୋଃ ସେଙ୍ଗେଲ୍‌ ଦହ ତେୟାଃ, ନେ ସବେନାଃ ପିତ୍ତାଲ୍‌ରାଃ ବାଇକେଦା। 4 ଓଡ଼ୋଃ ଇନିଃ ପିତ୍ତାଲ୍‌ରାଃ ମିଆଦ୍‌ ଜାଲମ୍‌ ବାଇକେଦା ଓଡ଼ୋଃ ବେଦିରାଃ ଲାତାର୍‌ରାଃ ଥାଲା ହିସା ଜାକେଦ୍‌ ତେବାଗଃ ଲେକା ଏନ୍‌ ଜାଲମ୍‌କେ ଦହକେଦା। 5 ଏନାରାଃ ଉପୁନ୍‌ କଚାରେ ପିତ୍ତାଲ୍‌ରାଃ ଉପୁନ୍‌ ଠୁ ଗୋଲ୍‌ ତେୟାଃ ବାଇକେଦା। 6 ବେଦି ନାଗେନ୍ତେ ବାବୁଲ୍‌ ଦାରୁରାଃ ଖୁଁଟା ବାଇ କେଦ୍‌ତେ ଏନାରାଃ ଚେତାନ୍‌ରେ ପିତ୍ତାଲ୍‌ତେ ହାରୁବ୍‌କେଦା। 7 ଓଡ଼ୋଃ ଇନିଃ ବେଦିକେ ଗଅଃ ନାଗେନ୍ତେ ଏନାରାଃ ବାରାନ୍‌ସାଃ ଗୋଲ୍‌ ତେୟାଃରେ ଏନ୍‌ ବାହାରମ୍‌ ତୁସିଙ୍ଗ୍‌କେଦା ଓଡ଼ୋଃ ଭିତାର୍‌ ସାମାଗି ତାଇନ୍‌କା ମେନ୍ତେ ତାକ୍‌ତା ବାଇକେଦା।

8 ଇନିଃ ପିତ୍ତାଲ୍‌ରାଃ‌ ତାୱା ଓଡ଼ୋଃ ପିତ୍ତାଲ୍‌ରାଃ‌ କାଟାକେ ନେପେଲ୍‌ କୁମ୍ବାରାଃ ଦୁଆର୍‌ ଆୟାର୍‌ରେ ସେୱାତାନ୍‌ କୁଡ଼ିକଆଃ ପିତ୍ତାଲ୍‌ ଆଏନାତେ ବାଇକେଦା।

