1 A̱ꞌkhue̱n rí José ndiyá-raꞌaa̱ anu̱u̱, jamí ni̱mbi̱ye̱e̱ꞌ-jmaa̱, xúꞌkhue̱n máꞌ niraꞌnuu̱ inuu. 2 Nda̱wa̱á a̱ꞌkhue̱n nixná-ñájúu̱n xa̱bo̱ thana tsí nitimbáyí-jmáa̱ rí mone̱ thanáá xuyuu anu̱u̱ rí ma̱xíga wapha. Xómáꞌ xa̱bo̱ tsúꞌkhue̱n nene̱ thanáá Israél. 3 A̱ꞌkhue̱n nene̱ gáxíi̱ a̱jma̱ skíñú (40) mbiꞌi, numuu rí xkuaꞌnii na̱ga̱nú mbiꞌi rí nuni̱i̱ thanúu̱ wa̱jen. Xómáꞌ xa̱bo̱ Ejípto̱ ni̱mbi̱ya̱ꞌ-jmaa Jakób mbá atsú skíñú gu̱wa̱ꞌ (70) mbiꞌi.

4 Ído̱ rí ninújngoo máꞌ mbiꞌi rí nu̱mbi̱ya̱ꞌ-jmaa̱, a̱ꞌkhue̱n rí José niꞌthúún xa̱bi̱i̱ Faraón:

—A̱gu̱ñu̱ꞌlaꞌ tháan mbá rí máján, a̱gu̱tháánlaꞌ tháan Faraón: 5 "Anu̱ꞌ niꞌñu̱ꞌ rí ma̱xu̱ꞌdá-mina̱ꞌ, rí niꞌthínꞌ xáꞌnii: ‘Atiaxi̱í rí ikhúúnꞌ, xtáá ma̱ja̱ñúꞌlo̱ꞌ. Ná iñá wa̱jen rí ni̱ndilo̱ꞌ ná mbaa Kanaán, ikhín gátha̱du̱ún tháan.’ Ikhaa jngó xúge̱ꞌ rá, na̱tha̱n-jáñaaꞌ rí ma̱ꞌgá gádi̱i̱ tháan anu̱ꞌ, jamí ma̱tangu̱ún-málo̱ꞌ".

6 Xómáꞌ Faraón niꞌthán:

—Ayu máꞌ gátha̱dii̱ ana̱a̱ꞌ, xóo rí niꞌñaa̱ꞌ rí ma̱ta̱xu̱ꞌdá-mina̱ꞌ.

7 A̱ꞌkhue̱n rí José ni̱ka̱ jayáa wa̱jen anu̱u̱ rí ma̱ꞌdii̱, xúꞌkhue̱n máꞌ nigóó mbá xúgíin xa̱bi̱i̱ Faraón ga̱jma̱á nindxu̱u̱, mbá xúgíin máꞌ xa̱buanuu tsí ná goꞌóo̱, jamí mbá xúgíin xa̱buanuu ná mbaa Ejípto̱, 8 jamí mbá xúgíin xa̱bo̱ tsí a̱ngui̱i̱n goꞌóo José, xúꞌkhue̱n máꞌ dxíyo̱o̱, mbá xúgíin máꞌ xa̱bo̱ goꞌóo anu̱u̱. I̱ndo̱ó e̱je̱n ni̱ni̱ñúu̱ꞌ ná mbaa Gosén, xúꞌkhue̱n máꞌ moguíi̱n, xedíi̱n. 9 Mangaa nigóó ga̱jma̱á nindxu̱u̱ ixe̱ rí nu̱xma̱thaa guáyo̱, xúꞌkhue̱n máꞌ xa̱bo̱ tsí tramúú guáyo̱, jamí phú mba̱a̱ kuthúún xa̱bo̱ neꞌne rí nigóó. 10 A̱ꞌkhue̱n rí niguáꞌníi̱ asndo ná Atád, ná rí ni̱tro̱tse̱ ixí iña, rí ꞌgí i̱mba̱ mbéꞌthóo mañuu Jordán. Ikhín nimbáxíi̱nꞌ rí phú mba̱a̱ nidaa a̱kuíi̱n rí ni̱mbi̱ye̱e̱ꞌ jínee̱. Xómáꞌ José mbá juan mbiꞌi nixtáa̱ rí nidaa a̱kui̱i̱n ga̱jma̱á numuu anu̱u̱. 11 Ído̱ ndiyáá xa̱bo̱ Kanaán tsí júwá ná mbaa rúꞌkhue̱n rí nu̱mbi̱ye̱e̱ꞌ ná Atád, nithee̱n: «Ríge̱ꞌ ñajuun rí phú mba̱a̱ xta̱mbi̱ñúú xa̱bo̱ Ejípto̱». Ikhaa jngó ikhín neꞌne mbiꞌyuu ne̱ Abél-misráim, rí ꞌgí i̱mba̱ mbéꞌthóo mañuu Jordán.

