1 Ído̱ Isaák neꞌne xi̱ꞌñú guéño máꞌ ñajuun, jamí nánguá ifrigu̱u̱, a̱ꞌkhue̱n mbá mbiꞌi niꞌthúu̱n Esaú, a̱dée̱ tsí nikhi̱i̱:

—A̱ꞌdéꞌ, Esaú.

Xómáꞌ ikhaa̱ niriꞌña̱a̱:

—Ge̱jioꞌ máꞌ xtáá, táa̱.

2 A̱ꞌkhue̱n niꞌthán Isaák:

—Nathayáá máꞌ rí xi̱ꞌñú guéño ñaju̱nꞌlo̱ꞌ, jamí tsíyo̱lo̱ꞌ náá mbiꞌi gájáñu̱ꞌ. 3 Ikhaa jngó xúge̱ꞌ rá, ada xkamídáaꞌ ga̱jma̱á xkuíyu̱u̱ xkamídá. Ayu xanáá gátha̱ꞌyáa mbáa xu̱kú-xáná, jamí aya̱a̱ꞌ ꞌcháa̱ꞌ. 4 Jamí athane̱ májáa̱nꞌ ganitsu xóo rí na̱ni̱gu̱ꞌ, xúꞌkhue̱n máꞌ aya̱ ꞌcháa ne̱ rí me̱ꞌkholo̱ꞌ. Ikhaa jngó ma̱ne̱ tsakun-rámáá rí xóó máꞌ tsíjáñu̱ꞌ.

5 Xómáꞌ Rebéka̱ nidxawuun rí Isaák nandxákuun ga̱jma̱á Esaú. A̱ꞌkhue̱n rí ni̱ka̱ Esaú xanáá gáꞌyáa xu̱kú-xáná tsí waꞌtháa̱n ma̱ꞌkha̱ jayáa̱. 6 A̱ꞌkhue̱n Rebéka̱ niꞌthúun Jakób:

—Atadxawíín rí xúge̱ꞌ, ikhúúnꞌ ni̱dxawuun rí nindxákuun ana̱a̱ꞌ ga̱jma̱á dxíya̱a̱ꞌ Esaú, rí niꞌthúu̱n xáꞌnii: 7 "Ayu gátha̱ꞌyáa mbáa xu̱kú-xáná, jamí athane̱ májáa̱nꞌ mbá ganitsu rí me̱ꞌkholo̱ꞌ, a̱ꞌkhue̱n rí ma̱ne̱ tsakun-rámáá inuu Ana̱ꞌlóꞌ Mikhuíí rí xóó máꞌ tsíjáñu̱ꞌ". 8 Ikhaa jngó xúge̱ꞌ rá, a̱ꞌdéꞌ, a̱tse̱mbáníí rí ma̱tha̱a̱nꞌ, jamí rí ma̱xna̱-ñájuaanꞌ rí ma̱tha̱ne̱. 9 Ayu xúge̱ꞌ ná gatiin xu̱kú, jamí aya̱ xtiin a̱jmi̱i̱ i̱jín-tsútúún tsí i̱tha̱n májíin, ikhaa jngó ma̱ne̱ májíi̱n mbá ganitsu rí me̱kho̱ ana̱a̱ꞌ, mbá xóo rí na̱ni̱gu̱u̱ꞌ jayuu̱ ikhaa̱. 10 A̱ꞌkhue̱n rí ikháán mi̱dxu̱ꞌ ꞌcháa ne̱ inuu ana̱a̱ꞌ rí me̱kho̱, ikhaa jngó ma̱ꞌne tsakun-rámaa̱ rí xóó máꞌ tsíjáñuu̱.

