ରାଜିନାମା ବାକ୍ସା ବାଇ
1 ଏନ୍ତେ ବାସ୍ଲେଲ୍ ମିଆଦ୍ ବାବୁଲ୍ ଦାରୁରାଃ ରାଜିନାମା ବାକ୍ସା ବାଇକେଦା, ଏନାରାଃ ଜିଲିଙ୍ଗ୍ ବାର୍ ମୁକା ମିଦ୍ ବିତା ଓଡ଼ୋଃ ଚାକାର୍ ମିଦ୍ ମୁକା ମିଦ୍ ବିତା ଓଡ଼ୋଃ ସାଲାଙ୍ଗି ମିଦ୍ ମୁକା ମିଦ୍ ବିତା ତାଇନ୍କା। 2 ଓଡ଼ୋଃ ଫାର୍ଚି ସୋନାତେ ଏନାରେୟାଃ ଭିତାର୍ ଓଡ଼ୋଃ ବାହାରିରେ ହାରୁବ୍କେଦା ଓଡ଼ୋଃ ସୋନାତେ ଏନାରେୟାଃ ଚେତାନ୍ରେ ସିଙ୍ଗାର୍ ବିୟୁର୍କେଦା। 3 ସୋନାରେୟାଃ ଉପୁନିୟାଠୁ ଗଅଃ ତେୟାଃ ଉପୁନିୟା କାଟା ନାଙ୍ଗ୍ ବାଇକେଦା ଓଡ଼ୋଃ ବାରାନ୍ସାଃ ବାରିୟା ଲେକା ଗଅଃ ତେୟାଃ ଲାଗାଅକେଦା। 4 ଓଡ଼ୋଃ ବାବୁଲ୍ ଦାରୁରେୟାଃ ବାରିୟା ବାହାରମ୍ ବାଇକେଦ୍ତେ ସୋନାତେ ହାରୁବ୍କେଦା। 5 ଓଡ଼ୋଃ ବାକାସ୍କେ ଗଅଃ ନାଗେନ୍ତେ ବାକାସ୍ରାଃ ବାରାନ୍ସାଃ ଗୋଲ୍ଗି ଲାଗାଅକାନ୍ ତେୟାଃରେଗି ଗଅଃତେୟାଃ ତୁସିଙ୍ଗ୍କେଦା। 6 ଇନିଃ ଫାର୍ଚି ସୋନାରାଃ ପାପ୍ ଛାମା ହାରୁବ୍ ବାଇକେଦା ଏନାରାଃ ଜିଲିଙ୍ଗ୍ ବାର୍ ମୁକା ମିଦ୍ ବିତା ଓଡ଼ୋଃ ଚାକାର୍ ମିଦ୍ ମୁକା ମିଦ୍ ବିତା ବାଇକେଦା। 7 ଇନିଃ ମାର୍ତୁଲ୍ଲଃ ଦାଲ୍କେଦ୍ତେ ସୋନାରାଃ ବାରିଆ କିରୁବ୍ ବାଇକେଦ୍କିନାଏ ଓଡ଼ୋଃ ପାପ୍ ହାରୁବ୍ରାଃ ବାରାନ୍ସାଃରେ ଦହକେଦ୍କିନାଏ। 8 ମିଆଦ୍ କିରୁବ୍କେ ନେ ଟୁଣ୍ଡୁରେ ଓଡ଼ୋଃ ଏଟାଃ କିରୁବ୍କେ ହାନ୍ ଟୁଣ୍ଡୁରେ ଦହକେଦ୍କିନା, ବାରାନ୍ କିରୁବ୍କିନ୍କେ ପାପ୍ ହାରୁବ୍ରେୟାଃ ବାରାନ୍ସାଃରେ ଦହକେଦ୍କିନା। 9 ଓଡ଼ୋଃ କିରୁବ୍କିନାଃ ଆପ୍ରବ୍ ଚେତାନ୍ କେଦ୍ତେ ପାପ୍ ହାରୁବ୍ରେ ତାଇନ୍କେନା, କିରୁବ୍କିନାଃ ମେଦ୍ମୁହାଡ଼୍ ପାପ୍ ହାରୁବ୍ସାଃରେ ତାଇନ୍କେନା।
ହଲଙ୍ଗ୍ ଦହ ନାଙ୍ଗ୍ ମେଜ୍ ବାଇ
