1 ಯಹೊವಾ ತೆ ದಿದಲ ವಾಗ್ದಾನಾ ಪ್ರಕಾರಜ಼ ಇಕ್ಹರ‍್ಯಾವಾಚಿ ಸಾರಾಳನೆ ಮರ್ಗಿನ ತಿನೆ ದಿದಲವಾತ ಪುರಾ ಕರ‍್ಯೊ. 2 ಸಾರಳ ಗಡಿಯೊ ಥಯಲ ಅಬ್ರಹಾಮಕ್ಹು ಪೆಟೆ ರ‍್ಹೈನ ಯಕ್ಕ ಪಟ್ಟೊ ಜ಼ನ್ನಿ. ಕ್ಹುದಾ ವಾಗ್ದನದಿದಲ ತಿಮ್ಮಜ಼ ಇ ಕ್ಹಾರು ಕರೆಟ್ಟ ಟೈಮ್ಮಜ಼ ಥಯು. 3 ಅಬ್ರಹಾಮ ಸಾರಳಮಾ ತಿನಾಕ್ಹು ಹುಟ್ಟಲ ಬಚ್ಚಾನೆ ಇಸಾಕ ಕೈನ ನಾಮ ಮ್ಹೆಲ್ಯೊ. 4 ಇಸಾಕನೆ ಆಟ ಮ್ಹೈನಾ ಥಾತಾಮಾ ಕ್ಹುದಾನಿ ವಾತನಿಂಗತ ಅಬ್ರಹಾಮ ತಿನೆ ಖತ್ನಾ ಕರಾಯೊ. 5 ಅಬ್ರಹಾಮನೆ ಕ್ಹೊ ವರಕ್ಹನೊ ಥಾತಾಮಾ ತಿನೊ ದಿಕ್ರೊ ಇಸಾಕ ಹುಟ್ಯೊ. 6 ಸಾರಳ ಕ್ಹುದಾ ಮಿ ಅಕ್ಹಾ ವರಕ್ಹು ಕರ‍್ಯೊಸ. ಎ ಐಕಲವಾಲಾ ಮಾರಾ ಕ್ಹಾತೆ ಅಕ್ಹಸ. 7 ಅಬ್ರಹಾಮ ಸಾರಳಮಾ ದಿಕ್ರೊ ಹುಟ್ಟಸ ಕೈನ ಕುನ್ನಜ಼ ವಿಚಾರ ಕರ‍್ಯುನ್ಹೊತು. ಅಬ್ರಹಾಮ ಗಡಿಯೊ ಥಯೊತಬಿ ಹಮ್ನಾ ಮಿ ತಿನೊ ಪಟ್ಟೊ ದಿದಿಸ ಕದಿ. 8 ಇಸಾಕ ಮ್ಹೊಟೊ ಥೈನ ಅನ್ನ ಖಾವಾ ಯಕ್ಲೊ ಮ್ಹೊಟೊ ಥಯೊ ತೆಳಾಮಾ ಅಬ್ರಹಾಮ ಮ್ಹೊಟು ಖಾವಾನು ಕರ‍್ಯೊ.

