1 ଦୁଇ ବାରାଷ୍‌ ହବାୟାନ୍‌ ତାୟମ୍‌ତେ, ଫାରୋ ମିଆଁଦ୍‌ କୁମୁ ନେଲ୍‌କେଦାଏ, କୁମୁରେ ଇନିଃ ନିଲ୍‌ ନାହିଁ ଗେନାରେ ତିଙ୍ଗୁକାନ୍‌ ତାଇକେନା। 2 ଇମ୍‌ତା ନିଲ୍‌ ନାହିଁ ଭିତାର୍‌ଏତେ କିରିକାନ୍‌ ବୁଗିନ୍‌ ଏୟା ଗାଈ ବାହାରି ଅଡଙ୍ଗ୍‌କେଦ୍‌ତେ ତାସାଦ୍‌ ଜମ୍‌କେଦାକ। 3 ଏନ୍ତେ ଆଡଃଗି ଏୟା ଗାଈ ନିଲ୍‌ ନାହିଁ ଭିତାର୍‌ଏତେ ଅଡଙ୍ଗ୍‌ୟାନାକ। ଇନ୍‌କୁ ପୁରାଃଗି ନାରାଦୁରା ଓଡ଼ୋଃ ସତ୍‌ରାଗି ନେଲଃ ତାଇକେନାକ। ଇନ୍‌କୁ ନାହିଁ ଗେନାରେ ଆତିଙ୍ଗ୍‌ତାନ୍‌ ଏଟାଃ ଗାଈକଆଃ ହେପାଦ୍‌ରେ ତିଙ୍ଗୁୟାନାକ। 4 ଏନ୍ତେ ଏନ୍‌ ନାରାଦୁରା ଓଡ଼ୋଃ ସତ୍‌ରା ଗାଈକ, ଏନ୍‌ କିରିକାନ୍‌ ବୁଗିନ୍‌ ଗାଈକକେ ଜମ୍‌କେଦ୍‌କଆକ। ଇମ୍‌ତା ଫାରୋ ଦୁଡ଼ୁମ୍‌ଏତେ ବିରିଦ୍‌ୟାନା। 5 ଇନିଃ ଆଡଃମିସା ଦୁଡ଼ୁମ୍‌ୟାନାଏ, ଓଡ଼ୋଃ ବାର୍‌ସାତେ କୁମୁ ନେଲ୍‌କେଦାଏ। ମିଆଁଦ୍ ଖେଡ଼୍‌ରେ ଏୟା ବୁଗିନ୍‌ ଜ’ତେ ପେରେୟାକାନ୍‌ ଗେଲେ ଅଡଙ୍ଗ୍‌ୟାନା। 6 ଏନ୍ ତାୟମ୍‌ତେ ପୁରାବ୍‌ସାଃଏତେ ଲଲ ହୟ ହିଜୁଃୟାନ୍‌ ହରାତେ ଜାଙ୍ଗ୍‌କାନ୍‌ ଏୟା ଗେଲେ ଓଡ଼ୋଃ ରହଡ଼ାକାନ୍‌ ଏୟା ଗେଲେ ଅଡଙ୍ଗ୍‌ୟାନା। 7 ଏନ୍‌ ରହଡ଼ାକାନ୍‌ ଏୟା ଗେଲେ, ଜାଙ୍ଗ୍‌କାନ୍‌ ଏୟା ଗେଲେକେ ଉଦ୍‌କେଦା। ଇମ୍‌ତା ଫାରୋ ରାଜା ଦୁଡ଼ୁମ୍‌ଏତେ ବିରିଦ୍‌ୟାନା ଓଡ଼ୋଃ ଇନିଃ ଏନାକେ କୁମୁ ମେନ୍ତେ ଆଟ୍‌କାର୍‌କେଦା। 8 ଏଟାଃହୁଲାଙ୍ଗ୍‌ ସେତାଃ ଇଦାନ୍‌ରେ ଫାରୋରାଃ ମନ୍‌ ଆକ୍‌ବାକାଅୟାନା। ଏନାତେ ଇନିଃ ମିସାର୍‌ ଦିଶୁମ୍‌ରେନ୍‌ ଯାଦୁବାଲା ଓଡ଼ୋଃ ସେଣାଁନ୍‌ ହଡ଼କକେ ହାକାଅ କେଦ୍‌କଆ। ମେନ୍‌ଦ ଇନ୍‌କୁଏତେ ଜେତାଏ ହଗି ଫାରରାଃ କୁମୁରେୟାଃ ମୁଣ୍ଡି କାକ କାଜି ଦାଡ଼ିକେଦା।

