1 Lyuŵa limo che Dina mwali ju che Yakubu juŵaŵeleche ni che Lea, ŵapite kukwajimajimila achakongwe ŵampepe ŵa chilambo chila. 2 Nipele che Shekemu mwanache ju che Hamoli jwa lukosyo lwa Ŵahifi, mwenye jwa chilambo chila paŵamweni che Dina ŵankamwile ni kwakamulila. 3 Che Shekemu ŵanonyelwe nnope ni mwali jo, ŵannonyele nipele ŵatandite kwapembeka. 4 Che Shekemu ŵapite kukwasalila che Hamoli atatigwe kuti, "Choonde atati mundomelele mwali ju kuti aŵe ŵankwangu."

5 Ndaŵi jijojo che Yakubu ŵapikene kuti mwali jwawo che Dina akamulilwe ni che Shekemu. Nambo pakuŵa achachanda ŵakwe ŵaliji kukuchinga, ŵamyalele mpaka paŵausile. 6 Nipele che Hamoli atatigwe che Shekemu ŵajawile ku che Yakubu kuti akunguluche nawo, 7 ni katema kakoko achachanda ŵa che Yakubu ŵaliji aninkuuja kutyochela kukuchinga. Paŵapikene ngani jo achachanda wo ŵasongoneche kwannope ni kuchimwa, pakuŵa che Shekemu ŵatendele chindu changalumbana ŵandu ŵa Isilaeli pakunkamulila mwali ju che Yakubu pakuŵa chindu cho chaliji kuŵagula.

8 Nambo che Hamoli ŵaasalile, "Mwanangu che Shekemu akunnonyela kwannope mwali jwenu. Choonde munkunde kuti anlombe. 9 Tujilane kuti ŵandu ŵetu alombele kukwenu ni ŵandu ŵa kukwenu alombele kukwetu. 10 Kwayele chintame pamo noweji mu chilambo chetu. Tinkombole kutama palipose mu chilambo muno ni kusumisya malonda genu ni kukola ipanje." 11 Iyoyopeyo, che Shekemu ŵasalile atatigwe che Dina ni achapwakwe, "Choonde muungunde noneji chinjimpa chilichose chachinsale. 12 Muusalile malipilo ga ulombela ni ntulilo, iiche nawo, namose chiŵe chekulungwa chinampe, kuti nombele mwali ju."

13 Nipele, pakuŵa che Dina alumbu jwawo ŵaliji akamulilwe, achachanda ŵa che Yakubu ŵala ŵajanjile kwa kwalambusya che Shekemu pamo ni che Hamoli atatigwe. 14 Ŵaasalile, "Ngatukukombola kunlombekasya alumbu ŵetu kwa mundu jwangaumbala. Kutenda yeleyo chiiŵe soni kukwetu. 15 Chitukunde iŵaga chinkunde kwaumbasya achalume ŵenu wose mpela itukuti uwe. 16 Pelepo ni pachitukunde kuti achiŵali ŵetu alombekwe ni ŵanyamwe ni achiŵali ŵenu alombekwe ni uwe, chitutame pamo ni ŵanyamwe ni kutaŵa ulongo. 17 Nambo naga ngankukunda kuumbala, chitunjigale mwali jwetu ni kwaula nawo."

18 Yeleyo yaanonyele che Hamoli ni nchanda jwao che Shekemu. 19 Jwanchanda jula jwaliji jwakuchimbichikwa kwapunda ŵandu wose ŵapannango pala, ni nganakaŵa kuchitenda chiŵasalilwe chila, pakuŵa ŵannonyele mwali ju che Yakobo.

20 Nipele che Hamoli ni che Shekemu mwanagwe, ŵapite kwauli nnango wa musi papakutendekwa nkungulu kukukunguluka ni achalume ŵa musi ula. 21 Ŵatite, "Ŵandu ŵa ali achambusanga ŵetu twakunde kuti atame pachilambo pa ni kusumisya malonda, pakuŵa tukwete chilambo chekulungwa chakutukwana uweji ni ŵanyawo. Chitulombele kukwao ni ŵanyawo chalombele kukwetu. 22 Nambo ŵele ŵandu tachikunda kutama ni uŵeji ni kuŵa ulongo umo, iŵaga chitummumbasye kila jwannume pasikati jetu nti yakuti pakuumbasya ŵanyawo. 23 Ana ngankuimanyilila kuti ilango yao ni ipanje yakwete chiiŵe yetuwe? Nipele tukunde atame mu chilambo chetu." 24 Achalume achinsyene musi wose ŵaŵasongangene pa nnango wa musi ula ŵajilene ni che Hamoli ni che Shekemu. Nipele kila jwannume jwa musi ula ŵaumbele.

25 Pagapitile moŵa gatatu pakumala kuumbala ali nkuwuwula kwa kupeteka, ŵanache ŵaŵili ŵa che Yakubu, yaani che Simoni ni che Lawi, achachimwene ŵao che Dina ŵajigele mapanga gao, ni kwaula kukwajimilila chisisimuchile achalume wose ŵa pamusi ula. 26 Ŵauleje ni mapanga che Hamoli ni mwanagwe che Shekemu, ŵanjigele che Dina kutyochela mu nyuumba ji che Shekemu ni kwaula. 27 Ŵanache ŵane ŵa che Yakobo ŵajawile ku musi ni kujigala kila chindu chiŵachisachile ligongo alumbwao ŵaatendele yangalumbana. 28 Ŵajigele ngondolo, mbusi pamo ni ng'ombe, ni mbunda ni yose iyaliji mu musi ula ni ya mmigunda. 29 Ŵajigele ipanje yose ya ŵandu ŵa musi ula pamo ni achakongwe ni ŵanache, ni yose iyaliji mmajumba.

30 Che Yakubu ŵaasalile che Simeoni ni che Lawi, "Ŵanyamwe munyichisye kulaga kwa kundenda njimwe ni ŵandu ŵa chilambo chi cha Ŵakanaani ni Ŵapelisi, ungutama nawo mu chilambo chi. Uŵeji nganitutupa, iŵaga akuŵilangana kuti atupute, chatujonanje." 31 Nambo ŵanyawo ŵajanjile, "Ngatukukombola kwalechelela apanganyichiswe alumbu ŵetu nti jwachigwagwa?"