1 ଏନ୍ତେ ମୁଶା ଓଡ଼ୋଃ ହାରୁନ୍ ସେନ୍‌ୟାନ୍‌ଲଃ ଫାରୋ‌କେ କାଜିକିୟାକିନ୍‌, "ଇସ୍ରାଏଲ୍‌ରେନ୍‌ ପ୍ରାଭୁ ପାର୍‌ମେଶ୍ୱାର୍‌ କାଜିକିୟାଏ, ‘ବିର୍‌ତେ ସେନ୍‌ୟାନ୍‌ଲଃ ଆଇଁୟାଃ ନୁତୁମ୍‌ତେ ମିଆଁଦ୍‌ ପାରାବ୍‌ ମାନାତିଙ୍ଗ୍‌ ନାଙ୍ଗ୍‌ ଆଇଁୟାଃ ହଡ଼କକେ ସେନ୍ ଇଚିକମେ।’ "

2 ଫାରୋ କାଜିକେଦାଏ, "ପ୍ରାଭୁ ଅକଏ ତାନିଃ ଯେ, ଆଇଙ୍ଗ୍‌ ଆୟାଃ କାଜି ଆୟୁମ୍‌କେଦ୍‌ତେ ଇସ୍ରାଏଲ୍‌ ହଡ଼କକେ ସେନ୍ ଇଚିକଆଇଙ୍ଗ୍‌ ? ଆଇଙ୍ଗ୍‌ ପ୍ରାଭୁକେ କାଇଙ୍ଗ୍‌ ସାରିୟା ଓଡ଼ୋଃ ଇସ୍ରାଏଲ୍‌ ହଡ଼କକେ କାଇଙ୍ଗ୍‌ ସେନ୍ ଇଚିକଆ।"

3 ମୁଶା ଓଡ଼ୋଃ ହାରୁନ୍‌ କାଜିକିୟାକିନ୍‌, "ଏବ୍ରୀ ହଡ଼କଆଃ ପାର୍‌ମେଶ୍ୱାର୍ ଆଲିଙ୍ଗ୍‌ଲଃ ନେପେଲ୍‌କାନାଏ। ଏନାମେନ୍ତେ ବିନ୍ତିମେ ତାନାଲିଙ୍ଗ୍‌ ପ୍ରାଭୁ ପାର୍‌ମେଶ୍ୱାର୍‌ଆଃ ନୁତୁମ୍‌ତେ ଦାଣେଁ ରାକାବ୍‌ ନାଙ୍ଗ୍‌ ବିର୍‌ତେ ଆପି ହୁଲାଙ୍ଗ୍‌ରେୟାଃ ହରା ସେନ୍ଇଚିଲେମେ, କା'ରେଦ ଇନିଃ ଆଲେକେ ମାରାଙ୍ଗ୍‌ ଦୁକୁତେ ଚାଏ ତାରାଉଡ଼ିତେ ଗଏଃଲେୟା।"

4 ମିସାର୍‌ରେନ୍‌ ରାଜା ମୁଶା ଓଡ଼ୋଃ ହାରୁନ୍‌କେ କାଜିକେଦ୍‌କିନା, "ଆବେନ୍ ଚିନାଃ ମେନ୍ତେ ହଡ଼କକେ ଆକଆଃ କାମିରେ ହକାକ ତାନାବେନ୍ ? ଜୁ, ଆବେନାଃ ଆପ୍‌ନାଃ କାମିତେ ରୁହାଡ଼୍‌ବେନ୍‌।" 5 ଫାରୋ ଆଡଃଗି କାଜିକେଦା, "ନେଲେବେନ୍‌, ନାହାଁଃ ଦିଶୁମ୍‌ରେ ନେ ହଡ଼କ ପୁରାଃଗି ମେନାକଆ ଓଡ଼ୋଃ ଆବେନ୍ ଇନ୍‌କୁକେ ଆକଆଃ କାମିରେ ହକାକ ତାନାବେନ୍‌।"

