Gênesis 12

ಕ್ಹುದಾ ಅಬ್ರಾಮನೆ ಬಲಾಯೆಲ

1 ಯಹೊವಾ ಅಬ್ರಾಮನೆ ತಾರು ದೆಶ ವರಿ ತಾರಾ ಮನಕ್ಹೊನೆ ಛೊಡಿನ ಜಾ಼ ತಾರಾ ಬಾನು ಖಾಂದಾನಾ ಛೊಡಿನ ಮಿ ದೆಕಾಡಾನಾ ಗಾಮೆ ಜಾ಼ 2 ಮಿ ತಾರು ಮ್ಹೊಟು ದೆಶ ಕರುಸ, ತುನೆ ಆಶಿರ್ವಾದ ಕರುಸ, ತಾರು ನಾಮ ಮ್ಹೊಟು ಕರುಸ, ತು ಆಶಿರ್ವಾದ ಥೈನ ರ‍್ಹಶಿ. 3 ತುನೆ ಆಶಿರ್ವಾದ ಕರಾವಾಲಾವೊನೆ ಆಶಿರ್ವಾದ ಕರುಸ, ತುನೆ ಕೆಟ್ಟ ನಜ಼ರಕ್ಹು ದೆಕಲವಾಲಾನೆ ಮಿ ಶ್ರಾಪ ದ್ಯುಸ. ತಾರಾಕ್ಹು ಭುಲೊಕಮಾ ರ‍್ಹಯಲ ಕ್ಹಾರಾ ಖಾಂದಾನವಾಲಾವೊನೆ ಮಿ ಆಶಿರ್ವಾದ ದ್ಯುಸ ಕದ್ಯೊ. 4 ತಿನಾಹುತಿ ಅಬ್ರಾಮನ ಕ್ಹುದಾನೆ ವಿಧೆಯ ಥಯೊ. ತೆ ಹಾರಾನ ಗಾಮ ಛೊಡಿನ ಗಯೊ. ತಿನಾಕ್ಹಾತೆ ಲೊಟಾಬಿ ಗಯೊ.ತೆಳಾಮಾ ಅಬ್ರಾಮನೆ 75 ವರಕ್ಹ ವೈಸ ಥೈತಿ. 5 ಅಬ್ರಾಮನ ಹಾರಾನ ಗಾಮ ಛೊಡಿನ ಯಕ್ಲೊ ಗಯೊ ನೈ. ಅಬ್ರಾಮನ ತಿನಿ ಬೈಕೊ ಥಯಲ ಸಾರಯಳನೆ ತಿನಾ ನ್ಹಾನಾ ಭೈನೊ ದಿಕ್ರೊ ಥಯಲ ಲೊಟನೆ ತಿನಾ ಕ್ಹಾತೆ ಬಲೈಲಿನ ಗಯೊ. ಹಾರಾನ ಗಾಮೆ ಹಮೊನೆ ರ‍್ಹಯಲ ಆಸ್ತಿ ತ್ಯುನೆ ಲಿನ ಗಯಾ. ಅಬ್ರಾಮನೆ ಹಾರಾನ ಗಾಮ್ಮಾ ಹೊಂದೆಲ ಸೆವಕೊ ತಿನಾ ಕ್ಹಾತೆ ಗಯಾ. ಅಬ್ರಾಮನ ವರಿ ತಿನಾ ಕ್ಹಾತೆ ರ‍್ಹಯಲವಾಲಾ ಹಾರಾನ ಗಾಮ ಛೊಡಿನ ಕಾನಾನ ಗಾಮೆ ಪ್ರಯಾಣ ಕರ್‍ಯಾ 6 ಅಬ್ರಾಮನ ಕಾನಾನ ಗಾಮ್ಮಾ ಪ್ರಯಾಣ ಅಗು ಚ಼ಲಾಯೊ ತೆ ಶೆಕೆಮ ಕವಾನಿ ಜ಼ಗಾ ಗೈನ ತ್ಯಾ ಮೊರೆ ಕವಾನು ಮ್ಹೊಟು ಝಾಡ ರ‍್ಹಯಲ ಜ಼ಗಾಲಕ್ಕಾ ಆಯೊ. ತೆ ಕಾಲಮಾ ಕಾನಾನ್ಯ ಗಮ್ಮಾ ವ್ಹತ್ತಾ. 