9 ಪೈಲಾ ಇಜಿಪ್ತನಿ ಸೆವಕಿ ಥಯಲ ಹಾಗರಳ ಯಕ್ಕ ದಿಕ್ರೊ ಹುಟ್ಯೊತೊ ತಿನೆಬಿ ಅಬ್ರಹಾಮ ಬಾ ಥಯೊತೊ. ವರಿಬಿ ತೆ ಪೈಲಾನಾ ದಿಕ್ರಾನೆ ಇಸಾಕನೆ ತ್ರಾಸ ದಿವಾನೆ ಸಾರಳ ದೆಕೆ. 10 ತಿನಾಹುತಿ ಸಾರಳ ಅಬ್ರಹಾಮನೆ ತೆ ಸೆವಕಿನೆ ತಿನಾ ದಿಕ್ರಾನೆ ಮೊಕ್ಲಿಪಾಡ ಅಪೆ ಮರಲ್ಪರ ಕ್ಹಾರಿ ಆಸ್ತಿ ಅಪ್ನೊ ದಿಕ್ರೊ ಇಸಾಕನೆ ಮಳಾದೆ. ಅಪ್ನಿ ಆಸ್ತಿಮಾ ಇಸಾಕನಾ ವಾಟಾಮಾ ತಿನೆ ವಾಟೊ ದಿವಾನೆ ಮನೆ ಮನಸ ನತ್ತಿ ಕೈನ ಕದಿ. 11 ಅಬ್ರಹಾಮನೆ ಘನ್ನು ದುಖ ಥಯು ತೆ ತಿನಾ ದಿಕ್ರೊ ಇಸ್ಮಾಯಿನಾ ಹುತಿ ಚಿಂತಾ ಕರಾಡ್ಯೊತೊ. 12 ತೆನೈಸೊ ಕ್ಹುದಾ ಅಬ್ರಹಾಮನೆ ತೆ ಪಟ್ಟಾನಾ ಹುತ ವರಿ ಸೆವಕಿನಾ ಹುತಿ ಚಿಂತಾ ಕರು ನಕೊ ಸಾರಳನು ಮನಸ ಕಿಮ ಛೆ ತಿಮ್ಮಜ಼ ಕರ. ಇಸಾಕ ಯಕ್ಲೊಜ಼ ಆಸ್ತಿನೆ ವಾರಸದಾರ ಥಾವಾದೆ. 13 ವರಿಬಿ ತಾರಿ ಸೆವಕಿನಾ ದಿಕ್ರಾನೆಬಿ ಮಿ ಆಶಿರ್ವಾ ದ್ಯುಸ. ತೆ ತಾರೊ ದಿಕ್ರೊ ರ‍್ಹಯಲ ಹುತಿ ತಿನಾಕ್ಹುಬಿ ಮ್ಹೊಟು ಜ಼ನಾಂಗ ಕರುಸ ಕೈನ ಕದ್ಯೊ. 14 ಮರ್ನಾ ದಿನ್ನೆ ಪಾಟೆ ಅಬ್ರಹಾನ ದಕ್ಹು ಅನ್ನ ವರಿ ದಕ್ಹು ಪಾನಿ ಲಿನ ಹಾಗರಳನೆ ದಿದ್ಯೊ. ಹಾಗರಲ ತೆಲಿನ ದಿನಾ ಬಚ್ಚಾನೆ ಲಿನ ತ್ಯಾಂತಿ ಗೈಪಡಿ ಹಾಗರಳ ತೆ ಜ಼ಗಾ ಛೊಡಿನ ಬೆರಶೆಬನೆ ಉಸುಕನಿ ಜ಼ಗಾ ಭಟ್ಕಾಡಿತಿ. 15 ದಕ್ಹೊ ಟೈಮ ಥಯಲ್ಪರ ತಿಕನ ರ‍್ಹಯಲ ಪಾನಿ ಖಲಾಸ ಥಯೊ. ಪಿವಾನಾ ಹುತಿ ಸುಜ಼ ನ್ಹೊತು. ತಿನಾಹುತಿ ಹಾಗರಳ ತಿನಾ ದಿಕ್ರಾನೆ ಝಾಡನಿ ಛವ್ಲಿನಾ ಹೆಟಿ ಕ್ಹುರಾಡಿ. 