9 ଇମ୍‌ତା ଦାଖ୍‌ରାସି ହାଟିଙ୍ଗ୍‌ ହଡ଼କଆଃ ଆଗୁଆଇ ଫାରୋକେ କାଜିକିୟା, "ତିସିଙ୍ଗ୍‌ ଆଇଙ୍ଗ୍‌ ଆଇଁୟାଃ ପାପ୍‌ ପାହାମେ ତାନାଇଙ୍ଗ୍‌। 10 ଫାରୋ ଆୟାଃ ଦାସିକିନାଃ ଚେତାନ୍‌ରେ ଖିସ୍‌ୟାନ୍‌ଲଃ ଆଇଙ୍ଗ୍‌କେ ଓଡ଼ୋଃ ଜଜମାଃ ବାଇତାନ୍‌ ଆଗୁଆଇକେ ହର ହଡ଼କଆଃ ଆଗୁଆଇରାଃ ଅଡ଼ାଃରେ ତାଇକାନ୍‌ ଜେହେଲ୍‌ରେ ହାଣ୍ଡେଦାକାଲିଙ୍ଗ୍‌ ତାଇକେନାଏ। 11 ଇମ୍‌ତା ଆଲିଙ୍ଗ୍‌ ବାରାନ୍‌କିନ୍‌ ମିଆଁଦ୍‌ ନିଦାରେ କୁମୁ ନେଲ୍‌କେଦାଲିଙ୍ଗ୍‌ ଓଡ଼ୋଃ ଏନ୍‌ କୁମୁରେୟାଃ ମୁଣ୍ଡି ଏଟାଃ ଏଟାଃ ତାଇକେନା। 12 ଏନ୍ତାଃରେ ଆଲିଙ୍ଗ୍‌ଲଃ ମିଆଁଦ୍ ଏବ୍ରୀ ଧାଙ୍ଗ୍‌ଡ଼ା କଡ଼ା ତାଇକେନାଏ, ଇନିଃ ହର ହଡ଼କଆଃ ଆଗୁଆଇରାଃ ଦାସି ତାଇକେନାଏ। ଆଲିଙ୍ଗ୍‌ ଇନିଃକେ ଆଲିଙ୍ଗ୍‌ୟାଁଃ କୁମୁ ଉଦୁବ୍‌କିୟାଲିଙ୍ଗ୍‌, ଓଡ଼ୋଃ ଇନିଃ ଆଲିଙ୍ଗ୍‌ୟାଁଃ ବାରାନ୍‌କିନାଃ ଏଟାଃ ଏଟାଃ କୁମୁରେୟାଃ ମୁଣ୍ଡି ଉଦୁବ୍‌କେଦ୍‌ଲିୟାଁ। 13 ଇନିଃ ଆଲିଙ୍ଗ୍‌ ବାରାନ୍‌କିନାଃ କୁମୁରେୟାଃ ମୁଣ୍ଡି କାଜିକେଦ୍‌ ଲେକାଗି ଆଲିୟାଁଃ ଚେତାନ୍‌ରେ ହବାୟାନା। ଆଇଙ୍ଗ୍‌ ଆଇଁୟାଃ ସିଦାରେୟାଃ କାମିରେ ଆଡଃମିସା ସାଲାୟାନାଇଙ୍ଗ୍‌ ଏନ୍ତେ ଆଡଃମିହୁଡ଼୍‌କେ ହାକା ଗଏଃରାଃ ହୁକୁମ୍‌ ଏମ୍‌ୟାନା।"

14 ଇମ୍‌ତା ଫାରୋ ଯୋଷେଫ୍‌କେ ଜେହେଲ୍‌ ଅଡ଼ାଃଏତେ ଆଉଇପେ ମେନ୍ତେ କାଜିକେଦ୍‌କଆ। ଇନିଃକେ ଇମ୍‌ତା ଜେହେଲ୍‌ ଅଡ଼ାଃଏତେ ଆଉକିୟାକ ଓଡ଼ୋଃ ଇନିଃ ଆୟାଃ ମେଦ୍‌ମୁହାଁଡ଼୍‌ ବାଇ ସାଫାୟାନ୍‌ଲଃ ବୁଗିନ୍‌ ଲିଜାଃ ତୁସିଙ୍ଗ୍‌କେଦ୍‌ତେ ଫାରୋରାଃ ଆୟାର୍‌ରେ ତିଙ୍ଗୁୟାନା। 