1 ଏନ୍ତେ ପ୍ରାଭୁ ମୁଶାକେ କାଜିକିୟା, "ନେଲେମେ ଆଇଙ୍ଗ୍‌ ଆମ୍‌କେ ଫାରୋ‌ଆଃ ଆୟାର୍‌ରେ ପାର୍‌ମେଶ୍ୱାର୍‌ ଲେକା ବାଇକାମାଇଙ୍ଗ୍‌ ଓଡ଼ୋଃ ଆମାଃ ହାଗା ହାରୁନ୍‌ ଆମାଃ ନାବୀ ହବାଅଃଆଏ। 2 ଆଇଙ୍ଗ୍‌ ଆମ୍‌କେ ଅକନ୍‌ କାଜିକ କାଜିମାଇଙ୍ଗ୍‌, ଏନା ଆମାଃ ହାଗା ହାରୁନ୍‌କେ କାଜିମେ ଓଡ଼ୋଃ ଫାରୋ‌ ଇସ୍ରାଏଲ୍‌ ହଡ଼କକେ ଆୟାଃ ଦିଶୁମ୍‌ଏତେ ସେନ୍‌ଇଚିକ ନାଙ୍ଗ୍‌ ହାରୁନ୍‌ ସେନ୍‌କେଦ୍‌ତେ ଫାରୋକେ କାଜିୟା। 3 ମେନ୍‌ଦ ଆଇଙ୍ଗ୍‌ ଫାରୋ‌ଆଃ ମନ୍‌ସୁରୁଦ୍‌କେ କେଟେଦ୍‌ ବାଇୟାଇଙ୍ଗ୍‌, ଏନ୍ତେ ମିସାର୍‌ ଦିଶୁମ୍‌ରେ ଆଇଙ୍ଗ୍‌ ପୁରାଃଗି ଆକ୍‌ଦାନ୍ଦାଅ କାମି ଓଡ଼ୋଃ ଚିହ୍ନାକ ରିକାଏୟାଇଙ୍ଗ୍‌। 4 ଏନ୍‌ରେୟ ଫାରୋ ଆବେନାଃ କାଜି କାଏ ଆୟୁମେୟା। ଏନ୍ତେ ଆଇଙ୍ଗ୍‌ ମିସାର୍‌ ଦିଶୁମ୍‌ ବିରୁଧ୍‌ରେ ଆଇଁୟାଃ ପେଡ଼େଃ ଉଦୁବ୍‌ତାନ୍‌ଲଃ ପୁରାଃ ସାଜାଇ ହରାତେ ଆଇଁୟାଃ ଇସ୍ରାଏଲ୍‌ ହଡ଼କକେ ମିସାର୍‌ ଦିଶୁମ୍‌ଏତେ ଅଡଙ୍ଗ୍‌ ଆଉକଆଇଙ୍ଗ୍‌। 5 ଚିମ୍‌ତା ମିସାର୍‌ ଦିଶୁମ୍‌ରାଃ ବିରୁଧ୍‌ରେ ଆଇଁୟାଃ ତିଃଇ ଜିଲିଙ୍ଗ୍‌କେଦ୍‌ତେ ମିସାର୍‌ ହଡ଼କଆଃ ଥାଲାଏତେ ଇସ୍ରାଏଲ୍‌ ହଡ଼କକେ ଅଡଙ୍ଗ୍‌ ଆଉକଆଇଙ୍ଗ୍‌, ଇମ୍‌ତା ମିସାର୍‌ରେନ୍‌ ହଡ଼କ ଆଇଙ୍ଗ୍‌ ପ୍ରାଭୁ ତାନିଙ୍ଗ୍‌ ମେନ୍ତେକ ସାରିୟା।"

