1 ಸರ್ವೆಸ್ಪರಾಚೊ ಸೆವಕ್ ಮೊಯ್ಜೆ ಮರಲ್ಲ್ಯಾ ಮಾನಾ, ಸರ್ವೆಸ್ಪರಾನ್ ಮೊಯ್ಜೆಚೊ ಸೆವಕ್, ನುನಾಚೊ ಲೆಕ್ ಜೊಶ್ವಾಕ್ಡೆ ಬೊಲುನ್, 2 "ಮಾಜೊ ಸೆವಕ್ ಮೊಯ್ಜೆ ಮರ್ಲೊ, ಅತ್ತಾ ಉಟುನ್ ತಿಯಾ ಅನಿ ಹಿ ಸಗ್ಳಿ ಲೊಕಾ ಹಿ ಜೊರ್ದಾನ್ ನ್ಹಯ್ ದಾಟುನ್, ಮಿಯಾ ಇಜ್ರಾಯೆಲ್‌ಕಾರಾಕ್ನಿ ದಿತಲ್ಯಾ ದೆಸಾಕ್ ಜಾ. 3 ಮಿಯಾ ಮೊಯ್ಜೆಕ್ ಗೊಸ್ಟ್ ದಿಲ್ಲ್ಯಾ ಸಾರ್ಕೆ, ತುಮಿ ಪಾಂಯ್ ಥವಲ್ಲೊ ಸಗ್ಳೊ ಜಾಗೊ ತುಮ್ಕಾ ದಿತಾ. 4 ಡಂಗ್ಳಿಚ್ಯಾ ಹ್ಯಾ ಲೆಬೊನ್ ಮಡ್ಡಿಕ್ನಾ ಯುಪ್ರಟಿಸ್ ಮೊಟ್ಟ್ಯಾ ನ್ಹಯ್ ಪತರ್ ಹೊತ್ತ್ಯಾ ಹಿತ್ತಿಯಾಂಚೊ ಸಗ್ಳೊ ಜಾಗೊ ತುಮ್ಚೊ ಹೊತಾ, ಅನಿ ದಿಸ್ ಬುಡ್ತಲ್ಯಾ ದಿಕ್ಕಾಚ್ಯಾ ಮೊಟ್ಟ್ಯಾ ಸಮುಂದರಾ ಪತರ್ ತುಮ್ಚಿ ಘಡ್ ಪಗಳ್ತಾ. 5 ಜೊಶ್ವಾ ತಿಯಾ ಝಿತ್ತೊ ರಾಯ್ ಪತರ್ ತುಕಾ ಕೊನ್ಬಿ ಹಾರ್ವಿನಾತ್, ಮಿಯಾ ಮೊಯ್ಜೆಕ್ನಾ ಹೊತ್ತ್ಯಾ ಸಾರ್ಕೆ ತುಜೆಕ್ನಾಬಿ ಸದ್ದಾ ರ್‍ಹಾತಾ, ಅನಿ ಮಿಯಾ ಕನ್ನಾಚ್ ತುಜೊ ಹಾತ್ ಸೊಡಿನಾ. 6 ಕನ್ನಾಬಿ ಧೈರಾನ್ ಅನಿ ಘಟ್ ರಾ, ತಿಯಾ ಹ್ಯಾ ಲೊಕಾಂಚೊ ಮುಖಂಡ್, ಅನಿ ಮಿಯಾ ಮೊಯ್ಜೆಕ್ ಗೊಸ್ಟ್ ದಿಲ್ಲ್ಯಾ ಜಿಮ್ನಿವೈರ್ ತೆನಿ ರ್‍ಹಾತಾತ್, ಅನಿ ಮಿಯಾ ತುಜ್ಯಾ ಪುರ್ವಜಾಕ್ನಿ ಗೊಸ್ಟ್ ದಿಲಾ. 7 ಧೈರಾನ್ ಅನಿ ಘಟ್ ರಾ, ಕನ್ನಾಬಿ ಮಾಜೊ ಸೆವಕ್ ಮೊಯ್ಜೆನ್ ದಿಲ್ಲೆ ಖಾಯ್ದೆ ಪಾಳುಚೆ, ತಿಯಾ ತೆ ಸೊಡುನ್ ಡಾವ್ಯಾಕ್ ನಾತರ್ ಉಜ್ವ್ಯಾಕ್ ಪರ್ತು ನಕ್ಕೊ ಅನಿ ತಿಯಾ ಜಾತಲ್ಯಾ ಸಗ್ಳ್ಯಾಕ್ಡೆ ಜಿಕ್ತೈಯ್. 