1 ಮಾನಾ ಜೊಶ್ವಾನ್ ಶೆಕೆಮಾತ್ ಇಜ್ರಾಯೆಲ್ ಕುಳಿಚ್ಯಾ ಲೊಕಾಂಚೊ ಬೈಟೆಕ್ ಮಿಳ್ವುಲ್ಯಾನ್, ಅಧಿಕಾರಿಯಾ ಮುಖಂಡಾ, ನ್ಯಾಯಾಧಿಪತಿಯಾ ಅನಿ ಪ್ರಮುಕ್ ಲೊಕಾ ಯೆವ್ನ್ ದೆವಾಚ್ಯಾ ಇದ್ರಾಕ್ ದಿಸ್ಲ್ಯಾನಿ, 2 ಜೊಶ್ವಾನ್ ತೆಂಕಾ, ತುಮ್ಚೊ ಸರ್ವೆಸ್ಪರ್ ದೆವ್ ಸಾಂಗ್ತಲೆ ಕಾಯ್ ಮಟ್ಲ್ಯಾರ್, ಅಬ್ರಾಹಾಮ್ ಅನಿ ನಾಹೊರ್ ಮನ್ತಲ್ಯಾಚೊ ಬಾಬಾ ತೆರಹ್ ಹೆನಿ ಸಗ್ಳೆ ತುಮ್ಚಿ ಪುರ್ವಜಾ ಅದ್ಲ್ಯಾ ಕಾಲಾತ್ ಯುಪ್ರಟಿಸ್ ನ್ಹಯಿಚ್ಯಾ ತಿಕುಲ್ಲ್ಯಾ ದುಸ್ರ್ಯಾ ದೆವತೆಕ್ನಿ ಫುಜ್ಯಾ ಕರಿತ್. 3 ಮಿಯಾ ತುಮ್ಚೊ ಪುರ್ವಜ್ ಅಬ್ರಾಹಾಮಾಕ್ ಥೈತ್ನಾ ಬಲ್ವುನ್ ಹಾನುನ್ ಫುರಾ ಕಾನಾನ್ ದೆಶ್ಯಾತ್ ಫಿರ್ವುನ್, ಇಸಾಕ್ ಮನ್ತಲೊ ಲೆಕ್ ದಿವ್ನ್ ತೆಚಿ ಪಿಳ್ಗಿ ವಾಡ್ವುಲೊ. 4 ಇಸಾಕಾಕ್ ಜಾಕೊಬ್ ಅನಿ ಎಸಾವ್ ಮನ್ತಲಿ ದೊನ್ ಲೆಕಾ ದಿವ್ನ್, ಎಸಾವಾಕ್ ಸೆಯಿರ್ ಮನ್ತಲಿ ಮಡ್ಡಿ ಸ್ವತಾಕ್ ಕರುನ್ ದಿಲೊ, ಜಾಕೊಬ್ ತರ್ ಅಪ್ನಾಚ್ಯಾ ಬಾಯ್ಕೊ ಪೊರಾಕ್ನಿ ಘೆವ್ನ್ ಇಜಿಪ್ತ್ ದೆಶ್ಯಾಕ್ ಗೆಲೊ. 5 ಮಾನಾ ಮಿಯಾ ಮೊಯ್ಜೆ ಅನಿ ಆರೊನಾಕ್ ಧಾಡುನ್, ತ್ಯಾ ಇಜಿಪ್ತ್ ದೆಶ್ಯಾತ್ ಲೈ ಚಮತ್ಕಾರಾಚಿ ಕಾಮಾಕರುನ್, ತೆಂಕಾ ತರಾಸ್ ದಿವ್ನ್, ತುಮ್ಕಾ ಥೈತ್ನಾ ಭಾಯ್ರ್ ಹಾನ್ಲೊ. 6 ತುಮ್ಚಿ ಪುರ್ವಜಾ ಇಜಿಪ್ತಾಕ್ನಾ ಸುಟ್ಕಾ ಹೊವ್ನ್ ತಾಂಬ್ಡ್ಯಾ ಸಮುಂದರಾಕ್ ಯೆತಾನಾ, ಇಜಿಪ್ತಾಚ್ಯಾ ಲೊಕಾನಿ ತೆಂಕಾ ರಥಾ, ಘೊಡ್ಕಿಯಾ ಸಗ್ಳೆ ಘೆವ್ನ್ ಫಾಟ್ ಲಾಗುನ್ ತ್ಯಾ ಸಮುಂದರಾ ಪತರ್ಬಿ ಯೆಲ್ಯಾನಿ. 