11 Xómáꞌ Jakób niꞌthúun ru̱dúu:

—Ká nathayáá máꞌ rí dxíyo̱ꞌ Esaú ñajuun mbáa xa̱bo̱ tsí phú tsa̱wi̱i̱n, xómáꞌ ikhúúnꞌ rá, mirángiu̱ún. 12 Gáꞌne xí maxkajmúú anu̱ꞌ, jamí mba̱ꞌyoo̱ rí na̱ne̱-ndúwaa̱. A̱ꞌkhue̱n rí maxná-múꞌúu̱n, ra̱ꞌkhá-lá rí ma̱ꞌne tsakun-rámúu̱.

13 Xómáꞌ ru̱dúu̱ niriꞌña̱a̱:

—A̱ꞌdéꞌ, ga̱ꞌne máꞌ rí ikhúúnꞌ gágruígú rí mi̱ꞌxná-maꞌáán. I̱ndo̱ó a̱tse̱mbáníí rí na̱tha̱a̱nꞌ, ayu ja gádxídiin tsí na̱tha̱a̱nꞌ.

14 A̱ꞌkhue̱n rí ikhaa̱ ni̱ke̱e̱ gágu̱u̱n, jamí ni̱ꞌkha̱a̱ jagu̱u̱n inuu ru̱dúu̱. Xómáꞌ ru̱dúu̱ neꞌne-mújúu̱n ganitsu, xóo rí na̱ni̱gu̱u̱ꞌ jayuu anu̱u̱. Na̱gu̱ma-mújúun ganitsu rí me̱kho̱ anu̱u̱ Jakób. 15 Xúꞌkhue̱n máꞌ ni̱gu̱wíi̱ xtíñuu Esaú, a̱dée̱ tsí nikhi̱i̱, rí i̱tha̱n máján gíꞌdoo̱ ná guꞌwáá, jamí ikhaa ne̱ nitsuaꞌaa̱n Jakób, a̱dée̱ tsí lájuíin. 16 Mangaa nirogoo̱ ga̱jma̱á xtúún i̱jín-tsútúún ná ñawúun jamí ná aphuu Jakób, ná rí nda̱a̱ tsu̱u̱n. 17 A̱ꞌkhue̱n rí nixnáxu̱u̱ Jakób ganitsu ga̱jma̱á guma rí neꞌne-mújúu̱n.

18 Xómáꞌ ikhaa̱, ni̱ke̱e̱ jayóo̱ ne̱ inuu anu̱u̱, jamí niꞌthúu̱n:

—Táa̱.

Xómáꞌ Isaák niriꞌña̱a̱:

—Jáa̱n rá. Tsáa-lá a̱ꞌdéꞌ ñajuaanꞌ ján rá.

19 A̱ꞌkhue̱n rí Jakób niꞌthúun anu̱u̱:

—Ikhúúnꞌ ñaju̱nꞌ Esaú, a̱ꞌdeáaꞌ tsí ginii. Ne̱ne̱-lá mbánuu xóo rí nirathúnꞌ rá. Na̱tha̱n-jáñaaꞌ rí ma̱raxu̱u̱nꞌ, rí ma̱raꞌún jamí me̱ꞌtso rí nika gáꞌyá xanáá, ikhaa jngó ma̱tha̱ne̱ tsakun-rámúú.

20 A̱ꞌkhue̱n Isaák niraxu̱u̱ a̱dée:

—Xáne rí phú wapha nitaxkamaa̱ róꞌ, a̱ꞌdéꞌ.

Xómáꞌ ikhaa̱ niriꞌña̱a̱:

—Numuu rí Ana̱ꞌlóꞌ Mikhuíí, tsí Ana̱a̱ꞌ máꞌ, niꞌnii̱ rí ma̱xkamaa̱ wapha.

21 A̱ꞌkhue̱n Isaák iꞌthúun Jakób:

—Ataxúꞌma-mina̱ꞌ tháan, a̱ꞌdéꞌ, ikhaa jngó ma̱goo ma̱xkajmáá mba̱yo̱o̱ xí rí a̱ꞌdéꞌ Esaú ñajuaanꞌ, o ra̱ꞌkháa máꞌ mbo̱ꞌ.

22 A̱ꞌkhue̱n rí nixuꞌma-mina̱ꞌ Jakób ná inuu anu̱u̱, xómáꞌ ikhaa̱ nixkajmaa̱, jamí niꞌthée̱n:

—Aꞌwóo Jakób ñajuun rí aꞌwóo̱, i̱ndo̱ó numuu rí ñawúu̱n, ñawúun máꞌ Esaú ñajuun ne̱.

23 Xkuaꞌnii táꞌne-nuwii̱n, numuu rí ñawúu̱n phú tsu̱u̱n xómá ñawúun Esaú, ikhaa jngó ndiyoo̱ máꞌ gáꞌne tsakun-rámaa̱. 24 I̱ndo̱ó numuu rí niraxu̱u̱ xóó:

—Á gakon rí a̱ꞌdéꞌ Esaú ñajuaanꞌ rá.

Xómáꞌ Jakób niriꞌña̱a̱:

—Aan, ikhúúnꞌlo̱ꞌ.

25 A̱ꞌkhue̱n Isaák niꞌthán:

—Aya̱ ꞌcháa ne̱ mijngi, jamí me̱ꞌkho rí nidxu̱ꞌ gátha̱ꞌyá xanáá, ikhaa jngó ma̱ne̱ tsakun-rámáálo̱ꞌ.

A̱ꞌkhue̱n rí nixuꞌma ne̱ Jakób, jamí nikueꞌtso anu̱u̱. Mangaa ni̱ꞌkha̱ jayóo̱ iyoo úba̱ rí ni̱ga̱yu̱u̱ꞌ, jamí niꞌña̱a̱ anu̱u̱. 26 A̱ꞌkhue̱n niꞌthán anu̱u̱:

—Ataxúꞌma-mina̱ꞌ ná inu̱ꞌ a̱ꞌdéꞌ, jamí atraꞌnu̱ꞌ tháan. Isaák naꞌne tsakun-rámaa Jakób.

27 A̱ꞌkhue̱n rí Jakób nixuꞌma-mina̱ꞌ, xúꞌkhue̱n máꞌ niraꞌnuu̱ inuu anu̱u̱. Xómáꞌ Isaák ndiyá xu̱u̱ꞌ xtíñuu̱, jamí neꞌne tsakun-rámaa̱ rí niꞌthée̱n ajngáa ríge̱ꞌ:

«Jéén-lá, ndaa thawiin a̱ꞌdéꞌ,

asndo xóo ndaa thawuun xanáá, rí neꞌne tsakun-rámuu Ana̱ꞌlóꞌ Mikhuíí.

28 Ana̱ꞌlóꞌ gáxnáaꞌ ruꞌwa rí na̱ꞌkha̱ ná mikhu,

xúꞌkhue̱n máꞌ mbá xúgíí rí najma̱a̱ inuu ju̱ba̱ꞌ,

jamí gaxnáa̱ꞌ mi̱ndaꞌkho ixí iña ga̱jma̱á máꞌ iyoo úba̱.

29 Ga̱nindxu̱ún yumbiáaꞌ xa̱bo̱ mbaꞌa xuajen,

jamí xúgíin xa̱bo̱ xuajen mba̱ꞌo̱ a̱gu̱sma̱ti̱gúún inaaꞌ.

Arathán-ñájúún ikháán a̱ngia̱a̱nꞌ,

jamí a̱gu̱sma̱ti̱gúún i̱ji̱i̱n ru̱dáaꞌ inaaꞌ.

Gi̱ꞌxná-máꞌíin tsí nuxna-maꞌáán,

jamí ga̱gu̱ma-tsakun-rámii tsí máján ithan numaaꞌ».

