Josué 6

ಜೆರಿಕೊ ಕೊಸಳ್ತಲೆ

1 ಜೆರಿಕೊಚಿ ಲೊಕಾ ಇಜ್ರಾಯೆಲ್‌ಕಾರಾಕ್ನಿ ಭಿವ್ನ್ ಅಪ್ಲ್ಯಾ ಶಾರಾಚೆ ದಡ್ಪೆ ಧಾಪುನ್ ಘೆಟ್ಲ್ಯಾನಿ, ತ್ಯಾ ಎಳಾರ್ ಕೊನ್ಬಿ ಭಾಯ್ರ್ ಯೆವ್ಕ್ ನಾತ್, ಭುತ್ತುರ್ಬಿ ಜಾವ್ಕ್ ನಾತ್. 2 ತನ್ನಾ ಸರ್ವೆಸ್ಪರಾನ್ ಜೊಶ್ವಾಕ್, "ಅಬಕ್ ಮಿಯಾ ಜೆರಿಕೊ ಅನಿ ತೆಚ್ಯಾ ರಾಜಾಕ್ನಿ ಅನಿ ಸೈನಿಕಾಕ್ನಿ ತುಜ್ಯಾ ಹಾತಿತ್ ದಿತಾ. 3 ತುಜಿ ಲಡಾಯಿಚಿ ಸೈನಿಕಾ ದಿಸಾಕ್ ಎಗ್ದಾ ಸಾತ್ ದಿಸಾ ಪತರ್ ಶಾರ್‍ಹಾತ್ ಫಿರುಂದಿತ್. 4 ಅನಿ ಸಾತ್ ಯಾಜಕ್ ಲೊಕಾ ಪಾಂವ್ವೆ ವಾಜ್ವಂನ್ಗೆತ್ ಕರಾರಾಚ್ಯಾ ಪೆಟಿಚಾ ಫಿಡೆ ಜಾಂವ್ದಿತ್, ತಿಯಾ ಅನಿ ತುಜಿ ಸೈನಿಕಾ ಸಾತ್ವ್ಯಾ ದಿಸಿ ಶಾರ್‍ಹಾತ್ ಸಾತ್ ಪಟಿ ಫಿರುಚೆ, 5 ಯಾಜಕಾನಿ ಪಾಂವ್ವೆ ವಾಜ್ವುಚೆ, ತೆನಿ ವಾಜ್ವುತಲ್ಯಾ ಪಂವ್ವ್ಯಾಂಚಿ ಧನ್ ಆಯ್ಕ್ ತಾನಾ ತುಮಿ ಮೊಟ್ಯಾನ್ ಬೊಬ್ ಮಾರಾ, ತನ್ನಾ ಶಾರಾಚಿ ಭಿತ್ ಅಪ್ನಿಚ್ ಪಡ್ತಾ, ಅನಿ ಹರ್ ಎಕ್ಲೊ ಆರಾಮಾನ್ ಶಾರ್‍ಹಾತ್ ಗುಸುಕ್ ಹೊತಾ" ಮಟ್ಲ್ಯಾನ್. 6 ತನ್ನಾ ನುನಾಚೊ ಲೆಕ್ ಜೊಶ್ವಾನ್ ಯಾಜಕಾಕ್ನಿ ಬಲ್ವುನ್, ತೆಂಕಾ ಕರಾರಾಚಿ ಪೆಟಿ ವಾವುನ್ ಘೆವ್ನ್ ಜಾವಾ, ಸಾತ್ ಯಾಜಕ್ ಲೊಕಾ ಅಪ್ನಾಚೆ ಪಂವ್ವೆ ಘೆವ್ನ್ ಸರ್ವೆಸ್ಪರಾಚ್ಯಾ ಕರಾರಾಚ್ಯಾ ಪೆಟಿಚ್ಯಾ ಫಿಡೆ ಚಲುಂದಿತ್ ಮಟ್ಲ್ಯಾನ್. 