15 ଫାରୋ ରାଜା ଯୋଷେଫ୍‌କେ କାଜିକିୟା, "ଆଇଙ୍ଗ୍‌ ମିଆଁଦ୍ କୁମୁ ନେଲାକାଦାଇଙ୍ଗ୍‌, ଜେତାଏ ହଁଗି ଏନାରାଃ ମୁଣ୍ଡି ଉଦୁବ୍‌ କାକ ଦାଡ଼ିତାନା। ମେନ୍‌ଦ ଆଇଙ୍ଗ୍‌ ଆମାଃ ବିଷାଏରେ ଆୟୁମାକାଦାଇଙ୍ଗ୍‌ ଯେ, ଆମ୍‌ କୁମୁ ଆୟୁମ୍‌କେଦ୍‌ତେ, ଏନାରାଃ ମୁଣ୍ଡି ଉଦୁବ୍‌ ଦାଡ଼ିୟାମ୍‌।"

16 ଯୋଷେଫ୍‌ ଫାରୋକେ କାଜିରୁହାଡ଼୍‌କିୟା, "ଆଇଙ୍ଗ୍‌ କୁମୁରାଃ ମୁଣ୍ଡି ଉଦୁବ୍‌ ଦାଡ଼ି ଲେକାନିଃ ନାହାଁଲିଙ୍ଗ୍‌, ମେନ୍‌ଦ ପାର୍‌ମେଶ୍ୱାର୍‌ ଫାରୋକେ କୁମୁରାଃ ବୁଗିନ୍‌ ମୁଣ୍ଡି ଉଦୁବାଇୟା।"

17 ଏନ୍ତେ ଫାରୋ ଯୋଷେଫ୍‌କେ କାଜିକିୟା, "ଆଇଙ୍ଗ୍‌ କୁମୁରେ ନେଲ୍‌ଦାଇଙ୍ଗ୍‌ ଯେ, ଆଇଙ୍ଗ୍‌ ନିଲ୍‌ ନାହିଁ ଗେନାରେ ତିଙ୍ଗୁକାନ୍‌ ତାଇକେନାଇଙ୍ଗ୍‌। 18 ଇମ୍‌ତା ନିଲ୍‌ ନାହିଁ ଭିତାର୍‌ଏତେ କିରିକାନ୍‌ ବୁଗିନ୍‌ ଏୟା ଗାଈ ବାହାରି ଅଡଙ୍ଗ୍‌କେଦ୍‌ତେ ତାସାଦ୍‌ ଜମ୍‌କେଦାକ। 19 ଇନ୍‌କୁଆଃ ତାୟମ୍‌ତେ ରହଡ଼ାକାନ୍‌ ନାରାଦୁରା ଏୟା ଗାଈ ନାହିଁ ଭିତାର୍‌ଏତେ ଅଡଙ୍ଗ୍‌ୟାନାକ। ଆଇଙ୍ଗ୍‌ ଏନ୍‌ ଲେକାନ୍‌ ରହଡ଼ାକାନ୍‌ ନାରାଦୁରା ଗାଈ ଚିଉଲା ହଗି ମିସାର୍‌ ଦିଶୁମ୍‌ରେ କାଇଙ୍ଗ୍‌ ନେଲାକାଦ୍‌କଆ। 20 ଏନ୍‌ ରହଡ଼ାକାନ୍‌ ନାରାଦୁରା ଗାଈକ, ସିଦାରେନ୍‌ କିରିକାନ୍‌ ବୁଗିନ୍‌ ଏୟା ଗାଈକକେ ଜମ୍‌କେଦ୍‌କଆକ। 21 ମେନ୍‌ଦ ଜମ୍‌ ଚାବାକେଦ୍‌ ତାୟମ୍‌ତେ ହଗି ଇନ୍‌କୁ ଜମାକାଦ୍‌ ଲେକା କାକ ନେଲ୍‌ୟାନା। ଇନ୍‌କୁ ସିଦା ଲେକାଗି ରହଡ଼ାକାନ୍‌ ନାରାଦୁରାଗି ନେଲ୍‌ୟାନାକ। ଇମ୍‌ତା ଆଇଙ୍ଗ୍‌ ଦୁଡ଼ୁମ୍‌ଏତେ ବିରିଦ୍‌ୟାନାଇଙ୍ଗ୍‌। 22 ଆଇଙ୍ଗ୍‌ ଆଡଃଗି କୁମୁ ନେଲ୍‌କେଦାଇଙ୍ଗ୍‌, ମିଆଁଦ୍ ନାଡାରେ ସାତ୍‌ଠୁ ବୁଗିନ୍‌ ଜ’ତେ ପେରେୟାକାନ୍‌ ଗେଲେ ଅଡଙ୍ଗ୍‌ୟାନା। 