30 Ído̱ rí inu máꞌ wámbo̱o̱ Isaák rí neꞌne tsakun-rámaa̱ Jakób, jamí níkhú jayu nigájna̱a̱ Jakób inuu anu̱u̱, a̱ꞌkhue̱n ni̱ga̱núu̱ Esaú rí ni̱ka̱ gáꞌyáa xu̱kú-xáná. 31 Xúꞌkhue̱n máꞌ mangaa̱ neꞌne-mújúu̱n ganitsu, jamí ni̱ka̱ jayóo̱ ne̱ inuu anu̱u̱. A̱ꞌkhue̱n niꞌthúu̱n:

—Araxu̱u̱nꞌ rá, táa̱, rí me̱ꞌtso rí nika gáꞌyá xanáá rá, ikhaa jngó ma̱tha̱ne̱ tsakun-rámúú.

32 A̱ꞌkhue̱n Isaák niraxe̱:

—Tsáa-lá ñajuaanꞌ ján rá.

Xómáꞌ ikhaa̱ niriꞌña̱a̱:

—Ikhúúnꞌ ñaju̱nꞌ Esaú, a̱ꞌdeáaꞌ tsí ginii.

33 A̱ꞌkhue̱n rí Isaák maphú gakhe̱ niguaꞌaa̱n jamí niꞌthée̱n:

—Tsáa-lá ñajuun tsí ni̱ꞌkha̱ máꞌ ge̱jioꞌ, jamí ni̱ꞌkha̱ jayóo̱ ganitsu-xáná, rí nixníꞌ nikho ne̱ mbá xúgíí, rí inu máꞌ ma̱dxa̱ꞌnúu̱ꞌ ikháán rá. Xómáꞌ ikhúúnꞌ ne̱ne̱ tsakun-rámaa̱, jamí gakon rí ma̱gu̱ma-tsakun-rámaa̱.

34 Ído̱ rí Esaú nidxawuun ajngóo anu̱u̱, phú gakhe̱ nindxaꞌwá-skee̱ jamí ra̱ꞌkhá-tháán natájuíin a̱kui̱i̱n. A̱ꞌkhue̱n niꞌthúu̱n anu̱u̱:

—Athane̱ tsakun-rámúú tháan mangúún, táa̱.

35 A̱ꞌkhue̱n Isaák niꞌthúu̱n:

—Ni̱ꞌkha̱ dxíya̱a̱ꞌ neꞌne-nduwúún, jamí ikhaa̱ ni̱grui̱guíi̱ rí jaꞌyoo ma̱gu̱ma-tsakun-rámáá ikháán.

36 Xómáꞌ Esaú niriꞌña̱a̱:

—Áa̱n, ikhaa jngó neꞌne mbiꞌyuu̱ Jakób* jno̱ꞌ. Tiriajma̱ máꞌ nothon rí naꞌne-nduwúu̱n. Nirígú-jáꞌyéꞌ rí xa̱bo̱ ginii ñaju̱nꞌ, jamí xúge̱ꞌ rá, narígú-jáꞌyéꞌ rí ma̱gu̱ma-tsakun-rámúú. —A̱ꞌkhue̱n niꞌthée̱n xóó—: Á nánguá niwanúu tháan rí ma̱tha̱ne̱ tsakun-rámúú ikhúúnꞌ rá dxe̱ꞌ.

37 A̱ꞌkhue̱n Isaák niriꞌña̱a̱ ajngóo Esaú:

—Nángí ni̱ꞌgíi̱ꞌlo̱ꞌ rí maꞌthán-ñájuaa̱nꞌ, xúꞌkhue̱n máꞌ xúgíin dxíyo̱o̱ ma̱nindxu̱ún yumbée̱, jamí mangaa ni̱tha̱n rí ma̱gi̱ꞌdoo̱ ixí iña ga̱jma̱á máꞌ iyoo úba̱. Xómáꞌ ikháán rá, a̱ꞌdéꞌ, náá-lá rí gáne̱ ga̱jma̱á nindxa̱a̱ꞌ ján rá.

38 A̱ꞌkhue̱n Esaú niꞌthúun xóó anu̱u̱:

—Á phú mbóó rí xtaꞌdáá rí ma̱tha̱ne̱ tsakun-ráma jngó rá dxe̱ꞌ, táa̱. Athane̱ tsakun-rámúú tháan mangúún, táa̱.