7 ತೆನಿ ಸರ್ವೆಸ್ಪರ್ ಹೊವ್ನ್ ಹೊತ್ತ್ಯಾ ಮಾಜೆಕ್ಡೆ ಮಾಗ್ತಾನಾ ಮಿಯಾ ತೆಂಚ್ಯಾ ಅನಿ ಇಜಿಪ್ತಾಚ್ಯಾ ಲೊಕಾಂಚ್ಯಾ ಮದ್ದಿ ದಾಟ್ಲೊ ಕಾಳೊಕ್ ಹೊಯ್ ಸಾರ್ಕೆ ಕರ್ಲೊ, ತವ್ಡೆಚ್ ನಸ್ತಾನಾ ಮಿಯಾ ಇಜಿಪ್ತ್ ಲೊಕಾಂಚ್ಯಾ ವರ್‍ತಿ ಸಮುಂದರ್ ಯೆಯ್ ಸಾರ್ಕೆ ಕರುನ್ ತೆಂಕಾ ಬುಡ್ವುಲೊ, ಮಿಯಾ ಇಜಿಪ್ತಾತ್ ಕರಲ್ಲ್ಯಾ ಹರ್ ಎಕಾಕ್ಬಿ ತುಮಿ ಸಾಕ್ಷಿ ಹೊವ್ನ್ ಹಾಸಿ. 8 ತುಮ್ಕಾ ಲೈ ಎಳ್ ಡಂಗ್ಳಿತ್ ಕಳದ್ಲ್ಯಾ ಮಾನಾ ಜೊರ್ದಾನ್ ನ್ಹಯಿಚ್ಯಾ ತಿಕುಲ್ಲ್ಯಾ ಅಮೊರಿತಾಂಚ್ಯಾ ದೆಶ್ಯಾಕ್ ಬಲ್ವುನ್ ಹಾನ್ಲೊ, ತುಮ್ಚ್ಯಾ ವಾಂಗ್ಡಾ ಝಗ್ಡ್ಯಾ ಯೆಲ್ಲ್ಯಾ ತೆಂಕಾ ತುಮ್ಚ್ಯಾ ಹಾತಿತ್ ದಿಲೊ, ತುಮಿ ತೆಂಚೊ ದೆಶ್ ತುಮ್ಚೊ ಕರುನ್ ಘೆಟ್ಲ್ಯಾಸಿ, ಅನಿ ತೆಂಕಾ ತುಮ್ಚ್ಯಾ ಇದ್ರಾಕುಚ್ ನಾಶ್ ಕರ್ಲೊ. 9 ತೆಜ್ಯಾ ಮಾನಾ ಮೊವಾಬ್ಯಾಂಚೊ ರಾಜಾ, ಚಿಪ್ಪೊರಾಚೊ ಲೆಕ್ ಬಾಲಾಕ್ ಇಜ್ರಾಯೆಲಾಂಚ್ಯಾ ತುಮ್ಕಾ ವಿರೊದ್ ಝಗ್ಡ್ಯಾಕ್ ಉಟುನ್ ತುಮ್ಕಾ ಶಾಪ್ ದಿವ್ಕ್ ಬೆಯೊರಾಚೊ ಲೆಕ್ ಬಿಳಾಮಾಕ್ ಬಲ್ವುಕ್ ಧಾಡ್ಲ್ಯಾನ್. 10 ಖರೆ ಮಿಯಾ ಬಿಳಾಮಾಕ್ ಒಪ್ಕಿ ದಿವ್ ನಸಲ್ಲ್ಯಾ ಸಾಟ್ನಿ ತೊ ತುಮ್ಕಾ ಆಶಿರ್ವಾದ್ ದಿವ್ನ್ಗೆತುಚ್ ರ್‍ಹಾತಲೆ ಹೊಲೆ, ಅಸೆ ಮಿಯಾ ತುಮ್ಕಾ ತೆಜ್ಯಾ ಹಾತಿತ್ನಾ ಚುಕ್ವುಲೊ. 