7 ಅನಿ ತೆನಿ ಲೊಕಾಕ್ನಿ, ಸಗ್ಳ್ಯಾ ಶಾರ್‍ಹಾತ್ ಫಿರಾ, ಲಡಾಯಿಕ್ ತಯಾರ್ ಹೊಲ್ಲೆ ಸಗ್ಳೆ ಸರ್ವೆಸ್ಪರಾಚ್ಯಾ ಕರಾರಾಚ್ಯಾ ಪೆಟಿಚಾ ಫಿಡೆ ಜಾಂವ್ದಿತ್ ಮಟ್ಲ್ಯಾನ್. 8 ಜೊಶ್ವಾಚ್ಯಾ ಹುಕುಮಾ ಸಾರ್ಕೆಚ್ ಸಾತ್ ಲೊಕಾ ಪಾಂವ್ವೆ ವಾಜ್ವುನ್ಗೆತ್ ಸರ್ವೆಸ್ಪರಾಚ್ಯಾ ಕರಾರಾಚ್ಯಾ ಪೆಟಿಚ್ಯಾ ಫಿಡೆ ಗೆಲೆ, ಅನಿ ಕರಾರಾಚಿ ಪೆಟ್ ತೆಂಚ್ಯಾ ಫಾಟ್ನಾ ಗೆಲಿ. 9 ಲಡಾಯಿಕ್ ತಯಾರ್ ಹೊಲ್ಲಿ ಸೈನಿಕಾ ಪಂವ್ವೆ ವಾಜ್ವುತಲ್ಯಾ ಯಾಜಕಾಂಚ್ಯಾ ಫಿಡೆ ಹೊತ್ತ್ಯಾನಿ, ಫಾಟ್ಲೊ ಸೈನ್ ಪೆಟಿಚ್ಯಾ ಫಾಟ್ನಾ ಹೊತ್ತೊ, ಪಂವ್ವೆ ವಾಜ್ವುನ್ಗೆತುಚ್ ಜಾವ್ಕ್ ಲಾಗಲ್ಲೆ. 10 ಜೊಶ್ವಾನ್ ಲೊಕಾಕ್ನಿ ಅತ್ತಾ ತುಮಿ ಬೊಬ್ ಮಾರುನಕಾಸಿ, ತುಮ್ಚಿ ಧನ್ ಬಿ ಆಯ್ಕುಕ್ ನಕ್ಕೊ, ತುಮ್ಚ್ಯಾ ತೊಂಡಾತ್ನಾ ಎಕ್ಬಿ ಬೊಲ್ನೆ ಭಾಯ್ರ್ ಯೆತಲೆ ನಕ್ಕೊ, ಮಿಯಾ ಬೊಬ್ ಮಾರಾ ಮನುನ್ ಸಾಂಗಲ್ಲ್ಯಾ ದಿಸಿ ತವ್ಡೆಚ್ ಬೊಬ್ ಮಾರಾ ಮನುನ್ ಹುಕುಮ್ ದಿಲ್ಯಾನ್. 11 ತೆನಿ ಸರ್ವೆಸ್ಪರಾಚ್ಯಾ ಕರಾರಾಚ್ಯಾ ಪೆಟಿಕ್ ಎಗ್ದಾ ಸಗ್ಳೆ ಶಾರ್ ಫಿರ್ವುನ್ ಬಿಡಾರಾಕ್ನಿ ಪರ್‍ತುನ್ ಯೆವ್ನ್ ಥೈಚ್ ರ್‍ಹಾತ್ ಕಳದ್ಲ್ಯಾನಿ. 