16 ಹಾಗರಳ ದಕ್ಹಿ ದುರ ಚಾ಼ಲ್ತಿ ಗೈನ ಬೈಟಿನ ತಿನೊ ದಿಕ್ರೊ ಮರಾನು ನೈ ದಕಾನೆ ಥಯಲಹುತಿ ರವಾನು ಸುರು ಕರಿ. 17 ಬಚ್ಚು಼ ರ‍ವಾನು ಕ್ಹುದಾ ಐಕು ಆಯು ತೆಳಾಮಾ ದೆವದುತ ಹಬಾಳತೊ ಐನ ತಿನೆ ಬಲೈನ ಹಾಗರಳ ತುನೆ ಸು ಥಯು ತು ಭುಚ್ಕು಼ ನಕೊ ಬಚ್ಚಾನು ರವಾನು ಯಹೊವಾ ಐಕ್ಯೊಸ. 18 ಗೈನ ಬಚ್ಚಾ಼ನೆ ಉಚೈಲೆ ತಿನಾಕ್ಹು ಮ್ಹೊಟು ಜ಼ನಾಂಗ ಕರುಸ ಕದ್ಯೊ. 19 ತೆ ಥಯಲ್ಪರ ಕ್ಹುದಾ ಹಾಗರಳನೆ ಯಕ್ಕ ಇರ ದಿಕ್ಹಾ ವರಕ್ಹಿ ಕರ‍್ಯೊ. ಹಾಗರಳ ಇರೆ ಗೈನ ತಿನಿ ತಿತ್ತಿಮಾ ಪಾನಿ ಭರಿ ಲೈನ ಐನ ಬಚ್ಚಾ಼ನೆ ಪಿಲೈ 20 ಕ್ಹುದಾ ತೆ ಬಚ್ಚಾ಼ನಾ ಕ್ಹಾತೆ ರ‍್ಹಯಲ ಹುತಿ ತೆ ಬಚ್ಚು಼ ಬೆಳ್ದಿನ ಮ್ಹೊಟೊ ಥಯೊ. ರಾನ್ಮಾ ಜಿವ್ನಾ ಕರಿನ ಚತುರ ಬಿಲ್ಲು ಬಾಣವಾಲೊ ಥಯೊ. 21 ತೆ ಪಾರಾರನಾ ರಾನ್ಮಾ ರ‍್ಹಯೊ. ತಿನಿ ಯಾ ಐಗುಪ್ತ ದೆಶತಿ ಯಕ್ಕ ಜಾಂಜಿಮಾನ ಛೊಕ್ರಿನೆ ಲೈನ ತಿನಾ ಕ್ಹಾತೆ ಹಿವಾ ಕರಿ.

22 ತೆ ಕಾಲಮಾ ಅಬಿಮೆಲೆಕ ಸೆನಾದಿಪತಿ ಥಯಲ ಫಿಕೊಲೊನಾ ಕ್ಹಾತೆ ಅಬ್ರಹಾಮನೆ, 'ತು ಕರಾನಾ ಕ್ಹಾರಾ ಕಾಮೊಮಾ ಕ್ಹುದಾ ತಾರಾ ಕ್ಹಾತೆ ಛೆ. 23 ತಿನಾಹುತಿ ತು ಮನೆ ಬಿ ಮಾರಾ ಬಚ್ಚಾವೊನೆ ಮರಿ ಸಂತತಿನೆ ಅನ್ಯಾಯ ಕರ‍್ಯಾವಾಚಿ ಮಿ ತುನೆ ಚೊಕು ಕರನಿಂಗತಜ಼಼ ಮನೆ ಬಿ ತು ಆ ರ‍್ಹಯಲ ದೆಶನೆ ಬಿ ಚೊ಼ಕು ಕರುಸ ಕೈನ ಕ್ಹುದಾನಾ ಉಪ್ಪರ ಕ್ಹಮ್ಮ ಘಾಲು ಕೈನ ಕದ್ಯೊ. 24 ತಿನಾಹುತಿ ಅಬ್ರಹಾಮ 'ತಿಮ್ಮಜ" ಕ್ಹಮ್ಮ ಘಾಲುಸ ಕದ್ಯೊ. 