1 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ମୁଶାକେ କାଜିକିୟା, "ଆମ୍‌ ଫାରୋ‌ତାଃତେ ସେନ୍‌କେଦ୍‌ତେ କାଜିମେ, ଏବ୍ରୀକଆଃ ପ୍ରାଭୁ ପାର୍‌ମେଶ୍ୱାର୍‌ ନେଆଁ କାଜିତାନାଏ, ଆଇଁୟାଃ ସେୱା ରିକା ନାଗେନ୍ତେ ଆମ୍‌ ଆଇଁୟାଃ ହଡ଼କକେ ସେନ୍‌ ରିକାକମେ। 2 ମେନ୍‌ଦ ଆମ୍‌ ଇନ୍‌କୁକେ କା ସେନ୍‌ ରିକାକେଦ୍‌ତେ ଆଡଃଗିମ୍‌ ମାନାକରେଦ, 3 ଆମାଃ ଆସୁଲ୍‌ ଜାଁତୁ ସାଦମ୍‌, ଗାଧା, ଉଁଟ୍‌, ଉରିଃକ୍‌, ମିଣ୍ଡି ଓଡ଼ୋଃ ମେରମ୍‌, ନେ ସବେନ୍‌ ଗୋଟ୍‌କଆଃ ଚେତାନ୍‌ରେ ପ୍ରାଭୁଆଃ ତିଃଇ ମେନାଃ, ଏନାମେନ୍ତେ ଇନ୍‌କୁରେ ବରୱାନ୍‌ ଦୁକୁ ହବାଅଃଆ। 4 ମେନ୍‌ଦ ପ୍ରାଭୁ ପାର୍‌ମେଶ୍ୱାର୍‌ ଇସ୍ରାଏଲ୍‌କଆଃ ଓଡ଼ୋଃ ମିସାର୍‌କଆଃ ଆସୁଲ୍‌ ଜାଁତୁକରେ ଫାରାକ୍‌ ଦହୟାଏ ଓଡ଼ୋଃ ଇସ୍ରାଏଲ୍‌କଆଃ ଜେତାନ୍‌ ଆସୁଲ୍‌ ଜାଁତୁ କାକ ଗଜଃଆ।" 5 ପ୍ରାଭୁ ପାର୍‌ମେଶ୍ୱାର୍‌ ନେଣ୍ଡା ଟାହାରାଅକେଦ୍‌ତେ କାଜିୟା, ଗାପା ନେ ଦିଶୁମ୍‌ରେ ନେ କାମି ରିକାୟାଏ।

6 ଏନାରାଃ ଏଟାଃ ହୁଲାଙ୍ଗ୍‌ ପ୍ରାଭୁ ପାର୍‌ମେଶ୍ୱାର୍‌ ଏନ୍‌ କାମି ରିକାକେଦା, ଓଡ଼ୋଃ ମିସାର୍‌କଆଃ ସବେନ୍‌ ଆସୁଲ୍‌ ଜାଁତୁକ ଗଏଃୟାନା ମେନ୍‌ଦ ଇସ୍ରାଏଲ୍‌କଆଃ ଆସୁଲ୍‌ ଜାଁତୁ ମିଆଦ୍‌ ହଁ କାକ ଗଏଃୟାନା। 7 ଫାରୋ‌ ହଡ଼ କୁଲ୍‌କେଦ୍‌ତେ ସାରିକେଦାଏ ଯେ ଇସ୍ରାଏଲ୍‌କଆଃ ମିଆଦ୍‌ ହଗି ଆସୁଲ୍‌ ଜାଁତୁ କାକ ଗଏଃକାନା। ଇମିନ୍‌ରେଅ ଫାରୋ‌ଆଃ ମନ୍‌ କେଟେଦ୍‌ୟାନା ଓଡ଼ୋଃ ହଡ଼କକେ କାଏ ସେନ୍‌ ରିକାକେଦ୍‌କଆ।