8 ಖಾಯ್ದ್ಯಾಚೆ ಪುಸ್ತಕ್ ಕನ್ನಾಬಿ ತುಜ್ಯಾ ತೊಂಡಾತ್ನಾ ಜಾವ್ಕ್ ದಿವ್ ನಕ್ಕೊ, ದಿಸ್ ಅನಿ ರ್‍ಹಾತ್ ತಿಯಾ ತೆ ವಾಚ್, ಅನಿ ತಿಯಾ ತ್ಯಾತುರ್ ಲಿವಲ್ಲೆ ಸಗ್ಳೆ ಪಾಳುಚೆ, ತನ್ನಾ ತಿಯಾ ಕುಶಿನ್ ರಾತೈ ಅನಿ ಜಿಕ್ತೈಯ್. 9 ಮಿಯಾ ತುಕಾ ದಿಲ್ಲೆ ಹುಕುಮ್ ಯಾದ್ ರಾಂವ್ದಿತ್, ಘಾಬ್ರುನಕ್ಕೊ, ಘಟ್ ರಾ, ಅನಿ ಭಿವ್ ನಕ್ಕೊ, ತಿಯಾ ಜಾತಲ್ಯಾ ಹರ್ ಎಕ್ ಜಾಗ್ಯಾರ್ಬಿ ಸರ್ವೆಸ್ಪರ್ ತುಜ್ಯಾ ವಾಂಗ್ಡಾ ರ್‍ಹಾತಾ" ಮಟ್ಲ್ಯಾನ್.

10 ತನ್ನಾ ಜೊಶ್ವಾನ್ ಲೊಕಾಂಚ್ಯಾ ಮುಖಂಡಾಕ್ನಿ ಹುಕುಮ್ ದಿವ್ನ್, 11 "ತುಮಿ ತಾಂಡ್ಯಾತ್ಲ್ಯಾ ಸಗ್ಳ್ಯಾ ಜಾಗ್ಯಾತ್ನಿಬಿ ಜಾವ್ನ್ ಲೊಕಾಕ್ನಿ, ತಿನ್ ದಿಸಾತ್ ಜೊರ್ದಾನ್ ನ್ಹಯ್ ದಾಟುನ್ ಸರ್ವೆಸ್ಪರಾನ್ ತುಮ್ಕಾ ಗೊಸ್ಟ್ ದಿಲ್ಲ್ಯಾ ದೆಸಾಕ್ ಜಾವ್ಚೆ, ತೆಚ್ಯಾ ಸಾಟ್ನಿ ತುಮಿ ಜೆವಾನ್ ತಯಾರ್ ಕರುನ್ ಘೆವಾ ಮನುನ್ ಸಾಂಗುಚೆ" ಮಟ್ಲ್ಯಾನ್. 12 ಅನಿ ಜೊಶ್ವಾನ್ ರುಬೆನಾಚ್ಯಾ ಅನಿ ಗಾದಾಂಚ್ಯಾ ಅನಿ ಮನಾಸ್ಸೆಂಚ್ಯಾ ಘರಾನಾಚ್ಯಾ ಅರ್ದ್ಯಾ ಲೊಕಾಕ್ನಿ ಸಾಂಗಲ್ಲೆ ಕಾಯ್ ಮಟ್ಲ್ಯಾರ್, 13 ಸರ್ವೆಸ್ಪರಾಚೊ ಸೆವಕ್ ಮೊಯ್ಜೆನ್ ತುಮ್ಕಾ ದಿಲ್ಲೊ ಹುಕುಮ್ ಯಾದ್ ಕರಾ, ತುಮ್ಚ್ಯಾ ಸರ್ವೆಸ್ಪರ್ ದೆವಾನ್ ಜೊರ್ದಾನ್ ನ್ಹಯ್ಚೊ ಹ್ಯೊ ದೆಶ್ ತುಮ್ಕಾ ದಿವ್ನ್ ಆರಾಮ್ ರಾಯ್ ಸಾರ್ಕೆ ಕರ್ಲಾ. 