Lukku 2

Jesu Upedekezegwa Muŋanda yaLeza

22 Mpawo nikwakasika chiindi chakusalazigwa kwabo mbuli kumulawu waMozesi, bakamweeta kuJerusalemu kuzomupeda kuMwami 23 ✝2:23. Kul 13:2,12.(mbuli mbukulembedwe mumulawu waMwami, "Woonse mwana mulombe mutaanzi ujula izyalilo uyootegwa ulasalala kuMwami") 24 akupa chipo chachipayizyo mbuli mbuwaamba mulawu waMozesi, "inziba zibili naakuti itwana twankwilimba tubili."

Businsimi bwaSimiyoni

25 Lino kwakali mwaalumi muJerusalemu, zina lwakwe wakali kutegwa Simiyoni, alimwi mwaalumi ooyu wakali musalali mpawo wakali lipedelede, inguzu zyaMuuya Usalala zyakali alinguwe, akuumbulizigwa kwaIzirayeli. 26 Alimwi chakayubununwa kulinguwe aMuuya Usalala kuti takoyoofwa pe katana kubona Mwami Mesiya ooyo wakasyomezegwa. 27 Alimwi Simiyoni kazwide aMuuya Usalala wakanjila mulubuwa lwaŋanda yaLeza; alimwi aawo bazyaali nibakamweeta mwana Jesu, kuti bamuchite mbuli chiyanza chamulawu, 28 Mpawo Simiyoni wakatumbatila mwana mumaboko mpawo wakalongezya Leza mpawo wati,

29 "Mwami, lino leka mulanda wako kuti

ayinde muluumuno, mukwiinda mujwi lyako;

30 nkaambo meso angu abona lufutuko lwako

31 oolo ndwakabamba kunembo lyabantu boonse,

32 mumuni wachiyubunuzyo kuli bantu batali baJuda pe,

alimwi abulemu kubantu bako baIzirayeli."

33 Mpawo wisi abanyina bakagamba azyakaambwa anguwe; amakani aSimiyoni ngakaamba atala amwana. 34 Mpawo Simiyoni wakabalongezya mpawo wati kuli Meri banyina amwana,

"Laanga, ooyu mwana ulachoolwe akubambililwa kuwa akubuka kwabayingi muIzirayeli.

Alimwi uyooba chitondezyo chiliikwambuulwa atala anguwe.

35 (Alimwi kuusa kupati kuyooyasa muuya wako),

kuti mizeezo yamyoyo myiingi ikayubununwe."

Businsimi bwaAna

36 Alimwi kwakali mwanakazi musinsimi, zina lyakwe wakali kutegwa Ana, mwana waFanuweli, wamukowa waAsa; wakali wachembala kapati, kaliwapona amulumi wakwe kwaminyaka ilimusanu ayibili kuzwa kubunakalindu bwakwe, 37 mpawo kali mukamufu kwaminyaka ilimakumi alimusanu aatatu alaminyaka iine. Taakwe naakazwa pe mulubuwa lwaŋanda yaLeza, wakatembawula kalyiimya akukomba mansinku asikati. 38 Mpawo wakasika achiindi nchinchecho wapakulumba kuli Leza, mpawo waambuula atala anguwe kuli boonse bakalaabulangilizi bwakunununwa kwaJerusalemu.