Gênesis 47

Jakób na̱ka̱ inuu Faraón

1 A̱ꞌkhue̱n rí ni̱ka̱ José gágáꞌthúun Faraón:

—Anu̱ꞌ jamí dxíyo̱ꞌ xúꞌkhue̱n máꞌ gajmíi̱ moguíi̱n jamí xedíi̱n, ga̱jma̱á mbá xúgíí rí kuaꞌdáa̱, niguwée̱ꞌ asndo ná mbaa Kanaán. Jamí niguáꞌníi̱ máꞌ xúge̱ꞌ ná mbaa Gosén rá.

2 Wapha máꞌ niraꞌwíi̱n mbá witsuun dxíyo̱o̱, ikhaa jngó tsúꞌkhue̱n ni̱ka̱ jagu̱u̱n inuu Faraón. 3 A̱ꞌkhue̱n rí Faraón niraxúu̱n:

—Náá rí ñajun rí no̱ne̱laꞌ róꞌ.

Xómáꞌ ikhii̱n ni̱ri̱ꞌñaa̱:

—Waxtú mogo̱ ñajúún yumbiáaꞌ, táta̱, xómáꞌ rí ninindxu̱ún xíña-xi̱ꞌñáxo̱ꞌ manguiin. 4 —Nitháa̱n xóó Faraón—: Nagúwa̱ꞌxo̱ꞌ rí ma̱juwaxo̱ꞌ ná mbaa ríge̱ꞌ, numuu rí nda̱a̱ ni xí tháan ra̱xa̱ rí mo̱pho̱ xu̱kuíín yumbiáaꞌ, xúꞌkhue̱n máꞌ ewe rí phú gakhe̱ ri̱ga̱ ná mbaa Kanaán. Ikhaa jngó, phú nu̱tha̱n-jáñaaꞌxo̱ꞌ xúge̱ꞌ rí ma̱ta̱tsi̱ꞌñúú yumbiáaꞌ ma̱ju̱wá ná mbaa Gosén.

5 A̱ꞌkhue̱n Faraón niꞌthúun José:

—Ana̱a̱ꞌ jamí a̱ngia̱a̱nꞌ niguwá ná xtaa xúge̱ꞌ, 6 ikhaa jngó mbaa Ejípto̱ ri̱ga̱ máꞌ ná ñawáanꞌ ikháán. Ná rí i̱tha̱n máján, ikhín gátha̱ne̱ rí ma̱xtáa ana̱a̱ꞌ jamí a̱ngia̱a̱nꞌ. Ga̱ju̱wée̱ꞌ máꞌ ná mbaa Gosén rámá. Jamí xí nathayáá rí júwá xa̱bo̱ tsí na̱ma̱ñúú none̱ ñajun, ataskuíji̱i̱n rí mu̱ña̱wúu̱n tháan xu̱kuíꞌ mangúún.

7 Xúꞌkhue̱n máꞌ mangaa, José ni̱ka̱ jayáa̱ anu̱u̱ inuu Faraón. Xómáꞌ Jakób niraxi̱i̱ ga̱jma̱á gamaku. 8 A̱ꞌkhue̱n Faraón niraxu̱u̱ Jakób:

—Nguátha̱ tsiguaaꞌ róꞌ, táta̱.

9 A̱ꞌkhue̱n Jakób niriꞌña̱a̱ ajngóo Faraón:

—Tsigu rí xtáá-rangroꞌo̱ꞌ ñajuun mbá majuun skíñú gu̱wa̱ꞌ (130) tsigu. Phú ra̱mbáa jamí ra̱máján wáa mbiꞌi rí nixtáá, jamí xóó tséꞌngo̱ꞌ ma̱jrúꞌúún tsigu rí xóo nigóó-rajúwa̱ꞌ xi̱ꞌñúꞌ wajiúú.

10 Nda̱wa̱á a̱ꞌkhue̱n Jakób niꞌthán-ngawoo Faraón ga̱jma̱á gamaku, a̱ꞌkhue̱n nigájna̱a̱ ni̱ka̱a̱. 11 Xkuaꞌnii jngó José neꞌne rí ma̱ri̱gá ná ma̱xtáa anu̱u̱ jamí a̱ngui̱i̱n. Nixnúu̱ máꞌ mbaa rí ma̱ꞌne mbañúu̱ ná rí ma̱ju̱wée̱ꞌ ná Ejípto̱, rí i̱tha̱n máján ná Ramesés, xómáꞌ nixná-ñájun Faraón. 12 Xómáꞌ José naxnúu ganitsu anu̱u̱ jamí a̱ngui̱i̱n, mbá xúgíin máꞌ xa̱bo̱ ná goꞌóo anu̱u̱, mbá xóo rí kíxnuu máꞌ i̱jíi̱n.

