Ilubuka lya Yesʉ
1 Mo yenga mo mambya abakatsɨ abo mobaya kw’ɨsɨnda nibahekire amafʉtha wo bengaga. 2 Babere bahika okw’ɨsɨnda, mobeya eribwe lyo lyabyaga ko lukyo nilyamalire ɨkʉmbagalɨtsɨbwa emʉsɨke. 3 Mobɨngɨra omw’ɨsɨnda, hewethuwe mobatheyamo ekinda kya Nyinya-kowethʉ Yesʉ. 4 Ebɨnwa ebyo mobyaleka nɨbathabagana. Mw’ɨthabagana eryo, aho n’aho emʉsɨke kʉbo moyafʉmba bandʉ babɨrɨ bambithe ngɨmba singengire kʉtsɨbʉ. 5 Aho bʉshana n’obʉba, abakatsɨ abo mobahuma amesho w’ahishi. He abandʉ abo mobabwɨrabo bathɨ: «Bʉshana na ki omʉshondetsya oyo ʉlɨho mo baholi? 6 Athakɨrɨ hano, alubukire! Mwɨbʉke ekyo ababwɨraga abere akɨnalɨ iNgalilaya. 7 Ndɨ mwababwɨra athɨ: "Ingye Mʉgala w’oMʉndʉ lɨtholere ninyahirwa mo minwe y’abakoli b’ebɨtsɨbʉ. Bandanyɨbamba kʉ mʉsalaba, he mo kɨro kya kashathʉ enyuma y’erɨfwa lyaye nyandalubuka."»
8 Aho abakatsɨ abo mobɨbʉka ebɨnwa byo Yesʉ anegenaga. 9 Mobathoka kw’ɨsɨnda, mobayafʉlɨra ebyoshi ebyo byo abathʉmwa ikumi n’omʉgʉma n’abandɨ bɨga boshi. 10 Bano bo bakatsɨ bayaga fʉlɨra abathʉmwa b’omwatsɨ: Marɨa w’ɨMangandala, na Yane na Marɨa nyinya wa Yakobo, n’abandɨ bakatsɨ bo babyaga nabo. 11 Hewethuwe abathʉmwa mobashʉnga ebɨnwa by’abakatsɨ abo nga nɨ bya bʉsha-bʉsha, mobathɨkɨrɨtsyabyo.
12 He Petero ɨye mwabathʉka n’ihuthukira tsʉba eyɨrɨ erɨsɨnda. Abere ahikayo mwunama, mwashʉnga ko mɨpapara mɨsha. Honyuma kw’aho, mwashʉba ewe nɨashwekera byo bɨthatsʉka.