6 ମୁଶା ଓଡ଼ୋଃ ହାରୁନ୍‌, ପ୍ରାଭୁ ପାର୍‌ମେଶ୍ୱାର୍‌ଆଃ ଆନ୍‌ଚୁ ଲେକା ରିକାକେଦାକିନ୍‌। 7 ଫାରୋ‌ଲଃ ଜାଗାର୍‌ତାନ୍‌ ଇମ୍‌ତା ମୁଶାକେ ଉପୁନ୍‌ ହିସି ଓଡ଼ୋଃ ହାରୁନ୍‌କେ ଉପୁନ୍‌ ହିସି ଆପି ବାରାଷ୍‌ ହବାଅଃ ତାଇକେନା।

8 ପ୍ରାଭୁ ପାର୍‌ମେଶ୍ୱାର୍‌ ମୁଶା ଓଡ଼ୋଃ ହାରୁନ୍‌କେ କାଜିକେଦ୍‌କିନା, 9 "ଫାରୋ‌ ଆବେନ୍‌କେ ଜେତାନ୍‌ ଆକ୍‌ଦାନ୍ଦାଅ କାମି ରିକା ନାଙ୍ଗ୍‌ କାଜିବେନ୍‌ରେଦ ମୁଶା, ହାରୁନ୍‌କେ ଆୟାଃ ସଟା ଅତେରେ ଉୟୁଃ ନାଙ୍ଗ୍‌ କାଜିକାଏ, ଏନାରେ ଏନ୍‌ ସଟା ମିଆଁଦ୍‌ ବିଙ୍ଗ୍‌ ବାଇକଆଃ।"

10 ଏନ୍ତେ ମୁଶା ଓଡ଼ୋଃ ହାରୁନ୍‌ ଫାରୋ‌ତାଃ ସେନ୍‌କେଦ୍‌ତେ ପ୍ରାଭୁ କାଜିକାଦ୍‌ ଲେକାଗି ରିକାକେଦାକିନ୍‌। ଫାରୋ‌ ଓଡ଼ୋଃ ଆୟାଃ କାମିତାନ୍‌କଆଃ ଆୟାର୍‌ରେ ହାରୁନ୍‌ ଆୟାଃ ସଟା ହୁଦ୍‌ମାକେଦାଏ ଓଡ଼ୋଃ ଏନା ମିଆଦ୍‌ ବିଙ୍ଗ୍‌ ବାଇୟାନା।

11 ଏନ୍ତେ ଫାରୋ‌ ଆୟାଃ ପାଣ୍ଡିତ୍‌କକେ ଓଡ଼ୋଃ ଦେଅଁଣାକକେ କେଡ଼ାକେଦ୍‌କଆ ଓଡ଼ୋଃ ମିସାର୍‌ରେନ୍‌ ଯାଦୁବାଲାକ ହଗି ଏନ୍‌ ଲେକା ରିକାକେଦାକ। 12 ଇନ୍‌କୁ ହଗି ଆକଆଃ ସଟାକେ ହୁଦ୍‌ମାକେଦାକ ଓଡ଼ୋଃ ଏନ୍‌ ସଟା ବିଙ୍ଗ୍‌ ବାଇୟାନା ମେନ୍‌ଦ ହାରୁନ୍‌ଆଃ ସଟା ଇନ୍‌କୁଆଃ ବିଙ୍ଗ୍‌କକେ ଉଦ୍‌କେଦ୍‌କଆ। 13 ମେନ୍‌ଦ ପ୍ରାଭୁ ପାର୍‌ମେଶ୍ୱାର୍‌ଆଃ କାଜି ଲେକା ଫାରୋ‌ଆଃ ମନ୍‌ସୁରୁଦ୍‌ କେଟେଦ୍‌ୟାନା ଓଡ଼ୋଃ ଇନ୍‌କିନାଃ କାଜି କାଏ ଆୟୁମ୍‌କେଦା।