A̱ꞌkhue̱n rí nigíꞌdu̱u̱ Esaú ni̱mbi̱ya̱ꞌ gakhe̱. 39 A̱ꞌkhue̱n Isaák niꞌthúu̱n:

«Athayáá rí xúge̱ꞌ ma̱ra̱xtaa tsíngua̱ꞌ ná inuu ju̱ba̱ꞌ rí máján,

xúꞌkhue̱n máꞌ ná na̱ga̱taa ruꞌwa mikhu.

40 Ga̱jma̱á chídia̱aꞌ ma̱thiambá-mina̱ꞌ,

jamí ma̱nindxa̱a̱ꞌ yumbáá inuu dxíya̱a̱ꞌ.

Ído̱ gága̱nú mbiꞌi rí mbi̱ya̱ ski̱ya̱a̱ꞌ,

a̱ꞌkhue̱n ma̱trígúu̱ ná rixa̱a̱ꞌ ixu̱u̱ xkandajoo̱ rí natiumbá-rámaaꞌ».

41 A̱ꞌkhue̱n rí Esaú níyoo gáꞌyoo Jakób ga̱jma̱á numuu rí ni̱gu̱ma-tsakun-rámaa̱ neꞌne anu̱u̱. Ikhaa jngó Esaú nindxaꞌwá-mina̱ꞌ: «Ma̱ga̱nú mbiꞌi rí ma̱ja̱ñúu anu̱ꞌ. Ído̱ ágánújngoo gaꞌkho̱, a̱ꞌkhue̱n rí ma̱xíya̱a̱ dxíyo̱ꞌ Jakób». 42 Ído̱ rí waꞌtháán Rebéka̱ ajngáa rawuun Esaú, a̱dée̱ máꞌ tsí nikhi̱i̱, xómáꞌ ikhaa̱ nindxaꞌwáa̱, Jakób, a̱dée̱ tsí lájuíin, jamí niꞌthúu̱n:

—Athadxuun-lá rá, rí dxíya̱a̱ꞌ Esaú naꞌni̱i̱ a̱kui̱i̱n, numuu rí naꞌgí-mine̱e̱ꞌ rí maxíñaa̱, méꞌ. 43 Ikhaa jngó xúge̱ꞌ rá, a̱ꞌdéꞌ, a̱tse̱mbáníí rí ma̱tha̱a̱nꞌ. Atagáyaaꞌ xúge̱ꞌ jamí ayu ná goꞌóo dxáju̱ꞌ Labán, ná Arán. 44 Araxtaa ga̱jma̱a̱ꞌ nguátha̱ máꞌ mbiꞌi, asndo náá gáxríguu̱ a̱kui̱i̱n dxíya̱a̱ꞌ rí najiꞌnáa. 45 Asndo gágáꞌni̱i̱ máján wáa a̱kui̱i̱n jaꞌyaaꞌ, jamí ma̱mbumuu̱ wáa rí nithaníi̱, a̱ꞌkhue̱n rí ikhúúnꞌ ma̱ndxa̱ꞌwa̱a̱ꞌlo̱ꞌ rí mi̱dxa̱a̱ꞌ ge̱e̱. Déjngó-lá gándáti̱go̱ꞌ ná-a̱jmaa̱ꞌlaꞌ, rí mbóó mbiꞌi rá.

46 A̱ꞌkhue̱n rí Rebéka̱ niꞌthúun Isaák:

—Tsigajmá ríga̱ ná awúun a̱kui̱nꞌ jún rá, ga̱jma̱á numúú go̱ꞌo̱ tsíge̱ꞌ i̱ji̱ín mbo̱ Ét. Xí Jakób gáyáa mbáa a̱ꞌgo̱ i̱ji̱ín mbo̱ Ét, mbo̱ máꞌ júwa̱ꞌ ná mbaa ríge̱ꞌ, náá-lá numuu jngó gáxtáá xóó xúꞌkhue̱n rá.