8 ଓଡ଼ୋଃ ପ୍ରାଭୁ ପାର୍‌ମେଶ୍ୱାର୍‌ ମୁଶା ଓଡ଼ୋଃ ହାରୁନ୍‌କେ କାଜିକିୟା, "ଆବେନ୍‌ ଭାଟିରାଃ ତରେକ୍‌ ମିଦ୍‌ମୁଠା ଇଦିକେଦ୍‌ତେ ମୁଶା ଫାରୋ‌ରାଃ ଆୟାର୍‌ରେ ଏନାକେ ସିର୍ମାସାଃ ହୁରାଙ୍ଗ୍‌ୟେଁକାଏ। 9 ଏନାରେ ଏନା ସବେନ୍‌ ମିସାର୍‌ ଦିଶୁମ୍‌ ଚେତାନ୍‌ରେ ହୁଡିଙ୍ଗ୍‌ ଗିତିଲ୍‌ ଲେକା ମିସାର୍‌ରେନ୍‌ ହଡ଼କଆଃ ଓଡ଼ୋଃ ଆସୁଲ୍‌ ଜାଁତୁକଆଃ ହଡ଼୍‌ମରେ ଗୁଡ଼ା ଘାଅ ହାସୁକ ହବାଅଃଆ।" 10 ଏନ୍ତେ ଇନ୍‌କିନ୍‌ ଫାରୋ‌ଆଃ ଆୟାର୍‌ରେ ଭାଟିରାଃ ତରେକ୍‌ ଇଦିକେଦ୍‌ତେ ତିଙ୍ଗୁୟାନା ଓଡ଼ୋଃ ମୁଶା ଏନାକେ ସିର୍ମାସାଃ ହୁରାଙ୍ଗ୍‌ ତାନ୍‌ଲଃ ସବେନ୍‌ ହଡ଼କଆଃ ଓଡ଼ୋଃ ଆସୁଲ୍‌ ଜାଁତୁକଆଃ ହଡ଼୍‌ମ ଗୁଡ଼ା ଘାଅ ହାସୁତେ ପେରେଃୟାନା। 11 ଏନ୍‌ ହାସୁ ନାଗେନ୍ତେ ଯାଦୁବାଲାକ ମୁଶା ଆୟାର୍‌ରେ କାକ ତିଙ୍ଗୁ ଦାଡ଼ିୟାନା, ଚିଆଃଚି ଯାଦୁବାଲାକ ଓଡ଼ୋଃ ସବେନ୍‌ ମିସାର୍‌ରେନ୍‌କଆଃ ହଡ଼୍‌ମରେ ଗୁଡ଼ା ଅଡଙ୍ଗ୍‌ୟାନା। 12 ମେନ୍‌ଦ ପ୍ରାଭୁ ପାର୍‌ମେଶ୍ୱାର୍‌ ଫାରୋ‌ଆଃ ମନ୍‌କେ କେଟେଦ୍‌କେଦା ଓଡ଼ୋଃ ପ୍ରାଭୁ ପାର୍‌ମେଶ୍ୱାର୍‌ଆଃ କାଜିଲେକା ମୁଶା ଓଡ଼ୋଃ ହାରୁନ୍‌ଆଃ କାଜି ଫାରୋ‌ କାଏ ଆୟୁମ୍‌କେଦା।

13 ଆଡଃଗି ପ୍ରାଭୁ ପାର୍‌ମେଶ୍ୱାର୍‌ ମୁଶାକେ କାଜିକିୟା, "ସେତାଃ ଇଦାନ୍‌ରେ ବିରିଦ୍‌କେଦ୍‌ତେ ଫାରୋ‌ଆଃ ଆୟାର୍‌ରେ ତିଙ୍ଗୁନ୍‌ମେ ଓଡ଼ୋଃ କାଜିମେ, ‘ଏବ୍ରୀକଆଃ ପ୍ରାଭୁ ପାର୍‌ମେଶ୍ୱାର୍‌ ନେଆଁ କାଜିତାନାଏ, ଆଇଁୟାଃ ହଡ଼କକେ ଆଇଁୟାଃ ସେୱା ରିକା ନାଗେନ୍ତେ ସେନ୍‌ ରିକାକମେ। 