10 ଇନିଃ ବାବୁଲ୍ ଦାରୁରାଃ ମିଆଦ୍ ମେଜ୍ ବାଇକେଦା ଏନାରାଃ ଜିଲିଙ୍ଗ୍ ବାର୍ ମୁକା, ଚାକାର୍ ମିଦ୍ ମୁକା ଓଡ଼ୋଃ ସାଲାଙ୍ଗି ମିଦ୍ ମୁକା ମିଦ୍ ବିତା ତାଇନ୍କେନା। 11 ଫାର୍ଚି ସୋନାତେ ଏନାକେ ହାରୁବେମେ ଓଡ଼ୋଃ ଏନାରାଃ ଚାରିଓସାଃ ସୋନାରାଃ କାଥି ବାଇକେଦା। 12 ଓଡ଼ୋଃ ଏନାରାଃ ଚାରିଓସାଃ ଉପୁନ୍ ସାର୍ସାର୍ ରେୟାଃ ପାଟ୍ରି ବାଇ ବିୟୁର୍କେଦା ଓଡ଼ୋଃ ଏନ୍ ପାଟ୍ରିରାଃ ଚାରିଓସାଃ ସୋନାତେ କାଥି ବାଇକେଦା। 13 ଚାର୍ଠୁ ସୋନାରାଃ ଗଅଃ ତେୟାଃ ବାଇ କେଦ୍ତେ ଚାର୍ଠୁ କଚାରାଃ ଚାରିଓସାଃରେ ଦହକେଦା। 14 ମେଜ୍କେ ଗଅଃ ନାଗେନ୍ତେ ଗୋଲ୍ ଭିତାର୍ରେ ତାଇନ୍ ତେୟାଃ ବାହାରମ୍କେ ଏନ୍ ପାଟ୍ରି ହେପାଦ୍ରେ ତାଇନ୍କେନା। 15 ଓଡ଼ୋଃ ମେଜ୍କେ ଗଅଃ ନାଗେନ୍ତେ ବାବୁଲ୍ ଦାରୁରାଃ ବାହାରମ୍ ବାଇକେଦ୍ତେ ସୋନାରେ ହାରୁବ୍କେଦା। 16 ଓଡ଼ୋଃ ଥାଡ଼ି, ଡୁଆ, କାଟୋରା ଓଡ଼ୋଃ ଦୁଲ୍ ନାଗେନ୍ତେ ଲଟା ବାଇକେଦା, ନେ ସବେନାଃ ଫାର୍ଚି ସୋନାତେ ବାଇକେଦା।
ଦିଆ ଦହ ଖୁଣ୍ଟୁ
17 ଇନିଃ ମାର୍ତୁଲ୍ଲଃ ଦାଲ୍କେଦ୍ତେ ଫାର୍ଚି ସୋନାରାଃ ମିଆଁଦ୍ ଦିର୍କା ବାଇକେଦାଏ, ଓଡ଼ୋଃ ଏନାରାଃ କାଟା, ଡାନମ୍, କତ ଓଡ଼ୋଃ ବାହାକ ସବେନାଃ ମିଦ୍ କେଚାଃତେ ବାଇକେଦା।
18 ଦିର୍କା ହେତେ ତୁରିୟାଠୁ କତ ଅଡଙ୍ଗ୍ୟାନା, ଆପିଆ କତ ଜମ୍ସାଃ ଓଡ଼ୋଃ ଆପିଆ କତ ଲେଙ୍ଗାସାଃ ତାଇନ୍ୟାନା। 19 ଏନାରାଃ ସବେନ୍ କତରେ ମୁମ୍ଫାଲି ବାହା ରେୟା ଆପିୟା ଡେମ୍ବକାନ୍, କଢ଼ ଓଡ଼ୋଃ ବାହା ତାଇନ୍ୟାନା। ଏନ୍ ମାର୍ସାଲ୍ଦାରୁ ଏତେ ଅଡଙ୍ଗ୍କାନ୍ ତୁରିୟା କତରେ ନେ’ଲେକା ହବାଅଃଆ। 20 ମେନ୍ଦ ମାର୍ସାଲ୍ ଦାରୁରେ ମୁମ୍ଫାଲି ବାହା ଉପୁନିୟା ଡେମ୍ବକାନ୍, କଢ଼ ଓଡ଼ୋଃ ବାହା ତାଇନ୍ୟାନା। 21 ଓଡ଼ୋଃ ଏନ୍ ମାର୍ସାଲ୍ ଦାରୁଏତେ ଅକନ୍ ତୁରିୟା କତ ଅଡଙ୍ଗ୍ୟାନା, ଏନ୍ ବାବାରିୟା କତରେୟାଃ ଲାତାର୍ରେ ମିମିଆଦ୍ କଢ଼ ତାଇନ୍ୟାନା। 