José i̱ngu̱jua̱ rí mo̱pho̱ xa̱bo̱

13 Nda̱a̱ xí tháan ganitsu mbá xúgíí numbaa rúꞌkhue̱n, jamí ewe phú gakhe̱ ri̱ga̱. Ná Ejípto̱ ga̱jma̱á mbaa Kanaán phú níꞌngu̱ún xa̱bo̱ rí na̱xki̱dxu̱ún. 14 Xómáꞌ José neꞌne ꞌnduu̱ꞌ mbá xúgíí mbúkha̱a̱ rí ríga̱ ná mbaa Ejípto̱ jamí Kanaán, ga̱jma̱á numuu ganitsu rí nune̱-numáa̱. A̱ꞌkhue̱n ni̱gu̱xi̱i̱ mbúkha̱a̱ rúꞌkhue̱n ná goꞌóo Faraón. 15 Ído̱ wámba̱ mbúkha̱a̱ ná mbaa Ejípto̱ jamí Kanaán rá, a̱ꞌkhue̱n niguwá mbá xúgíin xa̱bo̱ Ejípto̱ inuu José, jamí nitháa̱n:

—Araxnáxo̱ꞌ tháan rí mo̱phóxo̱ꞌ. Á numuu rí nánguá mbúkha̱ꞌxo̱ꞌ jngó ma̱tha̱tsi̱ꞌñáxo̱ꞌ rí ma̱ja̱ñáxo̱ꞌ rá dxe̱ꞌ.

16 A̱ꞌkhue̱n niriꞌña̱a̱ José ajngúu̱n:

—Xí wámba̱ mbúkha̱ꞌlaꞌ, gu̱xni̱i̱laꞌ xu̱kiálaꞌ. Xómáꞌ ikhúúnꞌ ma̱riꞌkhu-raꞌa ganitsu ga̱jma̱á numúu̱.

17 A̱ꞌkhue̱n niguwée̱ꞌ judii̱n xu̱kuíi̱n inuu José. Xómáꞌ José niriꞌkhu-raꞌa ganitsu ga̱jma̱á numúú guáyo̱, mogo̱, xede̱ ga̱jma̱á xtá-ngidi. Xkuaꞌnii neꞌne José rí nixnúu̱ rí mo̱pho̱ xa̱bo̱ jañii tsigu rúꞌkhue̱n ga̱jma̱á numúú xu̱kuíi̱n. 18 Ído̱ ninújngoo tsigu rúꞌkhue̱n, niguwée̱ꞌ gútháa̱n José tsigu rí riajmu̱u̱:

—Tsírkaꞌwííxo̱ꞌ inaaꞌ, táta̱. Wámba̱ mbúkha̱ꞌxo̱ꞌ, jamí xúgíin tsí ñajúún xu̱kiáxo̱ꞌ júwa̱ꞌ máꞌ ná ñawáanꞌ ikháán. Ná-nda̱a̱ nitháan rí mu̱xna̱a̱ꞌxo̱ꞌ rá, táta̱, i̱ndo̱ó mbá xóo rí ikháa̱nꞌxo̱ꞌ jamí mbayaxo̱ꞌ. 19 Nda̱a̱-lá numuu jngó ma̱ta̱tsi̱ꞌñáá rí ma̱ja̱ñáxo̱ꞌ jamí ma̱ꞌne chúu mbayaxo̱ꞌ rá. Aratsiáa̱nꞌxo̱ꞌ xúꞌkhue̱n máꞌ mbayaxo̱ꞌ, ga̱jma̱á numuu rí ma̱ra̱xna̱ꞌxo̱ꞌ ganitsu. A̱ꞌkhue̱n rí ma̱nindxa̱ꞌxo̱ꞌ yumbée Faraón xúꞌkhue̱n máꞌ mbayaxo̱ꞌ. Araxnáxo̱ꞌ rí mu̱dúu̱xo̱ꞌ, ikhaa jngó ma̱xájáñaxo̱ꞌ, ni máꞌ ma̱xáwanúu chúu mbayaxo̱ꞌ.

20 A̱ꞌkhue̱n rí José neꞌtse̱ mbá xúgíí mbaa ná Ejípto̱, rí ma̱ꞌne mbayuu Faraón. Mbámbáa máꞌ xa̱bo̱ Ejípto̱ ni̱ngu̱jua̱ mbayuu, numuu rí ewe phú gakhe̱ iꞌñúu̱. Xkuaꞌnii neꞌne jngó mbañúu̱ ninújnga̱a̱ꞌ ñawúun Faraón. 21 A̱ꞌkhue̱n rí mbá jndi rawuun numbaa Ejípto̱ wa̱tsu̱diin xa̱bo̱ rí ma̱guwáa̱nꞌ ná xuajen mba̱ꞌo̱.*47.21 Ríga̱ iꞌwá i̱yi̱i̱ꞌ ebréo̱ rí wayuu ná naꞌthán «mbá xúgíin xa̱bo̱ ninindxu̱ún yumbáá». 22 I̱ndo̱ó mbañúú dxakuun táꞌtsi̱i̱. Numuu rí tsí dxakuun najanúú máꞌ rí naꞌpho̱ eꞌne Faraón, ikhaa jngó táꞌñúu̱ rí ma̱ngo̱jue̱e̱ mbañúu̱.