14 କା'ରେଦ ଆଇଙ୍ଗ୍‌ ଆମାଃ ମନ୍‌ସୁରୁଦ୍‌ ବିରୁଧ୍‌ରେ, ଆମାଃ ଦାସିକଆଃ ଓଡ଼ୋଃ ହଡ଼କଆଃରେ ସବେନ୍‌ ରାକାମ୍‌ରାଃ ଦୁକୁ କୁଲେୟାଇଙ୍ଗ୍‌, ଏନାତେ ଆମ୍‌ ସାରିୟାଃମେ ଯେ, ଗଟା ଦିଶୁମ୍‌ରେ ଆଇଙ୍ଗ୍‌ ଲେକା ଜେତାଏ ବାଙ୍ଗ୍‌କଆ। 15 ଆଇଙ୍ଗ୍‌ ନାହାଁଃ ଜାକେଦ୍‌ ତିଃଇ ଜିଲିଙ୍ଗ୍‌କେଦ୍‌ତେ ଆମ୍‌କେ ଓଡ଼ୋଃ ଆମାଃ ଦାସିକକେ ଜିୟନ୍‌ କାକତେୟାଃଇଙ୍ଗ୍‌ ରେଦ, ଆପେ ଅତେ ଦିଶୁମ୍‌ରେ କାପେ ତାଇନ୍‌କାନ୍‌ତେୟାଃ। 16 ମେନ୍‌ଦ ଆଇଙ୍ଗ୍‌ ଆମ୍‌କେ ଆଇଁୟାଃ ପେଡ଼େଃକେ ଉଦୁବ୍‌ ନାଙ୍ଗ୍‌ ଓଡ଼ୋଃ ଗଟା ଅତେଦିଶୁମ୍‌ରେ ଆଇଁୟାଃ ନୁତୁମ୍‌ ନିତିରଃ ନାଗେନ୍ତେ ଆଇଙ୍ଗ୍‌ ଆମ୍‌କେ ବାଇ କେଦ୍‌ତେ ଦହକାଦ୍‌ମାଇଙ୍ଗ୍‌। 17 ଏନ୍‌ରେୟ ଆମ୍‌ ଆଇଁୟାଃ ହଡ଼କଆଃ ବିରୁଧ୍‌ରେ ତିଙ୍ଗୁକାନାମ୍‌ ଓଡ଼ୋଃ ଇନ୍‌କୁକେ କାମ୍‌ ସେନ୍‌ ରିକାକତାନା। 18 ଏନାମେନ୍ତେ ଗାପା ଆଇଙ୍ଗ୍‌ ନେ ନେଣ୍ଡାରେ ମିସାର୍‌ ଦିଶୁମ୍‌ରେ ନେ'ଲେକା ମାପ୍‌ରାଙ୍ଗ୍‌ ହାମ୍ବାଲ୍‌ ଆରିଲ୍‌ ଉୟୁଃ ଇଚିଆଇଙ୍ଗ୍‌ ଯେ, ମିସାର୍‌ ଦିଶୁମ୍‌ରେ ତିସିଙ୍ଗ୍‌ ଜାକେଦ୍‌ ଚିଉଲାହ କା ହବାକାନ୍‌ଗିୟାଃ। 19 ଏନାତେ ନାହାଁଃ ଆପେ ଆପେୟାଃ ପିଡ଼ିରେ ତାଇନାଃ କାନ୍‌ ଆସୁଲ୍‌ ଜାଁତୁକକେ ଅଡ଼ାଃତେ ଜାଲ୍‌ଦି ଆଉକପେ, ଚିଆଃଚି ଅକନ୍‌ ହଡ଼ ଚାଏ ଜାଁତୁ ପିଡ଼ିରେ ତାଇନାଃକ ଇନ୍‌କୁଆଃ ଚେତାନ୍‌ରେ ଆରିଲ୍‌ ଉୟୁଗଃରେ ଇନ୍‌କୁ ଗଜଃଆକ।’" 20 ଫାରୋ‌ଆଃ ଅକନ୍‌ ଦାସିକ ପ୍ରାଭୁଆଃ କାଜିକେ ବରକେଦାକ। ଇନ୍‌କୁ ଆକଆଃ ଦାସି ଓଡ଼ୋଃ ଆସୁଲ୍‌ ଜାଁତୁକକେ ଜାଲ୍‌ଦିଗି ଅଡ଼ାଃତେ ଆଉକେଦ୍‌କଆକ। 21 ମେନ୍‌ଦ ଅକନ୍‌କ ପ୍ରାଭୁଆଃ କାଜିକେ କାକ ଧ୍ୟାନ୍‌କେଦା, ଇନ୍‌କୁ ଆକଆଃ ଦାସି ଓଡ଼ୋଃ ଆସୁଲ୍‌ ଜାଁତୁକକେ ପିଡ଼ିରେଗି ତାଇ ଇଚିକେଦ୍‌କଆକ।