22 ଏନ୍ତେ ଏନ୍ କଢ଼ ଓଡ଼ୋଃ କତ ଏନାରାଃ ହିସା ହବାୟାନା ଓଡ଼ୋଃ ଏନା ମାର୍ତୁଲ୍ଲଃ ଦାଲ୍କେଦ୍ତେ ଫାର୍ଚି ସୋନାଲଃ ବାଇକେଦାଏ। 23 ଓଡ଼ୋଃ ଏନା ନାଗେନ୍ତେ ଏୟାଠୁ ଦିଆ ଦହ ନାଙ୍ଗ୍ ମିଆଁଦ୍ ଖୁଣ୍ଟୁ, ଚିମ୍ଠା ଓଡ଼ୋଃ ଆଙ୍ଗରା ଅଡଙ୍ଗ୍ କାର୍ଛୁଲ୍, ଏନ୍ ସବେନାଃକକେ ଫାର୍ଚି ସୋନାତେ ବାଇକେଦା। 24 ଇନିଃ ଲାଗ୍ଭାଗ୍ କେଜି ଫାର୍ଚି ସୋନାତେ ଦିଆ ଦହ ନାଙ୍ଗ୍ ଖୁଣ୍ଟୁ ଓଡ଼ୋଃ ଏନାରେୟାଃ ସବେନାଃ ବାଇକେଦାଏ।
ବୁଗିନ୍ ସହାନ୍ ଉରୁବ୍ ନାଙ୍ଗ୍ ବେଦି
25 ଇନିଃ ବାବୁଲ୍ ଦାରୁରାଃ ମିଆଁଦ୍ ଉରୁବ୍ ବେଦି ବାଇକେଦାଏ, ଏନାରେୟାଃ ଜିଲିଙ୍ଗ୍ ଓଡ଼ୋଃ ଚାକାର୍ ମିଦ୍ ମୁକା ଲେକା ଓଡ଼ୋଃ ସାଲାଙ୍ଗି ବାର୍ ମୁକା ବାଇକେଦାଏ। ଏନା ଉପୁନ୍ କଚା ବାଇକେଦାଏ ଓଡ଼ୋଃ ଏନାରେ ଦିରିଙ୍ଗ୍ ଲେକା ବାଇକେଦାଏ। 26 ଇନିଃ ବେଦିରେୟାଃ ଚାରିଓ କଚାରାଃ ଚେତାନ୍ରେ ତାଇକାନ୍ ଦିରିଙ୍ଗ୍କେ ଫାର୍ଚି ସୋନାତେ ଦାପାଲ୍କେଦା ଓଡ଼ୋଃ ବେଦିରାଃ ଚେତାନ୍ ହିସାରାଃ ଚାରିଓ ଗେନା ଗେନାରେ ଫାର୍ଚି ସୋନାରାଃ ଝାଲେର୍ ବାଇକେଦାଏ। 27 ଏନ୍ ବେଦିକେ ବଲିଲଃ ଗଅଃ ଇଦି ନାଙ୍ଗ୍ ବେଦିରାଃ ଝାଲେର୍ ଲାତାର୍ରେ ଫାର୍ଚି ସୋନାତେ ବାଇୟାକାନ୍ ବାବାରିୟା ଫୁନ୍ଦ୍ରି, ବେଦିରାଃ ବାରାନ୍ସାଃରାଃ କଚାରେ ଲାଗାଅକେଦା। 28 ଇନିଃ ବାବୁଲ୍ ଦାରୁରାଃ ବଲି ବାଇକେଦା ଓଡ଼ୋଃ ଏନାରେ ଫାର୍ଚି ସୋନାତେ ଦାପାଲ୍କେଦା।
29 ଇନିଃ ଆଭିଷେକ୍ ଏମ୍ ନାଙ୍ଗ୍ ପାବିତାର୍ ସୁନୁମ୍ ଓଡ଼ୋଃ ପୁରାଃ ବୁଗିନ୍ ସହାନ୍ତାନ୍ ଫାର୍ଚି ଧୁଆନ୍ତେ ବାଇକାନ୍ ବୁଗିନ୍ ସହାନ୍ ଧୁଆନ୍ ବାଇକେଦାଏ।
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)