11 ತುಮಿ ಜೊರ್ದಾನ್ ದಾಟುನ್ ಜೆರಿಕೊಕ್ ಯೆಲ್ಯಾಸಿ, ತನ್ನಾ ಜೆರಿಕೊತ್ಲಿ ಲೊಕಾ, ಅಮೊರಿತಾ, ಪೆರಿಜ್ಜಿಯಾ, ಕಾನಾನ್ಯಾ, ಹಿತ್ತಿಯಾ, ಗಿರ್ಗಾಶಿಯಾ, ಹಿವ್ವಿಯಾ, ಜೆಬುಸಿಯಾ ಹೆನಿ ಸಗ್ಳ್ಯಾನಿ ತುಮ್ಕಾ ವಿರೊದ್ ಝಗ್ಡ್ಯಾಕ್ ಯೆತಾನಾ ಮಿಯಾ ತೆಂಕಾ ತುಮ್ಚ್ಯಾ ಹಾತಿತ್ ದಿಲೊ. 12 ತವ್ಡೆಚ್ ನಸ್ತಾನಾ, ಮಿಯಾ ಮ್ಹಾವಾಚಿ ಮಾಸ್ಕಾ ತುಮ್ಚ್ಯಾನ್ ಫಿಡೆ ಧಾಡ್ಲೊ, ತ್ಯಾ ಮಾಸ್ಕಾನಿ ಅಮೊರಿತಾಂಚ್ಯಾ ದೊನ್ ರಾಜಾಕ್ನಿ ಪಳ್ಸುನ್ ಘಾಟ್ಲ್ಯಾನಿ, ತೆ ತುಮ್ಚ್ಯಾ ಕೊಯ್ತ್ಯಾನಿ ಅನಿ ಭರ್ಚಿಯಾನಿ ನ್ಹಯ್. 13 ತುಮಿ ಪೆರಿ ನಸ್ತಾನಾ ಉಗಾವಲ್ಲಿ ಜಿಮಿನ್ ತುಮ್ಕಾ ದಿಲೊ, ತುಮಿ ಭಾಂದುನಸಲ್ಲ್ಯಾ ಶಾರ್‍ಹಾತ್ನಿ ವಸ್ತಿ ರಾಲ್ಯಾಸಿ, ತುಮಿ ಉಗ್ವುನ್ ಬಾಳ್ಗು ನಸಲ್ಲ್ಯಾ ದರಾಕ್ಷಾಚಿ, ತೆಲಾಚಿ ಝಾಡಾ ಹೆಂಚಿ ಫಳಾ ಖಾತ್ಯಾಸಿ. 14 ಅಸೆ ರ್‍ಹಾತಾನಾ, ತುಮಿ ಸರ್ವೆಶ್ವರ್‍ಹಾತ್ ದೆವಸ್ಪಾನ್ ಅನಿ ಭಿಂಯಾನ್ ರಾವ್ನ್ ತೆಕಾ ಫುರಾ ಮನಾನ್ ಅನಿ ಬರ್ಯಾ ಮನಾನ್ ಆರಾದನ್ ಕರಾ, ತುಮ್ಚ್ಯಾ ಪುರ್ವಜಾನಿ ಯುಪ್ರಟಿಸ್ ನ್ಹಯಿಚ್ಯಾ ತಿಕ್ಡಿನ್ ಅನಿ ಇಜಿಪ್ತ್ ದೆಸಾತ್ ಫುಜ್ಯಾ ಕರಲ್ಲಿ ದೆವಾ ತುಮ್ಚ್ಯಾಕ್ನಾ ಕಾಡುನ್ ಟಾಕಾ, ಅನಿ ಸರ್ವೆಸ್ಪರಾಕುಚ್ ಆರಾದನ್ ಕರಾ. 15 ಸರ್ವೆಸ್ಪರಾಕ್ ಆರಾದನ್ ಕರ್‍ತಲೆ ತುಮ್ಕಾ ಸಮಾ ದಿಸಿನಸ್ಲ್ಯಾರ್ ಕೊನಾಕ್ ಆರಾದನ್ ಕರುಚೆ ಮನುನ್ ಕರ್ಲ್ಯಾಸಿ? ಮನ್ತಲೆ ಅತ್ತ್ಯಾಚ್ ನಿರ್ದಾರ್ ಕರಾ, ತುಮ್ಚ್ಯಾ ಪುರ್ವಜಾನಿ ಯುಪ್ರಟಿಸ್ ನ್ಹಯಿಚ್ಯಾ ತಿಕ್ಡಿನ್ ಆರಾದನ್ ಕರಲ್ಲಿ ದೆವಾಕಿ, ಕಾಯ್ ಹ್ಯಾ ದೆಶಾಚ್ಯಾ ಮುಳಾಚ್ಯಾ ಅಮೊರಿತಾ ಲೊಕಾನಿ ಪುಜ್ಯಾ ಕರಲ್ಲಿ ದೆವಾಕಿ ಸಾಂಗಾ, "ಮಿಯಾ ಅನಿ ಮಾಜ್ಯಾ ಘರಾಚಿ ಲೊಕಾ ತರ್ ಸರ್ವೆಸ್ಪರಾಕುಚ್ ಆರಾದನ್ ಕರ್ತ್ಯಾಂವ್" ಮಟ್ಲ್ಯಾನ್. 16 ತನ್ನಾ ಲೊಕಾನಿ, ಸರ್ವೆಸ್ಪರಾಚಿ ಸೆವಾ ಸೊಡುನ್ ದುಸ್ರ್ಯಾ ದೆವಾಕ್ನಿ ಫುಜ್ತಲೆ ಅಮ್ಚ್ಯಾಕ್ನಾ ಧುರ್ ರಾಂವ್ದಿತ್. 17 ಅಮಿ ಗುಲಾಮ್ ಗಿರಿತ್ ಹೊತ್ತ್ಯಾ ಇಜಿಪ್ತಾಕ್ನಾ ಅಮ್ಕಾ ಅನಿ ಅಮ್ಚ್ಯಾ ಪುರ್ವಜಾಕ್ನಿ ಭಾಯ್ರ್ ಹಾನುನ್, ಅಮ್ಚ್ಯಾ ಇದ್ರಾಕುಚ್ ಅಜಾಪಾಚಿ ಕಾಮಾ ಕರುನ್, ಅಮ್ಚ್ಯಾ ಪರ್ಯಾನಾತ್ನಿ ಅನಿ ಅಮಿ ದಾಟುನ್ ಯೆಲ್ಲ್ಯಾ ದುಸ್ರ್ಯಾ ಲೊಕಾತ್ನಿಬಿ ಅಮ್ಕಾ ರಾಕಲ್ಲೊ ಅಮ್ಚೊ ಸರ್ವೆಸ್ಪರ್ ದೆವುಚ್ ನ್ಹಯ್ ಕಾಯ್, 18 ಹ್ಯಾ ದೆಸಾತ್ ವಸ್ತಿ ರಾತಲಿ ಲೊಕಾ ಅಮೊರಿತಾ ಅನಿ ಬರ್ಯಾ ಬರ್ಯಾ ಸಗ್ಳ್ಯಾ ಲೊಕಾಕ್ನಿ ಅಮ್ಚ್ಯಾ ಇದ್ರಾಕ್ ಧಾಡಲೊ ತೊಚ್, ತಸೆಹೊವ್ನ್ ಅಮಿ ಸರ್ವೆಸ್ಪರಾಕುಚ್ ಆರಾದನ್ ಕರ್ತಾಂವ್, ಅನಿ ತೊಚ್ ಅಮ್ಚೊ ದೆವ್ ಮನುನ್ ಜವಾಬ್ ದಿಲ್ಯಾನಿ. 19 ತನ್ನಾ ಜೊಶ್ವಾನ್ ತೆಂಕಾ, ತುಮಿ ಸರ್ವೆಸ್ಪರಾಕ್ ಆರಾದನ್ ಕರುಕ್ ಯೊಗ್ಯ್ ನ್ಹಯ್, ಸರ್ವೆಸ್ಪರ್ ನಿತಳ್, ತೊ ಅಪ್ನಾಚೊ ಗೌರವ್ ದುಸ್ರ್ಯಾಕ್ನಿ ದಿವ್ಕ್ ದಿಯ್ನಸಲ್ಲೊ ದೆವ್, ತೊ ತುಮ್ಚಿ ಚುಕ್ ಅನಿ ಪಾಪಾ ಕ್ಷಮಾ ಕರಿನಾ. 20 ತುಮಿ ತೆಕಾ ಸೊಡುನ್ ದುಸ್ರ್ಯಾ ದೆವಾಕ್ನಿ ಪುಜ್ಯಾ ಕರ್ಲ್ಯಾರ್, ತೊ ತುಮ್ಕಾ ಧುರ್ ಹೊವ್ನ್ ಬರ್ಯಾಚ್ಯಾ ಬದ್ಲಾಕ್ ಬುರ್ಸೆಚ್ ಯೆಯ್ ಸರ್ಕೆ ಕರುನ್ ತುಮ್ಕಾ ನಾಶ್ ಕರ್ತಾ, ಮಟ್ಲ್ಯಾನ್. 