1 ଏନ୍ତେ ପ୍ରାଭୁ ମୁଶାକେ କାଜିକିୟା, "ଆମ୍‌, ହାରୁନ୍‌, ନାଦବ୍‌, ଅବିହୁ ଓଡ଼ୋଃ ଇସ୍ରାଏଲ୍‌ରେନ୍‌ ଆପି ହିସି ଗେଲ୍‌ ପ୍ରାଚିନ୍‌କଲଃ ପାର୍‌ମେଶ୍ୱାର୍‌ଆଃ ବୁରୁ ରାକାବ୍‌ କେଦ୍‌ତେ ସାଙ୍ଗିନ୍‌ରେ ଇନିୟାଃ ସେୱା ରିକାଇପେ। 2 ମୁଶା ଏସ୍‌କାର୍‌ ପ୍ରାଭୁଆଃ ହେପାଦ୍‌ତେ ହିଜୁଃଆ, ମେନ୍‌ଦ ଇନ୍‌କୁ ହେପାଦ୍‌ତେ କାକ ହିଜୁଆ, ଚାଏ ହଡ଼କ ହଗି ଇନିଃଲଃ ଆଲକା ରାକାବ୍‌କା।"

3 ଏନ୍ତେ ମୁଶା ହିଜୁଃୟାନ୍‌ଚି ପ୍ରାଭୁଆଃ ସବେନ୍‌ କାଜି ଓଡ଼ୋଃ ଆନ୍‌ଚୁ ହଡ଼କକେ ଉଦୁବାଦ୍‌କଆ ଓଡ଼ୋଃ ସବେନ୍‌କ ମିସାତେ କାଜିରୁହାଡ଼୍‌କେଦା, "ପ୍ରାଭୁ ଅକ ସବେନାଃ କାଜିକାଦାଏ, ଏନାକେ ଆଲେ ସବେନ୍‌କ ମାନାତିଙ୍ଗ୍‌ ରିକାୟା।" 4 ଏନ୍ତେ ମୁଶା ପ୍ରାଭୁଆଃ ସବେନ୍‌ କାଜି ଅଲ୍‌କେଦା ଓଡ଼ୋଃ ସେତାଃ ଇଦାନ୍‌ରେ ବିରିଦ୍‌କେଦ୍‌ତେ ବୁରୁ ଲାତାର୍‌ରେ ମିଆଁଦ୍‌ ବେଦି ବାଇକେଦା ଓଡ଼ୋଃ ଇସ୍ରାଏଲ୍‌ରେନ୍‌ ଗେଲ୍‌ବାର୍‌ କିଲି ଲେକାତେ ଗେଲ୍‌ବାର୍‌ ଦିରିରେୟାଃ ଖୁଣ୍ଟୁ ବାଇକେଦା। 5 ଓଡ଼ୋଃ ମୁଶା ଇସ୍ରାଏଲ୍‌ ହଡ଼କଆଃ ସେପେଡ଼େଦ୍‌କକେ କୁଲ୍‌କେଦ୍‌କଆ। ଇନ୍‌କୁ ପ୍ରାଭୁଆଃ ନୁତୁମ୍‌ତେ ଉରୁବ୍‌ଦାଣେଁ ଓଡ଼ୋଃ ମେନେସାରେୟାଃ ଦାନ୍‌ ନାଗେନ୍ତେ ବାଛାକକେ ଦାଣେଁ ରାକାବ୍‌କେଦ୍‌କଆକ। 6 ମୁଶା ଆଧା ମାୟୋମ୍‌ ଇଦି କେଦ୍‌ତେ କାଟୋରାରେ ଦହକେଦା ଓଡ଼ୋଃ ଆଧା ମାୟୋମ୍‌ ବେଦି ଚେତାନ୍‌ରେ ହିର୍‌ଚିକେଦା। 7 ଓଡ଼ୋଃ ରାଜିନାମା ଅନଲ୍‌ ପୁଥି ଇଦିକେଦ୍‌ତେ ହଡ଼କଆ ଆୟାର୍‌ରେ ପାଢ଼ାୱା କେଦା ଓଡ଼ୋଃ ଇନ୍‌କୁ କାଜିକେଦା, "ପ୍ରାଭୁ କାଜିକାଦ୍‌ ତେୟାଃ ସବେନାଃ ରିକାୟା ଓଡ଼ୋଃ ମାନାତିଙ୍ଗ୍‌ ରିକାୟା।"

8 ଏନ୍ତେ ମୁଶା ମାୟୋମ୍‌ ଇଦିକେଦ୍‌ତେ ହଡ଼କଆଃ ଚେତାନ୍‌ରେ ହିର୍‌ଚିକେଦ୍‌ତେ କାଜିକେଦା, "ପ୍ରାଭୁ ଆପେଲଃ ନେ ସବେନ୍‌ କାଜିନାଙ୍ଗ୍‌ ଅକନ୍‌ ରାଜିନାମା କାଦାଏ ଏନା ନେ ମାୟୋମ୍‌ ତାନାଃ।"

