Atos 3

Ukupola kwa mulemale

1 Isiku limo u Pitala nu Yohani bakabukagha ku nyumba ya Chala, pakabalilo ka kwiputa muma fili okoloko pamasuba. 2 Po umundu yumo yo akapapiwa mulemale ukufuma mo akapapiliwa, akanyamuliwagha akabalilo kosi nukubikiwa pa mulyango wa Nyumba ya Chala gho bakati Mwisa, ukuti asume ifyabupe ku bandu bo bakwingila mu Nyumba ya Chala. 3 Bo amutesya u Pitala nu Yohani bakwingila mu Nyumba ya Chala, akabasuma ukuti bamupeko chimo. 4 Po u Pitala nu Yohani bakamulolelesya, po u Pitala akamubusya akati, "Tutesye utwe." 5 Po umundu yula akabalolelesya nukusubila ukuti pamo tapokele chimo kukwabo. 6 Loli u Pitala akamubusya akati, isiliva nu golide fyo ndenafyo, loli fyo indi nafyo fyo ngukupa, mwilita lya Yesu Kilisitu uwa mu Nazaleti nyamuka endagha." 7 Po akamukola ninyobe yake indilo nukumunyamusya, papapo na papapo inyayo nu tupulung’unyu fikaba namaka. 8 Umwene akanyela nukwimilila, akanda pakwenda, nukwingila nabo poka mu Nyumba ya Chala bo akwenda nukunyela nyela, nu kumupala u Chala. 9 Bo abandu bosi bakumutesya akwenda nukumupala u Chala, 10 bakamumanya ukuti weyo akikalagha pa Mulyango Umwisa uwa Nyumba ya Chala nukusuma suma. Bosi bakaswigha ngani, nukusukumila pacho chikabombiwa ku mundu yula.