Tsuuhili a Yisu
1 Hu mbisa ilumbu hya saba, mu limiingu tsumba a ngwali, Mariya musi Mangadala na Mariya makima, baayidi hu uyatala ngila. 2 Masulubete, toto yanyingimi mu mifudi. Pofi a Pfumu akulimini umata hu yulu, ayabungamasa manya na atsahili ŋa yulu a lo. 3 Ifwafwani hya nde hyaba we muvedi-a-vedi, na bikutu bya nde byaba byasinzafuuka. 4 Bakeedi baatsuli likamba mu boomo. Bo baabeedi baaka we bamvumbi. 5 Ka pofi atoyi na aleeli huli bakaasu: «A liba na boomo ve. Me nzaabi ti benu Yisu wu baakomini ŋa kuruwa lili mu usaha. 6 Nde a hali ŋaniiŋa ve, nde miisuuha mu babaakwa we bu nde haaleeli. Yaani, yamonwaani mbuha yi baasuusi nde. 7 Na yenaani mawasa yaleelaani bayihi ba nde ti: "Nde miisuuha mu babaakwa na miitswamina benu hu Ngalili. Ni huuna benu luumono nde." Maana ni ma me miindeele benu.» 8 Bo baatahuhi mawasa na ngila na boomo bu bulahi, ka bo baaba na kinya yindahi, mu ubita musamu huli bayihi ba Yisu.