12 ಜೊಶ್ವಾ ಸಕ್ಕಾಳಿ ಉಟ್ಲೊ, ಯಾಜಕಾನಿ ಸರ್ವೆಸ್ಪರಾಚಿ ಕರಾರಾಚಿ ಪೆಟ್ ವಾವ್ನ್ ಘೆವ್ನ್ ಜಾವ್ಕ್ ಲಾಗ್ಲ್ಯಾನಿ, 13 ಸಾತ್ ಯಾಜಕಾ ಪಾಂವ್ವೆ ವಾಜ್ವುನ್ಗೆತ್ ಕರಾರಾಚ್ಯಾ ಪೆಟಿಚ್ಯಾ ಫಿಡೆ ಗೆಲ್ಯಾನಿ, ಲಡಾಯಿಚಿ ಸೈನಿಕಾ ತೆಂಚ್ಯಾ ಫಿಡೆ ಹೊತ್ತಿ, ಫಾಟ್ಲೊ ಸೈನ್ಯ ಪೆಟಿಚ್ಯಾ ಫಾಟ್ನಾ ಹೊತ್ತೊ, ಪಾಂವ್ವೆ ವಾಜ್ವುನ್ಗೆತುಚ್ ಹೊತ್ತೊ ಅನಿ ತೆನಿ ಜಾಯ್ತ್. 14 ಅಸೆ ದೊನ್ವ್ಯಾ ದಿಸಿಬಿ ಶಾರ್‍ಹಾತ್ ಫಿರುನ್ ಪರ್‍ತುನ್ ಬಿಡಾರಾತ್ನಿ ಯೆಲ್ಯಾನಿ. 15 ತೆನಿ ಸಾ ದಿಸ್ ಅಸೆಚ್ ಕರ್ಲ್ಯಾನಿ, ಸಾತ್ವೊ ದಿಸ್ ಉಗ್ತಾನಾ, ಉಟುನ್ ಸಾತ್ ಪಟಿ ಫಿರ್ಲ್ಯಾನಿ, ಹ್ಯಾ ದಿಸಿ ಸಾತ್ ಪಟಿ ಫಿರ್ಲ್ಯಾನಿ. 16 ಸತ್ವ್ಯಾ ಪಟಿ ಫಿರ್ತಾನಾ, ಯಾಜಕಾನಿ ಪಾಂವ್ವೆ ವಾಜ್ವುಲ್ಯಾನಿ, ತನ್ನಾ ಜೊಶ್ವಾನ್ ಲೊಕಾಕ್ನಿ, ಬೊಬ್ ಮಾರಾ ತುಮ್ಕಾ ಸರ್ವೆಸ್ಪರಾನ್ ಶಾರ್ ದಿಲಾ, 17 ಹೆ ಅನಿ ಹ್ಯಾತುರ್ ಹೊತ್ತೆ ಸಗ್ಳೆ ಸರ್ವೆಸ್ಪರಾಚೊ ವಾಟೊ ಮನುನ್ ಕಳ್ವುನ್ ಘೆವಾ, ರಾಹಾಬಾಚ್ಯಾ ವಾಂಗ್ಡಾ ಘರ್‍ಹಾತ್ ಹೊತ್ತಿ ಸಗ್ಳಿ ಲೊಕಾಬಿ ಹುರುಂದಿತ್, ತಿನಿ ಅಮಿ ಧಾಡಲ್ಯಾ ಗುಡಾಚಾರಿಯಾಕ್ನಿ ನಿಪ್ವುನ್ ಥವಲ್ಲಿನ್ ನ್ಹಯ್, 18 ತುಮಿ ತರ್ ಸರ್ವೆಸ್ಪರಾಕ್ ಮನುನ್ ನೆಮುನ್ ಥವಲ್ಯಾ ಸಾಮಾನಾಂಚ್ಯಾ ವಿಶಯಾತ್, ಹುಶ್ಯಾರ್ಕಿನ್ ರಾವಾ, ತುಮಿ ತ್ಯಾತುರ್‍ಲೆ ಕಾಯ್ತರ್ಬಿ ಕಾಡುನ್ ಘೆಟ್ಲ್ಯಾರ್, ಇಜ್ರಾಯೆಲಾಚಿ ಬಿಡಾರಾ ಶರಾಪಾತ್ ಪಡುನ್ ನಾಶ್ ಹೊತಿಲ್. 