23 ଏନ୍ତେ ପୁରାବ୍‌ ସାଃରେୟାଃ ହୟ ହିଜୁଃୟାନ୍‌ ହରାତେ ରହଡ଼୍‌ ଓଡ଼ୋଃ ପେଟେୟାକାନ୍ ସାତ୍‌ଠୁ ଗେଲେ ଅଡଙ୍ଗ୍‌ୟାନା। 24 ଏନ୍‌ ସାତ୍‌ଠୁ ରହଡ଼୍‌ ଓଡ଼ୋଃ ପେଟେଃ ଗେଲେ, ଏନ୍‌ ବୁଗିନ୍‌ ଜ’ତେ ପେରେୟାକାନ୍ ସାତ୍‌ଠୁ ଗେଲେକେ ଉଦ୍‌କେଦା। ନେ କୁମୁ ଆଇଙ୍ଗ୍‌ ଯାଦୁରିକା ହଡ଼କକେ କାଜିକେଦ୍‌କଆଇଙ୍ଗ୍‌, ମେନ୍‌ଦ ଜେତାଏ ଏନାରେୟାଃ ମୁଣ୍ଡି କାକ ଉଦୁବ୍‌ ଦାଡ଼ିକେଦା।"

25 ଯୋଷେଫ୍‌ ଫାରୋକେ କାଜିକିୟା, "ଆମାଃ ବାରାନ୍‌ କୁମୁରାଃ ମୁଣ୍ଡି ମିଆଁଦ୍‌ଗି ତାନାଃ, ପାର୍‌ମେଶ୍ୱାର୍‌ ଅକ୍‌ନାଃ ରିକା ନାଗେନ୍ତେ ସାନାଙ୍ଗ୍‌ତାନା, ଏନା ଇନିଃ ଫାରୋରାଃ ଆୟାର୍‌ରେ ଉଦୁବ୍‌କାଦା। 26 ଏନ୍‌ କିରିକାନ୍‌ ସାତ୍‌ଠୁ ବୁଗିନ୍‌ ଗାଈ, ସାତ୍‌ ବାରାଷ୍‌କେ ଉଦୁବଃତାନା, ଓଡ଼ୋଃ ଏନ୍‌ ସାତ୍‌ଠୁ ଜ’ତେ ପେରେୟାକାନ୍‌ ବୁଗିନ୍‌ ଗେଲେ ହଁଗି ସାତ୍‌ ବାରାଷ୍‌କେ ଉଦୁବଃତାନା, ଏନ୍‌ ବାରାନ୍‌ କୁମୁରାଃ ମୁଣ୍ଡି ମିଦ୍‌ଗି ତାନାଃ। 27 ଇନ୍‌କୁଆଃ ତାୟମ୍‌ତେ ହିଜୁଃକାନ୍‌ ସାତ୍‌ଠୁ ରହଡ଼୍‌ ଓଡ଼ୋଃ ନାରାଦୁରା ଗାଈ, ସାତ୍‌ ବାରାଷ୍‌କେ ଉଦୁବାଃଏ ଓଡ଼ୋଃ ପୁରାବ୍‌ ସାଃରେୟାଃ ହୟ ହରାତେ ସାତ୍‌ଠୁ ରହଡ଼୍‌ ଓଡ଼ୋଃ ପେଟେଃ ଗେଲେ ହଁଗି ଏନ୍‌ ସାତ୍‌ ବାରାଷ୍‌କେ ଉଦୁବାଃଏ। ନେ ସବେନାଃ ସାତ୍‌ ବାରାଷ୍‌ରେୟାଃ ରିଙ୍ଗା ହବାଅଃ ଦିପିଲିକେ ଉଦୁବାଃଏ।

28 "ଆଇଙ୍ଗ୍‌ ଫାରୋକେ ସିଦାରେଇଙ୍ଗ୍‌ କାଜିକାଇଜା, ‘ପାର୍‌ମେଶ୍ୱାର୍‌ ଅକଆଃ ରିକାନାଙ୍ଗ୍‌ ଉହାଟ୍‌କାଦାଏ, ଏନା ଫାରୋରାଃ ଆୟାର୍‌ରେ ଉଦୁବାକାଦା।’ 29 ମିସାର୍‌ ଦିଶୁମ୍‌ରାଃ ସବେନ୍‌ସାଃରେ ହିଜୁଃତାନ୍‌ ସାତ୍‌ ବାରାଷ୍‌ ପୁରାଃଗି ବୁଗିନ୍‌ ଜ’ହବାଅଃଆ। 