1 Kundanda ko, Akunnungu ŵagumbile kwinani ni chilambo. 2 Chilambo chaliji changali ukotopasyo, ni chaliji changali chindu. Chipi chauniche mwakusokosya mose mwamuli pa chilambo ni Mbumu jwa Akunnungu ŵautamile pa meesi pose. 3 Akunnungu ŵatite, "Lupagwe lulanga," ni lulanga lwakopochele. 4 Akunnungu ŵaluweni lulanga kuti luli lwambone. Nipele Akunnungu ŵaŵisile pakwe pakwe lulanga ni chipi. 5 Lulanga ŵaluŵilasile, "Muusi," ni chipi ŵachiŵilasile, "Chilo." Ligulo lyapite ni kwaiche kundaŵi, lyelelyo lyaliji lyuŵa lyaandanda.

6 Nipele Akunnungu ŵatite, "Lipesa lipagwe lilekanganye, meesi ga mwinani ni meesi ga paasi." 7 Nipele Akunnungu ŵapangenye lipesa, ŵalekangenye meesi, gane gaŵe mwinani ni gane gaŵe paasi. Yaliji yeleyo. 8 Akunnungu ŵaliŵilasile lipesa lyo "Mwinani." Ligulo lyapite ni kwaiche kundaŵi, lyelelyo lyaliji lyuŵa lyaaŵili.

9 Nipele Akunnungu ŵatite, "Meesi ga pachilambo gasongangane pamo, kuti papajumu paoneche." Yaliji yeleyo. 10 Akunnungu ŵapaŵilasile papajumu, "Lisi" ni meesi gagasongangene pamo ŵagaŵilasile "Bahali." Nipele Akunnungu ŵaiweni kuti ili yambone. 11 Nipele Akunnungu ŵatite, "Lisi limele mimela, mimela jijikusogola mbeju ni itela yaikusogola isogosi yaili ni mbeju." Yaliji yeleyo. 12 Nipele lisi lyamesisye mimela jajikusogola mbeju sya uwele wakwe ni itela yaikusogola isogosi ya mbeju sya uwele wakwe. Akunnungu ŵaiweni kuti ili yambone. 13 Ligulo lyapite, ni kwaiche kundaŵi, lyelelyo lyaliji lyuŵa lyaatatu.

14 Nipele Akunnungu ŵatite, "Lulanga luŵili lupagwe mwinani, ilekanganye muusi ni chilo, ilosye katema ni ndaŵi ni lyuŵa ni yaka, 15 imuliche mwinani ni kulanguchisya chilambo." Yaliji yeleyo. 16 Nipele Akunnungu ŵapanganyisye lulanga luŵili, lulanga lwekulungwa, yaani lyuŵa litawale muusi ni lulanga lwenandi, yaani lwesi lutawale chilo; iyoyo ŵapangenye ni ndondwa. 17 Akunnungu ŵasiŵisile lulanga syo mwinani kuti ilanguchisye chilambo, 18 ikombole kutawala muusi ni chilo ni kulekanganya lulanga ni chipi. Akunnungu ŵaiweni kuti ili yambone. 19 Ligulo lyapite, ni kwaiche kundaŵi, lyelelyo lyaliji lyuŵa lya ncheche.

20 Akunnungu ŵatite, "Yepanganyikwe yejinji yaili ni umi igumbale mmeesi ni ijuni nombeyo iguluche mwinani." 21 Kwayele, Akunnungu ŵaipangenye yepanganyikwe yekulungwa ya mu bahali ni yepanganyikwe yaikutama mmesi kwa uwele wakwe, ni ijuni yose kwa uwele wakwe. Akunnungu ŵaiweni kuti ili yambone. 22 Akunnungu ŵaipele upile yepanganyikwe yo ni ŵaisalile, "Mmelekane, nkachuluche, nkagumbale mmesi ga mubahali ni ijuni ijonjechekwe mu chilambo." 23 Ligulo lyapite, ni kwaiche kundaŵi, lyelelyo lyaliji lyuŵa lya nsano.

24 Nipele Akunnungu ŵatite, "Chilambo chityosye yepanganyikwe yejumi kwa uŵele wakwe: Inyama yakulangwa ni inyama yammatinji kwa uwele wakwe, ni yepanganyikwe yaikukwaŵa kwa uwele wakwe. Yaliji yeleyo." 25 Akunnungu ŵapangenye inyama ya mmatinji kwa uwele wakwe ni inyama yakulangwa kwa uwele wakwe ni yepanganyikwe yaikukwaŵa kwa uwele wakwe. Akunnungu ŵaiweni kuti ili yambone.

26 Nipele Akunnungu ŵatite, "Twagumbe ŵandu alandane ni uwe, ni aŵeje mpela uwe. Chatawale somba sya mu bahali ni ijuni ya mwinani ni inyama yose ni chilambo chose ni yepanganyikwe yose yaikukwaŵa." 27 Kwayele Akunnungu ŵaagumbile ŵandu chisau nsyene, elo chisau nsyene ŵaagumbile. Ŵaagumbile jwannume ni jwankongwe. 28 Akunnungu ŵapele upile ni kwasalila, "Mmelekane nkachuluche, nkachigumbasye chilambo ni kuchitenda chiŵe chenu. Nkasitawale somba sya mu bahali ni ijuni ya mwinani ni yepanganyikwe yose yaikukwaŵa pa chilambo." 29 Nipele Akunnungu ŵatite, "Mpilikanile, ngumpanga kila mmela pachilambo wauli ni mbeju ni kila chitela chachili ni isogosi yaili ni mbeju, yeleyo ni ichiiŵe yakulya yenu. 30 Ni inyama yose ya pachilambo ni ijuni yose ya mwinani ni yepanganyikwe yose yaikukwaŵa pa chilambo, yaani yepanganyikwe yejumi yose, chakulya chao chichiŵe masamba gose ga mimela." Yaliji yeleyo. 31 Akunnungu ŵaiweni kuti kila chindu chaagumbile chaliji chambone nnope. Ligulo lyapite, ni kwaiche kundaŵi, lyelelyo lyaliji lyuŵa lya sita.