19 ಸಗ್ಳಿ ಚಾಂದಿ ಅನಿ ಸೊನೆ, ತಾಂಬ್ಯಾಚಿ ಅನಿ ಲೊಂಗ್ಟಾಚಿ ಆಯ್ದಾನಾ ಸರ್ವೆಸ್ಪರಾಕ್ ಥವಲ್ಲ್ಯಾ ತೆಚ್ಯಾ ಬಂಡಾರಾಚೆಚ್ ಮಟ್ಲ್ಯಾನ್. 20 ತನ್ನಾಚ್ ಲೊಕಾಂಚಿ ಬೊಬ್ ಅನಿ ಪಾಂವ್ವ್ಯಾಂಚಿ ಧನ್ ಆಯ್ಕೊ ಯೆಲಿ, ಲೊಕಾನಿ ಪಾಂವ್ವ್ಯಾಂಚಿ ಧನ್ ಆಯ್ಕುನ್ ಲೈ ಮೊಟ್ಯಾನ್ ಬೊಬ್ ಮಾರ್ತಾನಾ ಶಾರಾಚಿ ಭಿತ್ ಅಪ್ನಿಚ್ ಪಡ್ಲಿ, ಹರ್ ಎಕ್ಲೊಬಿ ಸಸಾರಾನ್ ಶಾರ್‍ಹಾತ್ ಗುಸ್ಲ್ಯಾನಿ, ಅನಿ ತೆ ಶಾರ್ ತೆಂಚ್ಯಾ ಸ್ವತಾಕ್ ಗಾವ್ಲೆ. 21 ತೆನಿ ಶಾರ್‍ಹಾತ್ಲ್ಯಾ ಬಾಯ್ಕೊಮಾನ್ಸಾಕ್ನಿ, ಘವ್ಮಾನ್ಸಾಕ್ನಿ ಅನಿ ದಾಂಡ್ಗ್ಯಾಕ್ನಿ, ಮಾತಾರಾಕ್ನಿ, ಗೊರಾ, ಗಾಡ್ವಾ, ಬಕ್ರಿಯಾಕ್ನಿ ಹೆ ಸಗ್ಳೆ ಕಾಯ್ ಥೈ ನಸ್ತಾನಾ ಕೊಯ್ತ್ಯಾನಿ ಮಾರುನ್ ಜಿವ್ ಕಾಡ್ಲ್ಯಾನಿ. 22 ಜೊಶ್ವಾನ್ ತೆ ದೆಶ್ ಫಿರುನ್ ಬಗಲ್ಲ್ಯಾ ತ್ಯಾ ದೊನ್ ಘವ್ಮಾನ್ಸಾಕ್ನಿ, ತುಮಿ ತ್ಯಾ ಬಾಯ್ಕೊ ಮಾನ್ಸಿಕ್ ಗೊಸ್ಟ್ ದಿಲ್ಲ್ಯಾ ಸಾರ್ಕೆ ತಿಚ್ಯಾ ಘರಾಕ್ ಜಾವ್ನ್ ತಿಕಾ ಅನಿ ತಿಚ್ಯಾ ಸಗ್ಳ್ಯಾಕ್ನಿ ಘೆವ್ನ್ ಯೆವಾ ಮಟ್ಲ್ಯಾನ್. 