22 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ମୁଶାକେ କାଜିକିୟା, "ଆମ୍‌ ଆମାଃ ତିଃଇ ସିର୍ମାସାଃ ଜିଲିଙ୍ଗ୍‌ୟେଁମେ, ଏନ୍ତେ ଗଟା ମିସାର୍‌ରେନ୍‌ ହଡ଼, ଆସୁଲ୍‌ ଜାଁତୁ ଓଡ଼ୋଃ ପିଡ଼ିରେ ତାଇନ୍‌ତାନ୍‌ ସବେନ୍‌କଆଃ ଚେତାନ୍‌ରେ ଆରିଲ୍‌ ଉୟୁଗଃଆ।" 23 ଚିମ୍‌ତାଙ୍ଗ୍‌ ମୁଶା ଆୟାଃ ସଟାକେ ସିର୍ମାସାଃ ଜିଲିଙ୍ଗ୍‌କେଦାଏ, ପ୍ରାଭୁ ପାର୍‌ମେଶ୍ୱାର୍‌ ରିମିଲ୍‌ ସାଡି ଇଚିକେଦାଏ ଓଡ଼ୋଃ ଆରିଲ୍‌ କୁଲ୍‌କେଦାଏ, ଏନ୍ତେ ହିଚିର୍‌କେଦ୍‌ଲଃ ଅତେରେ ଠେର୍‌କେଦା। ନେ'ଲେକାତେ ମିସାର୍‌ ଦିଶୁମ୍‌ରେ ଆରିଲ୍‌ ଉୟୁଃୟାନା। 24 ଆରିଲ୍‌ ଉୟୁଗଃତାନ୍‌ଲଃ ହିଚିର୍‌କେଦାଏ, ନେ'ଲେକା ମିସାର୍‌ ଦିଶୁମ୍‌ରେ ଚିଉଲାହ କା ହବାକାନ୍‌ ତାଇକେନା। 25 ଏନାରେ ଗଟା ମିସାର୍‌ ଦିଶୁମ୍‌ରାଃ ଅତେରେ ତାଇକାନ୍‌ ହଡ଼କ ଓଡ଼ୋଃ ଆସୁଲ୍‌ ଜାଁତୁକ ଆରିଲ୍‌ ହରାତେ ଜିୟନ୍‌ୟାନାକ ଓଡ଼ୋଃ ଏନ୍‌ ଆରିଲ୍‌ତେ ଅତେରାଃ ସବେନ୍‌ ଦାରୁ ଟହେଦ୍‌ୟାନା। 26 ଇସ୍ରାଏଲ୍‌କ ତାଇନ୍‌ତାନ୍‌ ଗୋଶେନ୍‌ରେ ଏସ୍‌କାର୍‌ ଆରିଲ୍‌ କା ଉୟୁଃୟାନା।

27 ଏନ୍ତେ ଫାରୋ‌ ମୁଶା ଓଡ଼ୋଃ ହାରୁନ୍‌କେ କେଡ଼ାକେଦ୍‌ତେ କାଜିକେଦ୍‌କିନାଏ, "ନାହାଁଃ ଆଇଙ୍ଗ୍‌ ପାପ୍‌ କାଦାଇଙ୍ଗ୍‌, ପ୍ରାଭୁ ଧାର୍‌ମାନ୍‌ନିଃ ତାନିଃ, ମେନ୍‌ଦ ଆଇଙ୍ଗ୍‌ ଓଡ଼ୋଃ ଆଇଁୟାଃ ହଡ଼କ ଏତ୍‌କାନ୍‌ କାମି ରିକାକାଦାଲେ। 28 ପ୍ରାଭୁତାଃରେ ବିନ୍ତିବେନ୍‌, ଚିଆଃଚି ପାର୍‌ମେଶ୍ୱାର୍‌ ରିକାତାନ୍‌ ରିମିଲ୍‌ ସାଡ଼ି ଓଡ଼ୋଃ ଆରିଲ୍‌ ଉୟୁଗଃତେୟାଃ ପୁରାଃ ଥିମ୍ବାୟାନ୍‌ଗିଆ। ଆଇଙ୍ଗ୍‌ ଆପେକେ ସେନ୍‌ ଇଚିପେୟାଇଙ୍ଗ୍‌ ଓଡ଼ୋଃ ନେତାଃରେ ଥିମ୍ବା ନେଣ୍ଡା କାଇଙ୍ଗ୍‌ ତାଇନ୍‌ ଇଚିପେୟା।"