23 A̱ꞌkhue̱n rí José niꞌthúún xa̱bo̱ xuajen:

—Ndu̱yáá-málaꞌ xúge̱ꞌ rá, ni̱tsiáa̱nꞌlaꞌ ikháa̱nꞌlaꞌ jamí mbayalaꞌ, rí ma̱nindxa̱ꞌlaꞌ drígo̱o̱ Faraón. Ge̱jioꞌ ríga̱ tsíga rá. A̱gu̱duu̱laꞌ ne̱ inuu ju̱ba̱ꞌ. 24 Ído̱ gájma̱a̱ rí mu̱dulaꞌ, mu̱xna̱xíi̱laꞌ magu̱u̱ Faraón mbóó awúun rí mbámbá witsu rí najma̱a̱. Rí i̱mba̱á akho̱ ma̱ꞌne rí mi̱ꞌduu̱ inuu ju̱ba̱ꞌ, jamí rí mo̱pholaꞌ ikháa̱nꞌlaꞌ, jamí xa̱bia̱ꞌlaꞌ, xúꞌkhue̱n máꞌ i̱jia̱nꞌlaꞌ.

25 A̱ꞌkhue̱n rí ikhii̱n ni̱ri̱ꞌñaa̱:

—Phú máján a̱kia̱a̱nꞌ rí nithane̱-jáwiáa̱nꞌxo̱ꞌ, táta̱. Ga̱nindxa̱ꞌ máxo̱ꞌ yumbée Faraón rámá.

26 A̱ꞌkhue̱n rí José niꞌgí nakhúu xtángoo rí ri̱ga̱ máꞌ asndo xúge̱ꞌ ná mbaa Ejípto̱, rí naꞌthée̱n rí ma̱grui̱gúu̱ Faraón mbóó awúun rí mbámbá witsu rí najma̱a̱. I̱ndo̱ó ná mbañúú dxakuun tsígrui̱gúu̱ ne̱, numuu rí táꞌne máꞌ mbayuu Faraón.

Jakób na̱nda̱ꞌa̱ rí ma̱xíꞌdi̱i ná Ejípto̱

27 A̱ꞌkhue̱n rí xa̱bo̱ Israél nijúwá máꞌ ná mbayuu Ejípto̱, ná mbaa Gosén. Ikhín máꞌ neꞌne mbañúu̱, xúꞌkhue̱n máꞌ phú ni̱mi̱diúu̱n neꞌne mbaꞌii̱n mi̱ndaꞌkho. 28 Jakób nixtáa ná mbaa Ejípto̱ mbá gu̱wa̱ꞌ-nítsu i̱jma̱ tsigu. Jamí xúgíí tsigu rí nixtáa Jakób neꞌne mbá juan skíñú i̱jua̱n (147) tsigu. 29 Jamí ído̱ nangiyuu máꞌ mbiꞌi rí ma̱ja̱ñúu Israél, a̱ꞌkhue̱n nindxaꞌwóo̱ José, jamí niꞌthúu̱n:

—Xí rí phú naꞌne a̱kia̱a̱nꞌ xtayo̱ꞌ, na̱tha̱n-jáñaaꞌ rí ma̱tha̱gída̱ꞌ tháan ñawáanꞌ ná agoo sndi̱yu̱ꞌ ge̱e̱, jamí ma̱ta̱xu̱ꞌdá-mina̱ꞌ rí ma̱tha̱ne̱ rí ma̱tha̱a̱nꞌ. Phú na̱nda̱ꞌa̱a̱ꞌ rí ma̱xátha̱dúu̱n ná Ejípto̱. 30 Ído̱ ma̱ja̱ñúꞌlo̱ꞌ rí ma̱mba̱xíi̱ꞌ gajmíꞌ wa̱jen a̱ngui̱nꞌ, ma̱tríñu̱ú ná Ejípto̱, jamí ma̱tha̱dúu̱n ná iñá-wa̱jiúu̱n máꞌ ikhii̱n.

A̱ꞌkhue̱n niriꞌña̱a̱ José:

—Ma̱ne̱ mbá xóo rí narathán máꞌ, táa̱.

31 A̱ꞌkhue̱n rí Israél niꞌthán:

—Ataxúda-mina̱ꞌ.

Xómáꞌ José nixuda-mina̱ꞌ. A̱ꞌkhue̱n rí Israél ni̱rnga̱du̱u̱n ná idxu̱u̱ xi̱yawoo̱, rí neꞌne-mba̱a̱ Ana̱ꞌlóꞌ.