6 ଫାରୋ ଏନ୍ ହୁଲାଙ୍ଗ୍‌ ହଡ଼କଆଃ କାମିରେନ୍‌ ମାପ୍‌ରାଙ୍ଗ୍‌କକେ ଓଡ଼ୋଃ ହାକିମ୍‌କକେ ହୁକୁମ୍‌କେଦ୍‌ତେ କାଜିକେଦ୍‌କଆ, 7 "ଆପେ ନେ ହଡ଼କକେ ଇଟା ବାଇ ନାଗେନ୍ତେ ସିଦା ଲେକା ବୁସୁଃ ଆଲପେ ଏମାକଆ। ଇନ୍‌କୁ ଆକଗି ସେନ୍‌କେଦ୍‌ତେ ବୁସୁଃ ଦାଣାଁ ଆଉୱେକାକ। 8 ମେନ୍‌ଦ ସିଦାରେ ଇନ୍‌କୁକେ ଚିମିନାଙ୍ଗ୍‌ ଇଟା ବାଇ ନାଗେନ୍ତେ ଆଚୁକାନ୍‌ ତାଇକେନା, ଇମ୍‌ନାଙ୍ଗ୍‌ଗି ବାଇୟେକାକ, ଏନାଏତେ କାଟିଃହଗି ଆଲକାକ କାମ୍‌ତିକା। ଚିଆଃଚି ଇନ୍‌କୁଦ ଆଲ୍‌ସି ତାନ୍‌କ, ଏନାମେନ୍ତେ ଆଲେକେ ଆଲେୟାଃ ପାର୍‌ମେଶ୍ୱାର୍‌ଆଃ ନୁତୁମ୍‌ତେ ଦାଣେଁ ରାକାବ୍‌ ନାଙ୍ଗ୍‌ ସେନ୍ ଇଚିଲେମେ ମେନ୍ତେ କାଜିତାନାକ। 9 ଇନ୍‌କୁକେ ଆଡଃଗି ପୁରାଃ କାମି ଏମାକପେ, ଇନ୍‌କୁ କାମିରେଗି ତାଇନଃରେ ବେଦା କାଜି କାକ ଆୟୁମେୟା।"

10 ଏନ୍ତେ କାମିରେନ୍‌ ଗମ୍‌କେକ ଓଡ଼ୋଃ ହାକିମ୍‌କ ବାହାରି ଅଡଙ୍ଗ୍‌କେଦ୍‌ତେ ଇନ୍‌କୁକେ କାଜିକେଦ୍‌କଆକ, "ଫାରୋ ହୁକୁମ୍‌କାଦାଏ, ‘ଆପେକେ ଓଡ଼ୋଃ ବୁସୁଃ କା ଏମଃଆ। 11 ଆପେଗି ସେନ୍‌କେଦ୍‌ତେ ଆପେୟାଃ ନାଙ୍ଗ୍‌ ବୁସୁଃ ଦାଣାଁ ଆଉୱେପେ, ମେନ୍‌ଦ ଆପେୟାଃ କାମିରେ ଯେତ୍‌ନାଃ ଆଲକା କାମ୍‌ତିୟଃକା।’" 12 ଏନ୍ତେ ହଡ଼କ ବୁସୁଃ ବାଦ୍‌ଲାରେ ବାବା ନାଡା ଦାଣାଁ ନାଙ୍ଗ୍‌ ଗଟା ମିସାର୍‌ ଦିଶୁମ୍‌ରେ ଛିତିବିତି ୟାନାକ। 13 କାମିରେନ୍‌ ଗମ୍‌କେକ ଜାଲ୍‌ଦି କାମି ନାଗେନ୍ତେ କାଜିକେଦା, "ବୁସୁଃ ତାଇନଃ ଇମ୍‌ତାଙ୍ଗ୍‌ ଚିଲ୍‌କା କାମି ତାଇକେନାପେ ଏନ୍‌ଲେକା ନାହାଃଁ ହଗି ସିଙ୍ଗିସାଟୁବ୍‌ରାଃ କାମି ପୁରାଃ ଚାବାଏପେ।" 14 ଫାରୋ‌ଆଃ କାମିରେନ୍‌ ଗମ୍‌କେକ ଇସ୍ରାଏଲ୍‌ କିଲିରେନ୍‌ ଅକ କାମିରାଃ ହାକିମ୍‌କକେ ସାଲାକାଦ୍‌କ ତାଇକେନା, ଇନ୍‌କୁକେ ଦାଲ୍‌କେଦ୍‌ତେ କାଜିକେଦ୍‌କଆକ, "ଆପେ ସିଦାଲେକା ହଲା ଓଡ଼ୋଃ ତିସିଙ୍ଗ୍‌ରାଃ ଇଟା ଚିଲ୍‌କା କାପେ ବାଇପୁରା ଦାଡ଼ିତାନା ?"

15 ଏନ୍ତେ ଇସ୍ରାଏଲ୍‌ ହଡ଼କଆଃ କାମିରେନ୍‌ ହାକିମ୍‌କ ଫାରୋ‌ତାଃ ହିଜୁଃକେଦ୍‌ତେ ରାଆଃତାନ୍‌ଲଃ କାଜିକେଦାକ, "ଆମ୍‌ ଚିନାଃ ମେନ୍ତେ ଆମାଃ ଦାସିକକେ ନେ'ଲେକାମ୍‌ ରିକାକତାନା ? 16 ଆମାଃ ଦାସିକକେ ବୁସୁଃ କା ଏମଃତାନା, ଏନ୍‌ରେୟ ଇନ୍‌କୁ କାଜିତାନାକ, ‘ଇଟା ବାଇୟେପେ।’ ଆଲେ ଦାଲଃତାନାଲେ, ମେନ୍‌ଦ ଗୁହ୍ନାଁ ଆମାଃ ହଡ଼କଆଃ ତାନାଃ।"

