1 ନେ’ଲେକାତେ ପାର୍‌ମେଶ୍ୱାର୍‌ ଅତେଦିଶୁମ୍‌, ସିର୍ମା ଓଡ଼ୋଃ ଏନ୍‌ ବାରାନାଃରେ ତାଇକାନ୍‌ ସବେନାଃକେ ବାଇ ପୁରାକେଦା। 2 ପାର୍‌ମେଶ୍ୱାର୍‌ ଏୟା ହୁଲାଙ୍ଗ୍‌ରେ ଆୟାଃ ସବେନ୍‌ କାମି ପୁରା ଚାବାକେଦାଏ ଓଡ଼ୋଃ କାମିଏତେ ରୁଡ଼ୁୟାନା। 3 ଏନ୍ତେ, ପାର୍‌ମେଶ୍ୱାର୍‌ ଏୟା ହୁଲାଙ୍ଗ୍‌କେ ଆଶିଷ୍‌କେଦ୍‌ଲଃ ପାବିତାର୍‌ ମେନ୍ତେ କାଜିକେଦାଏ। ଚିୟାଃଚି ଏନ୍‌ ହୁଲାଙ୍ଗ୍‌ରେ ପାର୍‌ମେଶ୍ୱାର୍‌ ଆୟାଃ ସବେନ୍‌ କାମିକେ ପୁରାକେଦ୍‌ଲଃ କାମିଏତେ ରୁଡ଼ୁୟାନା।

4 ଅତେ ଓଡ଼ୋଃ ସିର୍ମା ବାଇକେଦ୍‌ ଇମ୍‌ତାରେୟାଃ କାଜି ନେଆଁ ତାନାଃ, ପ୍ରାଭୁ ପାର୍‌ମେଶ୍ୱାର୍‌ ଅତେ ଓଡ଼ୋଃ ସିର୍ମାରେୟାଃ ସବେନାଃ ବାଇକେଦାଏ ଇମ୍‌ତା, 5 ପିଡ଼ିରେ ଜେତାନ୍ ଆଡ଼ାଃସାକାମ୍‌ ଓଡ଼ୋଃ ହିତାଜାଙ୍ଗ୍‌ କା ଅମନ୍‌କାନ୍‌ ତାଇନ୍‌କେନା; ଚିୟାଃଚି ପ୍ରାଭୁ ପାର୍‌ମେଶ୍ୱାର୍‌ ଅତେରେ ଦାଆଃ କାଏ ଗାମା, ଓଡ଼ୋଃ ପିଡ଼ିରେ କାମି ନାଗେନ୍ତେ ଜେତା ମାନୱା ହଁଗି କାକ ତାଇକେନା। 6 ଏନ୍ତେ ଅତେରେ ଅସ୍‌ଦାଆଃ ଉୟୁଃୟାନ୍‌ ହରାତେ ଅତେ ଆଲିୟାନା।

7 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ଅତେରାଃ ଧୁଡ଼ି ଇଦିକେଦ୍‌ତେ ମାନୱାକେ ବାଇକିୟା ଓଡ଼ୋଃ ଇନିୟାଃ ମୁହୁଁରେ ଅମ୍‌କେଦ୍‌ତେ ଜୀଉ ଏମଃ ସାହେଁଦ୍‌ ଏମ୍‌କିୟାଏ, ଏନ୍ତେ ଇନିଃ ଜୀନିଦ୍‌ ହଡ଼ ହବାୟାନାଏ।

8 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ଏଦାନ୍ ନୁତୁମଃତାନ୍‌ ଠାୟାଦ୍‌ରେୟାଃ ସିଙ୍ଗିତୁରଃସାଃରେ ମିଆଁଦ୍‌ ବାଗାଇଚା ବାଇକେଦାଏ, ଓଡ଼ୋଃ ଏନ୍ତାଃରେ ଆୟାଃ ତିଃଇତେ ବାଇକିଃ ମାନୱାକେ ଦହକିୟା। 9 ପ୍ରାଭୁ ପାର୍‌ମେଶ୍ୱାର୍‌ ରାକାମ୍‌ ରାକାମ୍‌ ଜ ଏମ୍‌ତାନ୍‌ ସବେନ୍‌ ଦାରୁ ଓଡ଼ୋଃ ନେଲ୍‌ ନାଗେନ୍ତେ ସୁଗାଡ଼ାନ୍‌ ଦାରୁ ରଏକେଦାଏ। ଓଡ଼ୋଃ ବାଗାଇଚା ରେୟାଃ ଥାଲାରେ ଜୀଦାନ୍‌ ଏମଃ ଦାରୁ ଓଡ଼ୋଃ ବୁଗିନାଃ ଏତ୍‌କାନାଃ ଆଟ୍‌କାର୍‌ଉରୁମ୍‌ ରେୟାଃ ସେଣାଁନ୍‌ ଦାରୁ ହଁଗି ରଏକେଦାଏ।