9 ଏନ୍ତେ ଇନିଃ ଅଡ଼ାଃରାଃ ରାଚା ବାଇକେଦ୍‌ତେ, ଏନ୍‌ ରାଚାରାଃ ଜମ୍‌ସାଃ ନିରାଲ୍‌ ସୁତାମ୍‌ତେ ମଣେଁ ହିସି ମୁକା ଦାନାଙ୍ଗ୍‌ ଲିଜାଃ ବାଇକେଦା। 10 ଏନାରାଃ ଖୁଁଟା ମିଦ୍‌ ହିସି ଓଡ଼ୋଃ ତିଙ୍ଗୁ ତେୟାଃ ମିଦ୍‌ ହିସି ଠୁ ପିତ୍ତାଲ୍‌ରାଃ ତାଇନ୍‌କେନା ଓଡ଼ୋଃ ଖୁଁଟାରାଃ ଆକୁସି ଓଡ଼ୋଃ ଗୋଲ୍‌ ତେୟାଃ ରୁପାରାଃ ତାଇନ୍‌କେନା। 11 ନେଲେକା ଗି ଲେଙ୍ଗାସାଃ ମଣେଁ ହିସି ଜିଲିଙ୍ଗ୍‌ ଦାନାଙ୍ଗ୍‌ ଲିଜାଃ ତାଇନ୍‌କେନା, ଏନାରାଃ ମିଦ୍‌ ହିସି ଖୁଁଟା ଓଡ଼ୋଃ ମିଦ୍‌ ହିସି ତିଙ୍ଗୁ ତେୟାଃ ପିତ୍ତାଲ୍‌ରାଃ ତାଇନ୍‌କେନା ଓଡ଼ୋଃ ଖୁଁଟାରାଃ ଆକୁସି ଓଡ଼ୋଃ ଗୋଲ୍‌ ତେୟାଃ ରୁପାରାଃ ତାଇନ୍‌କେନା। 12 ଓଡ଼ୋଃ ରାଚାରାଃ ଚାକାର୍‌ ନାଗେନ୍ତେ ସିଙ୍ଗି ହାସୁର୍‌ସାଃ ବାର୍‌ ହିସି ଗେଲ୍‌ ମୁକା ଦାନାଙ୍ଗ୍‌ ଲିଜାଃ, ଏନାରାଃ ଗେଲ୍‌ ଖୁଁଟା ଓଡ଼ୋଃ ଗେଲ୍‌ ତିଙ୍ଗୁ ତେୟାଃ ତାଇନ୍‌କେନା। 13 ସିଙ୍ଗିତୁରଃସାଃ ରାଚାରାଃ ଚାକାର୍‌ ବାର୍‌ ହିସି ଗେଲ୍‌ ମୁକା ତାଇନ୍‌କେନା। 14 ଦୁହାର୍‌ରାଃ ମିଦ୍‌ସାଃ ଗେଲ୍‌ ମଣେଁ ମୁକା ଦାନାଙ୍ଗ୍‌ ଲିଜାଃ ଓଡ଼ୋଃ ଆପିଆ ଖୁଁଟା ଓଡ଼ୋଃ ଆପିଆ ତିଙ୍ଗୁ ତେୟାଃ ତାଇନ୍‌କେନା। 15 ଓଡ଼ୋଃ ଏଟାଃସାଃ ଗେଲ୍‌ ମଣେଁୟା ଦାନାଙ୍ଗ୍‌ ଲିଜାଃ ଓଡ଼ୋଃ ଆପିଆ ଖୁଁଟା ଓଡ଼ୋଃ ଆପିଆ ତିଙ୍ଗୁ ତେୟାଃ ତାଇନ୍‌କେନା। 16 ରାଚାରାଃ ଚାରିଓସାଃ ଦାନାଙ୍ଗ୍‌ ଲିଜାଃ ଉଇଙ୍ଗ୍‌କାନ୍‌ ପୁଣ୍ଡି ନିରାଲ୍‌ ସୁତାମ୍‌ତେ ବାଇୟାକାନ୍‌ ତାଇକେନା। 17 ରାଚାରାଃ ସବେନ୍‌ ଖୁଁଟା ରୁପାରାଃ ଓଡ଼ୋଃ ଏନାରେୟାଃ ତିଙ୍ଗୁ ତେୟାଃ ପିତ୍ତାଲ୍‌ରାଃ ଓଡ଼ୋଃ ହାକାତେୟାଃ ଓଡ଼ୋଃ ଗୋଲ୍‌ତେୟାଃ ରୁପାରାଃ, ଏନାରାଃ ଚୁଟି ରୁପାତେ ଓଡ଼ୋଃ ରାଚାରାଃ ସବେନ୍‌ ଖୁଁଟା ରୁପାତେ ବାଇକାନ୍‌ ତାଇକେନା। 18 ଦୁହାର୍‌ ନାଗେନ୍ତେ ଦାନାଙ୍ଗ୍‌ ଲିଜାଃ ନିଲିୟା, ବାଇଗିନିୟା, ଆରାଃ ଓଡ଼ୋଃ ଉଇଙ୍ଗ୍‌କାନ୍‌ ପୁଣ୍ଡି ନିରାଲ୍‌ ସୁତାମ୍‌ତେ ସୁଇଲଃ ରଅଃକେଦ୍‌ତେ ବାଇକେଦା। ରାଚାରେୟାଃ ଦାନାଙ୍ଗ୍‌ ଲିଜାଃ ଲେକା ଏନାରାଃ ଜିଲିଙ୍ଗ୍‌ ମିଦ୍‌ ହିସି ମୁକା ଓଡ଼ୋଃ ଚାକାର୍‌ ମଣେଁ ମୁକା ସାଲାଙ୍ଗି ତାଇନ୍‌କେନା। 19 ପିତ୍ତାଲ୍‌ରାଃ ଉପୁନିୟା ଖୁଣ୍ଟୁ ଓଡ଼ୋଃ କାଟା ଓଡ଼ୋଃ ଏନାରେ ହାକା ତେୟାଃ ରୁପାରାଃ ବାଇକେଦା। 20 ଓଡ଼ୋଃ କୁମ୍ବାରାଃ ଓଡ଼ୋଃ ରାଚାରଃ ଚାରିଓସାଃରେନ୍‌ ସବେନ୍‌ ଖିଲାକ ପିତ୍ତାଲ୍‌ରାଃ ତାଇନ୍‌କେନା।

21 ହାରୁନ୍‌ ଯାଜାକ୍‌ ହନ୍‌ ଇଥାମର୍‌ ହରାତେ ମୁଶାରାଃ ଆଚୁଲେକା, ଲେବୀ ହଡ଼କଆ କାମି ନାଗେନ୍ତେ ନିୟାମ୍‌ ଅନଲ୍‌ ଠାୟାଦ୍‌ ବାଇନାଗେନ୍ତେ ଅଡ଼ାଃରାଃ ଲାଗାତିଙ୍ଗ୍‌ ତେୟାଃ ଲେକାୟାନା।

22 ପ୍ରାଭୁ ମୁଶାକେ ଆଚୁକାଇ ଲେକା ଯିହୁଦା କିଲିରେନ୍‌ ହୁର୍‌ଆଃ ଜାଇହନ୍‌ ଉରିରାଃ ହନ୍‌କଡ଼ା ବାସ୍‌ଲେଲ୍‌ ସବେନାଃ ବାଇକେଦା। 23 ଦାନ୍‌ କିଲିରେନ୍‌ ଆହିଷାମାକ୍‌ଆଃ ହନ୍‌ ଅହଲିୟାବ୍‌ ଦିରି ଓଡ଼ୋଃ ଦାରୁରାଃ ଖୋଦାକାମିନିଃ ଓଡ଼ୋଃ ନିଲିୟା, ବାଇଗିନିୟା, ଆରାଃ ଓଡ଼ୋଃ ଉଇଙ୍ଗ୍‌କାନ୍‌ ପୁଣ୍ଡି ନିରାଲ୍‌ ସୁତାମ୍‌ତେ କାମିନିଃ କାମିରେ ଦେଙ୍ଗାନିଃ ତାଇନ୍‌କେନାଏ।