12 Xómáꞌ i̱ji̱i̱n Jakób nene̱-mbáníí xómá nixná-ñájun anúu̱ rí muni̱i̱. 13 Nigó juya̱a̱ ná mbaa Kanaán. Nidi̱i̱ ná iñá ná mbaa Makpéla̱, rí ꞌgí ná na̱ꞌkha̱ a̱kha̱ꞌ ná rawuun Mámre̱, iñá rí neꞌtse̱ máꞌ Abraám ga̱jma̱á máꞌ mbayuu, ná ñawúun Efrón mbo̱ Ét, numuu rí ikhaa ne̱ gáꞌne iñá-wa̱jiúu̱n. 14 Nda̱wa̱á ído̱ wámba̱ niꞌdi̱i̱ anu̱u̱ José, a̱ꞌkhue̱n nitanga̱a̱ ná Ejípto̱ gajmíi̱ dxíyo̱o̱, xúꞌkhue̱n máꞌ mbá xúgíin tsí nigóó ga̱jma̱á nindxu̱u̱.

15 Numuu rí nijáñuu máꞌ Jakób rá, a̱ꞌkhue̱n rí nithan dxíyo̱o̱ José: «Gáꞌne xí José ná-xáxóo gáꞌyalóꞌ rá, jamí ma̱ꞌnii̱ rí mo̱ꞌne̱-núma̱a̱ꞌlóꞌ mbá xúgíí rí ra̱máján rí niꞌnii̱lóꞌ». 16 A̱ꞌkhue̱n ni̱xo̱ꞌmee̱ ajngáa inuu José, rí nitháa̱n xáꞌnii: «Ana̱a̱ꞌ niniñuu ajngáa rí inu máꞌ ma̱ja̱ñúu̱ rí mu̱tha̱a̱nꞌxo̱ꞌ: 17 "Xáꞌnii gútha̱ánlaꞌ José: ‘Na̱tha̱n-jáñaaꞌ rí xúge̱ꞌ ma̱tha̱ne̱ mba̱a̱ a̱kia̱a̱nꞌ xtayáá aꞌkhúún dxíya̱a̱ꞌ, numuu rí phú ra̱máján rí niña̱a̱ꞌ.’ " Ikhaa jngó xúge̱ꞌ rá, phú nu̱tha̱n-jáñaaꞌxo̱ꞌ rí ma̱tha̱ne̱ mba̱a̱ a̱kia̱a̱nꞌ xtañúú yumbée Anu̱u̱ ana̱a̱ꞌ rí ra̱máján ni̱ña̱a̱ꞌxo̱ꞌ». Awúun máꞌ rí nutháa̱n rúꞌkhue̱n, ni̱mbi̱ya̱ꞌ José.

18 A̱ꞌkhue̱n rí niguáꞌnú máꞌ dxíyo̱o̱, jamí ni̱sma̱ti̱gúu̱n inuu̱ rí nitháa̱n:

—Ge̱e̱ máꞌ júwa̱ꞌxo̱ꞌ rá, táta̱. Yumbiáaꞌ máꞌ ñajuanxo̱ꞌ.