10 ଏନ୍‌ ବାଗାଇଚାରେ ଦାଆଃ ଏମ୍‌ନାଙ୍ଗ୍‌ ଏଦାନ୍‌ଏତେ ମିଆଁଦ୍‌ ଗାଡ଼ା ଲିଙ୍ଗିୟଃ ତାଇକେନା, ଏନା ଉପୁନ୍‌ ହିସାରେ ହାଟିଙ୍ଗ୍‌ୟାନା। 11 ସିଦା ଗାଡ଼ାରେୟାଃ ନୁତୁମ୍‌ ପିଶୋନ୍‌ ତାଇକେନା, ଏନା ଗଟା ହବିଲା ନୁତୁମ୍‌ ଦିଶୁମ୍‌ରେୟାଃ ଚାରିଅସାଃରେ ଲିଙ୍ଗିୟଃ ତାଇକେନା। ଏନ୍ତାଃରେ ସୋନା ନାମଃ ତାଇକେନା। 12 ଏନ୍‌ ଦିଶୁମ୍‌ରେ ଫାର୍‌ଚି ସୋନା,ମତି ଓଡ଼ୋଃ ଗୋମେଦକ୍‌ ନୁତୁମ୍‌ ଗନଙ୍ଗ୍‌ଆଁନ୍‌ ଦିରି ହଁଗି ନାମଃ ତାଇକେନା। 13 ଏଟାଃ ଗାଡ଼ାରେୟାଃ ନୁତୁମ୍‌ ଗିହୋନ୍‌ ତାଇକେନା, ନେ ଗାଡ଼ା କୁଶ୍‌ ଦିଶୁମ୍‌ରେୟାଃ ଚାରିଅସାଃରେ ଲିଙ୍ଗିୟଃ ତାଇକେନା। 14 ଆପି ଗାଡ଼ାରେୟାଃ ନୁତୁମ୍‌ ହିଦ୍ଦେକଲ୍‌ ତାଇକେନା, ଅକଆଃଚି ଟାଇଗ୍ରିସ୍‌ ମେନ୍ତେ କାଜିୟଃତାନା। ନେ ଗାଡ଼ାଦ ଆସେରିୟା ଦିଶୁମ୍‌ରାଃ ସିଙ୍ଗିତୁରଃସାଃ ହରାତେ ଲିଙ୍ଗିୟଃ ତାଇକେନା। ଉପୁନିୟା ଗାଡ଼ାରେୟାଃ ନୁତୁମ୍‌ ଇଉଫ୍ରେଟିସ୍‌ ତାଇକେନା, ଅକଆଃଚି ଇଉଫ୍ରାଟିସ୍‌ ମେନ୍ତେ କାଜିୟଃତାନା।

15 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ଏନ୍‌ ମାନୱାକେ ଇଦିକେଦ୍‌ତେ ଏଦାନ୍‌ ବାଗାଇଚାରେ କାମିନାଙ୍ଗ୍‌ ଓଡ଼ୋଃ ଯାତାନ୍‌ ଇଦିନାଙ୍ଗ୍‌ ଦହକିୟାଏ। 16 ମେନ୍‌ଦ ପ୍ରାଭୁ ପାର୍‌ମେଶ୍ୱାର୍‌ ଏନ୍‌ ମାନୱାକେ ହୁକୁମ୍‌ ଏମ୍‌କେଦ୍‌ତେ କାଜିକିୟା, "ବାଗାଇଚାରେ ତାଇନ୍‌ତାନ୍‌ ସବେନ୍‌ ଦାରୁରାଃ ଜ ବେଗାର୍‌ ବରତେ ଜମ୍‌ ଦାଡ଼ିୟାମ୍‌, 17 ମେନ୍‌ଦ ବୁଗିନାଃ ଓଡ଼ୋଃ ଏତ୍‌କାନାଃ ଆଟ୍‌କାର୍‌ଉରୁମ୍‌ରାଃ ସେଣାଁ ଏମ୍‌ତାନ୍‌ ଦାରୁରେୟାଃ ଜ ଆଲମ୍‌ ଜମାଃ, ଅକ ହୁଲାଙ୍ଗ୍‌ ଜମେୟାଁମ୍‌ ଏନ୍‌ ହୁଲାଙ୍ଗ୍‌ ସାର୍‌ତିଗି ଗଜଃଆମ୍‌।"

