Kuzyalwa KwaJesu Kkirisitu
1 Mumazuba aayo Silutwe mupati wanyika yabaRoma, utegwa Agasitasi Siza wakapa malayilile, kuti kube kulembwa kwabantu boonse, munyika yoonse yabaRoma. 2 Ooku kwakali kulembwa kutaanzi kwakachitika. Aawo Kwiniriyasi naakali mweendelezi waSiriya. 3 Alimwi boonse bakayinka umwi awumwi kukulembwa, kugunzi lyakwe.
4 Lino Jozefu wakeenda alubo kuzwa muGalili, muchisi chaNazareti, wakaya kuJudiya, kuchisi chaDevidi, chitegwa Bbetelehemu, nkaambo wakali waŋanda yamukowa waDevidi, 5 kuchitila kuti bakaakulembwe amwanakazi wakwe Meri, ngwakali watangila, mpawo wakali waamba kutumbuka. 6 Mpawo nibakachili nkukooko, chiindi chakazulila chakuti mwana atumbukwe. 7 Wakatumbuka mwana mutaanzi mulombe, wamuputila amudabba, wamulazika muchilyido chaŋombe nkaambo tekwakali busena muŋanda yabanakweenda.
Beembeli Abaangelo
8 Alimwi mugundu eelyo kwakali beembeli bakali mumyuunda, kabalokulanga butanga bwabo mansiku. 9 Alimwi mungelo waMwami wakaliboniya kulimbabo abulemu kwaMwami bwakabamwinikila; eelyo bakazula kuyoowa. 10 Alimwi mungelo wakati kulimbaabo, "Mutabi akuyoowa! Amulange, ndamweetela makani mabotu alukondo lupati, atakabe kubantu boonse; 11 nkaambo mubuzuba obuno mwazyalilwa muchisi chaDevidi Mufutuli, nguKkirisitu utegwa Mwami! 12 Alimwi eechi chiyooba chitondezyo kulindinywe; muyojana mwana kaputidwe, amudabba, kalede muchilyido chaŋombe."
13 Mpawawo kwakali inkamu yabaangelo bakujulu yakaliboniya kiili aamwi amungelo mutaanzi kabatembawula Leza, kabati,
14 "Ngapegwe bulemu Leza simajulu,
alimwi luumuno lube akati kabantu munyika akuli baabo mbabotelwa!"
15 Eelyo baangelo nibakabweeda kujulu, beembeli bakaambilana bati "Katuya kuBbetelehemu tukaakubone chintu eechi chachitika, azeezi Mwami nzyatuyubunwida."
16 Mpawo bakeenda chakufwambaana, alimwi bakajana Meri aJozefu, amwana kalede muchilyido chaŋombe. 17 Alimwi beembeli nibakabona bakalungununa kapati eezyo zyakaambulwa atala ayooyu mwana; 18 alimwi boonse bakamvwa bakagamba kuli zyakaambwa abeembeli. 19 Pesi Meri wakabamba aaya majwi woonse, kalokuzilikila mumoyo wakwe. 20 Mpawo beembeli bakabweeda, kabalokulumbayizya akutembawula Leza atala azyoonse zintu nzibakamvwa akubona, mbuli mbubakaambilwa.