7 ಕ್ಹುದಾ ಅಬ್ರಾಮನೆ ದಿಕ್ಹಿನ ತಾರಾ ಖಾಂದಾನೆ ಆ ಗಾಮ ದ್ಯುಸ ಕೈನ ಕದ್ಯೊ. ತೆ ಜ಼ಗಾಪರ ಕ್ಹುದಾ ಅಬ್ರಾಮನೆ ದಿಕ್ಹ್ಯೊ ತಿನಾಹುತಿ ಅಬ್ರಾಮನ ಕ್ಹುದಾನೆ ಹುತಿ ತ್ಯಾ ಯಕ್ಕ ಬಲಿನೊ ಕಟ್ಟೊ ಭಾಂದ್ಯೊ. 8 ಪಾಚಾ಼ತೊ ಅಬ್ರಾಮನ ತೆ ಜ಼ಗಾಕಂತೊ ಗೈನ ಬೆತೆಲಿನೆ ಪುರ್ವಮಾ ರ‍್ಹಯಲ ಡೊಂಗರೊ ಕನ ಪ್ರಯಾಣ ಕರೊ.ತ್ಯಾ ಅಬ್ರಾಮನ ತಿನಾ ಗುಡಾರೊಮಾ ಘಾಲ್ಯೊ ಪಶ್ಚಿಮಕನ ಬೆತಲ ಕೈನ ಗಾಮ ವ್ಹತ್ತು ಪುರ್ವಮಾ ಆಯಿ ಕೈನ ಗಾಮ ವ್ಹತ್ತು. ತೆ ಜ಼ಗಾಪರ ತೆ ಕ್ಹುದಾನೆ ಯಕ್ಕ ಬಲಿನೊ ಕಟ್ಟೊ ಭಾಂದಿನ ತೆ ಯಹೊವಾನೆ ಆರಾದನಾ ಕರ‍್ಯೊ.

ಅಬ್ರಾಮ ಇಜಿಪ್ತಮಾ ಆಯಲ

9 ವರಿ ತೆ ಪ್ರಯಾಣ ಅಗೊ ಚ಼ಲಾಯೊ ನೆಗೆವ ಜ಼ಗಾಕನ ಗಯೊ. 10 ತೆ ಟೈಮ್ಮಾ ಭುಮಿಪರ ಬರ್ಗಾಲ ವ್ಹತ್ತು, ಅಬ್ರಾಮ ರ‍್ಹವಾನಾಹುತಿ ಇಜಿಪ್ಟೆ ಗಯೊ. ಕಾ ಕದ್ಯಾಮ ತ್ಯಾ ಘನ್ನು ಮ್ಹೊಟು ಬರ್ಗಾಲ ವ್ಹತು. 11 ತಿನಿ ಬೈಕೊ ಸಾರಯಳ ರುಪವತಿ ರ‍್ಹಯಲ ಅಬ್ರಾಮನೆ ಗೊತ್ತ ವ್ಹತ್ತು. ತಿನಾಹುತಿ ಇಜಿಪ್ಟೆ ಜಾವಾತಿ ಪೈಲಾಜ ಅಬ್ರಾಮನೆ ಸಾರಯಳನೆ, '‘ತು ರುಪವತಿ ವ್ಹೈ ಕೈನ ಮನೆ ಗೊತ್ತ ಛೆ. 12 ಇಜಿಪ್ಟನಾ ದಾಣ್ಗಾ ತುನೆ ದೆಕಿನ ಆ ಇನಿ ಬೈಕೊ ವ್ಹೈ ಕೈನ ತಿಳದ್ಯು ತುನೆ ಪಡದಾನಾ ಹುತಿ ಮನೆ ಖಲಾಸ ಕರಿನ ತುನೆ ಜಿವಂತ ಛೊಡಸ. 13 ತಿನಾಹುತಿ ತು ಮನೆ ಭೆನ ಥೌ ಕೈನ ಮನಕ್ಹೊ ಕನ ಕೆ ತೆಳಾಮಾ ತ್ಯುನೆ ಮನೆ ತಾರೊ ಭೈ ವ್ಹೈ ಕೈನ ಐಕ್ಯಾ ಮನೆ ನೈ ಮಾರತಾ ಮಪರ ದಯಾ ಕರಸ .