18 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ କାଜିକେଦାଏ, "ମାନୱା ଏସ୍‌କାର୍‌ଗି ତାଇନଃତେୟାଃ ବୁଗିନାଃ ନାହାଁଲାଃ, ଆଇଙ୍ଗ୍‌ ଇନିୟାଃ ଲାଗାତିଙ୍ଗ୍‌ ଲେକା ମିଆଦ୍‌ ଦେଙ୍ଗାନିଃକେ ବାଇୟାଇଙ୍ଗ୍‌।" 19 ପ୍ରାଭୁ ପାର୍‌ମେଶ୍ୱାର୍‌ ଅତେରେୟାଃ ଧୁଡ଼ିଏତେ ସବେନ୍‌ ଜାଁତୁ ଓଡ଼ୋଃ ଚେଣେଁକକେ ବାଇକେଦ୍‌କଆ। ପାର୍‌ମେଶ୍ୱାର୍‌ ଏନ୍‌ ମାନୱାତାଃତେ ଏନ୍‌ ସବେନ୍‌କକେ ନେଲ୍‌ ନାଗେନ୍ତେ ଓଡ଼ୋଃ ଅକଏକେ ଅକ ନୁତୁମ୍‌ ଏମାଇୟା ଏନା ସାରି ନାଗେନ୍ତେ ଆଉକେଦ୍‌କଆ। ଓଡ଼ୋଃ ଇନିଃ ଅକଏକେ ଅକ ନୁତୁମ୍‌ ଏମାଦ୍‌କଆଏ ଇନ୍‌କୁଆଃ ଏନ୍‌ ନୁତୁମ୍‌ ହବାୟାନା। 20 ନେ’ଲେକାତେ ଏନ୍‌ ମାନୱା ସବେନ୍‌ ଆସୁଲ୍‌ ଜାଁତୁକଆଃ ଓଡ଼ୋଃ ଚେଣେଁକଆଃ ନୁତୁମ୍‌ ଏମାଦ୍‌କଆଏ, ମେନ୍‌ଦ ଆୟାଃ ଲାଗାତିଙ୍ଗ୍‌ ଲେକା ଦେଙ୍ଗାନିଃ କାକ ନାମ୍‌ୟାନା।

21 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ମାନୱାକେ ପୁରାଃଗି ଦୁଡ଼ୁମ୍‌ତେ ଦୁଡ଼ୁମ୍‌କିୟା, ଓଡ଼ୋଃ ଏନ୍‌ ଦୁଡ଼ୁମ୍‌କାନ୍‌ ଇମ୍‌ତା ପ୍ରାଭୁ ପାର୍‌ମେଶ୍ୱାର୍‌ ଏନ୍‌ ମାନୱାରାଃ ମିଆଁଦ୍‌ ସାଡ଼େଜାଙ୍ଗ୍‌ ଇଦିକେଦ୍‌ତେ ଏନ୍ତାଃରେ ମାସ୍‌ତେ ପେରେଃକେଦା। 22 ଏନ୍ତେ ପ୍ରାଭୁ ପାର୍‌ମେଶ୍ୱାର୍‌ ଇନିୟାଃ ସାଡ଼େଜାଙ୍ଗ୍‌ ଏତେ ମିଆଦ୍‌ କୁଡ଼ି ବାଇକିୟାଏ, ଓଡ଼ୋଃ ଇନିଃକେ ଏନ୍‌ ମାନୱାରାଃ ହେପାଦ୍‌ତେ ଆଉକିୟା। 23 ଏନ୍ତେ, ଏନ୍‌ ମାନୱା କାଜିକେଦାଏ,

"ଇନିଃ ଆଇଁୟାଃ ଲେକାଗି ମେନାଇୟା,

ଇନିୟାଃ ଜାଙ୍ଗ୍‌ ଆଇଁୟାଃ ଜାଙ୍ଗ୍‌ ଏତେଗି ବାଇୟାକାନା ଓଡ଼ୋଃ ଇନିୟାଃ ମାସ୍‌ ଆଇଁୟାଃ ମାସ୍‌ ଏତେଗି ବାଇୟାକାନା।

ଇନିୟାଃ ନୁତୁମ୍‌ କୁଡ଼ି, ଚିୟାଃଚି ଇନିଃଦ କଡ଼ା ଏତେଗି ହିଜୁଆକାନା।"

24 ନେଆଁ ନାଗେନ୍ତେ କଡ଼ା ଆୟାଃ ଏଙ୍ଗା ଓଡ଼ୋଃ ଆପୁକେ ବାଗିକେଦ୍‌ତେ ଆପ୍‌ନାଃ କୁଡ଼ିଲଃ ମେସାନାଏ ଓଡ଼ୋଃ ଏନ୍‌ ବାରାନ୍‌କିନ୍‌ ମିଆଦ୍‌ ହଡ଼୍‌ମ ହବାଅଃଆକିନ୍‌।

25 ଏନ୍‌ କଡ଼ା ଓଡ଼ୋଃ କୁଡ଼ି, ବାରାନ୍‌କିନ୍‌ ସାମା ହଡ଼୍‌ମଗି ତାଇକେନାକିନ୍‌ ଏନ୍‌ରେୟ ଆକିନାଃ ଗିହୁଃ କା ତାଇକେନା।