30 ମେନ୍‌ଦ ଏଟାଃ ସାତ୍‌ ବାରାଷ୍‌ ଜାକେଦ୍‌ ମିସାର୍‌ ଦିଶୁମ୍‌ରେ ପୁରାଃଗି ରିଙ୍ଗା ହବାଅଃଆ। ସବେନ୍‌ ହଡ଼କ ଏନ୍‌ ବୁଗିନ୍‌ ବାରାଷ୍‌କେ ରିଡ଼ିଙ୍ଗ୍‌ତାଃକ ଚିୟାଃଚି ରିଙ୍ଗା ହରାତେ ଦିଶୁମ୍‌ ଜିଅନ୍‌ ରିକାଅଃଆ। 31 ଦିଶୁମ୍‌ରେ ଏନ୍‌ ରିଙ୍ଗା ଦିପିଲି ପୁରାଃ ବରୱାନ୍‌ଗି ହବାଅଃ ହରାତେ ସବେନ୍‌ ହଡ଼କ ଏନ୍‌ ବୁଗିନ୍‌ ବାରାଷ୍‌କେ ପୁରା ରିଡ଼ିଙ୍ଗ୍‌ତାଃକ। 32 ଫାରୋ ବାର୍‌ସାତେ କୁମୁ ନେଲ୍‌କେଦାଏ, ଏନାରାଃ ମୁଣ୍ଡି ହବାଅଃତାନା ଯେ, ନେଆଁ ପାର୍‌ମେଶ୍ୱାର୍‌ଆଃ ହରାତେ ସାର୍‌ତିଗି ହବାଅଃତାନା ଓଡ଼ୋଃ ନେଆଁ ଜାଲ୍‌ଦିଗି ହବାଅଃଆ।

33 "ଏନାମେନ୍ତେ ନାହାଃଁ ଫାରୋ ଜାଲ୍‌ଦିଗି ମିଆଁଦ୍‌ ସେଣାଁନ୍‌ ଓଡ଼ୋଃ ଆଟ୍‌କାର୍‌ଉରୁମ୍‌ ଦାଡ଼ି ହଡ଼କେ ନେଲ୍‌କେଦ୍‌ତେ ମିସାର୍‌ ଦିଶୁମ୍‌ ଚାଲାଅ ନାଗେନ୍ତେ ସାଲାଇକା। 34 ଫାରୋ ଚିମିନ୍‌ ହାକିମ୍‌କକେ ସାଲାକେଦ୍‌ତେ ସାତ୍‌ ବାରାଷ୍‌ ଜାକେଦ୍‌ ବୁଗିନ୍‌ ଜ' ହବାଅଃ ଦିପିଲି ଇମ୍‌ତା ଗଟା ମିସାର୍‌ ଦିଶୁମ୍‌ରେ ହବାଅଃତାନ୍‌ ବୁଗିନ୍‌ ଜ’ରେୟାଃ ମଣେୟାଁ ହିସା ହାରମ୍‌କେଦ୍‌ତେ ଦହେକାକ 35 ଓଡ଼ୋଃ ଇନ୍‌କୁ ଏନ୍‌ ବୁଗିନ୍‌ ବାରାଷ୍‌ରେ ସବେନ୍‌ ରାକାମ୍‌ରେୟାଃ ଜଜମାଃକ ହୁଣ୍ଡିକାକ ଓଡ଼ୋଃ ନାଗାର୍‌ରେୟାଃ ଜଜମାଃ ନାଗେନ୍ତେ ଭାଣ୍ଡାର୍‌ ଅଡ଼ାଃରେ ଦହେକାକ। ଫାରୋରାଃ ଆକ୍‌ତେୟାର୍‌ରେ ଏନ୍‌ ସବେନ୍‌ ଜଜମାଃକକେ ଦହଃକା। 36 ନେ’ଲେକାତେ ହିଜୁଃ ସାତ୍‌ ବାରାଷ୍‌ରେୟାଃ ରିଙ୍ଗା ନାଙ୍ଗ୍‌ ମିସାର୍‌ ଦିଶୁମ୍‌ରେ ଜଜମାଃକ ହୁଣ୍ଡିକେଦ୍‌ତେ ଦହଲେରେ ରିଙ୍ଗା ହରାତେ ଦିଶୁମ୍‌ରାଃ ଜେତ୍‌ନାଃ ହାନି କା ହବାଅଃଆ।"

