Lucas 24

Yesʉ ahʉlʉkɨra abɨga babɨrɨ mo nzɨra y’iEmau

13 Hene ko mona kɨro ky’eyenga ekyo, babɨrɨ mo bɨga ba Yesʉ bagenda abaya mʉ mʉrongo mʉgʉma w’agenda ahʉlwamo Emau. Omʉrongo oyo abyaga kʉ lʉgendo lwa hofɨ bilometere ikumi na kɨgʉma n’omuyi w’ɨYerʉsalemʉ. 14 Bagenda abagenda nɨabaganʉlɨra ko byoshi ebyo bɨthatsʉka. 15 Babere banemʉsɨmola n’ikubisania, Yesʉ yowene-wene mwayɨfʉnda hofɨ nabo n’igendania nabo. 16 Mobamʉshʉnga he kɨndʉ kɨrebe mokyaleka nɨbathamʉmɨnya.

17 Yesʉ mwabʉtsyabo athɨ: «Nɨ myatsɨ ehɨ y’omukubisaniako mʉlɨ omʉgenda?»

Abɨga babɨrɨ abo mobimana nibathashagalukire. 18 Mʉgʉma wa kʉbo nɨ yo Kiliopa, mwamʉshʉbɨtsya athɨ: «Abahimbani boshi b’ɨYerʉsalemʉ betsi emyatsɨ yo yɨtsʉkamo ko bɨro bɨno! Wowene wo uthanetsi emyatsɨ eyo?» 19 Yesʉ mwabʉtsyabo athɨ: «Bɨhɨ ebyo?»

Mobamʉshʉbɨtsya bathɨ: «Emyatsɨ yo yahikiraga Yesʉ w’iNasareti. Abyaga mʉmɨnyeretsɨ wa maka, mw’ɨnegena na mw’ɨkola embere sa Gongo n’embere s’abandʉ boshi.

20 «Abakʉlʉ b’abaheri bethʉ n’abakʉlʉ bethʉ mobamuhanire asoherwe lʉholo. Na honyuma kw’aho mobamubambire ko mʉsalaba. 21 Ithwe thwabyaga nithuhirire yo maha ko n’ɨye yo wandashabʉla aBaisiraeli. Hewethuwe munobwire nɨ kɨro kya kashathʉ ɨthoka ebɨnwa ebyo bikolekire. 22 Na kandɨ bakatsɨ bagʉma b’omo kɨkembe kyethʉ mobathʉshwekya. Mobatsɨndʉka kw’ɨsɨnda, 23 hewethuwe mobathalɨ abeyayo ekinda kɨwe. Mobashʉbʉla n’ɨthʉfʉlɨra omwatsɨ ko abamalaɨka mobahʉlʉkɨrabo n’ɨbwɨrabo ko alɨho. 24 Honyuma kw’aho bagʉma ba kw’ithwe nabo mobaya kw’ɨsɨnda, mobeya ebyoshi ng’oko abakatsɨ bathanegena. Nabo kuthyo mobathalɨ abashʉnga ko kinda kɨwe.»

25 Aho Yesʉ mwabwɨrabo athɨ: «Imwe thʉhʉmo! N’emɨthɨma enyu ɨthalɨ eyɨnɨkɨrɨtsya tsʉba emyatsɨ yoshi yo abamɨnyeretsɨ banegenaga! 26 Bithabyaga bɨtholere Kirisito athange ɨagalwa athyo embere ɨngɨre mo lʉkengerwa lʉwe?» 27 Honyuma kw’aho Yesʉ mwakumbulirabo ebɨnwa byoshi bishakirwe kw’ɨye mo Mashako Abuyirire woshi. Mwathangɨra ko bɨtabo bya Mʉsa n’ebɨtabo byoshi by’abamɨnyeretsɨ.

28 Babere bahika hofɨ n’omʉrongo wo bagenda abayako, Yesʉ mwashʉngɨka nga mʉndʉ ashondya ɨlotsya ebʉshondotsɨ. 29 Hewethuwe abɨga mobamʉshaba kʉtsɨbʉ bathɨ: «Bya hagʉma nethwe, kʉshangwa bwahera igolo n’obuthuku bo bʉno bwamakʉra.»

Aho mwɨngɨra mo nyʉmba bʉshana abye hagʉma nabo. 30 Mwikala alye kalyo hagʉma nabo, mwatsɨmba omukati, n’ɨsɨma Gongo, honyuma kw’aho mwatsawo, n’ɨhawobo. 31 Aho amesho wabo mwakɨngʉkala mobamʉmɨnya. He Yesʉ mwaliribana embere sabo. 32 Aho mobabwɨrana bathɨ: «Athabere alɨ anegena nethwe mo nzɨra n’ithukumbulira aMashako Abuyirire, emɨthɨma ethʉ mo yɨthalɨ eyotsulamo lʉmogo?»

33 Kona kathambi ako mobabathʉka n’ɨshʉba ɨYerʉsalemʉ. Mobeyayo abathʉmwa ikumi n’omʉgʉma ba Yesʉ nɨbalɨ mʉ muhindo hagʉma n’abo mo kɨkembe kyabo. 34 Abo babyaga mo muhindano mobabwɨra abɨga babɨrɨ abo bathɨ: «Kundu kundu Nyinya-kowethʉ alubukire! Mwahʉlʉkɨra Simoni!»

35 Abɨga babɨrɨ abo mobaganʉlɨra balikyabo byo bɨthatsʉka mo nzɨra, na ko bathamɨnya Yesʉ athabere atsa omukati.