9 ମୁଶା ଓଡ଼ୋଃ ହାରୁନ୍‌, ନାଦବ୍‌, ଅବିହୁ ଓଡ଼ୋଃ ଇସ୍ରାଏଲ୍‌ରେନ୍‌ ଆପି ହିସି ଗେଲ୍‌ ପ୍ରାଚିନ୍‌କଲଃ ରାକାବ୍‌ୟାନା, 10 ଓଡ଼ୋଃ ଇସ୍ରାଏଲ୍‌ଆଃ ପାର୍‌ମେଶ୍ୱାର୍‌କେ ନେଲ୍‌କିୟା, ଇନିୟାଃ କାଟା ଲାତାର୍‌ରାଃ ଠାୟାଦ୍ ଚାମ୍‌କାଅଃତାନ୍ ନୀଳକାନ୍ତ ମଣି ଲେକା ଓଡ଼ୋଃ ସିର୍ମା ଲେକା ଫାର୍‌ଚି ତାଇକେନା। 11 ଓଡ଼ୋଃ ଇନିଃ ଇସ୍ରାଏଲ୍‌ରେନ୍‌ ପ୍ରାଚିନ୍‌କଆଃ ବିରୁଧ୍‌ରେ ତିଃଇ କାଏ ଜିଲିଙ୍ଗ୍‌ କେଦା, ମେନ୍‌ଦ ଇନ୍‌କୁ ପାର୍‌ମେଶ୍ୱାର୍‌କେ ଦାର୍‌ଶାନ୍‌ କିୟାଃକ ଓଡ଼ୋଃ ଜମ୍‌ ନୁ କେଦା।

12 ଏନ୍‌ତାୟମ୍‌ତେ ପ୍ରାଭୁ ମୁଶାକେ କାଜିକିୟା, "ଆମ୍‌ ବୁରୁ ରାକାବ୍‌ କେଦ୍‌ତେ ଆଇଁୟାଃ ତାଃତେ ହିଜୁଃ କେଦ୍‌ତେ ନେ ଠାୟାଦ୍‌ରେ ତାଇନ୍‌ମେ, ଆଇଙ୍ଗ୍‌ ହଡ଼କକେ ଇତୁକ ନାଗେନ୍ତେ ଆମ୍‌କେ ବାରିୟା ଦିରି ପାଟାରେ ଅଲାକାଦ୍‌ ନିୟାମ୍‌ ଓଡ଼ୋଃ ଆନ୍‌ଚୁ ଏମାମେୟାଁ ଏନା ହଡ଼କକେ ଇତୁକମେ।" 13 ଏନ୍ତେ ମୁଶା ଓଡ଼ୋଃ ଆୟାଃ ଦେଙ୍ଗାନିଃ ଯିହୋଶୁୟ ବିରିଦ୍‌ୟାନା ଓଡ଼ୋଃ ମୁଶା ପାର୍‌ମେଶ୍ୱାର୍‌ଆଃ ବୁରୁତେ ରାକାବ୍‌ୟାନା। 14 ମୁଶା ପ୍ରାଚିନ୍‌କକେ କାଜିକେଦ୍‌କଆ, "ଆଲେ ଆଉରି ରୁହାଡ଼୍‌ ଜାକେଦ୍‌ ଆପେ ତାଙ୍ଗି କେଦ୍‌ତେ ନେତାଃରେ ତାଇନ୍‌ପେ, ହାରୁନ୍‌ ଓଡ଼ୋଃ ହୁର୍‌ ଆପେଲଃ ମେନାକିନା, ଜେତାୟାଃ ଜେତ୍‌ନାଃ କାଜି ହବାଅଃରେ ଇନିଃ ଗମ୍‌କେକିନ୍‌ତାଃ ସେନ୍‌ କାଏ।"

15 ଏନ୍ତେ ମୁଶା ବୁରୁତେ ରାକାବ୍‌ୟାନା ଓଡ଼ୋଃ ବୁରୁକେ ରିମିଲ୍‌ ହାରୁବ୍‌ କେଦାଏ। 16 ସିନାଇ ବୁରୁ ଚେତାନ୍‌ରେ ପ୍ରାଭୁଆଃ ମାନାରାଙ୍ଗ୍‌ ଉଦୁବ୍‌ୟାନା ଓଡ଼ୋଃ ତୁରିୟା ଦିନ୍‌ ଜାକେଦ୍‌ ରିମିଲ୍‌ ହାରୁବ୍‌ଗି ତାଇନ୍‌ୟାନା, ଏନ୍ତେ ଏୟା ଦିନ୍‌ରେ ରିମିଲ୍‌ ହେତେ ପ୍ରାଭୁ ମୁଶାକେ କେଡ଼ାକିୟାଏ। 17 ଏନାରେ ପ୍ରାଭୁଆଃ ମାନାରାଙ୍ଗ୍‌ ଇସ୍ରାଏଲ୍‌ ହନ୍‌ କଆ ନେପେଲ୍‌ରେ ବୁରୁ ଚୁଟିରେ ଜିଅନେତାନ୍‌ ସେଙ୍ଗେଲ୍‌ ଲେକା ଉଦୁବ୍‌ୟାନା।

18 ଏନ୍ତେ ମୁଶା ରିମିଲ୍‌ ଥାଲାରେ ବଲୟାନ୍ତେ ବୁରୁ ଚେତାନ୍‌ ରାକାବ୍‌ କେଦ୍‌ତେ ବାର୍‌ ହିସି ସିଙ୍ଗି ନୁବାଃ ଏନ୍‌ ବୁରୁ ଚେତାନ୍‌ରେ ତାଇନ୍‌ୟାନା।