1 Ana̱ꞌlóꞌ neꞌne tsakun-rámaa Noé gajmíí i̱ji̱i̱n, jamí niꞌthúu̱n: «Ga̱mi̱dia̱ꞌlaꞌ, a̱ga̱ꞌne mbaꞌáa̱nꞌlaꞌ jamí a̱go̱ne̱ matíí-mi̱jna̱laꞌ ná inuu ju̱ba̱ꞌ. 2 Mbá xúgíin xu̱kú tsí júwa̱ꞌ ná inuu ju̱ba̱ꞌ ma̱mi̱ꞌñúú jamí mbuya-makualaꞌ: xúgíin ño̱ꞌo̱n, xúgíin tsí na̱ba̱ñi̱i̱ꞌ inuu ju̱ba̱ꞌ, jamí i̱gi̱ꞌ ná iya a̱pha̱. Mbá xúgíin tsúꞌkhue̱n na̱xna̱xíi̱nꞌlo̱ꞌ ná ñawánlaꞌ. 3 Xúgíin xu̱kú tsí nduya na̱ba̱ñi̱i̱ꞌ, ma̱ꞌne ganitsalaꞌ, xúꞌkhue̱n máꞌ ya̱ꞌo̱ mangaa. Ikhúúnꞌ na̱xna̱ꞌlaꞌ mbá xúgíí rúꞌkhue̱n. 4 I̱ndo̱ó máꞌ rí ma̱xópholaꞌ xuwi rí gíꞌdoo iꞌdiuu, numuu rí ikhaa ne̱ jayá rí ndaꞌya. 5 Gakon ikhúúnꞌ ma̱nda̱ꞌa̱a̱lo̱ꞌ nguátha̱ rí neꞌne mbámbáa xa̱bo̱ jamí mbámbáa xu̱kú, ga̱jma̱á numuu iꞌdiuu mbiꞌyalaꞌ. Mbámbáa xa̱bo̱ ma̱nda̱ꞌa̱a̱lo̱ꞌ ga̱jma̱á numuu mbiꞌyuu dxájuu.

6 »Xí mbáa maxíya̱a̱ xa̱bo̱,

ma̱ja̱ñúu̱ mangaa̱ gáꞌne i̱mba̱a̱ xa̱bo̱,

numuu rí Ana̱ꞌlóꞌ niꞌnii xa̱bo̱

xómáꞌ jaꞌnii̱ ikhaa̱.

7 »Xómáꞌ ikháa̱nꞌlaꞌ, ga̱mi̱dia̱ꞌlaꞌ, a̱ga̱ꞌne mbaꞌáa̱nꞌlaꞌ. Ga̱mi̱dia̱ꞌlaꞌ jamí a̱go̱ne̱ matíí-mi̱jna̱laꞌ ná inuu numbaa».

8 Xóó niꞌthán Ana̱ꞌlóꞌ, niꞌthúun Noé gajmíí i̱ji̱i̱n: 9 «Ikhúúnꞌ na̱ꞌgí mbá awan ga̱jma̱á nindxa̱ꞌlaꞌ xúꞌkhue̱n máꞌ ga̱jma̱á nindxu̱ún xa̱bia̱ꞌlaꞌ tsí ma̱ju̱wá nda̱wa̱á, 10 xúꞌkhue̱n máꞌ ga̱jma̱á nindxu̱ún mbá xúgíin tsí nduya júwa̱ꞌ ga̱jma̱á nindxa̱ꞌlaꞌ: ño̱ꞌo̱n, xu̱kú-xáná jamí xu̱kú kiraꞌdiin, mbá xúgíin tsí nigájna̱á ná awúun rguwa asndo xúgíin xu̱kú tsí júwa̱ꞌ ná ju̱ba̱ꞌ. 11 Awan ríge̱ꞌ nagúꞌdo̱ꞌ ga̱jma̱á nindxa̱ꞌlaꞌ: ni̱mi̱ꞌtsu̱n ná-ma̱xáne̱ gámbi̱i̱n xa̱bo̱ ga̱jma̱á ruꞌwa a̱pha̱, ni̱mi̱ꞌtsu̱n ná-ma̱xáꞌne ruꞌwa a̱pha̱ rí ma̱ꞌne gámba̱a̱ ju̱ba̱ꞌ».