29 ମୁଶା ଫାରୋ‌କେ କାଜିରୁହାଡ଼୍‌କିୟା, "ଆଇଙ୍ଗ୍‌ ନେ ନାଗାର୍‌ ବାଗି ତର୍‌ସାଗି ପ୍ରାଭୁତାଃରେ ତିଃଇ ଜିଲିଙ୍ଗ୍‌କେଦ୍‌ତେ ବିନ୍ତିୟାଇଙ୍ଗ୍‌, ଏନାରେ ରିମିଲ୍‌ ସାଡି ଓଡ଼ୋଃ ଆରିଲ୍‌ ଉୟୁଗଃତେୟାଃ ହକାଅଃଆ। ଇମ୍‌ତା ଆମ୍‌ ସାରିୟାଃମେ ଯେ, ନେ ଅତେ ଦିଶୁମ୍‌ରେ ପ୍ରାଭୁ ମେନାଇୟା। 30 ମେନ୍‌ଦ ଆଇଙ୍ଗ୍‌ ସାରିତାନାଇଙ୍ଗ୍‌, ଆମ୍‌ ଓଡ଼ୋଃ ଆମାଃ ଦାସିକ ନାହାଁଃ ଜାକେଦ୍‌ ପ୍ରାଭୁ ପାର୍‌ମେଶ୍ୱାର୍‌କେ କାପେ ବରତାନା।"

31 ସାନାଇ ଓଡ଼ୋଃ କଦେ ଜିଅନ୍‌ୟାନା ଚିଆଃଚି କଦେ ଗେଲେ ସେକାଡ଼ାକାନ୍‌ ଓଡ଼ୋଃ ସାନାଇ ସାଗେନାକାନ୍‌ ତାଇକେନା। 32 ମେନ୍‌ଦ ଗହମ୍‌ ଓଡ଼ୋଃ ମାନି କା ହାରାୟାନା ଏନାମେନ୍ତେ ଏନା କା ଜିଅନ୍‌ୟାନା।

33 ମୁଶା ଫାରୋ‌ ତାଃତେ ନାଗାର୍‌ ବାହାରି ସେନ୍‌କେଦ୍‌ତେ ପ୍ରାଭୁ ପାର୍‌ମେଶ୍ୱାର୍‌କେ ବିନ୍ତିକିୟା ଓଡ଼ୋଃ ରିମିଲ୍‌ ସାଡି, ଆରିଲ୍‌ ଉୟୁଗଃ ଓଡ଼ୋଃ ଦାଆଃ ଗାମା ହକାୟାନା। 34 ଫାରୋ‌ ନେଲ୍‌କେଦାଏ ଯେ, ରିମିଲ୍‌ ସାଡି ଓଡ଼ୋଃ ଆରିଲ୍‌ ଉୟୁଗଃ ହକାୟାନା, ଇମ୍‌ତା ଇନିଃ ଆଡଃଗି ପାପ୍‌କେଦା, ଏନ୍ତେ ଆୟାଃ ଓଡ଼ୋଃ ଆୟାଃ ଦାସିକଆଃ ମନ୍‌ କେଟେଦ୍‌ୟାନା। 35 ପ୍ରାଭୁ ମୁଶାରାଃ ହରାତେ କାଜିକାଦ୍‌ ଲେକା ଫାରୋ‌ରାଃ ମନ୍‌ କେଟେଦ୍‌ୟାନା ଓଡ଼ୋଃ ଇସ୍ରାଏଲ୍‌ ହଡ଼କକେ କାଏ ସେନ୍‌ ଇଚିକେଦ୍‌କଆ।