Jesu Utuma Bali Makkumi Alimusanu Abili Ababili
1 Nikwakayinda eezyo, Mwami wakasala baambi basikwiiya balimakumi alimusanu abili ababili, mpawo wabatuma kuti bayiinke nembo lyakwe kabali babilibabili mumasena asiyene, ooko Mwami nkwakalikuyanda kuuya. 2 Mpawo wakabaambila wati, "Butebuzi mbuyiingi, pesi basikutebula mbache; kamukomba kuti Mwami wabutebuzi, atume babeleki mumuunda. 3 Kamuya! Amulange, ndamutuma mbuli tubelele akati kabawumpe. 4 Mutanyampuli nikuba kakwama, nikuba chikwama nikuba insangu; alimwi mutakajuzyi kufumbwa ngumutakuswaniye munzila. 5 Kufumbwa ŋanda njimuya kunjila, lutaanzi mukakwaambe kuti, ‘Luumuno lube muŋanda eeyo!’ 6 Alimwi kuti muna aŋanda wabilana andinywe muluumuno, luumuno lwanu luyokkala alinguwe; pesi kuti kwataba boobo, luyobweeda kulindinywe. 7 Alimwi mukakkale muŋanda njiyeeyo, mukaakulye akunywa ezyo nzibayoomupa, nkaambo simulimu ulaachelelo kumpindu zyakwe; mutakayinki kuŋanda aŋanda. 8 Kufumbwa muunzi ngumuyonjila alimwi baakumutambula ngamukalye eezyo nzibatakayengezye. 9 Mukaponiye bachiswa bali nkukoko, alimwi mukabaambile, ‘Bwami bwaLeza bwaba afwiifwi andinywe.’ 10 Pesi mwaakunjila mumuunzi mpawo teebamutambula, kamuya mutuzila, mpawo mwaambe, 11 ‘Nikuba lusuko lwagunzi lyanu luli kumawulu eesu, tulamukunkumwida; nikuba boobo amuzizibe ezi, kuti bwami bwaLeza bwaba afwiifwi andinywe.’ 12 Ndamwaambila, kuyooba chisubulo chipati mubuzuba byaSodomu kwiinda elyo guunzi."
Chisi Chitazumini
(Mateyu 11:20-24)
13 "Maawe kulindinywe, baKkorazini! Maawe kulindinwe, Bbetisayida! Nkaambo nikuunga milimu mipati yakachitwa kulinduwe yakali yachitilwa kuTaya aku Sidoni, bakali kunosanduka chiindi chakale, balakkala muzisamo zyamasaka amudyota! 14 Pesi chiyooba chuuba kapati kuTaya aSidoni mubuzuba bwalubeta kwiinda ndinywe. 15 10:15. Ay 14:13-15.Alimwi anduwe, Kkapenawumi, iwe tukwe kuyoosumpulwa pe kujulu? Pesi uyoowalilwa muchikkalilo chabafu."
16 "Ooyo umvwa ndinywe umvwa ndime, alimwi ooyo umutama utama ndime, alimwi ooyo utama ndime unoli utama ooyo wakandituma."
Kuboola Kwabali Kkumi Alimusanu Abili Ababili
17 Balimakumi alimusanu abili ababili bakaboola mulukondo, kabati, "Mwami, nibaba basikazwa bakazwa muzina lyako!"
18 Mpawo wakabaambila wati, "Ndabona Satani kali kuwa mbuli kalabi kuzwa kujulu. 19 Amulange, ndamupa nguzu zyakulyata atala abazoka atubanze, alimwi atala anguzu zyoonse zyasinkondoma; alimwi takukwe kumuchisa pe. 20 Nikuba oobo mutabotelwi muli zeezi, kuti mwatanda myuuya mibi; pesi amubotelwe kuti mazina aanu alembwa kujulu."
Jesu Ulakondwa
(Mateyu 11:25-27; 13:16,17)