12 A̱ꞌkhue̱n niꞌthán Ana̱ꞌlóꞌ: «Ríge̱ꞌ ñajuun tsinuu awan rí na̱gúꞌdo̱ꞌlo̱ꞌ jámuu mbiꞌi ikhúúnꞌ jamí ikháa̱nꞌlaꞌ, jamí mbá xúgíin tsí nduya júwa̱ꞌ ga̱jma̱á nindxa̱ꞌlaꞌ. 13 Ni̱tsijii to̱ka̱ye̱ꞌ ná du̱u̱n, rí ma̱ꞌne tsinuu awan rí na̱gúꞌdo̱ꞌlo̱ꞌ ga̱jma̱á numbaa. 14 Jamí ído̱ gáne̱ ma̱ꞌkha̱a̱ du̱u̱n ná inuu ju̱ba̱ꞌ, a̱ꞌkhue̱n rí ma̱kujmaa to̱ka̱ya̱ꞌ drígo̱ꞌ ná awúun du̱u̱n. 15 A̱ꞌkhue̱n rí ma̱rmáꞌáa̱n a̱kui̱nꞌ awan rí ni̱gúꞌdo̱lo̱ꞌ ikhúúnꞌ ga̱jma̱á nindxa̱ꞌlaꞌ, jamí ga̱jma̱á máꞌ mbá xúgíin tsí nduya, xa̱bo̱ jamí xu̱kú. Ni̱mi̱ꞌtsu̱n ná-ma̱xáꞌne ruꞌwa a̱pha̱ rí ma̱ꞌne gámbi̱i̱n xa̱bo̱ jamí xu̱kú. 16 Ído̱ gákujmaa to̱ka̱ya̱ꞌ ná du̱u̱n, ma̱ya̱xu̱u̱lo̱ꞌ jamí ma̱rmáꞌáa̱n a̱kui̱nꞌ awan rí gúꞌdo̱ꞌ jámuu mbiꞌi gajmíꞌ mbá xúgíin tsí nduya, xúgíin xa̱bo̱ jamí xu̱kú tsí júwa̱ꞌ ná inuu numbaa». 17 Xkuaꞌnii jaꞌnii niꞌthán Ana̱ꞌlóꞌ, niꞌthúun Noé: «Ríge̱ꞌ ñajuun awan rí ni̱ꞌgílo̱ꞌ ikhúúnꞌ gajmíꞌ xúgíin xa̱bo̱ jamí xu̱kú tsí júwa̱ꞌ ná inuu numbaa».

18 I̱ji̱i̱n Noé tsí nigájna̱á ná awúun rguwa ñajúún Sém, Kám jamí Jafét, jamí Kám ñajuun anu̱u̱ Kanaán. 19 Mbá atsúun tsíge̱ꞌ ñajúún i̱ji̱i̱n Noé, jamí ikhii̱n ñajúu̱n tsí nene̱ matíí-mi̱jnaa̱ mbá xúgíí inuu numbaa.

20 A̱ꞌkhue̱n rí Noé nigíꞌdu̱u̱ niñajun ná inuu ju̱ba̱ꞌ, jamí niꞌdii̱ mbá xaxtuu xndú úba̱. 21 Ído̱ niꞌña̱a̱ iyoo xndú rí ni̱ga̱yu̱u̱ꞌ, a̱ꞌkhue̱n nijnga̱a̱ jamí kri̱ga̱a̱ tsaꞌtsaa̱ ná awúun guꞌwá xtíin rí xtáa̱. 22 A̱ꞌkhue̱n ndiꞌyoo Kám, anu̱u̱ mbo̱ Kanaán, rí tsaꞌtsaa tátée̱, jamí ni̱ka̱ gáꞌthúu̱n ná-a̱jmi̱i̱ dxíyo̱o̱ tsí gatiin rixa̱á. 23 A̱ꞌkhue̱n rí Sém ga̱jma̱á Jafét ndiye̱e̱ mbá xtíin, ni̱xpa̱tra̱me̱e̱ꞌ ná xpaphúu̱n, jamí niguwée̱ꞌ skidi rí ni̱mbra̱ma̱a̱ la ne̱ anúu̱. Numuu rí mbóó ná wéje̱ inúu̱ nu̱ya̱xi̱i̱, mbá xkuaꞌnii túyáa̱ rí tsaꞌtsaa anúu̱.

24 Ído̱ niꞌni̱i̱ a̱kui̱i̱n Noé rí nijnga̱a̱, a̱ꞌkhue̱n nidxawuu̱n rí ni̱gu̱máa̱ neꞌne a̱dée̱ tsí lájuíin. 25 A̱ꞌkhue̱n niꞌthée̱n:

«Kixná-maꞌáan tsí Kanaán.

Yumbáá tsí mingínáa i̱ndo̱ó máꞌ nayumbáá gánindxu̱u̱ inúú dxíyo̱o̱».

26 A̱ꞌkhue̱n niꞌthée̱n xóó:

«Anu̱ꞌ Mikhuíí gáꞌne tsakun-rámaa Sém.

Ikhaa Kanaán gáꞌne yumbée̱.

27 Ana̱ꞌlóꞌ gáꞌne rí ma̱gi̱ꞌdoo numuu Jafét,

ga̱xtáa̱ ná goꞌóo Sém,

jamí Kanaán gáꞌne yumbée̱».

28 Ído̱ rí ninújngoo máꞌ ruꞌwa a̱pha̱, Noé xóó nixtáa i̱mba̱á atsú siénto̱ i̱jma̱ skíñú gu̱wa̱ꞌ (350) tsigu. 29 Mbá xúgíí mbiꞌi rí nixtáa Noé neꞌne mbá mijnagu̱wa̱ꞌ siénto̱ i̱jma̱ skíñú gu̱wa̱ꞌ (950) tsigu, a̱ꞌkhue̱n rí nijáñuu̱.