14 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ମୁଶାକେ କାଜିକିୟା, "ଫାରୋ‌ଆଃ ମନ୍‌ସୁରୁଦ୍‌ କେଟେଦ୍‌କାନା, ଏନାମେନ୍ତେ ଇନିଃ ଇସ୍ରାଏଲ୍‌ ହଡ଼କକେ କାଏ ସେନ୍‌ ଇଚିକତାନା।" 15 ଏନାମେନ୍ତେ ଫାରୋ ସେତାଃ ଇଦାନ୍‌ରେ ଦାଆଃ ହେପାଦ୍‌ତେ ସେନ୍‌ ଇମ୍‌ତା ଇନିଃଲଃ ନେପେଲ୍‌ ନାଙ୍ଗ୍‌ ସେନ୍‌ମେ ଓଡ଼ୋଃ ଅକ ସଟା ବିଙ୍ଗ୍‌ ବାଇକାନ୍‌ ତାଇକେନା, ଏନ୍‌ ସଟାକେ ତିଃଇରେ ସାବ୍‌କେଦ୍‌ତେ ନିଲ୍‌ ନାହିଁ ଗାଡ଼ାତାଃରେ ତାଙ୍ଗିମେ। 16 ଏନ୍ତେ ଫାରୋକେ କାଜିମେ, "ଏବ୍ରୀ ହଡ଼କଆଃ ପ୍ରାଭୁ ପାର୍‌ମେଶ୍ୱାର୍‌ ଆଇଙ୍ଗ୍‌କେ ଆମ୍‌ତାଃ କୁଲ୍‌କେଦ୍‌ତେ କାଜିକାଦିୟାଁ, ‘ଆମ୍‌ ଇସ୍ରାଏଲ୍‌କକେ ସୁନୁସାର୍‌ କାମି ରିକା ନାଗେନ୍ତେ ବିର୍‌ତେ ସେନ୍‌ ନାଙ୍ଗ୍‌ ବାଗିତାକମେ ମେନ୍‌ଦ ନାହାଁଃ ଜାକେଦ୍‌ ଆମ୍‌ ଆଇଁୟାଃ କାଜି କାମ୍‌ ଆୟୁମ୍‌କେଦା।’" 17 ପାର୍‌ମେଶ୍ୱାର୍‌ ନେ'ଲେକା କାଜିତାନାଏ, "ଆଇଙ୍ଗ୍‌ ପ୍ରାଭୁ ତାନିଙ୍ଗ୍‌, ଏନା ନେ'ଲେକାତେ ସାରିୟାଃମେ। ନେଲେମେ ଆଇଙ୍ଗ୍‌ ଆଇଁୟାଃ ନେ ସଟାକେ ନିଲ୍‌ ନାହିଁରାଃ ଦାଆଃ ଚେତାନ୍‌ରେ ହୁମାଗେୟା ଓଡ଼ୋଃ ଦାଆଃ ମାୟୋମ୍‌ ବାଇକଆଃ। 18 ଓଡ଼ୋଃ ନିଲ୍‌ ନାହିଁ ଦାଆଃରେନ୍‌ ହାକୁକ ଗଏଃକଆଃକ ଓଡ଼ୋଃ ଦାଆଃ ସିତ୍‌ରୁ ସହାନଆଃ, ଏନାମେନ୍ତେ ମିସାର୍‌ରେନ୍‌ ହଡ଼କ ଦାଆଃ ନୁଁ କାକ ଦାଡ଼ିୟା।"

19 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ମୁଶାକେ କାଜିକିୟା, "ହାରୁନ୍‌କେ କାଜିମେ ଇନିଃ ମିସାର୍‌ ଦିଶୁମ୍‌ରେୟାଃ ସବେନ୍‌ ନାହିଁ, ଗାଡା ଓଡ଼ୋଃ ବାନ୍ଦା ଚେତାନ୍‌ରେ ତିଃଇ ଜିଲିଙ୍ଗ୍‌ୟେଁମେ। ଏନାରାଃ ସବେନ୍‌ ଦାଆଃ ମାୟୋମ୍‌ ବାଇକଆଃ। ଓଡ଼ୋଃ ମିସାର୍‌ ଦିଶୁମ୍‌ରାଃ ସବେନ୍‌ ଦାରୁରେୟାଃ କାଟୋରା ଓଡ଼ୋଃ ଦିରିରେୟାଃ କାଟୋରାରେ ତାଇନଃ ଦାଆଃ ହଗି ମାୟୋମ୍‌ ବାଇକଆଃ।"