ಅಮ್ಮತು ಮಾರಾ ಪ್ರಾಣ ವಚಾ಼ಡಿ; ಕೈನ ಕದ್ಯೊ. 14 ಲಾಸ್ಟಮಾ ಅಬ್ರಾಮ ಇಜಿಪ್ಟೆ ಗಯೊ. ಇಜಿಪ್ಟನಾ ದಾಣ್ಗಾ ಸಾರಯಳನೆ ದಿಕಿನ ಆ ಘನ್ನಿ ರುಪವತಿ ಕದ್ಯಾ. 15 ಇಜಿಪ್ಟನಾ ದಕ್ಹಾ ನಾಯಕೊಬಿ ತಿನೆ ದೆಕ್ಯಾ.ತ್ಯುನೆ ಫರೊಹನ ಕನ ಗೈನ ತಿನು ಅಮ್ಮೊಘ ಸುಂದರತಾ ಬಗ್ಗೆ ತಿಳಶ್ಯಾ. ವರಿ ತೆ ನಾಯಕೊ ಸಾರಯಳ ಫರೊಹನಕನ ಲಿನ ಗಯಾ. 16 ಅಬ್ರಾಮ ಸಾರಳನೊ ಭೈ ವ್ಹೈ ಕೈನ ಫರೊಹನ ಅಬ್ರಾಮನೆ ಮರಗ್ಯೊ. ಫರೊಹನ ಅಬ್ರಾಮನೆ ಬೈಲೊ ಬಕ್ರಾ ವರಿ ಗದಡಾ ದಿದ್ಯೊ. ವರಿ ಅಬ್ರಾಮನೆ ದಾಸ ದಾಸಿಯೊ ವರಿ ಹುಂಟೊ ದಿದ್ಯೊ. 17 ಫರೊಹನ ಅಬ್ರಾಮನೆ ಬೈಕೊನೆ ಲಿದಲಕ್ಹು ಕ್ಹುದಾ ಫರೊಹನನೆ ತಿನಾ ಘರವಾಲಾವೊನೆ ಮ್ಹೊಟೊ ರೊಗ ಆವಾಲಗಾಡ್ಯೊ. 18 ತೆಳಾಮಾ ಫರೊಹನ ಅಬ್ರಾಮನೆ ಬಲೈನ ತು ಮನೆ ಘನ್ನು ಕೆಟ್ಟ ಕರ‍್ಯೊಸ ಸಾರಯಳ ತಾರಿ ಬೈಕೊ ವ್ಹೈ ಕೈನ ಪೈಲಾ ಕಾ ಕದ್ಯೊ ನೈ? 19 ಆ ತಾರಿ ಭೆನ ವ್ಹೈ ಕೈನ ಕಾ ಕದ್ಯೊ? ತು ಅಮ್ಮ ಕದಲಕ್ಹು ಮಿ ತಿನೆ ಮಾರಿ ಬೈಕೊ ಥಾವಾನಾಹುತಿ ಲಿದ್ಯೊ.ತಿನಾಹುತಿ ಹಮ್ನಾ ಮಿ ತಾರಿ ಬೈಕೊನೆ ವರಿ ತುನೆ ದ್ಯುಸ ಕದ್ಯೊ.ತು ಇನೆ ಬೈಲೈಲಿನ ತಾರಾ ಕ್ಹಾತೆ ಗೈಪಡ ಕೈನ ಕದ್ಯೊ. 20 ಪಾಚಲ್ತೊ ಫರೊಹನ ತಿನಾ ಮನಕ್ಹೊನೆ ಅಬ್ರಾಮನನೆ ಇಜಿಪ್ಟತಾ ವಳೈ ಕೈನ ಸೆ ಕರಲಿದ್ಯಾ ತಿನಾಹುತಿ ಅಬ್ರಾಮನ ವರಿ ತಿನಿ ಬೈಕೊ ತೆ ಜ಼ಗಾ ಛೊಡಿನ ಗಯಾ ತ್ಯುನೆ ತ್ಯುನಾ ಕ್ಹಾತೆ ರ‍್ಹಯಲ ಲಿನ ಗಯಾ.