21 ಲೊಕಾನಿ ಜೊಶ್ವಾಕ್, ನಾ ಅಮಿ ಸರ್ವೆಸ್ಪರಾಕುಚ್ ಆರಾದನ್ ಕರ್ತಾಂವ್ ಮಟ್ಲ್ಯಾನಿ. 22 ಜೊಶ್ವಾನ್ ತೆಂಕಾ, ತುಮಿ ಸರ್ವೆಸ್ಪರಾಚಿ ಸೆವಾ ಎಚುನ್ಗೆಟ್ಲ್ಯಾಸಿ ಮನ್ತಲ್ಯಾಕ್ ತುಮಿಚ್ ಸಾಕ್ಷಿ, ಮಟ್ಲ್ಯಾನ್, ತನ್ನಾ ತೆನಿ ಹೊಯ್ ಅಮಿಚ್ ಸಾಕ್ಷಿ ಮಟ್ಲ್ಯಾನಿ. 23 ತನ್ನಾ ಜೊಶ್ವಾನ್ ತೆಂಕಾ, ತಸೆಹೊಲ್ಯಾರ್ ತುಮ್ಚ್ಯಾಕ್ಲಿ ದುಸ್ರಿ ದೆವಾ ಕಾಡುನ್ ಟಾಕಾ ಅನಿ ಇಜ್ರಾಯೆಲಾಂಚೊ ದೆವ್ ಸರ್ವೆಸ್ಪರಾಕ್ ತುಮ್ಚ್ಯಾಕ್ಡೆ ಪರ್‍ತುನ್ ಘೆವಾ, ಮಟ್ಲ್ಯಾನ್. 24 ತನ್ನಾ ಲೊಕಾನಿ, ಅಮ್ಚೊ ದೆವ್ ಸರ್ವೆಸ್ಪರಾಕುಚ್ ಆರಾದನ್ ಕರ್ತಾಂವ್ ಅನಿ ತೆಚಿ ಗೊಸ್ಟ್ ಆಯಿಕ್ತಾಂವ್, ಮಟ್ಲ್ಯಾನಿ. 25 ಅಸೆ ಜೊಶ್ವಾನ್ ಶೆಕೆಮಾತ್ ಇಜ್ರಾಯೆಲ್ ಲೊಕಾಂಚ್ಯಾ ವಾಂಗ್ಡಾ ಕರಾರ್ ಕರುನ್ ಘೆವ್ನ್ ತೆಂಕಾ ಉಲ್ಲಿ ಕರುಚೆಚ್ ಹೊಲ್ಲಿ ಕಾಮಾ ಸಾಂಗ್ಲ್ಯಾನ್. 26 ತವ್ಡೆಚ್ ನಸ್ತಾನಾ ತೆನಿ ಹಿ ಸಗ್ಳಿ ಗೊಸ್ಟಿಯಾ ದೆವಾಚ್ಯಾ ಪುಸ್ತಕಾತ್ ಲಿವ್ನ್, ಎಕ್ ಮೊಟ್ಟೊ ಗುಂಡೊ ಹಾನುನ್ ಸರ್ವೆಸ್ಪರಾಚ್ಯಾ ಗುಡಿಚ್ಯಾ ಜಗ್ಗೊಳ್ ಹೊತ್ತ್ಯಾ ಅಲ್ಲಾ ಝಾಡಾಚ್ಯಾ ಮುಳಾತ್ ಇಬೆ ಕರುನ್, 27 ಸಗ್ಳ್ಯಾ ಲೊಕಾಕ್ನಿ, ಅಬಕ್ ಹ್ಯೊ ಗುಂಡೊ ತುಮ್ಚ್ಯಾ ವಿಶಯಾತ್ ಸಾಕ್ಷಿ ಸಾಂಗ್ತಾ, ಹೆನಿ ಸರ್ವೆಸ್ಪರಾನ್ ಸಾಂಗಲ್ಲಿ ಗೊಸ್ಟಿಯಾ ಆಯಿಕ್ಲಾ, ತಸೆ ಹೊವ್ನ್, ತುಮಿ ತುಮ್ಚ್ಯಾ ದೆವಾಕ್ ತಿರಸ್ಕಾರ್ ಕರ್ಲ್ಯಾರ್, ಹ್ಯೊ ಗುಂಡೊಚ್ ತುಮ್ಕಾ ವಿರೊದ್ ಸಾಕ್ಷಿ ಹೊವ್ನ್ ರ್‍ಹಾತಾ, ಮನುನ್, 28 ತೆಂಕಾ ತೆಂಚ್ಯಾ ಘರಾಕ್ನಿ ಧಾಡ್ಲ್ಯಾನ್.