37 ଯୋଷେଫ୍‌ରାଃ ନେ କାଜି ଫାରୋ ଓଡ଼ୋଃ ଆୟାଃ ଦାସିକକେ ବୁଗିନ୍‌ ଆଟ୍‌କାର୍‌ କେଦ୍‌କଆ। 38 ଏନାତେ ଫାରୋ ଆୟାଃ ଦାସିକକେ କାଜିକେଦ୍‌କଆ, "ଆବୁ ନିୟାଃ ଲେକାନ୍‌ ହଡ଼ ଚିନାଃ ଜେତାଏକେ ନାମ୍‌ ଦାଡ଼ିୟାବୁ ? ନିଃତାଃରେ ପାର୍‌ମେଶ୍ୱାର୍‌ଆଃ ଆତ୍ମା ମେନାଇୟା।" 39 ଫାରୋ ଯୋଷେଫ୍‌କେ କାଜିକିୟା, "ପାର୍‌ମେଶ୍ୱାର୍‌ ନେ ସବେନାଃ ଆମ୍‌କେ ଉଦୁବାକାଦ୍‌ମା, ଏନାମେନ୍ତେ ଆମାଃ ଲେକାନ୍‌ ସେଣାଁନ୍‌ ଓଡ଼ୋଃ ଇତୁଆନ୍‌ ହଡ଼ ଜେତାଏ ବାଙ୍କଆ। 40 ଆମ୍ ଆଲେୟାଃ ଦିଶୁମ୍‌ରେନ୍‌ ଲାଟ୍‌ସାହେବ୍‌ ହବାଅଃଆମ୍‌ ଓଡ଼ୋଃ ସବେନ୍‌କ ଆମାଃ କାଜିକ ମାନାତିଙ୍ଗ୍‌ୟାଁଃ, ରାଜ୍‌ଗାଦିରେ ଏସ୍‌କାର୍‌ ଆଇଙ୍ଗ୍‌ ଆମାଃତାଃଏତେ ମାରାଙ୍ଗ୍‌ ଠାୟାଦ୍‌ରେ ତାଇନାଃଇଙ୍ଗ୍‌।" 41 ଫାରୋ ଯୋଷେଫ୍‌କେ ଆଡଃଗି କାଜିକିୟା, "ଆଇଙ୍ଗ୍‌ ଆମ୍‌କେ ସବେନ୍‌ ମିସାର୍‌ ଚେତାନ୍‌ରେ ରାଇଜ୍‌ ରିକା ନାଙ୍ଗ୍‌ ଲାଟ୍‌ସାହେବ୍‌ ଲେକାଇଙ୍ଗ୍‌ ସାଲାକେଦ୍‌ମା।" 42 ଏନ୍ତେ ଫାରୋ ଆୟାଃ ତିଃଇରାଃ ସାର୍‌ସାର୍‌ଏତେ ମୋହର୍‌ରାଃ ମୁଦାମ୍‌ ଅଡଙ୍ଗ୍‌କେଦ୍‌ଲଃ ଯୋଷେଫ୍‌ରାଃ ସାର୍‌ସାର୍‌ରେ ତୁସିଙ୍ଗ୍‌କିୟା, ଇନିଃକେ ନିରାଲ୍‌ ଲିଜାଃ ତୁସିଙ୍ଗ୍‌କିୟାଏ ଓଡ଼ୋଃ ହଟଃରେ ସୋନାରେୟାଃ ଇସିର୍‌ ତୁସିଙ୍ଗ୍‌କିୟାଏ। 43 ଇନିଃ ଆୟାଃ ଆଡଃମିଆଦ୍‌ ସାଦମ୍‌ ଗାଡ଼ିରେ ଦୁବ୍‌କିୟା ଓଡ଼ୋଃ ହଡ଼କ ଇନିୟାଃ ଆୟାର୍‌ ଆୟାର୍‌ ସେନ୍‌କେଦ୍‌ତେ ଇକ୍‌ଡ଼ୁମେପେ ଇକ୍‌ଡ଼ୁମେପେ ମେନ୍ତେ କାଜିକେଦାକ। ନେ’ଲେକାତେ ଫାରୋ ଇନିଃକେ ସବେନ୍‌ ମିସାର୍‌ ଦିଶୁମ୍‌ରେନ୍‌ ଲାଟ୍‌ସାହେବ୍‌ ବାଇକିୟାଏ। 