25 ಅಬಿಮೆಲೆಕನಾ ಆಳೊ ಐನ ಇರನೆ ಜ಼ಬರದಸ್ತಿ ಕರಿನ ಸ್ವಾದಿನ ಕರಲಿದಲಕ್ಹು ಅಬ್ರಹಾಮ ಅಬಿಮೆಲೆಕನಾ ಉಪ್ಪರ ತಪ್ಪ ಘಾಲಾನಾ ಹುತಿ. 26 ಅಬಿಮೆಲೆಕ, 'ಆ ಕಾಮ ಕರಲವಾಲಾ ಕುನ್ನ ವ್ಹೈ ಮನೆ ಗ್ವತ ನತ್ತಿ; ತು ಮನೆ ತಿಳಸಾಯೊ ಬಿ ನೈ ವರಿ ಹಜಿ಼ ಮಟಾ ಬಿ ಮಿ ಆ ಸಂಗತಿಯೊನೆ ಐಕ್ಯೊ ಬಿ ನತ್ತಿ" ಕದ್ಯೊ. 27 ತಿ ಥಯಲ್ಪರ ಅಬ್ರಹಾಮ ಬೈಲೊ-ಬಕ್ರಿಯೊನೆ ಅಬಿಮೆಲೆಕನೆ ದಾನ ಕರ‍್ಯೊ. 28 ಪಾಚ಼ಲ್ತೊ ಅಬ್ರಹಾಮ ಹಿಂಡನಾ ಕ್ಹಾತ ಹೆಣ್ಣ ಬಕ್ರಿಯೊನ ಬಚ್ಚಾವೊನೆ ಪ್ರತ್ಯೆಕಮಾ ಹುಬ್ರಾಡಲಕ್ಹು, 29 ಅಬಿಮೆಲೆಕ ಅಬ್ರಹಾಮನೆ 'ತು ಎ ಕ್ಹಾತ ಹೆಣ್ಣ ಬಕ್ರಿಯೊನಾ ಬಚ್ಚಾ಼ವೊನೆ ಪ್ರತ್ಯೆಕಮಾ ಹುಬ್ರಾಡಲ ಕಾರಣ ಸು ವ್ಹೈ?" ಕೈನ ಪುಚ್ಯೊ. 30 ತಿನಾಹುತಿ ಅಬ್ರಹಾಮ, ಎ ಇರನೆ ಖಂದಾಯಲವಾಲೊ ಮಿಜ಼ ವ್ಹೈ ಕೈನ ಕವಾನೆ ತು ಎ ಕ್ಹಾತ ಹೆಣ್ಣ ಬಕ್ರಿಯೊನ ಬಚ್ಚಾ಼ವೊನೆ ಮಾರಾ ಹತಮಾತೊ ಕಾಳ್ಯು" ಕೈನ, ತ್ಯುನೆ ಭಂಬಿಜ಼ನಾ ಒಡಂಬಡಿಕೆ ಕರಲಿದ್ಯಾ. 31 ತ್ಯುನೆ ಭಂಬಿಜ಼ನಾ ತ್ಯಾ ಕ್ಹಮ್ಮ ಘಾಲಲ ಕ್ಹು ತೆ ಜ಼ಗಾನೆ 'ಬೆರ್ಷೆಬ" ಕವಾನು ನಮ ಪಡ್ಯು. 32 ಬೆರ್ಷೆಬಮಾ ತ್ಯುನೆ ಒಡಂಬಡಿಕೆ ಕರಲಿದಲ ಥಯಲ್ಪರ ಅಬಿಮೆಲೆಕ ತಿನೆ ಸೆನಾದಿಪತಿ ಥಯಲ ಫಿಕೊಲ ಫಿಲಿಷ್ಟಿಯರೊನಾ ದೆಶೆ ಪಾಚೊ಼ ಫರಿನ ಗೈಪಡ್ಯಾ. 33 ಅಬ್ರಹಾಮ ಬೆರ್ಷೆಬಮಾ ತಮರಿಸ್ಕನು ಝಾಡ ಘಾಲಿನ ತ್ಯಾ ಹಮೆಶಾಬಿ ರ‍್ಹವಾನು ಯಹೊವಾನು ನಾಮ ಕೈನ ಆರಾಧನಾ ಕರ‍್ಯೊ. 34 ಅಬ್ರಹಾಮ ಫಿಲಿಷ್ಟಿಯೊನಾ ದೆಶಮಾ ಘನ್ನಾ ದಿನ್ನ ಲಕ್ಕಾ ವ್ಹತೊ.