20 ମୁଶା ଓଡ଼ୋଃ ହାରୁନ୍‌ ପ୍ରାଭୁ ପାର୍‌ମେଶ୍ୱାର୍‌ଆଃ କାଜି ଲେକା ଏନ୍‌ଲେକା ରିକା କେଦା। ହାରୁନ୍‌, ଫାରୋ‌ ଓଡ଼ୋଃ ଆୟାଃ ଦାସିକଆଃ ଆୟାର୍‌ରେ ନିଲ୍‌ ନାହିଁରାଃ ଦାଆଃ ଚେତାନ୍‌ରେ ସଟାକେ ହୁମାଃକେଦା ଓଡ଼ୋଃ ନାହିଁରାଃ ସବେନ୍‌ ଦାଆଃ ମାୟୋମ୍‌ ହବାୟାନା। 21 ଓଡ଼ୋଃ ନିଲ୍‌ ନାହିଁରେନ୍‌ ସବେନ୍‌ ହାକୁ ଗଏଃୟାନାକ ଓଡ଼ୋଃ ସବେନ୍‌ ଦାଆଃ ସିତ୍‌ରୁ ସହାନ୍‌ୟାନା। ଏନାରେ ମିସାର୍‌ରେନ୍‌ ହଡ଼କ ଦାଆଃ ନୁଁ କାକ ଦାଡ଼ିୟାନା। ଓଡ଼ୋଃ ମିସାର୍‌ ଦିଶୁମ୍‌ରାଃ ସବେନ୍‌ସାଃ ମାୟୋମ୍‌ତେ ପେରେଃୟାନା। 22 ଇମ୍‌ତାଙ୍ଗ୍‌ ମିସାର୍‌ରେନ୍‌ ଯାଦୁବାଲାକ ହଗି ଏନ୍‌ ଲେକା ରିକାକେଦାକ। ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ଆଃ କାଜିଲେକା ଫାରୋ‌ ରାଜାରାଃ ମନ୍‌ସୁରୁଦ୍‌ କେଟେଦ୍‌ୟାନା। ଓଡ଼ୋଃ ଇନ୍‌କିନାଃ କାଜି କାଏ ଆୟୁମ୍‌କେଦା। 23 ଏନ୍ତେ ଫାରୋ‌ ଏନାରେ ଆୟାଃ ମନ୍‌ରେ କାଏ ଦହକେଦା ଓଡ଼ୋଃ ଆୟାଃ ଅଡ଼ାଃତେ ରୁହାଡ଼୍‌ୟାନା। 24 ମିସାର୍‌ରେନ୍‌ ହଡ଼କ ଦାଆଃ ନୁଁ କାକ ଦାଡ଼ିକେଦା। ଏନାମେନ୍ତେ ଇନ୍‌କୁ ନିଲ୍‌ ନାହିଁ ଗେନାକରେ କୁଆଁ ଉର୍‌କେଦ୍‌ତେ ଦାଆଃ ଦାଣାଁକେଦାକ।

25 ଏୟା ହୁଲାଙ୍ଗ୍‌ ପୁରାୟାନ୍‌ ତାୟମ୍‌ତେ ପ୍ରାଭୁ ପାର୍‌ମେଶ୍ୱାର୍‌ ନିଲ୍‌ ନାହିଁ ଦାଆଃ ଚେତାନ୍‌ରେ ହୁମାଃକେଦା।