23 ತ್ಯಾ ದಾಂಡ್ಗ್ಯಾ ಮಾನ್ಸಾನಿ ಜಾವ್ನ್ ರಾಹಬಾಕ್ ತಿಚ್ಯಾ ಬಾಯ್ ಬಾಬಾಕ್, ಭಾವಾ ಅನಿ ಭೆನಿಯಾಕ್ನಿ ತಿಚ್ಯಾ ಗೊತ್ರಾಚ್ಯಾ ಸಗ್ಳ್ಯಾ ಲೊಕಾಕ್ನಿ ಹಾನುನ್ ಇಜ್ರಾಯೆಲಾಚ್ಯಾ ಬಿಡಾರಾಂಚ್ಯಾ ಜಗ್ಗೊಳ್ ಥವ್ಲ್ಯಾನಿ. 24 ಇಜ್ರಾಯೆಲಾನಿ ಶಾರ್ ಅನಿ ತ್ಯಾತುರ್ ಹೊತ್ತೆ ಸಗ್ಳೆ ಆಗಿನ್ ಜಾಳ್ವುಲ್ಯಾನಿ, ಖರೆ ಸೊನೆ, ಚಾಂದಿ ಅನಿ ತಾಂಬ್ಯಾಚಿ, ಲೊಂಗ್ಟಾಚಿ ಆಯ್ದಾನಾ, ಸರ್ವೆಸ್ಪರಾಚ್ಯಾ ಗುಡಿಕ್ ಕಾನಿಕ್ ದಿಲ್ಯಾನಿ. 25 ರಾಹಬಾನ್ ಜೆರಿಕೊ ಫಿರುನ್ ಬಗುಕ್ ಯೆಲ್ಲ್ಯಾ ಸರ್ವೆಸ್ಪರಾಚ್ಯಾ ಧುತಾಕ್ನಿ ನಿಪ್ವುನ್ ಥವಲ್ಲ್ಯಾ ವೈನಾ, ತೆನಿ ತಿಕಾ ಅನಿ ತಿಚ್ಯಾ ಬಾಬಾಚ್ಯಾ ಘರಾಚ್ಯಾ ಸಗ್ಳ್ಯಾಕ್ನಿಬಿ ಹುರ್ವುಲ್ಯಾನಿ, ತಿ ಅನಿ ತಿಚ್ಯಾ ಪಿಳ್ಗಿಚಿ ಲೊಕಾ ಅಜುನ್ ಪತರ್ಬಿ ಇಜ್ರಾಯೆಲಾಂಚ್ಯಾ ವಾಂಗ್ಡಾ ವಸ್ತಿ ಕರುನ್ ಹಾತ್. 26 ಜೊಶ್ವಾನ್ ತ್ಯಾಚ್ ಎಳಾರ್ ಇಜ್ರಾಯೆಲಾಚ್ಯಾಕ್ನಿ ಆನ್ ಘಾಲುನ್, ತೆಂಕಾ ಜೆರಿಕೊ ಶಾರ್ ಭಾಂದುಕ್ ಹಾತ್ ಲಾವಲ್ಲೊ ಮಾನುಸ್ ಸರ್ವೆಸ್ಪರಾಚ್ಯಾ ಇದ್ರಾಕ್ ಶರಾಪಿತ್ ಹೊಂವ್ದಿತ್, ತೊ ಥೈ ಪಾಯಾ ಭಾಂದ್ತಾನಾ ಅಪ್ನಾಚ್ಯಾ ಥೊರ್ಲ್ಯಾ ಲೆಕಾಕ್, ಅನಿ ದಾರಾ ಥವ್ತಾನಾ ಅಪ್ನಾಚ್ಯಾ ಧಾಕ್ಲ್ಯಾ ಲೆಕಾಕ್ ನಾ ಕರುನ್ ಘೆಂವ್ದಿತ್ ಮಟ್ಲ್ಯಾನ್. 27 ಸರ್ವೆಸ್ಪರ್ ಜೊಶ್ವಾ ವಾಂಗ್ಡಾ ಹೊತ್ತ್ಯಾ ಸಾಟ್ನಿ ತೆಚಿ ಕಿರ್ತಿ ಸಗ್ಳ್ಯಾದೆಸಾತ್ ಪಗಳ್ಳಿ.