44 ଫାରୋ ଯୋଷେଫ୍‌କେ କାଜିକିୟା, "ଆଇଙ୍ଗ୍‌ ଫାରୋ ତାନିଙ୍ଗ୍‌, ମେନ୍‌ଦ ଆମାଃ ବେଗାର୍‌ ଆଚୁତେ ଗଟା ମିସାର୍‌ ଦିଶୁମ୍‌ରେନ୍‌ ଜେତାଏ କାଟା ତିଃଇ ରିମ୍‌ କାକ ଦାଡ଼ିୟା।" 45 ଫାରୋ ଯୋଷେଫ୍‌କେ ମିସାର୍‌ ଦିଶୁମ୍‌ରେୟାଃ ନୁତୁମ୍‌ ସାଫ୍‌ନତ୍‌ ପାନେହ ଏମ୍‌କିୟାଏ। ଆଡଃଗି ଇନିଃ ଓନ୍‌ ନାଗାର୍‌ରେନ୍‌ ପୋଟିଫେର୍‌ ନୁତୁମ୍‌ ଯାଜାକ୍‌ଆଃ ହନ୍ତେକୁଡ଼ି ଆସ୍‌ନତ୍‌ଲଃ ଯୋଷେଫ୍‌କେ ଆଣ୍‌ଦିକିୟା। ଯୋଷେଫ୍‌ ଗଟା ମିସାର୍‌ ଦିଶୁମ୍‌ରେୟାଃ ଚାରିଓସାଃରେ ହନର୍‌ବାଡ଼ାକେଦା।

46 ଯୋଷେଫ୍‌ରାଃ ହିସିଗେଲ୍‌ ବାରାଷ୍‌ ହବାକାନ୍‌ ଇମ୍‌ତା ଇନିଃ ଫାରୋ ରାଜାରାଃ ଆୟାର୍‌ରେ ତିଙ୍ଗୁୟାନା। ଏନ୍ତେ ଇନିଃ ଫାରୋତାଃଏତେ ସେନଃୟାନ୍‌ଲଃ ମିସାର୍‌ ଦିଶୁମ୍‌ରାଃ ଚାରିଓସାଃତେ ହନର୍‌କେଦା। 47 ଏନ୍‌ ସାତ୍‌ ବାରାଷ୍‌ରାଃ ବୁଗିନ୍‌ ଦିପିଲିରେ ଅତେରେ ପୁରାଃଗି ହିତା ହବାୟାନା। 48 ଯୋଷେଫ୍‌ ଏନ୍‌ ସାତ୍‌ ବାରାଷ୍‌ ଜାକେଦ୍ ମିସାର୍‌ ଦିଶୁମ୍‌ରେ ହବାକାନ୍‌ ହିତାଜାଙ୍ଗ୍‌କ ହୁଣ୍ଡିକେଦ୍‌ତେ ସବେନ୍‌ ନାଗାର୍‌ରେ ଦହକେଦା ଓଡ଼ୋଃ ମିପିଆଦ୍‌ ସବେନ୍‌ ନାଗାର୍‌ରେ ହବାକାନ୍‌ ହିତାକ, ଏନ୍‌ ନାଗାର୍‌ରେଗି ଦହ ହୁଣ୍ଡିକେଦା। 49 ଯୋଷେଫ୍‌ ଦରେୟାରେୟାଃ ଗିତିଲ୍‌ ଲେକା ନିମିନ୍‌ ହିତା ହୁଣ୍ଡିକେଦାଏ ଯେ, ଏନାକେ ଓଡ଼ୋଃ କାଏ ସଙ୍ଗ୍‌କେଦା, ଚିୟାଃଚି ଏନା ପୁରାଃଗି ତାଇକେନା।

50 ରିଙ୍ଗା ହବାୟାନ୍‌ ସିଦାରେ ଯୋଷେଫ୍‌ଆଃ ବାରିୟା ହନ୍‌କିନ୍‌ ତାଇକେନା। ଇନ୍‌କିନ୍‌କେ ଓନ୍‌ ନାଗାର୍‌ରେନ୍‌ ପୋଟିଫେର୍‌ ଯାଜାକ୍‌ରାଃ ହନ୍ତେକୁଡ଼ି ଆସ୍‌ନତ୍‌ ଜାନାମ୍‌କାଦ୍‌କିନ୍‌ ତାଇକେନାଏ। 