17 ଫାରୋ‌ କାଜିକେଦ୍‌କଆଏ, "ଆପେ ସବେନ୍‌କ ଆଲ୍‌ସି ତାନ୍‌ପେ ଏନାମେନ୍ତେ କାଜିତାନାପେ ଯେ, ପ୍ରାଭୁ ପାର୍‌ମେଶ୍ୱାର୍‌ଆଃ ନୁତୁମ୍‌ତେ ଦାଣେଁ ରାକାବ୍‌ ନାଗେନ୍ତେ ଆଲେକେ ସେନଃ ଇଚିଲେପେ। 18 ନାହାଁଃ, ଜୁ, ସେନ୍‌କେଦ୍‌ତେ ସୁନୁସାର୍‌ କାମି କାମିପେ। ଆପେକେ ବୁସୁଃ କା ଏମଃଆ, ମେନ୍‌ଦ ଆପେକେ ଇଟାରାଃ ହିସାବ୍‌ ପୁରା ଏମ୍‌ ଲାଗାତିୟାଃଁ।"

19 ଆପେୟାଃ ମିପିଦ୍‌ ହୁଲାଙ୍ଗ୍‌ରାଃ ଇଟା ବାଇତେୟାଃ କା କାମ୍‌ତିୟଃଆ। ଇସ୍ରାଏଲ୍‌ ହଡ଼କଆଃ କାମିରାଃ ମାପ୍‌ରାଙ୍ଗ୍‌ ହାକିମ୍‌କ ନେ କାଜି ଆୟୁମ୍‌କେଦ୍‌ତେ ଆକଆଃ ଆପ୍‌ନାଃ ଦୁର୍‌ଦାସା ହବାଅଃତେୟାଃ ସାରି ଦାଡ଼ିୟାନାକ।

20 ଇନ୍‌କୁ ଫାରୋ‌ତାଃଏତେ ରୁହାଡ଼୍‌ ତାଇକେନ୍‌ ଇମ୍‌ତା ମୁଶା ଓଡ଼ୋଃ ହାରୁନ୍‌ଲଃ ନେପେଲ୍‌ୟାନାକ। ଜେ'ଲେକାଚି ଇନ୍‌କିନ୍‌ ଇନ୍‌କୁକେ ତାଙ୍ଗିକାଦ୍‌କ ତାଇକେନାକିନ୍‌।

21 ଇନ୍‌କୁ ମୁଶା ଓଡ଼ୋଃ ହାରୁନ୍‌କେ କାଜିକେଦ୍‌କିନାକ, "ପ୍ରାଭୁ ଆବେନ୍‌କେ ନେଲ୍‌କେଦ୍‌ତେ ବିଚାର୍‌ ରିକାଏକା, ଆବେନ୍‌ ଆଲେକେ ଫାରୋ ଓଡ଼ୋଃ ଆୟାଃ ଦାସିକଆଃ ଆୟାର୍‌ରେ ହିଲାଙ୍ଗ୍‌ଅଃ ଜିନିଷ୍‌ ଲେକା ହିଣିଁକାଦ୍‌ଲେୟାବେନ୍‌ ଓଡ଼ୋଃ ଆଲେକେ ଗଏଃ ନାଙ୍ଗ୍‌ ଇନ୍‌କୁଆଃ ତିଃଇରେ ତାରାଉଡ଼ି ଏମାକାଦାବେନ୍‌।"

22 ଏନ୍ତେ ମୁଶା ପ୍ରାଭୁତାଃ ରୁହାଡ଼୍‌କେଦ୍‌ତେ କାଜିକେଦା, "ହେ ପ୍ରାଭୁ, ଆମ୍‌ ଚିନାଃମେନ୍ତେ ନେ ହଡ଼କକେ ଦୁକୁ ଏମାକ ତାନାମ୍‌ ? ଆମ୍‌ ଆଇଙ୍ଗ୍‌କେ ଚିନାଃମେନ୍ତେ ନେତାଃ କୁଲାକାଦିୟାଁମ୍‌ ? 23 ଆଇଙ୍ଗ୍‌ ଆମାଃ ନୁତୁମ୍‌ତେ ଫାରୋ‌ତାଃ ସେନ୍‌ୟାନ୍‌ ହୁଲାଙ୍ଗ୍‌ତାଃଏତେ, ନେ ହଡ଼କ ପୁରାଃଗି ଦୁକୁ ନାମେ ତାନାକ, ଓଡ଼ୋଃ ଆମ୍‌ ଆପ୍‌ନାଃ ହଡ଼କକେ କାଟିଃ ଲେକାହ କାମ୍‌ ଦେଙ୍ଗାକତାନା।"