24 ପାବିତାର୍‌ ଠାୟାଦ୍‌ରାଃ ସବେନ୍‌ କାମିରେ ନେ ସବେନ୍‌ ସୋନାକ ଲାଗାଅୟାନା ଏନା ହବାଅଃତାନା, ଝୁଲାଅରାଃ ଦାନ୍‌ରେ ଏମାକାନ୍‌ ସବେନ୍‌ ପାବିତାର୍‌ ଠାୟାଦ୍‌ରାଃ ଶେକେଲ୍‌ ଲେକାତେ ମିଦ୍‌ହିସି ତାଲନ୍ତ୍‌ ୭୩୦ ଶେକେଲ୍‌ ତାଇକେନା। 25 ଓଡ଼ୋଃ ଲେକାକାନ୍‌ ସାମାଜ୍‌ରେନ୍‌ ହଡ଼କଆ ରାକାବ୍‌କାନ୍‌ ରୁପା ପାବିତାର୍‌ ଠାୟାଦ୍‌ରେ ଶେକେଲ୍‌ ଲେକା ମିଦ୍‌ ସାଅ ତାଲନ୍ତ୍‌ ଓଡ଼ୋଃ ମିଦ୍‌ ହାଜାର୍‌ ସାତ୍‌ ସାଅ ଆପି ହିସି ଗେଲ୍‌ ମଣେଁ ଶେକେଲ୍‌ ତାଇନ୍‌କେନା। 26 ମିଦ୍‌ ହିସି ବାରାଷ୍‌ରେନ୍‌ ଚାଏ ଏନା ହେତେ ଆଦ୍‌କା ବାରାଷ୍‌ରେନ୍‌ ଲେକାକାନ୍‌ ୬୦୩,୫୫୦ ଏନ୍‌ ସବେନ୍‌ ହଡ଼କ ଥାଲା ହେତେ ମିଆଦ୍‌ ବେକା ପାବିତାର୍‌ ଠାୟାଦ୍‌ ଶେକେଲ୍‌ ଲେକା ଆଧା ଆଧା ଶେକେଲ୍‌ ଏମ୍‌କେଦା। 27 ମିଦ୍‌ ସାଅ ତାଲନ୍ତ୍‌ ରୁପା ପାବିତାର୍‌ ଠାୟାଦ୍‌ ଓଡ଼ୋଃ ଦାନାଙ୍ଗ୍‌ ଲିଜାଃରାଃ ଖୁଁଟାରେ ଦୁଲ୍‌ୟାନା, ମିଦ୍‌ ସାଅ ଖୁଁଟା ନାଙ୍ଗ୍‌ ମିଦ୍‌ ସାଅ ତାଲନ୍ତ୍‌, ମିମିଆଦ୍‌ ଖୁଁଟା ନାଗେନ୍ତେ ମିମିଆଦ୍‌ ତାଲନ୍ତ୍‌ ଦୁଲ୍‌ୟାନା। 28 ୧,୭୭୫ ଶେକେଲ୍‌ ରୁପାଲଃ ଖୁଁଟା ନାଙ୍ଗ୍‌ ହାକା ତେୟାଃ ବାଇକେଦା ଓଡ଼ୋଃ ଚୁଟି ହାରୁବ୍‌ 29 ପ୍ରାଭୁଆଃ ଉଦ୍ଦେଶ୍‌ରେ ଝୁଲାଅରାଃ ଦାନ୍‌ ଏମାକାନ୍‌ ପିତ୍ତାଲ୍‌ ଆପିହିସି ଗେଲ୍‌ ତାଲନ୍ତ୍‌ ୨,୪୦୦ ଶେକେଲ୍‌ ତାଇକେନା। 30 ଏନାମେନ୍ତେ ନେପେଲ୍‌ କୁମ୍ବାରାଃ ଖୁଁଟା, ପିତ୍ତାଲ୍‌ରାଃ ବେଦି ଓଡ଼ୋଃ ପିତ୍ତାଲ୍‌ରାଃ ଜାଲମ୍‌ ଓଡ଼ୋଃ ବେଦିରାଃ ସବେନ୍‌ ବାସାନ୍‌କ 31 ଓଡ଼ୋଃ ରାଚାରାଃ ଚାରିଓସାଃରାଃ ଖୁଣ୍ଟୁ, ଦୁହାର୍‌ରାଃ ଖୁଣ୍ଟୁ, ଅଡ଼ାଃରାଃ ସବେନ୍‌ ଖିଲା ଓଡ଼ୋଃ ରାଚାରାଃ ଚାରିଓସାଃରାଃ ଖିଲା ବାଇକେଦା।