51 ଯୋଷେଫ୍‌ ଆୟାଃ ମୁତ୍‌କୁଲ୍‌ ହନ୍‌ରାଃ ନୁତୁମ୍‌ ମନଶି ଦହକେଦାଏ। ଚିଆଃଚି ଇନିଃ କାଜିକେଦାଏ, "ପାର୍‌ମେଶ୍ୱାର୍‌ ଆଇଁୟାଃ ସବେନ୍‌ ଦୁକୁ ଓଡ଼ୋଃ ଆପୁଆଃ ଅଡ଼ାଃରାଃ ସବେନାଃ ରିଡ଼ିଙ୍ଗ୍‌ନାଙ୍ଗ୍‌ ଦେଙ୍ଗାକେଦିୟାଁଏ।" 52 ଇନିଃ ଏଟାଃ ହନ୍‌ରାଃ ନୁତୁମ୍‌ ଇଫ୍ରାଇମ୍‌ ଦହକେଦାଏ। ଚିୟାଃଚି ଇନିଃ କାଜିକେଦାଏ, "ଆଇଙ୍ଗ୍‌ ଅକ ଦିଶୁମ୍‌ରେ ଦୁକୁ ହାସୁ ନାମ୍‌କେଦାଇଙ୍ଗ୍‌, ଏନ୍‌ ଦିଶୁମ୍‌ରେ ପାର୍‌ମେଶ୍ୱାର୍‌ ଆଇଙ୍ଗ୍‌କେ ପୁରାଃଗି ଆଶିଷ୍‌କେଦିୟାଁ।"

53 ଯୋଷେଫ୍‌ରାଃ କାଜି ଲେକାଗି ମିସାର୍‌ ଦିଶୁମ୍‌ରେ ଏୟା ବାରାଷ୍‌ ଜାକେଦ୍‌ ବୁଗିନ୍‌ ଦିପିଲି ହବାକେଦ୍‌ତେ ଟୁଣ୍ଡୁୟାନା। 54 ଓଡ଼ୋଃ ଯୋଷେଫ୍‌ଆଃ କାଜି ଲେକାଗି ଏୟା ବାରାଷ୍‌ ଜାକେଦ୍‌ ରିଙ୍ଗା ହବା ଏଟେଦ୍‌ୟାନା, ଏଟାଃ ଦିଶୁମ୍‌କରେ ହଁଗି ରିଙ୍ଗା ହବାୟାନା। ମେନ୍‌ଦ ଗଟା ମିସାର୍‌ ଦିଶୁମ୍‌ରେ ଜଜମାଃ ତାଇକେନା। 55 ମିସାର୍‌ ଦିଶୁମ୍‌ରେନ୍‌ ହଡ଼କ ଜଜମାଃରେ ଜାଞ୍ଜିଅଃତାନ୍‌ ଆଟ୍‌କାର୍‌କେଦାକ ଇମ୍‌ତା ଇନ୍‌କୁ ଜଜମାଃ ନାଙ୍ଗ୍‌ ଫାରୋତାଃରେ କାଜି ଗହାର୍‌କେଦାକ। ଇମ୍‌ତା ଫାରୋ ମିସାର୍‌ରେନ୍‌ ହଡ଼କକେ କାଜିୟାଦ୍‌କଆ, "ଯୋଷେଫ୍‌ତାଃ ସେନଃପେ, ଇନିଃ ଅକ୍‌ନାଃ କାଜିପେୟାଏ, ଏନା ରିକାଏପେ।" 56 ରିଙ୍ଗା ଗଟା ଦିଶୁମ୍‌ରେ ହବାୟାନ୍‌ ହରାତେ ଯୋଷେଫ୍‌ ହିତାରାଃ ଭାଣ୍ଡାର୍‌ ଅଡ଼ାଃ ନିଃକ୍‌କେଦ୍‌ତେ ମିସାର୍‌ ଦିଶୁମ୍‌ରେନ୍‌ ହଡ଼କତାଃରେ ହିତାଜାଙ୍ଗ୍‌ ଆଖ୍‌ରିଙ୍ଗ୍‌କେଦାଏ। 57 ଏଟାଃ ଏଟାଃ ଦିଶୁମ୍‌କଏତେ ହଗି ହଡ଼କ ଯୋଷେଫ୍‌ତାଃ ହିତାଜାଙ୍ଗ୍‌ କିରିଙ୍ଗ୍‌ ନାଙ୍ଗ୍‌ ମିସାର୍‌ ଦିଶୁମ୍‌ତେ ହିଜୁଃୟାନାକ। ଚିଆଃଚି ଗଟା ଦିଶୁମ୍‌ରେ ପୁରାଃଗି ରିଙ୍ଗା ହବାକାନ୍‌ ତାଇକେନା।