14 ತುಮ್ಚಿ ಬಾಯ್ಕಾ, ಪೊರಾ, ಅನಿ ತುಮ್ಚಿ ಗೊರಾ ಡೊರಾ ಅನಿ ತುಮ್ಕಾ ಪಾಜೆ ಹೊಲ್ಲೆ ಸಗ್ಳೆ ಘೆವ್ನ್ ಮೊಯ್ಜೆನ್ ತುಮ್ಕಾ ದಿಲ್ಲ್ಯಾ ಜೊರ್ದಾನ್ ನ್ಹಯ್ಚ್ಯಾ ತಿಕುಲ್ಯಾ ದೆಸಾತ್ ರಾಂವ್ದಿತ್, ಖರೆ ತುಮ್ಚಿ ಸೈನಿಕಾ ಲಡಾಯಿಕ್ ತಯಾರ್ ಹೊವ್ನ್, ಇಜ್ರಾಯೆಲ್ ಭಾವಾಕ್ನಿ ನ್ಹಯ್ ದಾಟುಕ್ ಮಜತ್ ಕರುದಿಂತ್. 15 ತುಮ್ಚ್ಯಾ ಭಾವಾನಿ, ತುಮ್ಚ್ಯಾ ಸರ್ವೆಸ್ಪರ್ ದೆವಾನ್ ದಿಲ್ಲೊ ದೆಶ್ ಅಪ್ನಾಚ್ಯಾ ಸ್ವತಾಕ್ ಕರುನ್ ಘೆವ್ನ್ ತೆನಿಬಿ ತುಮ್ಚ್ಯಾ ಗತಿನ್ ಆರಾಮ್ ಘೆಟ್ಲ್ಯಾ ಮಾನಾ ಸರ್ವೆಸ್ಪರಾಚೊ ಸೆವಕ್ ಮೊಯ್ಜೆನ್ ತುಮ್ಕಾ ಜೊರ್ದಾನ್ ನ್ಹಯ್ಚ್ಯಾ ದಿಸ್ ಉಗಾವ್ತಲ್ಯಾ ದಿಕ್ಕಾಕ್ ಸ್ವತಾಕ್ ಕರುನ್ ದಿಲ್ಲ್ಯಾ ದೆಸಾಕ್ ಪರ್‍ತುನ್ ಯೆವ್ನ್ ರಾವ್ಕ್ ಹೊತಾ. 16 ತೆನಿ ಜೊಶ್ವಾಕ್, "ತಿಯಾ ಹುಕುಮ್ ದಿಲ್ಲೆ ಸಗ್ಳೆ ಅಮಿ ಕರ್ತಾಂವ್, ಅನಿ ತಿಯಾ ಖೈ ಧಾಡ್ತೈಯ್ ಥೈ ಜಾತಾಂವ್. 17 ಅಮಿ ಮೊಯ್ಜೆಚಿ ಸಗ್ಳಿ ಗೊಸ್ಟಿಯಾ ಆಯ್ಕಲ್ಲ್ಯಾ ಸಾರ್ಕೆ ತುಜಿ ಗೊಸ್ಟಿಯಾಬಿ ಆಯಿಕ್ತಾಂವ್, ಸರ್ವೆಸ್ಪರ್ ದೆವ್ ಮೊಯ್ಜೆಚ್ಯಾ ವಾಂಗ್ಡಾ ಹೊತ್ತ್ಯಾ ಸಾರ್ಕೊ ತುಜ್ಯಾ ವಾಂಗ್ಡಾಬಿ ರಾಂವ್ದಿತ್" ಮಟ್ಲ್ಯಾನಿ. 18 ಜೆ ಕೊನ್ ತುಜೆ ಆಯ್ಕಿನಾ, ನಾತರ್ ತಿಯಾ ಸಾಂಗಲ್ಲೆ ಪಾಳಿನಾ ತೊ ಮರ್ತಾ, ಕನ್ನಾಬಿ ಘಟ್ ಅನಿ ಧೈರಾನ್ ರಾ.