19 Xómáꞌ José niriꞌña̱a̱:

—Ma̱xáꞌthúun máꞌ a̱kia̱nꞌlaꞌ. Ma̱xáxóo ma̱ne̱-mina̱ꞌlo̱ꞌ xóo Ana̱ꞌlóꞌ jún. 20 Ikháa̱nꞌlaꞌ ni̱ju̱ma̱ꞌlaꞌ rí mu̱ñu̱ꞌlaꞌ rí ra̱máján, xómáꞌ Ana̱ꞌlóꞌ niꞌni̱i̱ ne̱ rí máján. Ikhaa ne̱ ñajuun rí nduꞌyáálóꞌ xúge̱ꞌ rá, rí ndiya̱a̱ mbiꞌñúú mbaꞌiin xa̱bo̱. 21 Ikhaa jngó xúge̱ꞌ rá, ma̱xámíña-málaꞌ. Ikhúúnꞌ máꞌ gáxna̱ꞌlaꞌ rí mo̱pholaꞌ, xúꞌkhue̱n máꞌ i̱jia̱nꞌlaꞌ.

Xkuaꞌnii neꞌne maꞌndáa̱ a̱kui̱ín a̱ngui̱i̱n, rí niꞌthúu̱n ga̱jma̱á ajngáa waba.

22 A̱ꞌkhue̱n rí ni̱ka̱-raxtáa José ná Ejípto̱, xúꞌkhue̱n máꞌ xa̱bo̱ goꞌóo anu̱u̱. Mbá witsu skíñú gu̱wa̱ꞌ (110) tsiguu José neꞌne. 23 A̱ꞌkhue̱n ndiꞌyoo̱ ni̱gu̱mii i̱jín-xíñii-egoo Efraín. Ndiꞌñúu̱ mangiin i̱ji̱i̱n Makír tsí a̱dée máꞌ Manasés, tsí ninindxúu̱n máꞌ asndo xómáꞌ i̱ji̱i̱n*50.23 Ná ajngáa ebréo̱ naꞌthán «nigaꞌnuu̱ ná iduu nakhúu̱». ikhaa José.

24 A̱ꞌkhue̱n rí José niꞌthúún dxíyo̱o̱: «Ikhúúnꞌ ma̱ja̱ñúꞌlo̱ꞌ. I̱ndo̱ó máꞌ rí Ana̱ꞌlóꞌ phú gakon ma̱ꞌkha̱ gámbáyálaꞌ, jamí ma̱ꞌnii̱ rí ma̱ga̱jnáa̱ꞌlaꞌ ná mbaa ríge̱ꞌ, rí mu̱ꞌguaa̱ꞌlaꞌ ná mbaa rí nixuda-mina̱ꞌ Ana̱ꞌlóꞌ rí maxnúu̱ Abraám, ga̱jma̱á Isaák jamí Jakób». 25 José neꞌne rí mu̱xu̱da̱ꞌ-mi̱jna̱ i̱ji̱i̱n Israél, rí niꞌthúu̱n xáꞌnii: «Phú gakon rí ma̱ꞌkha̱ gámbáyálaꞌ Ana̱ꞌlóꞌ, a̱ꞌkhue̱n rí mu̱ri̱ya̱a̱ꞌlaꞌ tháan itsu̱ꞌ ná ge̱e̱, jamí mu̱ꞌgua ju̱ya̱ꞌlaꞌ ne̱».

26 Mbá witsu skíñú gu̱wa̱ꞌ (110) tsiguu José ído̱ rí nijáñuu. A̱ꞌkhue̱n rí nene̱ thanáa̱ xuyuu̱ rí ma̱xíga wapha, xúꞌkhue̱n máꞌ ni̱gi̱wa̱a̱nꞌ awúun mbá e̱jna̱ ná Ejípto̱.