29 ತೆಜ್ಯಾ ಮಾನಾ ಸರ್ವೆಸ್ಪರಾಚೊ ಸೆವಕ್ ನುನಾಚೊ ಲೆಕ್ ಜೊಶ್ವಾ ಸೆಂಬರಾರ್ ಧಾ ವರ್ಸಾಚೊ ಹೊವ್ನ್ ಮರ್ಲೊ. 30 ತೆಕಾ ಎಫ್ರಾಯಿಮ್ ಮಡ್ಡಿಚ್ಯಾ ಜಾಗ್ಯಾಚ್ಯಾ ಗಾಶ್ ಮಡ್ಡಿಚ್ಯಾ ಉತ್ತರ್ ದಿಕ್ಕಾಕ್ ಹೊತ್ತ್ಯಾ ತಿಮ್ನತ್ ಸೆರಾ ಮನ್ತಲ್ಯಾ ತೆಜ್ಯಾ ಸ್ವತ್ಯಾಚ್ಯಾ ಜಿಮ್ನಿತ್ ಮಾಟಿ ದಿಲ್ಯಾನಿ. 31 ಜೊಶ್ವಾಚ್ಯಾ ಎಳಾರ್ ಅನಿ ತೆಜ್ಯಾ ಮಾನಾ ಝಿತ್ತೆ ಹೊತ್ತ್ಯಾ ಸಗ್ಳ್ಯಾನಿಬಿ ಇಜ್ರಾಯೆಲಾಂಚ್ಯಾ ಲೊಕಾಂಚ್ಯಾ ಸಾಟ್ನಿ ಸರ್ವೆಸ್ಪರಾನ್ ಕರಲ್ಲ್ಯಾ ಚಮತ್ಕಾರಾಚ್ಯಾ ಕಾಮಾಕ್ನಿ ಸಾಕ್ಷಿ ಹೊವ್ನ್ ಹೊತ್ತ್ಯಾ ಜಾಂನ್ತ್ಯಾಂಚ್ಯಾ ದಿಸಾತ್ನಿಬಿ ಇಜ್ರಾಯೆಲ್ ಲೊಕಾ ಸರ್ವೆಸ್ಪರಾಕ್ ಆರಾದನ್ ಕರಿತ್. 32 ಇಜ್ರಾಯೆಲ್ ಲೊಕಾನಿ ಇಜಿಪ್ತಾಕ್ನಾ ಹಾನಲ್ಲಿ ಜುಜೆಚಿ ಹಡ್ಡಾ ಜಾಕೊಬಾನ್ ಶೆಕೆಮಾಚೊ ಬಾಬಾ ಹಾಮೊರಾಚ್ಯಾ ಪೊರಾಂಚ್ಯಾಕ್ನಾ ಸೆಂಬರ್ ಪೈಸ್ಯಾಕ್ನಿ ಇಕಾತ್ ಘೆಟಲ್ಲ್ಯಾ ಶೆಕೆಮ್ ಗಾಂವಾಚ್ಯಾ ಸೆತಾತ್ ಮಾಟಿ ಕರ್ಲ್ಯಾನಿ, ತೆ ಸೆತ್ ಜುಜೆಚೆ ಸ್ವತಾಚೆ ಹೊವ್ನ್ ಹಾಯ್. 33 ಆರೊನಾಚೊ ಲೆಕ್ ಎಲಿಯಾಜರ್ ಮರ್ಲೊ, ತೆಕಾ ಎಫ್ರಾಯಿಮ್ ಮಡ್ಡಿಚ್ಯಾ ಪ್ರಾಂತ್ಯಾತ್ ತೆಜೊ ಲೆಕ್ ಫಿನೆಹಾಸನಾಚ್ಯಾ ವಾಟ್ಯಾಚ್ಯಾ ಮಡ್ಡಿತ್ ಮಾಟಿ ಕರ್ಲ್ಯಾನಿ.